រយៈពេលប៉ុន្មានថ្ងៃមកនេះ រាជរដ្ឋាភិបាលកម្ពុជា នៅក្រោមការដឹកនាំរបស់គណបក្សប្រជាជនកម្ពុជា និងលោក ហ៊ុន សែន ដែលគេហៅថាបុរសខ្លាំងកម្ពុជា បានស្វែងរកអន្តរាគមន៍កាន់តែច្រើនឡើងៗទៅសហគមន៍អន្តរជាតិ។
គេសង្កេតឃើញសាររបស់លោកនាយករដ្ឋមន្ត្រីកម្ពុជា ហ៊ុន ម៉ាណែត បានបញ្ជូនទៅកាន់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ដែលជាប្រធានអាស៊ាននៅឆ្នាំ២០២៥ និងទៅកាន់ប្រធានាធិបតីបារាំង ប្រធានាធិបតីសហរដ្ឋអាមេរិក អគ្គលេខាធិការអង្គការសហប្រជាជាតិ និងប្រទេសចិន ឲ្យជួយដោះស្រាយធ្វើយ៉ាងណាឲ្យថៃ គោរពឱ្យបានពេញលេញបទឈប់បាញ់គ្នាដែលភាគីកម្ពុជា និងថៃ បានព្រមព្រៀងគ្នាជាផ្លូវការកាលពីថ្ងៃទី២៨ ខែកក្កដា ឆ្នាំ២០២៥ ក្រោយពីការប៉ះទង្គិចគ្នាតាមព្រំដែនរយៈពេល ៥ថ្ងៃ។
ក្នុងស្ថានភាពដែលគេមើលឃើញកម្ពុជា កំពុងតែទម្លាក់ខ្លួនជាជនរងគ្រោះ ហើយស្វែងរកយុត្តិធម៌ពីសហគមន៍អន្តរជាតិ ក៏គេសង្កេតឃើញភាគីថៃ មិនបានថមថយនៃការបំពារបំពានរំលោភព្រំដែនកម្ពុជា នោះទេ។ ទាហានថៃ នៅតែបន្តរាយលួសបន្លារហូតដល់បាញ់ប្រហារដោយប្រើប្រាស់កាំភ្លើងខ្យល់ និងគ្រាប់បែកផ្សែងវាយប្រហារមកលើប្រជាជន និងព្រះសង្ឃទៀតផង។ យ៉ាងណា ភាគីថៃ តែងតែលើកឡើងថា ភាគីកម្ពុជា បានបំពានលើអធិបតេយ្យភាពរបស់ថៃ ទើបថៃ ទាមទារតំបន់ដែលទាហានថៃ រាយលួសបន្លានោះជាដែនដីរបស់ថៃ។
អ្វីដែលធ្វើឱ្យអ្នកសង្កេតការណ៍ចេះតែគិតថា ហេតុអ្វីបានជាកម្ពុជា មិនលាតត្រដាងឲ្យច្បាស់ថាខ្លួនមានយុត្តិការអ្វីខ្លះដែលត្រូវតតាំងក្ដីចំពោះការឈ្លានពានពីសំណាក់ប្រទេសថៃ ទៅលើអធិបតេយ្យកម្ពុជា។
កម្ពុជា មានសន្ធិសញ្ញាបារាំង-សៀម រួចទៅហើយ ដោយមានផែនទីខ្នាត ១លើ ២០០ពាន់ ដែលប្រទេសថៃ ទទួលស្គាល់តាមសន្ធិសញ្ញាបារាំង-សៀម ឆ្នាំ១៩០៤ និងឆ្នាំ១៩០៧។ ចុះហេតុអ្វីបានជាកម្ពុជា មិនលាតត្រដាងផែនទីទាំងនេះជាផ្លូវការទៅកាន់ស្ថាប័នអន្តរជាតិ ដែលមានកាតព្វកិច្ចជួយស្វែងរកការពិតដើម្បីបញ្ចប់ជម្លោះព្រំដែនកម្ពុជា-ថៃ?
តើកម្ពុជា បានប្ដឹងទៅតុលាការយុត្តិធម៌អន្តរជាតិហើយឬនៅ ដែលស្ថាប័នតុលាការមួយនេះមានដែនយុត្តាធិការក្នុងការស្វែងរកដំណោះស្រាយឲ្យប្រទេសដែលមានជម្លោះព្រំដែនជាមួយគ្នា?
