ក្រសួងការបរទេសនៃប្រទេសន័រវែស ប្រកាសថា រដ្ឋាភិបាលប្រទេសវេណេហ្ស៊ុយអេឡា បានសម្រេចបិទស្ថានទូតរបស់ខ្លួននៅទីក្រុងអូស្លូ ដោយពុំមានការពន្យល់ពីហេតុការណ៍ដែលនាំឱ្យប្រទេសអាមេរិកខាងត្បូងមួយនេះ សម្រេចបិទស្ថានបេសកកម្មទូតរបស់ខ្លួននោះទេ។
តែគេថារដ្ឋាភិបាលវេណេហ្ស៊ុយអេឡា ដែលនៅក្រោមអំណាចរបស់បុរសខ្លាំង Nicolás Maduro ពិតណាស់សម្ដែងប្រតិកម្មទៅនឹងប្រទេសន័រវែស និងគណៈកម្មាធិការពានរង្វាន់ណូបែលសន្តិភាព ដែលសម្រេចផ្ដល់សម្រាប់ឆ្នាំ២០២៥ ទៅឱ្យមេបក្សប្រឆាំង អ្នកស្រី María Corina Machado ដែលជាស្ត្រីអ្នកនយោបាយគូប្រជែងអាចធ្វើឱ្យលោក Maduro ធ្លាក់ពីអំណាច។
អ្នកនាំពាក្យក្រសួងការបរទេសន័រវែស អ្នកស្រី Cecilie Roang បានប្រាប់ទីភ្នាក់ងារព័ត៌មាន AFP ថា ន័រវែស ត្រូវបានគេប្រាប់ថា ស្ថានទូតប្រទេសវេណេហ្ស៊ុយអេឡា កំពុងតែបិទទ្វារហើយ។ ការបិទស្ថានទូតនេះ ក៏រដ្ឋាភិបាលវេណេហ្ស៊ុយអេឡា មិនបានជូនដំណឹងទៅរដ្ឋាភិបាលប្រទេសន័រវែស ដែរ។
ស្ត្រីអ្នកនាំពាក្យក្រសួងការបរទេសន័រវែស និយាយថា វាជាការសោកស្ដាយ។ ទោះជាមានគំនិតខ្វែងគ្នាលើបញ្ហាជាច្រើន គួរតែរក្សាកិច្ចសន្ទនានឹងគ្នា ហើយន័រវែស នឹងបន្តពិនិត្យមើលរឿងនេះឡើងវិញ។
យោងតាមប្រភពព័ត៌មានដដែល ការទាក់ទងតាមប្រព័ន្ធទូរសព្ទពីខាងក្រៅទៅកាន់ការិយាល័យស្ថានទូតវេណេហ្ស៊ុយអេឡា នៅក្រុងអូស្លូ ក៏លែងដំណើរការដែរ ចាប់តាំងពីរសៀលថ្ងៃចន្ទ ទី១៣ ខែតុលា មក។
ទង្វើពីរដ្ឋាភិបាលលោក Maduro ដូចនេះ ធ្វើឡើង ៣ថ្ងៃបន្ទាប់ពីអ្នកស្រី Machado បានទទួលពានរង្វាន់ណូបែលសន្តិភាពនៅអូស្លូ។
អ្នកស្រី Machado ត្រូវបានគេកត់ថាជាស្ត្រីអ្នកនយោបាយដ៏មានឥទ្ធិពល ដែលស្ត្រីជ័យលាភីណូបែលសន្តិភាពរូបនេះកំពុងបំពេញបេសកកម្មផ្ដួលរំលំរបបកុម្មុយនីស្តនៅវេណេហ្ស៊ុយអេឡា។ អ្នកស្រី Machado ក៏ត្រូវបានរារាំងពីការឈរឈ្មោះបោះឆ្នោតប្រធានាធិបតីក្នុងឆ្នាំ២០២៤ ដោយគូប្រជែងរបស់អ្នកស្រី គឺលោក Maduro។ ទីបំផុត លោក Maduro ពិតជាប្រាកដថាអ្នកស្រី Machado ទេជាអ្នកឈ្នះឆ្នោតប្រធានាធិបតីនៅថ្ងៃទី២៨ ខែកក្កដា ឆ្នាំ២០២៤ នោះ។
អ្នកស្រី Machado ត្រូវបានគណៈកម្មាធិការរង្វាន់ណូបែលសន្តិភាព ផ្ដល់រង្វាន់ណូបែលចំពោះភាពមិនហត់នឿយក្នុងការលើកកម្ពស់សិទ្ធិប្រជាធិបតេយ្យដើម្បីប្រជាជនវេណេហ្ស៊ុយអេឡា ដែលអ្នកស្រីបានតស៊ូ និងកំពុងតែតស៊ូដើម្បីការផ្លាស់ប្ដូរដោយសន្តិវិធី និងយុត្តិធម៌ពីអំណាចផ្ដាច់ការមកប្រជាធិបតេយ្យវិញ។
នៅថ្ងៃដែលអ្នកស្រី Machado បានពានរង្វាន់ណូបែល ត្បិតថាលោក Maduro មិនបានហៅសំដៅលើស្ត្រីវ័យ ៥៨ឆ្នាំក៏ពិតមែន តែមានស្ត្រីអ្នកនយោបាយតែម្នាក់គត់នៅវេណេហ្ស៊ុយអេឡា ស័ក្តិសមជាគូប្រជែងអំណាចរបស់គាត់។
លោក Maduro ថាប្រជាជនប្រទេសវេណេហ្ស៊ុយអេឡា ចង់បានសន្តិភាព ហើយសន្តិភាពជាមួយនឹងសេរីភាព និងអធិបតេយ្យ។
