អង្គភាពប្រឆាំងអំពើពុករលួយ (ACU) អះអាងថា វិញ្ញាសាគណិតវិទ្យាអំឡុងសម័យប្រឡងបាក់ឌុប កាលពីថ្ងៃទី២៩ ខែសីហា ឆ្នាំ២០២៥ មានលទ្ធភាពបែកធ្លាយក្រោយដំណាក់កាលរដ្ឋមន្ត្រីក្រសួងអប់រំ លោក ហង់ជួន ណារ៉ុន បានពិនិត្យរួច ខណៈម្ចាស់គណនី Facebook និង TikTok ចំនួន ៦នាក់ដែលបានបង្ហោះពីការលេចធ្លាយកន្លងមក មិនមែនជាបុគ្គលបំពុលសង្គមនោះឡើយ ប៉ុន្តែជាអ្នកឈានមុខក្នុងការជូនដំណឹងឱ្យមានការស្រាវជ្រាវ បកស្រាយ និងដោះស្រាយ។
យោងតាមសេចក្តីប្រកាសព័ត៌មានពីអង្គភាពប្រឆាំងអំពើពុករលួយ នៅថ្ងៃទី១ ខែកញ្ញា ឆ្នាំ២០២៥ បានអះអាងថា អាចមានលទ្ធភាពបែកធ្លាយវិញ្ញាសាប្រឡងបាក់ឌុបកាលពីថ្ងៃទី២៩ ខែសីហា ឆ្នាំ២០២៥ ពិតមែន ព្រោះតាមលទ្ធផលដំបូងនៃការធ្វើកោសលវិច័យឯកសារដែលគេបង្ហោះក្នុងបណ្ដាញសង្គមហ្វេសប៊ុកក្នុងទម្រង់ផ្សេងៗគ្នា ដូចជារូបភាពព្រាលៗក្តី ឬច្បាស់ៗក្តី ដោយមានទាំងហត្ថលេខាសង្ខេបរបស់រដ្ឋមន្ត្រីក្រសួងអប់រំ លោក ហង់ជួន ណារ៉ុន ឬគ្មានហត្ថលេខាសង្ខេបក្តី ឯកសារទាំងនោះត្រូវបានកំណត់ថាពិតក្នុងកម្រិតពី ៨០ ទៅ ១០០ភាគរយដូចនឹងវិញ្ញាសាដើម។
ACU បានឱ្យដឹងទៀតថា ការបង្ហោះវិញ្ញាសាដែលបែកធ្លាយក្រោយប្រឡងនេះ ACU កំពុងពិចារណាលើចំណុចពីរធំៗ គឺចំណុចទី១ វិញ្ញាសាគណិតវិទ្យា អំឡុងសម័យប្រឡងបាក់ឌុបកាលពីថ្ងៃទី២៩ ខែសីហា ឆ្នាំ២០២៥ មានលទ្ធភាពបែកធ្លាយក្រោយដំណាក់កាលរដ្ឋមន្ត្រីអប់រំ ពិនិត្យ និងសម្រេចជាមួយនឹងហត្ថលេខាសង្ខេប។
ប្រភពដដែលអះអាងថា ចំណុចទី២ ការបញ្ចូលវិញ្ញាសាក្នុងស្រោមសំបុត្រនីមួយៗចំនួន ១០០សន្លឹកសម្រាប់ ៤ថ្នាក់ ការបញ្ចូលវិញ្ញាសា ២០សន្លឹកក្នុងស្រោមសំបុត្រដោយឡែកសម្រាប់បម្រុង ការវេចចូលជាកញ្ចប់ធំៗសម្រាប់មួយមណ្ឌល ឬការដាក់ក្នុងហិបចាក់សោមករក្សាទុកនៅវិទ្យាស្ថានជាតិអប់រំ និងសម្រាប់ថ្នាក់ដែលបេក្ខជនវត្តមានមិនគ្រប់ ២៥នាក់ ក៏អាចមានលទ្ធភាពលួចថតចម្លងវិញ្ញាសាគណិតវិទ្យានោះផងដែរ។
