សមត្ថកិច្ចសិង្ហបុរី កំពុងតាមចាប់ខ្លួនបណ្ដាញក្រុមឧក្រិដ្ឋជនឆបោកអនឡាញជនជាតិសិង្ហបុរី និងជនជាតិម៉ាឡេស៊ី ចំនួន ៣៤នាក់ ដែលមានបណ្ដាញឆបោកអនឡាញចេញពីប្រទេសកម្ពុជា បន្ទាប់ពីបានឆបោកយកប្រាក់ពីជនរងគ្រោះជាជនជាតិសិង្ហបុរី ប្រមាណ ៣១លានដុល្លារសហរដ្ឋអាមេរិក តាមរយៈការក្លែងបន្លំធ្វើជាមន្ត្រីរដ្ឋាភិបាលសិង្ហបុរី។
យោងតាមការផ្សាយក្នុងទូរទស្សន៍សិង្ហបុរី CNA កាលពីថ្ងៃទី២៩ ខែតុលា ឆ្នាំ២០២៥ ក្រុមជនសង្ស័យទាំង ៣៤នាក់ដែលសមត្ថកិច្ចសិង្ហបុរី កំពុងតាមចាប់ខ្លួន បច្ចុប្បន្នពុំមានវត្តមានក្នុងប្រទេសសិង្ហបុរី នោះទេ ខណៈពួកគេមានបណ្ដាញឆបោកអនឡាញចេញពីប្រទេសកម្ពុជា។
ជនសង្ស័យទាំង ៣៤នាក់ មានជនជាតិសិង្ហបុរី ចំនួន ២៧នាក់ និងជនជាតិម៉ាឡេស៊ី ចំនួន ៧នាក់។ ពួកគេពុំស្ថិតនៅក្នុងប្រទេសសិង្ហបុរី និងប្រទេសកម្ពុជា នោះទេ សមត្ថកិច្ចកំពុងធ្វើការជាមួយប៉ូលិសអាំងទែរប៉ូល ដើម្បីកំណត់ទីតាំងដើម្បីឈានទៅដល់ការចាប់ខ្លួនពួកគេ។
ប្រភពដដែលបានឲ្យដឹងថា ពួកគេបានក្លែងបន្លំធ្វើជាមន្ត្រីរដ្ឋាភិបាលសិង្ហបុរី ហើយបានឆបោកប្រាក់ពីជនរងគ្រោះប្រមាណ ៣១,៧លានដុល្លារសហរដ្ឋអាមេរិក ក្នុងបទល្មើសចំនួន ៤៣៨ករណី។ តែនៅថ្ងៃទី៩ ខែកញ្ញា ឆ្នាំ២០២៥ ក្រោយសមត្ថកិច្ចសិង្ហបុរី បានសហការជាមួយអគ្គស្នងការនគរបាលជាតិកម្ពុជា ក្រុមបណ្ដាញឧក្រិដ្ឋជនឆបោកអនឡាញទាំងនោះត្រូវបានកំណត់អត្តសញ្ញាណ ដោយពួកគេពិតជាជាប់ពាក់ព័ន្ធនឹងឧក្រិដ្ឋកម្មអនឡាញក្នុងប្រទេសកម្ពុជា។
ថ្លែងក្នុងពិធីបើកសិក្ខាសាលាស្ដីពីការផ្លាស់ប្ដូរបទពិសោធក្នុងការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា និងការសម្អាតសាច់ប្រាក់ នៅថ្ងៃទី៨ ខែតុលា លោក ស សុខា លើកឡើងថា រដ្ឋាភិបាលកាលពីអាណត្តិទី៦ បានបណ្ដេញចេញជនបរទេសពាក់ព័ន្ធនឹងបទល្មើសអនឡាញជាង ២ម៉ឺន ១ពាន់នាក់ក្នុងមួយអាណត្តិ។ នៅក្នុងនីតិកាលទី៧ ប្រមាណ ២ឆ្នាំនេះ រដ្ឋាភិបាលក៏បានបណ្ដេញចេញជនបរទេសជាង ១ម៉ឺន ៥ពាន់នាក់ផងដែរ។
លោក ស សុខា បន្ថែមទៀតថា ការបណ្ដេញជនបរទេសទាំងនេះ បានឆ្លុះបញ្ចាំងឱ្យឃើញថា រាជរដ្ឋាភិបាលនីតិកាលទី៧ បានយកចិត្តទុកដាក់ខ្ពស់ទៅលើកិច្ចការងារបទល្មើសអនឡាញ។ លោកថា ការបង្ក្រាបបទល្មើសអនឡាញ មិនមែនមានតែកម្ពុជា នោះទេដែលទទួលខុសត្រូវ គឺបណ្ដាប្រទេសនានាត្រូវស្វែងយល់ពីគ្នាទៅវិញទៅមក ដើម្បីរួមគ្នាបង្ក្រាបបទល្មើសអនឡាញនេះ។
គួរកត់សម្គាល់ថា៖ ឧកញ៉ាវ័យក្មេងជនជាតិចិន សញ្ជាតិខ្មែរ ឈ្មោះ ចេន ហ្ស៊ី ឈ្មោះអង់គ្លេស Vincent ថៅកែក្រុមហ៊ុន Prince Group ដើមឡើយជាទីប្រឹក្សាលោក ស ខេង បន្ទាប់មកទីប្រឹក្សាលោក ស សុខា ដែលមានចំណែកក្នុងក្រុមហ៊ុន ជីនប៉ី (Jinbei) មួយរយៈ មុននឹងលោក ហ៊ុន សែន យកទៅធ្វើទីប្រឹក្សាលោកផ្ទាល់។
យោងតាមលេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ក្នុងរយៈពេល ៤ខែចុងក្រោយឆ្នាំ២០២៥ នេះ សមត្ថកិច្ចបានចុះពិនិត្យ និងបង្ក្រាបទីតាំងចំនួន ៩២កន្លែង គ្របដណ្ដប់លើ១៨ រាជធានី និងខេត្ត។ លទ្ធផលចុងក្រោយ សមត្ថកិច្ចបានឃាត់ខ្លួនជនសង្ស័យសរុប ៣៤៥៥នាក់ មាន ២០សញ្ជាតិ មានជនបរទេសចំនួន ២៨២៥នាក់ ត្រូវបានចាប់បញ្ជូនចេញពីប្រទេសកម្ពុជា៕
© 2025, . All rights reserved.