រដ្ឋមន្ត្រីក្រសួងបង្រួបបង្រួមនៃប្រទេសកូរ៉េខាងត្បូង និយាយថា លោកជឿជាក់ថាប្រធានាធិបតីសហរដ្ឋអាមេរិក លោក ដូណាល់ ត្រាំ នឹងអាចជួបមេដឹកនាំកូរ៉េខាងជើង លោក គីម ជុងអ៊ុន អំឡុងទស្សនកិច្ចរបស់លោក ត្រាំ ទៅកាន់ឧបទ្វីបកូរ៉េ នាសប្តាហ៍ក្រោយនេះ។ នេះបើតាមការចេញផ្សាយដោយសារព័ត៌មានបារាំង France 24 ចុះផ្សាយនៅថ្ងៃសុក្រ ទី២៤ តុលា។
លោក ត្រាំ ត្រូវបានរំពឹងថានឹងទៅដល់កូរ៉េខាងត្បូង នៅថ្ងៃទី២៩ ខែតុលា ដើម្បីចូលរួមវេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក ហៅកាត់ថា APEC។
តាមប្រព័ន្ធផ្សព្វផ្សាយអាមេរិក មន្ត្រីរដ្ឋការលោក ត្រាំ បានពិភាក្សាស្ងាត់ៗអំពីការរៀបចំជំនួបរវាងលោកប្រធានាធិបតីអាមេរិក និងលោក គីម ជុងអ៊ុន ជាថ្មីម្ដងទៀត។
មេដឹកនាំទាំងពីរធ្លាប់ជួបគ្នា ៣លើកមកហើយ។ ជំនួបទីមួយនៅប្រទេសសិង្ហបុរី។ ជំនួបទី២ នៅទីក្រុងហាណូយ ប្រទេសវៀតណាម និងចុងក្រោយនៅភូមិ Panmunjom ក្នុងតំបន់គ្មានកងទ័ពតាមព្រំដែនកូរ៉េខាងជើង និងកូរ៉េខាងត្បូង ក្នុងឆ្នាំ២០១៩។ ជំនួបកំពូលលោក គីម ជុងអ៊ុន និងលោក ត្រាំ ផ្ដោតលើការកាត់បន្ថយភាពតានតឹងលើឧបទ្វីប និងកាត់បន្ថយការសាយភាយអាវុធនុយក្លេអ៊ែរ។
លោក Chung Dong-young រដ្ឋមន្ត្រីក្រសួងបង្រួបបង្រួមរបស់កូរ៉េខាងត្បូង ដែលទទួលបន្ទុកកិច្ចការអន្តរកូរ៉េ បាននិយាយថា កូរ៉េខាងជើងកំពុងយកចិត្តទុកដាក់ចំពោះសហរដ្ឋអាមេរិក ហើយសញ្ញាជាច្រើនមកទល់ពេលនេះបានបង្ហាញថា មានលទ្ធភាពច្រើនដែលជំនួបរវាងលោក ត្រាំ និងលោក ជុងអ៊ុន អាចនឹងកើតឡើង ប៉ុន្តែលោក Chung ទទូចដល់មេដឹកនាំទាំងពីរឱ្យរក្សាឱកាសនេះដើម្បីបានជួបគ្នាជាថ្មីម្ដងទៀត។
កាលពីពេលថ្មីៗនេះ លោក ត្រាំ និយាយថា លោកមានក្ដីរំពឹងអាចជួបលោក ជុងអ៊ុន ម្តងទៀត បើអាចទៅរួច គឺក្នុងឆ្នាំ២០២៥ នេះ។ ចំពោះលោក ជុងអ៊ុន វិញ កាលពីខែកញ្ញា ក៏បានរំលឹកថាលោកចងចាំរឿងល្អៗអំពីលោក ត្រាំ ហើយថាទីក្រុងព្យុងយ៉ាង បើកទ្វារចំហចំពោះកិច្ចពិភាក្សា ប្រសិនបើសហរដ្ឋអាមេរិក ទម្លាក់ចោលការទាមទារដែលចង់ឱ្យទីក្រុងព្យុងយ៉ាង បោះបង់អាវុធនុយក្លេអ៊ែររបស់ខ្លួន ព្រោះថាកូរ៉េខាងជើង មិនព្រមធ្វើសម្បទានអ្វីទាំងអស់ទាក់ទងនឹងសំណើអាមេរិកដូចនេះ។