យ៉ាងណា អ្នកស្រី Machado អ្នកនយោបាយវេណេហ្ស៊ុយអេឡា រូបនេះ បានគាំទ្រជាខ្លាំងនូវវត្តមានរបស់ទ័ពសហរដ្ឋអាមេរិកដែលកំពុងដាក់ពង្រាយនៅតំបន់ឆ្នេរសមុទ្រវេណេហ្ស៊ុយអេឡា ដែលអ្នកស្រីបានចាត់ទុកថាពានរង្វាន់ណូបែលសន្តិភាព គឺជាកិត្តិយសរបស់លោក ដូណាល់ ត្រាំ ប្រធានាធិបតីអាមេរិក ថាកំពុងជួយរំដោះទុក្ខវេទនារបស់វេណេហ្ស៊ុយអេឡា ពីអំណាចផ្ដាច់ការរបស់លោក Maduro។
ក្នុងបទសម្ភាសន៍ជាមួយបណ្ដាញទូរទស្សន៍ Fox news អ្នកស្រី Machado ថាលោក ត្រាំ សមនឹងទទួលបានពានរង្វាន់ ពីព្រោះមិនត្រឹមតែដោះស្រាយសង្គ្រាមចំនួន ៨ ក្នុងរយៈពេលប៉ុន្មានខែទេ តែសកម្មភាពរបស់លោក ត្រាំ ដែលឥតរារែកក្នុងការជួយវេណេហ្ស៊ុយអេឡា ទៅរកសេរីភាព។
គេថាលោក Maduro កាន់តែធ្វើខ្លួនឱ្យកាន់តែឯកានៅលើវេទិកាអន្តរជាតិ ចំពោះការបិទស្ថានទូតនៅប្រទេសន័រវែស។ បុរសខ្លាំង Nicolás Maduro ពិតណាស់ គេស្គាល់ គេដឹងឈ្មោះលោកជាប្រធានាធិបតីវេណេហ្ស៊ុយអេឡា។ គាត់បានឡើងកាន់អំណាចនៅឆ្នាំ២០១៣ ជាឆ្នាំដែលប្រធានាធិបតី Hugo Chávez ស្លាប់ដោយជំងឺមហារីក។ តាំងពីពេលនេះ របបផ្ដាច់ការដែលបន្សល់ពីលោក Hugo Chávez កាន់តែអាក្រក់ខ្លាំងឡើងនៅក្រោមអំណាចរបស់លោក Maduro។ លោក Maduro កំពុងគាបសង្កត់យ៉ាងខ្លាំងលើសិទ្ធិសេរីភាពនយោបាយទៅលើបក្សប្រឆាំង។
អ្នកនយោបាយប្រឆាំងជាង ៨០០នាក់ ត្រូវបានចាប់ខ្លួន និងរត់ភៀសខ្លួនទៅក្រៅប្រទេស។ ជាមួយគ្នានេះ ប្រជាជនជិត ៨លាននាក់ភៀសខ្លួនទៅនៅប្រទេសជិតខាង ព្រោះតែគ្មានសេរីភាពក្នុងការរស់នៅក្រោមរបបលោក Maduro ខណៈអំពើពុករលួយជាប្រព័ន្ធរាលដាលពាសពេញស្ថាប័នរដ្ឋ។
អត្រាយុវជនអត់ការងារធ្វើកាន់តែកើនឡើង។ សង្គមកំពុងធ្លាក់ក្នុងការបែងចែកពណ៌សម្បុរបក្ខពួក។ ក្នុងស្ថានភាពនៃការរំលោភសិទ្ធិនយោបាយកាន់តែធ្ងន់ធ្ងរ សហគមន៍អន្តរជាតិ សហភាពអឺរ៉ុប សហរដ្ឋអាមេរិក និងបណ្ដាប្រទេសប្រជាធិបតេយ្យជាច្រើន មិនទទួលស្គាល់លោក Maduro ជាមេដឹកនាំប្រទេសវេណេហ្ស៊ុយអេឡា ស្របច្បាប់ឡើយ។ ក្នុងស្ថានភាពដែលរដ្ឋាភិបាលវេណេហ្ស៊ុយអេឡា បិទស្ថានទូតរបស់ខ្លួននៅន័រវែស កាន់តែធ្វើឱ្យរដ្ឋការលោក ដូណាល់ ត្រាំ ត្រូវតែប្រញាប់កាត់ផ្ដាច់របបលោក Maduro ពីឆាកអន្តរជាតិ ហើយការលើកទ័ពអាមេរិកកម្ទេចបណ្ដាញឧក្រិដ្ឋកម្មគ្រឿងញៀនដែលអាមេរិកចោទថាលោក Maduro ជាមេខ្លោង កាន់តែធ្វើឱ្យសេតវិមាននៃរដ្ឋការលោក ត្រាំ ពង្រឹងប្រតិបត្តិការយោធាថែមទៀត ប្រឆាំងរបបដឹកនាំរបស់លោក Maduro។
គួរបញ្ជាក់ថា ប្រទេសវេណេហ្ស៊ុយអេឡា ជាប្រទេសមានប្រេងកាត ហើយចុះកិច្ចសន្យាបូម ចម្រាញ់ប្រេងជាមួយក្រុមហ៊ុនប្រេងឥន្ធនៈអាមេរិកាំង ExxonMobil មកទល់នឹងពេលវរសេនីយ៍ឯក Hugo Chavez ធ្វើរដ្ឋប្រហារដូរទៅជារបបសង្គមនិយម ហើយធ្វើជាតូបនីយកម្មរ៉ែប្រេងកាតធ្វើជាសម្បត្តិរដ្ឋ លុបកិច្ចសន្យាជាមួយក្រុមហ៊ុនអាមេរិកាំងជាស្ថាពរ៕
© 2025, . All rights reserved.