ឯកអគ្គរដ្ឋទូតចិន ប្រចាំនៅកម្ពុជា លើកឡើងថា ទំនាក់ទំនងចិន-កម្ពុជា បានវិវឌ្ឍទៅជាសហគមន៍វាសនារួមរវាងចិន-កម្ពុជាគ្រប់រដូវកាលក្នុងយុគសម័យថ្មី ហើយក៏ជានិមិត្តរូបនៃទំនុកចិត្ត និងសាមគ្គីភាពដ៏ជ្រាលជ្រៅរវាងប្រទេសទាំងពីរ។
ឯកអគ្គរដ្ឋទូតសាធារណរដ្ឋប្រជាមានិតចិន ប្រចាំនៅកម្ពុជា លោក វ៉ាង វិនពីន (WANG Wenbin) សរសេរលើទំព័រហ្វេសប៊ុករបស់ខ្លួនកាលពីយប់ថ្ងៃទី១០ ខែកញ្ញា នេះថា ទំនាក់ទំនងរវាងចិន-កម្ពុជា បានបើកនូវចក្ខុវិស័យនៃការអភិវឌ្ឍកាន់តែទូលំទូលាយសម្រាប់កិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយ។
លោក វ៉ាង វិនពីន លើកឡើងថា នៅក្នុងវិស័យតភ្ជាប់បណ្ដាញទូរគមនាគមន៍ ប្រទេសទាំងពីរនឹងជំរុញសមាហរណកម្មសេដ្ឋកិច្ចក្នុងតំបន់ដោយការពង្រឹងហេដ្ឋារចនាសម្ព័ន្ធ ភស្តុភារ និងការតភ្ជាប់បណ្ដាញទូរគមនាគមន៍ឌីជីថលផងដែរ។
ឯកអគ្គរដ្ឋទូតចិនរូបនេះ បញ្ជាក់ថា ចិនបានដើរតួនាទីយ៉ាងសំខាន់ក្នុងការបង្កើតសណ្ដាប់ធ្នាប់អន្តរជាតិដោយសន្តិវិធី បន្ទាប់ពីសង្គ្រាមឈ្លានពានរបស់ជប៉ុន និងសង្គ្រាមប្រឆាំងហ្វាស៊ីសពិភពលោក ដោយផ្អែកលើគោលបំណងធម្មនុញ្ញរបស់អង្គការសហប្រជាជាតិ និងសមភាពអធិបតេយ្យភាព ការគោរពគ្នាទៅវិញទៅមក និងកិច្ចសហប្រតិបត្តិការជោគជ័យរួម។
ប្រធានគណបក្សជំនាន់ថ្មី លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី១១ កញ្ញា នេះថា ជម្រើសល្អបំផុតរបស់កម្ពុជា គឺត្រូវរក្សាអព្យាក្រឹត្យរាល់ទំនាក់ទំនងនយោបាយការទូតជាមួយគ្រប់ប្រទេសទាំងអស់ ទោះក្នុងលក្ខខណ្ឌណាក៏ដោយ។
លោកបន្តថា ក្នុងស្ថានភាពដែលសណ្ដាប់ធ្នាប់ពិភពលោកកំពុងមានភាពផុយស្រួយនាពេលនេះ កម្ពុជាមិនត្រឹមតែត្រូវបន្តការប្រុងប្រយ័ត្នខ្ពស់ជុំវិញនយោបាយការទូតអន្តរជាតិទេ ប៉ុន្តែកម្ពុជាក៏ត្រូវប្រើនយោបាយការទូតទាំងនេះ ដើម្បីពង្រឹងសមត្ថភាពក្នុងការការពារខ្លួន ទាំងសេដ្ឋកិច្ច និងអធិបតេយ្យជាតិរបស់ខ្លួនដែរ។
លោកបញ្ជាក់ថា បទពិសោធន៍នយោបាយការទូតក្នុងអតីតកាលដែលនាំកម្ពុជាឱ្យធ្លាក់ក្នុងភ្លើងសង្គ្រាម បាត់បង់ទឹកដី បាត់បង់ផលប្រយោជន៍ជាតិ បាត់បង់ជីវិតមនុស្ស ល្មមគ្រប់គ្រាន់ឱ្យកម្ពុជារៀនសូត្រ និងបញ្ចៀសសោកនាដកម្មទាំងនេះបានហើយទៅថ្ងៃមុខ។
ជុំវិញបញ្ហានេះ កាលពីថ្ងៃទី៣១ ខែសីហា ឆ្នាំ២០២៥ ក្នុងជំនួបទ្វេភាគីជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត ជុំវិញកិច្ចប្រជុំកំពូលនៃអង្គការសហប្រតិបត្តិការសៀងហៃបូក ប្រធានាធិបតីចិន លោក ស៊ី ជីនពីង (Xi Jinping) បានប្ដេជ្ញាលើកកម្ពស់កម្រិតទំនាក់ទំនងដើម្បីធានាឱ្យភាពជាដៃគូរវាងប្រទេសទាំងពីរ ទទួលបានផលប្រយោជន៍ជាក់ស្តែងសម្រាប់ប្រជាជនទាំងពីរ និងដើម្បីរួមចំណែកដល់សន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក៕
© 2025, . All rights reserved.