ក្នុងជំនួបនៅសិង្ហបុរី កាលពីឆ្នាំ២០១៨ និងនៅវៀតណាម កាលពីឆ្នាំ២០១៩ លោក គីម ជុងអ៊ុន បានអះអាងចង់ភ្ជាប់ចំណងជាមួយក្រុងវ៉ាស៊ីនតោន ដរាបណាអាមេរិកបញ្ឈប់គំនិតរុញកូរ៉េខាងជើង ឱ្យគ្មានអាវុធនុយក្លេអ៊ែរ។
កូរ៉េខាងជើង បន្តអភិវឌ្ឍកម្មវិធីនុយក្លេអ៊ែរដោយឈានដល់ដំណាក់កាលសាកល្បងជាញឹកញាប់ ហើយបានជោគជ័យទៀតផង។ នៅខែតុលា ឆ្នាំ២០២៥ នេះទៀត ក្រុងព្យុងយ៉ាង បានបង្ហាញមីស៊ីលបាលីស្ទិកអន្តរទ្វីប ICBM ដែលអាចបំពាក់ដោយក្បាលគ្រាប់នុយក្លេអ៊ែរក្នុងពិធីហែក្បួនព្យុហយាត្រានាឱកាសខួប ៨០ឆ្នាំនៃកំណើតបក្សកុម្មុយនីស្ត។ ប្រទេសកូរ៉េខាងជើង អាចមានគ្រាប់នុយក្លេអ៊ែរពី ៤០គ្រាប់ទៅ ៥០គ្រាប់។ នេះបើតាមគេហទំព័រ Global Firepower។
នៅមុនពេលលោក ត្រាំ ទៅដល់ទីក្រុងប៊ូសាន ដែនដីកូរ៉េខាងត្បូង កូរ៉េខាងជើងកាលពីថ្ងៃពុធ ទី២២ តុលា បានបាញ់បង្ហោះមីស៊ីលបាលីស្ទិកជាច្រើនគ្រាប់។ បើតាមប្រភពយោធាកូរ៉េខាងត្បូង ទីក្រុងព្យុងយ៉ាង បានបាញ់មីស៊ីលបាលីស្ទិករយៈខ្លីជាច្រើនគ្រាប់ ចេញពីតំបន់ភាគខាងជើងនៃប្រទេសកុម្មុយនីស្តមួយនេះ។
ការបាញ់មីស៊ីលរបស់ទីក្រុងព្យុងយ៉ាង ជាថ្មីម្ដងទៀតនេះ ប្រព្រឹត្តទៅមួយសប្តាហ៍មុនដំណើរទៅដល់របស់លោក ដូណាល់ ត្រាំ។ លោកប្រធានាធិបតីអាមេរិក ត្រូវទៅបំពេញទស្សនកិច្ចនៅជប៉ុន ចាប់ពីថ្ងៃទី២៧ ដល់ថ្ងៃទី២៩ តុលា បន្ទាប់មកលោកនឹងទៅចូលរួមក្នុងជំនួបកំពូល APEC ដែលនឹងរៀបចំធ្វើនៅប្រទេសកូរ៉េខាងត្បូង នៅថ្ងៃទី៣១ តុលា និងថ្ងៃទី១ វិច្ឆិកា។
នៅខាងក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក នៅកូរ៉េខាងត្បូង សេតវិមានកាលពីថ្ងៃព្រហស្បតិ៍ ទី២៣ ខែតុលា បានឱ្យដឹងថា ប្រធានាធិបតីអាមេរិក លោក ដូណាល់ ត្រាំ នឹងជួបសមភាគីចិន លោក ស៊ី ជីនពីង។ ជំនួបនេះ ត្រូវបានរំពឹងទុកជាយូរមកហើយនឹងប្រព្រឹត្តទៅតាមការគ្រោងទុករវាងមេដឹកនាំប្រទេសមហាអំណាចទាំងពីរនេះ។
