ប្រធានាធិបតីកូរ៉េខាងត្បូង លោក លី ជែម្យុង (Lee Jae Myung) គ្រោងជួបនាយករដ្ឋមន្ត្រីកម្ពុជា លោក ហ៊ុន ម៉ាណែត ក្នុងជំនួបដាច់ដោយឡែកមួយអំឡុងពេលចូលរួមកិច្ចប្រជុំកំពូលអាស៊ានក្នុងទីក្រុងកូឡាឡាំពួរ នៅអាទិត្យក្រោយនេះ ជាពិសេសពាក់ព័ន្ធនឹងឧក្រិដ្ឋកម្មឆបោកអនឡាញ។
សារព័ត៌មានកូរ៉េខាងត្បូង YONHAP NEWS AGENCY បានស្រង់សម្ដីទីប្រឹក្សាសន្តិសុខជាតិសាធារណរដ្ឋកូរ៉េ លោក វី ស៊ុងឡាក់ (Wi Sung-lac) នៅថ្ងៃទី២៤ តុលា នេះថា ប្រធានាធិបតីកូរ៉េខាងត្បូង នឹងពិភាក្សាអំពីភាពជាដៃគូយុទ្ធសាស្ត្រជាមួយកម្ពុជា និងបញ្ហាដែលមិនទាន់ដោះស្រាយ ដូចជាឧក្រិដ្ឋកម្មឆបោកតាមអ៊ីនធឺណិត ជាដើម។
ប្រភពដដែល បញ្ជាក់ថា លោក លី ជែម្យុង (Lee Jae Myung) គ្រោងនឹងធ្វើដំណើរទៅកាន់ទីក្រុងកូឡាឡាំពួរ (Kuala Lumpur) ក្នុងបំណងចូលរួមកិច្ចប្រជុំកំពូលអាស៊ាន និងដើម្បីបង្កើនភាពជាដៃគូយុទ្ធសាស្ត្រគ្រប់ជ្រុងជ្រោយជាមួយតំបន់អាស៊ានដែលមានសមាជិកទាំង ១០ នេះផងដែរ។
ទីប្រឹក្សាសន្តិសុខជាតិកូរ៉េ រូបនេះ បញ្ជាក់ថា ប្រធានាធិបតីកូរ៉េខាងត្បូង នឹងបង្ហាញអំពីចក្ខុវិស័យរបស់ខ្លួនសម្រាប់ការពង្រឹងកិច្ចសហប្រតិបត្តិការក្នុងតំបន់ក្នុងអំឡុងពេលកិច្ចប្រជុំកំពូលនេះ មុននឹងចូលរួមក្នុងកិច្ចប្រជុំអាស៊ានបូកបី ដែលមានការចូលរួមពីកូរ៉េខាងត្បូង ជប៉ុន និងចិន នៅពេលនោះ។
កាលពីថ្ងៃទី១១ ខែតុលា ឆ្នាំ២០២៥ ប្រធានាធិបតីកូរ៉េខាងត្បូង លោក លី ជែម្យុង (Lee Jae Myung) បានបញ្ជាឱ្យក្រសួងការបរទេសកូរ៉េ ចាត់វិធានការការទូតគ្រប់សព្វបែបយ៉ាងឆ្លើយតបចំពោះឧក្រិដ្ឋកម្មដែលកើតឡើងជាបន្តបន្ទាប់ក្នុងប្រទេសកម្ពុជា លើពលរដ្ឋកូរ៉េ កន្លងមក។
បទបញ្ជានេះ ធ្វើឡើងបន្ទាប់ពីមានរបាយការណ៍ស្លាប់និស្សិតកូរ៉េខាងត្បូង ម្នាក់ឈ្មោះ Park Minho នៅកម្ពុជា ក្នុងសំណុំរឿងអំពើឆបោកតាមប្រព័ន្ធអនឡាញ ខណៈក្រសួងការបរទេសកូរ៉េខាងត្បូង ក៏ប្រកាសវិធានការចំពោះឧក្រិដ្ឋកម្មនានានៅកម្ពុជា តាមបទបញ្ជារបស់ប្រធានាធិបតីរបស់ខ្លួនភ្លាមៗដែរ ពាក់ព័ន្ធនឹងអំពើឆបោក ការងារក្លែងក្លាយ និងការបង្ខាំងមនុស្សដោយខុសច្បាប់ ជាដើម ដែលមានគោលដៅចំពោះជនជាតិកូរ៉េខាងត្បូង។