តើកម្ពុជា មានបានគិតថាខ្លួនគួរស្នើទៅកាន់ប្រទេសបារាំង និងប្រទេសឥណ្ឌូនេស៊ី ដែលជាសហប្រធានសន្និសីទទីក្រុងប៉ារីស និងជាប្រទេសផ្ដួចផ្ដើមឱ្យមានសន្តិភាពសម្រាប់កម្ពុជា បញ្ចប់សង្គ្រាមស៊ីវិលនៅឆ្នាំ១៩៩១ ដែលសន្ធិសញ្ញានេះក៏តម្រូវឱ្យប្រទេសជិតខាងកម្ពុជាទាំងអស់ គោរពអធិបតេយ្យភាពបូរណភាពទឹកដីកម្ពុជា ដោយមិនត្រូវបង្កការឈ្លានពានកម្ពុជាឡើយ។
ត្រង់នេះហើយដែលគេមើលឃើញថា យន្តការទាំងនេះនៅតែមានតម្លៃចំពោះដំណោះស្រាយជម្លោះព្រំដែនកម្ពុជា ជាមួយប្រទេសជិតខាងទាំងអស់។
ជាថ្មីម្ដងទៀតក្រោយពីកម្ពុជា អំពាវនាវឲ្យប្រធានអាស៊ានខិតខំរុញថៃ ឱ្យបញ្ឈប់ការឈ្លានពានព្រំដែនកម្ពុជា នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ដែលជាប្រធានអាស៊ានប្តូរវេន បានអញ្ជើញនាយករដ្ឋមន្ត្រីថ្មីរបស់ថៃ លោក Anutin Charvirakul ឱ្យមកបំពេញទស្សនកិច្ចនៅប្រទេសម៉ាឡេស៊ី ក្រោយលោកឡើងដឹកនាំប្រទេសថៃ ជាផ្លូវការនៅថ្ងៃទី១៩ ខែកញ្ញា។ នេះបើតាមការចេញផ្សាយដោយសារព័ត៌មានម៉ាឡេស៊ី Bernama នាថ្ងៃសុក្រ ទី១៩ខែកញ្ញា ឆ្នាំ២០២៥។
លោក អាន់វ៉ា បានអញ្ជើញលោក Anutin អំឡុងកិច្ចសន្ទនាតាមទូរសព្ទរវាងមេដឹកនាំទាំងពីរកាលពីថ្ងៃព្រហស្បតិ៍ ហើយលោក អាន់វ៉ា បានបញ្ជាក់ថា គឺជាផ្នែកនៃកិច្ចប្រឹងប្រែងដើម្បីពង្រឹងចំណងទាក់ទងជិតស្និទ្ធរវាងប្រទេសជិតខាងទាំងពីរ ដែលសង្ឃឹមថាលោក Anutin នឹងជួបលោក អាន់វ៉ា ឆាប់ៗនេះ។
លោកនាយករដ្ឋមន្ត្រីម៉ាឡេស៊ី បានបន្ថែមថា រូបលោកក៏បានពិភាក្សាផងដែរជាមួយលោក Anutin អំពីការវិវត្តចុងក្រោយនៃស្ថានការណ៍នៅព្រំដែនថៃ-កម្ពុជា ហើយនាឱកាសនោះ លោកបានសង្កត់ធ្ងន់ពីសារសំខាន់ដែលភាគីទាំងអស់ត្រូវរក្សាសន្តិភាព និងចៀសវាងបណ្តោយឱ្យការខ្វែងគំនិតគ្នាណាមួយបង្កជាភាពតានតឹងថែមទៀត។
លោក អាន់វ៉ា បានបន្តទៀតថា រូបលោកបានអំពាវនាវថា បញ្ហាណាមួយត្រូវដោះស្រាយនៅឯតុចរចាតាមរយៈកិច្ចប្រជុំគណៈកម្មការព្រំដែន JBC ហើយម៉ាឡេស៊ី ជឿជាក់ថា ស្មារតីនៃកិច្ចសន្ទនា ការទូត និងការយោគយល់គ្នាទៅវិញទៅមក គឺជាមធ្យោបាយប្រសើរបំផុត ដើម្បីធានាបាននូវសុខសន្តិភាព និងស្ថិរភាពក្នុងតំបន់។
