សាស្ត្រាចារ្យនយោបាយ និងកិច្ចការបរទេសរបស់ថៃ លោក ស៊ូរ៉ាឆាត បំរ៉ុងសក្តិ (Surachart Bamrungsuk) ព្រមានថា ការលុបចោលអនុស្សរណៈនៃការយោគយល់រវាងកម្ពុជា និងថៃ គឺជាការបើកផ្លូវឲ្យកម្ពុជា យកសំណុំរឿងព្រំដែនរវាងប្រទេសទាំងពីរទៅតុលាការយុត្តិធម៌អន្តរជាតិ (ICJ) ដោយជោគជ័យ។
កាសែត The Nation របស់ថៃ បានស្រង់សម្ដីលោក ស៊ូរ៉ាឆាត បំរ៉ុងសក្តិ កាលពីថ្ងៃទី៥ ខែតុលា នេះថា ការស្នើឱ្យមានការធ្វើប្រជាមតិលុបអនុស្សរណៈយោគយល់គ្នាឆ្នាំ២០០០ (MOU43) និងអនុស្សរណៈយោគយល់ឆ្នាំ២០០១ (MOU44) នឹងបង្កបញ្ហាដល់ប្រទេសថៃ ខ្លួនឯងទៅថ្ងៃក្រោយ។
សាស្ត្រាចារ្យនយោបាយរូបនេះ លើកឡើងថា ពលរដ្ឋថៃ ភាគច្រើនមិនបានយល់ពីភាពស្មុគស្មាញនៃគោលនយោបាយការបរទេសដែលជាប់ពាក់ព័ន្ធនឹងខ្លឹមសារដែលបានចែងក្នុងអនុស្សរណៈយោគយល់គ្នារវាងកម្ពុជា-ថៃ ទាំងពីរនេះឡើយ។
ប្រភពដដែល អះអាងថា ការសម្រេចចិត្តធ្វើប្រជាមតិលុបអនុស្សរណៈនៃការយោគយល់ទាំងពីរនាពេលនេះ គឺពាក់ព័ន្ធទៅនឹងអារម្មណ៍ជាតិនិយម យោធានិយមរបស់ក្រុមស្តាំនិយមជ្រុល ជាជាងផ្អែកលើគោលនយោបាយការបរទេសជាក់ស្តែង។
លោកបន្ថែមថា បើអនុស្សរណៈនៃការយោគយល់ (MOU) ទាំងពីរនេះដាក់ទៅក្នុងការបោះឆ្នោត នោះប្រាកដជានឹងត្រូវលុបចោលទាំងស្រុង ដើម្បីបញ្ជាក់ថាពួកគេគឺជាអ្នកជាតិនិយម ស្រឡាញ់ប្រទេសជាតិ។
លោក ស៊ូរ៉ាឆាត បំរ៉ុងសក្តិ ព្រមានថា ប្រសិនបើអនុស្សរណៈនៃការយោគយល់ (MOU) ទាំងពីរនេះ ត្រូវបានលុបចោលមែន នោះបញ្ហារវាងកម្ពុជា-ថៃ នឹងកើនឡើងបន្ថែមទៀត ដែលនឹងរាំងស្ទះដល់អនាគតនៃការចរចាបញ្ចប់ជម្លោះរវាងប្រទេសទាំងពីរ ដូច្នេះបញ្ហានេះនឹងត្រូវរុញទៅដល់តុលាការយុត្តិធម៌អន្តរជាតិ (ICJ) តែម្តង។ លោកថា កម្ពុជាកំពុងរង់ចាំថៃ ដើរចូលក្នុងអន្ទាក់នេះ ព្រោះអ្វីដែលកម្ពុជា ចង់បាន គឺឱ្យថៃ ឈានជើងចូលក្នុងតុលាការអន្តរជាតិដោយខ្លួនឯង។
កាលពីថ្ងៃទី៣០ ខែកញ្ញា ឆ្នាំ២០២៥ នាយករដ្ឋមន្ត្រីថៃ លោក អនុធីន ឆានវីរៈគុល (Anutin Charnvirakul) អះអាងថា ចំពោះរូបលោកផ្ទាល់ គឺពិតជាមានបំណងឱ្យលុបកិច្ចព្រមព្រៀងឆ្នាំ២០០០ និងកិច្ចព្រមព្រៀងឆ្នាំ២០០១ រវាងកម្ពុជា-ថៃ ឱ្យបាន ប៉ុន្តែលោកត្រូវធ្វើប្រជាមតិសិន ដើម្បីសម្រេចថា តើត្រូវលុបចោលអនុស្សរណៈនៃការយោគយល់គ្នានេះឬយ៉ាងណា។
ជុំវិញបញ្ហានេះ កាសែតបាងកកប៉ុស្តិ៍ (Bangkok Post) ចេញផ្សាយនៅថ្ងៃទី៦ តុលា នេះថា លទ្ធផលនៃការស្ទង់មតិរបស់វិទ្យាស្ថានរដ្ឋបាលអភិវឌ្ឍន៍ជាតិ (Nida) បង្ហាញថា ៤៤,១% នៃសាធារណជនថៃ មិនបានយល់ដឹងអំពីមុខងារនៃអនុស្សរណៈនៃការយោគយល់ឆ្នាំ២០០០ (MoU43) នោះទេ។
របាយការណ៍នេះ បង្ហាញថា មានតែពលរដ្ឋថៃ ៧,៧% ប៉ុណ្ណោះ ដែលយល់ដឹងពីអនុស្សរណៈនៃការយោគយល់នេះច្បាស់ ចំណែកអ្នកយល់ដឹងខ្លះៗដល់ ២៣,១% និងអ្នកយល់ដឹងបន្តិចបន្តួចមាន ២៤,៩%។
ដោយឡែកការស្ទង់មតិលើអនុស្សរណៈឆ្នាំ២០០១ (MOU44) បង្ហាញថា មានតែពលរដ្ឋថៃ ៦,៨% ប៉ុណ្ណោះ ដែលយល់ដឹងច្បាស់ ចំណែកអ្នកយល់ដឹងខ្លះៗមាន ២២,៤% និងអ្នកយល់ដឹងបន្តិចបន្តួចមាន ២៤,៩% ខណៈអ្នកមិនដឹងសោះមានរហូតដល់ ៤៥,៧% ឯណោះ។
ជុំវិញបញ្ហានេះ លោក ជុំ ឈាង អតីតនាយទាហានជាន់ខ្ពស់នៃភាគីរណសិរ្សជាតិរំដោះប្រជាពលរដ្ឋខ្មែរ បានលើកឡើងក្នុងកម្មវិធី Idea Talk នៃសារព័ត៌មាន Cambodia Daily កាលពីរាត្រីថ្ងៃទី២ តុលា ថា ផ្អែកតាមអនុសញ្ញាក្រុងវីយែន ឆ្នាំ១៩៦៩ អនុស្សរណៈរវាងកម្ពុជា-ថៃ គឺអាចលុបបាន តែត្រូវស្ថិតក្រោមលក្ខខណ្ឌមួយចំនួនដែលបានចែងក្នុងមាត្រា៤៦ រហូតដល់មាត្រា៦៤ នៃច្បាប់នេះ៕
© 2025, . All rights reserved.