ពាក់ព័ន្ធនឹងបញ្ហានេះ សារព័ត៌មានហុងកុង The South China Morning Post កាលពីថ្ងៃទី១៦ ខែតុលា បានរាយការណ៍ថា ពលរដ្ឋកូរ៉េខាងត្បូង ជាច្រើន បានលុបចោលដំណើរកម្សាន្តទៅកាន់ប្រទេសកម្ពុជា ក៏ដូចជាប្រទេសក្បែរខាងកម្ពុជាមួយចំនួនដែរ ក្រោយរដ្ឋាភិបាលក្រុងសេអ៊ូល ដាក់បម្រាមកម្រិតខ្ពស់មិនឱ្យពលរដ្ឋកូរ៉េ ធ្វើដំណើរទៅតំបន់ខ្លះក្នុងប្រទេសកម្ពុជា ដោយព្រមានពីការធ្លាក់ចូលក្នុងអន្ទាក់អំពើឆបោកអនឡាញ។
យ៉ាងណាក៏ដោយ ក្នុងជំនួបជាមួយអនុរដ្ឋមន្ត្រីនៃក្រសួងការបរទេសសាធារណរដ្ឋកូរ៉េ អ្នកស្រី គីម ជីណា កាលពីថ្ងៃទី១៧ ខែតុលា នាយករដ្ឋមន្ត្រីកម្ពុជា លោក ហ៊ុន ម៉ាណែត បញ្ជាក់ថា ជំនួបនេះ កម្ពុជា-កូរ៉េ នឹងបន្តពង្រឹងកិច្ចសហប្រតិបត្តិការរួមគ្នាដើម្បីបង្ការ ទប់ស្កាត់ និងប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា ខណៈរដ្ឋាភិបាលកូរ៉េ ក៏បានសន្យាផ្ដល់ការគាំទ្រលើការងារបណ្ដុះបណ្ដាល បំប៉នសមត្ថភាព ចែករំលែកព័ត៌មាន និងផ្លាស់ប្ដូរបទពិសោធជាមួយកម្ពុជា ផងដែរ។
ជុំវិញបញ្ហានេះ ក្រសួងការបរទេស និងសហប្រតិបត្តិការអន្តរជាតិកម្ពុជា កាលពីថ្ងៃទី២៣ ខែតុលា បានចេញសេចក្តីថ្លែងការណ៍ថា តាមរយៈកិច្ចសហប្រតិបត្តិការ មិនមែនជាការស្ដីបន្ទោសនោះទេ ខណៈកម្ពុជា នឹងបន្តស្វែងរកឧក្រិដ្ឋជន ការពារ និងសង្គ្រោះជនរងគ្រោះ ព្រមទាំងរក្សាសុខសុវត្ថិភាព សណ្ដាប់ធ្នាប់សង្គម និងសេចក្តីថ្លៃថ្នូររបស់មនុស្សគ្រប់ៗគ្នា។
ពាក់ព័ន្ធនឹងបញ្ហានេះ កាលពីថ្ងៃទី១៣ ខែតុលា ឆ្នាំ២០២៥ សភាអាមេរិក បានចេញសេចក្តីព្រាងច្បាប់លេខ H.R 5490 ក្នុងគោលបំណងដាក់ប្រទេសកម្ពុជា ក្នុងបញ្ជីខ្មៅ និងស្នើដាក់ទណ្ឌកម្មលើមន្ត្រីរដ្ឋាភិបាលគ្រាក់ៗ និងឧកញ៉ាខ្មែរមួយចំនួនផងដែរ ដូចជា លោក ឌី វិជ្ជា លោក នេត សាវឿន លោក គួច ចំរើន លោក ស សុខា ឧកញ៉ា ហ៊ុន តូ និងឧកញ៉ា កុក អាន រួមទាំងមនុស្សជាង ៣០នាក់ផ្សេងទៀតដែលភាគច្រើនជាឧក្រិដ្ឋជនជនជាតិចិន៕
© 2025, . All rights reserved.