កាលពីល្ងាចថ្ងៃទី១៨ ខែកញ្ញា ឆ្នាំ២០២៥ លោក ហ៊ុន ម៉ាណែត បានជួបពិភាក្សាជាមួយលោក អាន់វ៉ា អ៊ីប្រាហ៊ីម (Anwar Ibrahim) នាយករដ្ឋមន្ត្រីម៉ាឡេស៊ី តាមទូរសព្ទ ដោយស្នើឲ្យជួយធ្វើអន្តរាគមន៍ជាបន្ទាន់ ដើម្បីបន្ធូរភាពតានតឹងរវាងកងកម្លាំងប្រដាប់អាវុធថៃ និងប្រជាពលរដ្ឋស៊ីវិលកម្ពុជា ដោយឱ្យរក្សាស្ថានភាពដដែល កុំឱ្យមានការរាយលួសបន្លាបន្ថែម។
ក្រោយកងកម្លាំងថៃ ប្រព្រឹត្តទង្វើយ៉ាងព្រៃផ្សៃលើពលរដ្ឋកម្ពុជា នៅភូមិព្រៃចាន់ សេនានុព័ន្ធយោធាម៉ាឡេស៊ី ដែលជាប្រធានក្រុមអ្នកសង្កេតការណ៍អន្តរកាលអាស៊ាន IOT ប្រចាំប្រទេសថៃ បានជំរុញឲ្យថៃ រក្សាភាពស្ងប់ស្ងាត់ និងបញ្ឈប់រាល់សកម្មភាពបង្កហេតុ ហើយអំពាវនាវដល់អាជ្ញាធរថៃ ទុកបញ្ហានេះឲ្យគណៈកម្មាធិការព្រំដែនចម្រុះ JBC ធ្វើការ និងដោះស្រាយ។
លោក Samsul Rizal Bin Musa ប្រធានក្រុមអ្នកសង្កេតការណ៍អន្តរកាលអាស៊ាន IOT បានច្រានចោលសំណើរបស់ថៃ ដែលចង់ឲ្យលោកទៅមើលតំបន់ព្រំដែនដែលមានជម្លោះ។ លោកទទូចថា ភាគីទាំងពីរសូមបញ្ឈប់រាល់សកម្មភាពបង្កហេតុ ដោយត្រូវរង់ចាំការប្រជុំ JBC។
នៅថ្ងៃទី១៩ កញ្ញា ព្រះមហាក្សត្រថៃ Maha Vajiralongkorn បានអនុម័តលើគណៈរដ្ឋមន្ត្រីថ្មីរបស់នាយករដ្ឋមន្ត្រី Anutin Charnvirakul។ ការអនុម័តជាផ្លូវការរបស់ព្រះមហាក្សត្រថៃ នឹងបើកផ្លូវឱ្យគណៈរដ្ឋមន្ត្រីថ្មីរបស់ថៃ ស្បថចូលកាន់តំណែងជាផ្លូវការនៅចំពោះមុខព្រះមហាក្សត្រ ក៏ដូចជាធ្វើបទបង្ហាញពីគោលនយោបាយរបស់ខ្លួនទៅកាន់រដ្ឋសភា មុននឹងរដ្ឋមន្ត្រីទាំងអស់អាចកាន់តំណែងជាផ្លូវការ។
ជាទម្លាប់ នាយករដ្ឋមន្ត្រីប្រទេសណាមួយនៃសមាគមអាស៊ានដែលទើបចូលកាន់តំណែង ច្រើនតែចេញទៅធ្វើទស្សនកិច្ចនៅក្នុងប្រទេសក្នុងតំបន់ ដើម្បីជាការបង្ហាញពីការរឹតចំណងទាក់ទងទ្វេភាគីឡើងវិញ។
ក្នុងន័យនេះហើយដែលលោក អាន់វ៉ា អ៊ីប្រាហ៊ីម (Anwar Ibrahim) នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាន បានអញ្ជើញមុនគេឱ្យលោក Anutin Charnvirakul ដែលទើបចូលកាន់តំណែងនាយករដ្ឋមន្ត្រីនៃរាជាណាចក្រថៃ ទៅធ្វើទស្សនកិច្ចនៅប្រទេសម៉ាឡេស៊ី ព្រោះប្រទេសថៃ ក៏មានព្រំដែនជាប់នឹងម៉ាឡេស៊ី ដែរ៕
© 2025, . All rights reserved.