លិខិតពីលោក យ៉ិនទៀង ពុទ្ធិរិទ្ធ អនុប្រធានទី១ ACU បានបញ្ជាក់ពីឆន្ទៈក្នុងការបន្តស្វែងរកយុត្តិធម៌ជូនបេក្ខជនប្រឡងបាក់ឌុប តាមរយៈការសហការផ្តល់ដំណឹងពីមិត្តភក្ដិបណ្ដាញសង្គមមួយចំនួន មានគណនី TikTok រស្មី កែវរដ្ឋា, គណនីហ្វេសប៊ុក ស្រ៊ី ម៉ុងតាល់, ឃុន សុផានិត, គង់ សំណាង, ឡី សំបូរ, អ៊ីង ខេមរៈ និង សាយ សេងហ៊ង។ លោកបានអះអាងថា បុគ្គលទាំង ៦នាក់ជាអ្នកឈានមុខជូនដំណឹងពីការសង្ស័យថាអាចមានការលេចធ្លាយវិញ្ញាសាប្រឡងបាក់ឌុប ហើយសំណូមពរជូនក្រសួងអប់រំ យុវជន និងកីឡា ស្រាវជ្រាវ បកស្រាយ និងដោះស្រាយ ដើម្បីជាយុត្តិធម៌ដល់បេក្ខជនបេក្ខនារី។
ACU បានសិក្សា និងពិចារណាលើចំណុចផ្សេងទៀត ដោយភស្តុតាងកាន់តែបង្ហាញឃើញថា លទ្ធភាពនៃការបែកធ្លាយវិញ្ញាសានេះ អាចកើតឡើងក្រោយដំណាក់កាលរដ្ឋមន្ត្រីពិនិត្យ និងសម្រេចជាមួយនឹងហត្ថលេខាសង្ខេប ពោលគឺអាចមានការលួចថតនៅថ្នាក់ដែលបេក្ខជនអវត្តមានមិនគ្រប់ ២៥នាក់។
ទោះជាយ៉ាងណាក៏ដោយ អង្គភាពប្រឆាំងអំពើពុករលួយ កន្លងមកបានទទួលការរិះគន់ពីមជ្ឈដ្ឋានសាធារណជនខ្មែរ ទាំងក្នុង និងក្រៅប្រទេស ថាបិទភ្នែក បិទត្រចៀក បិទមាត់ចំពោះអំពើពុករលួយក្នុងជួរមេដឹកនាំរដ្ឋាភិបាល និងមន្ត្រីរាជការតាមក្រសួង មន្ទីរ នាយកដ្ឋាន ការិយាល័យ ដែលមានខ្សែ មានបក្ខពួកអ្នកមានអំណាច តាំងពីរឿងឧក្រិដ្ឋកម្មផ្សេងៗ ដល់រឿងវិវាទដីធ្លី។
កាលពីខែឧសភា ឆ្នាំ២០២៥ ទស្សនាវដី្ត PAD Magazine – Property & Development ខាងអចលនទ្រព្យ និងអភិវឌ្ឍន៍ ផ្សាយថា បើយោងតាមការអះអាងពីអ្នកឯកទេសជាច្រើននាក់ លោក ហ៊ុន សែន និងគ្រួសារ មានទ្រព្យសម្បត្តិសរុបជាទឹកប្រាក់ប្រមាណពី ៥០០ ទៅ ៤ពាន់លានដុល្លារ។ ជាការពិបាកនឹងជឿ ដែលថាប្រាក់ខែរបស់លោកប្រចាំខែបានតែ ១១០០ដុល្លារនោះ។ សមាជិកគ្រួសារលោក ជាកូន ក្មួយ គ្រប់គ្រងចាត់ចែងអាជីវកម្មក្នុងស្រុកចំនួន ១១៤ប្រភេទ ដែលគិតជាតម្លៃទឹកប្រាក់ ២០០លានដុល្លារ។ គេឃើញលោក ហ៊ុន សែន ពាក់នាឡិកាដៃមួយម៉ាក Richard Mille RM57-05 Tourbillon Eagle តម្លៃ ១លាន ២សែនដុល្លារ; ម៉ាក Patek Philippe Grandmaster Chime 5175 តម្លៃ ២លាន ៧សែនដុល្លារសហរដ្ឋអាមេរិក៕
© 2025, . All rights reserved.