អ្នកនាំពាក្យសេតវិមាន អ្នកស្រី Karoline Leavitt បាននិយាយថា លោក ត្រាំ ត្រូវធ្វើដំណើរទៅកាន់ប្រទេសម៉ាឡេស៊ី នៅយប់ថ្ងៃសុក្រ ទី២៤ តុលា ដើម្បីចូលរួមក្នុងកិច្ចប្រជុំកំពូលអាស៊ាន ហើយក្រោយមក ទើបបន្តដំណើរឆ្ពោះទៅកាន់ជប៉ុន និងកូរ៉េខាងត្បូង។
តាមអ្នកស្រី Karoline Leavitt លោក ត្រាំ នឹងត្រូវជួបលោក ស៊ី ជីនពីង នៅថ្ងៃព្រហស្បតិ៍សប្ដាហ៍ក្រោយ បន្ទាប់ពីថ្លែងសុន្ទរកថាទៅកាន់កិច្ចប្រជុំកំពូលកម្រិត CEO នៃកិច្ចសហប្រតិបត្តិការអាស៊ី-ប៉ាស៊ីហ្វិក ក្នុងទីក្រុងប៊ូសាន ប្រទេសកូរ៉េខាងត្បូង។
អ្នកស្រី Karoline Leavitt បញ្ជាក់ថា នៅព្រឹកថ្ងៃព្រហស្បតិ៍ សប្ដាហ៍ក្រោយនេះ លោកប្រធានាធិបតី ត្រាំ នឹងត្រូវចូលរួមក្នុងជំនួបទ្វេភាគីជាមួយលោកប្រធានាធិបតីចិន ស៊ី ជីនពីង មុនត្រឡប់ទៅសហរដ្ឋអាមេរិកវិញ។
គម្រោងនៃជំនួបរវាងលោក ត្រាំ និងលោក ស៊ី ជីនពីង ស្ថិតក្នុងភាពស្រពេចស្រពិលអស់ជាច្រើនសប្ដាហ៍មកនេះ ថាតើជំនួបរវាងមេដឹកនាំទាំងពីរអាចនឹងប្រព្រឹត្តទៅតាមការគ្រោងទុក ឬក៏យ៉ាងណា ស្របពេលសហរដ្ឋអាមេរិក និងចិន កំពុងមានជម្លោះពាណិជ្ជកម្មនឹងគ្នាយ៉ាងខ្លាំង។
ជម្លោះពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង បានផ្ទុះឡើងជាថ្មីក្នុងខែតុលា នេះ ក្រោយពីចិន ប្រកាសដាក់ចេញវិធានការរឹតត្បិតលើការនាំចេញរ៉ែកម្រ។ ករណីនេះ ជំរុញឱ្យលោក ត្រាំ គំរាមដំឡើងពន្ធលើទំនិញនាំចូលពីចិន ១០០ភាគរយ។
ប៉ុន្តែប្រសិនបើមានជំនួបរវាងលោក ដូណាល់ ត្រាំ និងលោក គីម ជុងអ៊ុន អាចមានជាថ្មីម្ដងទៀត វាកើតឡើងក្រោយពីលោក ជុងអ៊ុន បានជួបលោកប្រធានាធិបតីរុស្ស៊ី វ៉្លាឌីមៀ ពូទីន និងលោក ស៊ី ជីនពីង នៅទីក្រុងប៉េកាំង កាលពីថ្ងៃទី២ ខែកញ្ញា ឆ្នាំ២០២៥ ដែលប្រទេសចិន បានរៀបចំមហាព្រឹត្តិការណ៍រំលឹកខួប ៨០ឆ្នាំទិវាជ័យជម្នះបញ្ចប់សង្គ្រាមលោកលើកទី២ លើកងទ័ពជប៉ុន។
ក្នុងជំនួបនោះ មេដឹកនាំមហាមិត្តបីប្រទេសនេះ បានបង្ហាញទំនាក់ទំនងជាយុទ្ធសាស្ត្រភូមិសាស្ត្រនយោបាយយ៉ាងស៊ីជម្រៅ ដែលមិនអាចបំបែកបំបាក់បានឡើយ។ ទាំងចិន និងរុស្ស៊ី សុទ្ធតែប្រទេសមហាអំណាចនុយក្លេអ៊ែរ។ ប្រទេសពីរនេះមិនដែលជួយទប់ស្កាត់ការអភិវឌ្ឍកម្មវិធីនុយក្លេអ៊ែររបស់កូរ៉េខាងជើង ម្ដងណាឡើយ៕
© 2025, . All rights reserved.