តុលាការខេត្តតាកែវ សម្រេចចោទប្រកាន់សកម្មជននយោបាយបក្សប្រឆាំង លោក ហ៊ុន យុទ្ធ ឬ ភុន យុទ្ធ ហៅ ភាន អំពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៥ នៃក្រមព្រហ្មទណ្ឌ។
សាលាដំបូងខេត្តតាកែវ បានចេញសេចក្តីប្រកាសព័ត៌មានកាលពីថ្ងៃទី៣០ ខែតុលា ដែលទើបនឹងត្រូវបានផ្សព្វផ្សាយនៅថ្ងៃទី៣១ តុលា ថា អយ្យការអមសាលាដំបូងតាកែវ សម្រេចចោទប្រកាន់ជនសង្ស័យឈ្មោះ ហ៊ុន យុទ្ធ ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» បន្ទាប់ពីសាកសួរចម្លើយជនសង្ស័យរួចរាល់។
ប្រភពដដែល អះអាងថា កាលពីថ្ងៃទី២៩ ខែតុលា កម្លាំងសមត្ថកិច្ចនៃស្នងការដ្ឋាននគរបាលខេត្តតាកែវ បានបញ្ជូនសំណុំរឿងពាក់ព័ន្ធករណីញុះញង់ឱ្យប្រព្រឹត្តបទឧក្រិដ្ឋជាអាទិ៍នៃជនសង្ស័យឈ្មោះ ហ៊ុន យុទ្ធ ដែលបានប្រព្រឹត្តនៅលើបណ្ដាញសង្គមហ្វេសប៊ុកចំនួន ៣លើក។
សាលាដំបូងខេត្តតាកែវ បញ្ជាក់ថា តាមរយៈចម្លើយសារភាពរបស់ជនសង្ស័យ តុលាការបានរកឃើញថា ឈ្មោះ ហ៊ុន យុទ្ធ បានប្រព្រឹត្តល្មើសមាត្រា៤៩៥ នៃក្រមព្រហ្មទណ្ឌនៅលើបណ្ដាញទំនាក់ទំនងសង្គមហ្វេសប៊ុកកាលពីថ្ងៃទី២០ ខែកញ្ញា ថ្ងៃទី២០ និងថ្ងៃទី២៥ ខែតុលា ឆ្នាំ២០២៥ នេះ។
សេចក្តីប្រកាសព័ត៌មាននេះ ធ្វើឡើងបន្ទាប់ពីសមត្ថកិច្ចស្រុកទ្រាំង បានចុះទៅព័ទ្ធផ្ទះ និងចាប់ខ្លួនលោក ហ៊ុន យុទ្ធ កាលពីថ្ងៃពុធ កន្លងទៅនេះ។
ក្នុងវីដេអូឃ្លីបប្រវែងជិតមួយនាទី ត្រូវបានលោក ហ៊ុន យុទ្ធ បង្ហោះលើបណ្ដាញសង្គមហ្វេសប៊ុក មុនពេលសមត្ថកិច្ចចាប់ខ្លួន ដោយបញ្ជាក់ថា នគរបាលបាននាំគ្នាមកចាប់ខ្លួនលោកហើយ ខណៈរូបលោកមិនដឹងថាខ្លួនឯងបានប្រព្រឹត្តបទល្មើសអ្វីនោះទេ។
មុនពេលសមត្ថកិច្ចចាប់ខ្លួន លោក ហ៊ុន យុទ្ធ បានរិះគន់រដ្ឋាភិបាលកម្ពុជា លើបណ្ដាញទំនាក់ទំនងសង្គមហ្វេសប៊ុកជាបន្តបន្ទាប់ ក្រោយពីមានសេរីភាពឡើងវិញប្រមាណជា ១ខែ ក្នុងនោះ លោក ហ៊ុន យុទ្ធ បានរិះគន់ពីចំនួនមន្ត្រីរដ្ឋាភិបាលដែលមានចំនួនច្រើនហួសហេតុ និងលើកឡើងពីការលុបបំបាត់ជនជាតិវៀតណាម ដែលកំពុងរស់នៅដោយខុសច្បាប់លើទឹកដីកម្ពុជា ផងដែរ។
យោងតាមបទចោទដែលតុលាការបានសម្រេចនាពេលនេះ លោក ហ៊ុន យុទ្ធ ទំនងជាត្រូវជាប់ពន្ធនាគារ ១ឆ្នាំ ៦ខែ ជាលើកទី៣ ដូចពេលមុនៗដែរ។
លោក ហ៊ុន យុទ្ធ ជាជនពិការជើងពីកំណើត រស់នៅភូមិត្រពាំងឈូក ឃុំត្រឡាច ស្រុកទ្រាំង ខេត្តតាកែវ ត្រូវសមត្ថកិច្ចចាប់ខ្លួនចំនួនពីរលើករួចមកហើយកាលពីឆ្នាំ២០១៩ និងឆ្នាំ២០២៤។
យ៉ាងណាក៏ដោយ អង្គការ Freedom House បានចេញរបាយការណ៍របស់ខ្លួនកាលពីពេលកន្លងទៅថា ប្រទេសកម្ពុជាជាប់ចំណាត់ថ្នាក់លេខរៀងទី៨ ក្នុងចំណោមប្រទេសទាំង១១ ក្នុងតំបន់អាស៊ាន ជាប្រទេសល្បីល្បាញខាងគាបសង្កត់សេរីភាពនយោបាយ សេរីភាពបញ្ចេញមតិ សិទ្ធិមូលដ្ឋានរបស់ប្រជាពលរដ្ឋ និងបំបិទប្រព័ន្ធផ្សព្វផ្សាយឯករាជ្យ។
ពាក់ព័ន្ធនឹងបញ្ហានេះ អង្គការគម្រោងយុត្តិធម៌ពិភពលោក World Justice Project (WJP) បានចេញផ្សាយរបាយការណ៍ស្ដីពីចំណាត់ថ្នាក់នីតិរដ្ឋរបស់ប្រទេសចំនួន ១៤៣ នៅលើពិភពលោក សម្រាប់ឆ្នាំ២០២៥ នេះ ក្នុងនោះ កម្ពុជាជាប់ចំណាត់ថ្នាក់លេខរៀងទី១៤១ ដោយសារគេរកឃើញការដឹកនាំគ្មានតម្លាភាព ការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌តាមផ្លូវតុលាការ ជាដើម៕
© 2025, . All rights reserved.