អ្នកសង្កេតការណ៍លើកឡើងថា ការប្ដេជ្ញាចិត្តរបស់នាយករដ្ឋមន្ត្រីថ្មីថៃ លោក អនុធីន ឆានវីរៈគុល (Anutin Charnvirakul) ក្នុងការធានានូវសន្តិភាពជាមួយកម្ពុជា គឺជារឿងល្អសម្រាប់ប្រទេសទាំងពីរ ជាពិសេសគឺសម្រាប់ផលប្រយោជន៍សេដ្ឋកិច្ចរបស់ថៃ ដែលមានជាមួយកម្ពុជា នាពេលកន្លងមកនោះ។
អ្នកផ្តល់ប្រឹក្សាផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១២ កញ្ញា ថា ក្នុងនាមប្រទេសជិតខាងគ្នា មិនគួរឈ្លោះទាស់ទែងគ្នា ឬដណ្តើមទឹកដីប្រទេសម្ខាងទៀតរហូតបង្កទៅជាសត្រូវប្រើអាវុធសម្លាប់គ្នាដូចរដ្ឋាភិបាលដែលដឹកនាំដោយអតីតនាយករដ្ឋមន្ត្រីមុននោះទេ ព្រោះការធ្វើបែបនេះ គឺមានតែខាតទាំងសងខាងប៉ុណ្ណោះ។
លោក សេក សុជាតិ បញ្ជាក់ថា បើរដ្ឋាភិបាលថ្មីរបស់លោក អនុធីន ឆានវីរៈគុល អាចដឹកនាំស្វែងរកការផ្សះផ្សាបានកាន់តែឆាប់ គឺកាន់តែល្អ ជាពិសេសការផ្សះផ្សាក្រោមច្បាប់អន្តរជាតិ និងកិច្ចព្រមព្រៀងដែលភាគីទាំងពីរបានឯកភាពគ្នាកន្លងមក ដើម្បីភាពសុខសាន្តរបស់ពលរដ្ឋទាំងសងខាង។
កាលពីថ្ងៃទី១១ កញ្ញា សារព័ត៌មានប្រទេសម៉ាឡេស៊ី Bernama បានចុះផ្សាយថា ថ្លែងនៅក្នុងកិច្ចប្រជុំរដ្ឋមន្ត្រីអាស៊ានលើកទី១៩ ស្ដីពីឧក្រិដ្ឋកម្មឆ្លងដែន (AMMTC) នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បានលើកឡើងថា លោកបានពិភាក្សាជាមួយនាយករដ្ឋមន្ត្រីថៃ លោក អនុធីន ឆានវីរៈគុល តាមទូរសព្ទកាលពីដើមសប្តាហ៍កន្លងទៅ។
នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បញ្ជាក់ថា នាយករដ្ឋមន្ត្រីថៃ លោក អនុធីន ឆានវីរៈគុល (Anutin Charnvirakul) បានធានាចំពោះមុខលោកថានឹងប្ដេជ្ញាចិត្តក្នុងការធានាថា សន្តិភាពរវាងកម្ពុជា និងថៃ ដែលត្រូវបានគោរព និងផ្តល់តម្លៃពេញលេញ។
ជុំវិញបញ្ហានេះ ស្ថានទូតអង់គ្លេសប្រចាំកម្ពុជា បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី១១ ខែកញ្ញា ឆ្នាំ២០២៥ នេះថា រដ្ឋាភិបាលអង់គ្លេស លើកទឹកចិត្តឱ្យភាគីទាំងពីរបន្តអនុវត្តផែនការដែលបានព្រមព្រៀងគ្នា ហើយគាំទ្រដល់កិច្ចខិតខំប្រឹងប្រែងជាបន្តបន្ទាប់របស់អាស៊ានក្នុងការលើកកម្ពស់សន្តិភាព និងការអភិវឌ្ឍនៅក្នុងតំបន់។
ជុំវិញបញ្ហានេះ នាយករដ្ឋមន្ត្រីកម្ពុជា លោក ហ៊ុន ម៉ាណែត បានអះអាងក្នុងលិខិតអបអរសាទរលោក អនុធីន ឆានវីរៈគុល (Anutin Charnvirakul) កាលពីថ្ងៃទី៧ ខែកញ្ញា ថា កម្ពុជាទន្ទឹមរង់ចាំធ្វើការយ៉ាងជិតស្និទ្ធជាមួយនាយករដ្ឋមន្ត្រីថ្មីរបស់ថៃ ដើម្បីស្ដារទំនាក់ទំនងរវាងកម្ពុជា និងថៃ ឱ្យត្រឡប់ទៅរកភាពប្រក្រតីឡើងវិញ៕
© 2025, . All rights reserved.