អង្គភាពប្រឆាំងអំពើពុករលួយ (ACU) ប្រកាសសាជាថ្មីថាមិនមានការបែកធ្លាយវិញ្ញាសាគណិតវិទ្យាមុនការប្រឡងសញ្ញាបត្រមធ្យមសិក្សាទុតិយភូមិនោះទេ ចំពោះឯកសារដែលបានបង្ហោះក្នុងបណ្ដាញសង្គមហ្វេសប៊ុក គឺត្រូវបានបត់ និងលាយកមកបង្ហោះក្រោយម៉ោងប្រឡង។
សេចក្តីរាយការណ៍ស៊ើបអង្កេតពី ACU ចេញផ្សាយថ្ងៃទី៧ កញ្ញា បានឲ្យដឹងថា ក្រោយស៊ើបអង្កេតលើករណីការបង្ហោះរូបថតចម្លងដែលយល់ថាជាវិញ្ញាសាគណិតវិទ្យាអស់រយៈពេល ១០ថ្ងៃ អង្គភាពប្រឆាំងអំពើពុករលួយ រកមិនឃើញថាវិញ្ញាសាគណិតវិទ្យាត្រូវបានបែកធ្លាយមុនម៉ោងប្រឡងនោះទេ។
ករណីអ្នកប្រើប្រាស់បណ្ដាញសង្គមយល់ថា មានការបែកធ្លាយវិញ្ញាសាគណិតវិទ្យាថ្នាក់វិទ្យាសាស្ត្រ សម័យប្រឡង ២៨ សីហា ក្រុមការងារបានយកចិត្តទុកដាក់ស្រាវជ្រាវលើករណីការធ្លាយវិញ្ញាសាគណិតវិទ្យាមុនម៉ោងប្រឡង ដើម្បីឱ្យដឹងប្រាកដថាមានមែនពិត ឬមិនមាន។ បន្ទាប់ពីចំណាយពេលស៊ើបអង្កេតអស់រយៈពេល ១០ថ្ងៃ ពីថ្ងៃទី២៩ សីហា ដល់ថ្ងៃទី៧ កញ្ញា អង្គភាពប្រឆាំងអំពើពុករលួយ អះអាងថា វិញ្ញាសាគណិតវិទ្យា មិនមានបែកធ្លាយមុនម៉ោងប្រឡងទេ។
ACU បានលើកពីករណីសង្ស័យមួយចំនួន រួមមាន ដំណាក់កាលតាក់តែង បោះពុម្ព ថតចម្លង វេចខ្ចប់ ដំណាក់កាលដឹកហិបវិញ្ញាសាទៅរាជធានី-ខេត្ត និងករណីវីដេអូបង្រៀនចម្លើយវិញ្ញាសាគណិតវិទ្យាឡើងវិញ។ តាមការស្រាវជ្រាវពី ACU ដំណាក់កាលតាក់តែង បោះពុម្ព ថតចម្លង វេចខ្ចប់ ពុំមានបែកធ្លាយវិញ្ញាសាមួយសន្លឹកណាឡើយ។
ACU ឲ្យដឹងបន្ថែមទៀតថា ដោយឡែកដំណាក់កាលដឹកហិបវិញ្ញាសាទៅរាជធានី-ខេត្ត គឺមានភាពហ្មត់ចត់ ប្រធានវិញ្ញាសាត្រូវបានប្រមូលមកឱ្យតែប្រធានមណ្ឌលម្នាក់គត់ជាអ្នករក្សាទុកតាមការផ្ទៀងផ្ទាត់លេខច្បាស់លាស់។ ទោះជាយ៉ាងណា គ្រប់វិញ្ញាសាដែលបានតាក់តែងសម្រាប់ការប្រឡងទាំងអស់ ត្រូវបានបញ្ជូនទៅអនុរដ្ឋលេខាធិការក្រសួងអប់រំ តែម្នាក់គត់ មុននឹងប្រគល់ទៅដល់ដៃបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ ដើម្បីពិនិត្យ និងចុះហត្ថលេខាសង្ខេប។
ប្រភពដដែលអះអាងថា តាមរយៈការស៊ើបអង្កេតនេះ ACU ស្នើឱ្យបេក្ខជនទាំងអស់ជឿជាក់លើក្រសួងអប់រំ យុវជន និងកីឡា។ ACU លើកទឹកចិត្តដល់បេក្ខជនទោះបាននិទ្ទេស A ក្ដី ឬ E ក្ដី ពិតជាស័ក្ដិសមនឹងជាប់ដោយសមត្ថភាពរបស់ខ្លួនពិតប្រាកដ។
កាលពីថ្ងៃទី១ ខែកញ្ញា ឆ្នាំ២០២៥ កន្លងទៅ ACU បានអះអាងថាអាចមានលទ្ធភាពបែកធ្លាយវិញ្ញាសាគណិតវិទ្យាក្នុងការប្រឡងបាក់ឌុបថ្ងៃទី២៩ ខែសីហា ឆ្នាំ២០២៥ ប្រាកដមែន ប៉ុន្តែការបែកធ្លាយនេះ ត្រូវបាន ACU សង្ស័យលើពីរចំណុច គឺទី១ អាចកើតឡើងក្នុងដំណាក់កាលនៃការពិនិត្យ និងចុះហត្ថលេខាសង្ខេបពីរដ្ឋមន្ត្រីក្រសួងអប់រំ និងទី២ គឺការលួចថតចម្លងវិញ្ញាសារបស់បេក្ខជនដែលអវត្តមានក្នុងការប្រឡង៕
© 2025, . All rights reserved.