សមត្ថកិច្ចឃាត់ខ្លួនជនបរទេសចំនួន ៦៥នាក់ ដែលពាក់ព័ន្ធនឹងបទល្មើសឆបោកតាមប្រព័ន្ធអនឡាញក្នុងរាជធានីភ្នំពេញ និងខេត្តកំពត ក្រោមរូបភាពប្រើប្រាស់វិធីសាស្ត្រឆបោកលួងលោមស្នេហា (Romance scam) និងមានគោលដៅឆបោកទៅកាន់ប្រទេសផ្សេងៗទៀត។
យោងតាមរបាយការណ៍របស់អ្នកនាំពាក្យក្រសួងព័ត៌មាន លោក ទេព អស្នារិទ្ធ បានឲ្យដឹងថា នៅថ្ងៃទី២៨ ខែតុលា ឆ្នាំ២០២៥ សមត្ថកិច្ចចម្រុះ ចុះពិនិត្យ និងបង្ក្រាបករណីឆបោកតាមប្រព័ន្ធបច្ចេកវិទ្យានៅទីតាំងបន្ទប់ B17-05 ស្ថិតនៅអគារខុនដូរវិមានកុលាប ក្នុងសង្កាត់ទន្លេបាសាក់ខណ្ឌចំការមន រាជធានីភ្នំពេញ ឃាត់ខ្លួនបានបុរសជនជាតិចិន ជាជនសង្ស័យចំនួន ៧នាក់។
ប្រភពដដែលបានឲ្យដឹងថា ក្នុងប្រតិបត្តិការនេះ សមត្ថកិច្ចដកហូតបានសម្ភារៈមួយចំនួនដូចជា កុំព្យូទ័រ ៥គ្រឿង ម៉ូនីទ័រចំនួន ២គ្រឿង CPU ចំនួន ២គ្រឿង និងទូរសព្ទដៃចំនួន ៣២គ្រឿង។
សមត្ថកិច្ចជំនាញឲ្យដឹងថា ក្រុមជនសង្ស័យទាំងនោះបានសារភាពថា ពួកគេបានប្រើប្រាស់វិធីសាស្ត្រឆបោកក្រោមរូបភាពជាការលួងលោមស្នេហា (Romance scam) និងមានគោលដៅឆបោកទៅកាន់ប្រទេសផ្សេងៗទៀត។
ពាក់ព័ន្ធនឹងបទល្មើសឆបោកតាមប្រព័ន្ធអនឡាញនេះ នៅថ្ងៃទី២៨ ខែតុលា ដដែល កម្លាំងនគរបាលខេត្តកំពត ក៏បានចុះបង្ក្រាបទីតាំងសង្ស័យ ស្ថិតក្នុងទីតាំងក្រោណ៩៥ ភូមិរលួស សង្កាត់បឹងឈូក ក្រុងបូកគោ ខេត្តកំពត ដោយបានឃាត់ខ្លួនជនជាតិវៀតណាម ចំនួន ៥៨នាក់។
ប្រភពដដែលបានឲ្យដឹងថា ក្នុងប្រតិបត្តិការបង្ក្រាបនេះមានមុខសញ្ញាក្នុងដីកាតាមចាប់ខ្លួនចំនួន ០៧នាក់ និងបានដកហូតសម្ភារៈជាវត្ថុតាងរួមមាន កុំព្យូទ័រចំនួន ៦៣គ្រឿង PC២គ្រឿង ម៉ូនីទ័រ ៣គ្រឿង និងទូរសព្ទដៃចំនួន ៤៨គ្រឿង។ ក្រោយការធ្វើកោសល្យវិច័យលើឧបករណ៍អេឡិចត្រូនិក និងវត្ថុតាងដែលប្រមូលបាន សមត្ថកិច្ចរកឃើញថា ទីតាំងនោះបានប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ក្រោមរូបភាពវិនិយោគពាក់ព័ន្ធនឹងរូបិយវត្ថុឌីជីថលលើគេហទំព័រក្លែងក្លាយ និងគ្មានប្រភពច្បាស់លាស់ដែលមានគោលដៅទៅប្រទេសផ្សេងៗ។
