កងរាជអាវុធហត្ថខេត្តបន្ទាយមានជ័យ កំពុងកសាងសំណុំរឿងបញ្ជូនមន្ត្រីនគរបាលសរុបចំនួន ៦នាក់ ទៅតុលាការ ដើម្បីចាត់ការបន្ត ក្រោយពីឃាត់ខ្លួនមន្ត្រីទាំងនោះ ដែលជាប់ពាក់ព័ន្ធនឹងបទល្មើសនាំជនជាតិថៃ ឆ្លងដែនចូលមកកម្ពុជា ដោយខុសច្បាប់ នៅត្រង់ចំណុចប៉ុស្តិ៍ការពារព្រំដែនគោកអូរល្ហុង។
នៅយប់ថ្ងៃទី៨ ខែតុលា ឆ្នាំ២០២៥ ទាហានកងពលលេខ៥១ ក្រោយមានបទបញ្ជាដែលដឹកនាំដោយឧត្ដមសេនីយ៍ទោ សេង ធារិន មេបញ្ជាការរង និងជានាយសេនាធិការយោធភូមិទី៥ បានឃាត់ខ្លួនមន្ត្រីនគរបាលខេត្តបន្ទាយមានជ័យ ចំនួន ៦នាក់។ មន្ត្រីនគរបាលដែលត្រូវបានចាប់ខ្លួនទាំងនេះ រួមមានទាំងមេបញ្ជាការរងវរសេនាតូចការពារព្រំដែន៨៩១ ចំនួន ២នាក់ គឺលោកវរសេនីយ៍ត្រី សុខ សំអុល និងលោកវរសេនីយ៍ត្រី ព្រឹម ដែន ព្រមទាំងមេប៉ុស្តិ៍នគរបាលការពារព្រំដែនគោកអូរល្ហុង លោកវរសេនីយ៍ត្រី ព្រំ ផូរ។ ចំណែកមនុស្សចំនួន ៣នាក់ផ្សេងទៀត គឺជាមន្ត្រីនៃវរសេនាតូចការពារព្រំដែន៨៩១ រួមមានឈ្មោះ ព្រឹម ឌុន កាក់ សេងទ្រី និង ភុំ ចំរើន ខណៈម្នាក់ទៀតឈ្មោះ ង៉ិក មិថុនា ជាចុងភៅ គឺមិនជាប់ពាក់ព័ន្ធឡើយ។
អ្នកនាំពាក្យរងក្រសួងមហាផ្ទៃ លោក ទូច សុឃៈ បានថ្លែងប្រាប់អ្នកសារព័ត៌មានថា នៅព្រឹកថ្ងៃទី៩ ខែតុលា នេះ ក្រោយការចាប់ខ្លួន មន្ត្រីនគរបាលទាំង ៦នាក់នោះកំពុងស្ថិតក្រោមសមត្ថកិច្ចរបស់កងរាជអាវុធហត្ថខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់ក្នុងការកសាងសំណុំរឿងបញ្ជូនទៅតុលាការ។
ការចាប់ឃាត់ខ្លួនមន្ត្រីល្មើសច្បាប់ទាំង ៦នាក់នេះ ធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីប្រធានព្រឹទ្ធសភាកម្ពុជា លោក ហ៊ុន សែន នៅយប់ថ្ងៃទី៨ ខែតុលា បានទទូចឱ្យរដ្ឋាភិបាលរបស់លោក ហ៊ុន ម៉ាណែត និងអាជ្ញាធរគ្រប់ជាន់ថ្នាក់ កម្ចាត់ចោលតែម្តងនូវមន្ត្រី និងឈ្មួញណាដែលនៅបន្តលួចនាំទំនិញថៃ ចូលកម្ពុជា ក្នុងអំឡុងពេលព្រំដែនបន្តបិទនៅឡើយ។ លោក ហ៊ុន សែន ក៏បានសរសេរថា ប្រសិនបើលោកនៅធ្វើជានាយករដ្ឋមន្ត្រីដូចពេលមុន នោះបទបញ្ជាចាប់ខ្លួន ឬដកចេញពីមន្ត្រីនឹងត្រូវអនុវត្តភ្លាមៗ។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា លើកឡើងថា លោកសាទរចំពោះអាជ្ញាធរដែលឃាត់ខ្លួនមន្ត្រីល្មើសច្បាប់ទាំង ៦នាក់ ព្រោះមន្ត្រីទាំងនេះបានបង្កើតកំហុសយ៉ាងធ្ងន់ធ្ងរដែលធ្វើឲ្យប៉ះពាល់ដល់ប្រទេសជាតិ ខណៈប្រទេសទាំងពីរកំពុងតែមានជម្លោះនឹងគ្នា។
លោកថា ករណីនេះ មន្ត្រីទាំងនោះត្រូវតែចាត់វិធានការច្បាប់ដោយគ្មានការលើកលែង។ លោកបន្តថា លោកនាយករដ្ឋមន្ត្រី ហ៊ុន ម៉ាណែត គួរតែយកច្បាប់ដកហូតសញ្ជាតិមកប្រើចំពោះមន្ត្រីទាំង ៦នាក់នោះ។
ចំណែកឯឧត្ដមសេនីយ៍ឯក ហ៊ុន ជា ដែលជាក្មួយរបស់ប្រធានព្រឹទ្ធសភាកម្ពុជា លោក ហ៊ុន សែន ដែលធ្លាប់សាលាដំបូងរាជធានីភ្នំពេញ ផ្ដន្ទាទោសឲ្យជាប់ឃុំក្នុងពន្ធនាគារព្រៃសរយៈពេលមួយឆ្នាំកន្លះ ពីបទគំរាមកំហែងសម្លាប់ កាលពីថ្ងៃទី២ ខែមេសា ឆ្នាំ២០១៨ កន្លងមក បានសរសេរនៅលើហ្វេសប៊ុករបស់លោកនៅថ្ងៃទី៩ តុលា នេះថា កុំឱ្យប្រឡាក់កន្លែងតុលាការ ដកសញ្ជាតិយកដាក់គុកទៅឆាប់ចប់។
ក្នុងរយៈពេល ៦ខែឆ្នាំ២០២៥ នេះ មន្ត្រីអន្តោប្រវេសន៍នៃក្រសួងមហាផ្ទៃ ដែលប្រចាំការបំពេញភារកិច្ចតាមបណ្ដាច្រកទ្វារព្រំដែន រួមទាំងច្រកទ្វារព្រំដែនអាកាស បានប្រើវិធីសាស្ត្រស្រាវជ្រាវ និងសន្និដ្ឋានបឋម ឈានទៅទប់ស្កាត់បានទាន់ពេលវេលាករណីសង្ស័យពាក់ព័ន្ធអំពើជួញដូរមនុស្ស ដោយឃាត់ដំណើរឆ្លងដែនសរុប ១១៨នាក់ ក្នុងនោះមានជនជាតិខ្មែរ ១០៤នាក់ ជនជាតិចិន ១៤នាក់៕
© 2025, . All rights reserved.