ជនសង្ស័យ និងវត្ថុតាងដែលរឹបអូសបាន ត្រូវបានប្រគល់ជូនអគ្គនាយកដ្ឋានអន្តោប្រវេសន៍ និងសមត្ថកិច្ចពាក់ព័ន្ធ ដើម្បីអនុវត្តតាមនីតិវិធីច្បាប់។ សមត្ថកិច្ចជំនាញ កំពុងសហការជាមួយភាគីពាក់ព័ន្ធ ដើម្បីបន្តស្រាវជ្រាវបន្ថែមទៀតឈានទៅចាត់វិធានការផ្លូវច្បាប់ចំពោះមេខ្លោងនៃការឆបោកតាមប្រព័ន្ធបច្ចេកវិទ្យានេះ។
យោងតាមរបាយការណ៍របស់គណៈកម្មការចំពោះកិច្ចប្រយុទ្ធប្រឆាំងបទល្មើសបច្ចេកវិទ្យា ក្នុងរយៈពេល ៤ខែចុងក្រោយ ឆ្នាំ២០២៥ នេះ សមត្ថកិច្ចកម្ពុជា បានឃាត់ខ្លួនជនសង្ស័យជាង ៣៤០០នាក់ពាក់ព័ន្ធនឹងបទល្មើសឆបោកតាមប្រព័ន្ធអនឡាញ។ ដំណាលគ្នានេះ មេខ្លោង រួមនឹងបក្ខពួកសរុប ៧៥នាក់ត្រូវបានបញ្ជូនទៅតុលាការ។
យ៉ាងណាក៏ដោយ ក្នុងជំនួបជាមួយអនុរដ្ឋមន្ត្រីនៃក្រសួងការបរទេសសាធារណរដ្ឋកូរ៉េ អ្នកស្រី គីម ជីណា កាលពីថ្ងៃទី១៧ ខែតុលា នាយករដ្ឋមន្ត្រីកម្ពុជា លោក ហ៊ុន ម៉ាណែត បញ្ជាក់ថា ជំនួបនេះ កម្ពុជា-កូរ៉េនឹងបន្តពង្រឹងកិច្ចសហប្រតិបត្តិការរួមគ្នាដើម្បីបង្ការ ទប់ស្កាត់ និងប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា ខណៈរដ្ឋាភិបាលកូរ៉េ ក៏បានសន្យាផ្ដល់ការគាំទ្រលើការងារបណ្ដុះបណ្ដាល បំប៉នសមត្ថភាព ចែករំលែកព័ត៌មាន និងផ្លាស់ប្ដូរបទពិសោធជាមួយកម្ពុជាផងដែរ។
ពាក់ព័ន្ធនឹងបញ្ហានេះ កាលពីថ្ងៃទី១៣ ខែតុលា ឆ្នាំ២០២៥ សភាអាមេរិក បានចេញសេចក្តីព្រាងច្បាប់លេខ H.R 5490 ក្នុងគោលបំណងដាក់ប្រទេសកម្ពុជា ក្នុងបញ្ជីខ្មៅ និងស្នើដាក់ទណ្ឌកម្មលើមន្ត្រីរដ្ឋាភិបាលគ្រាក់ៗ និងឧកញ៉ាខ្មែរយ៉ាងតិច ៤៣នាក់ផងដែរ ដូចជា លោក ឌី វិជ្ជា លោក នេត សាវឿន លោក គួច ចំរើន លោក ស សុខា ឧកញ៉ា ហ៊ុន តូ អ្នកស្រី ជូ ប៊ុនអេង ឧកញ៉ា កុក អាន រួមទាំងមនុស្សជាង ៣០នាក់ផ្សេងទៀតដែលភាគច្រើនជាឧក្រិដ្ឋជនជនជាតិចិន ដែលគេរកឃើញថារួមគំនិតជួយបិទបាំង ការពារ និងបានផលប្រយោជន៍ពីសហគ្រាសឧក្រិដ្ឋកម្មនេះ៕
© 2025, . All rights reserved.