រដ្ឋមន្ត្រីការបរទេសកូរ៉េខាងត្បូង បំពេញទស្សនកិច្ចនៅកម្ពុជា ៣ថ្ងៃដើម្បីពិភាក្សាការបង្ក្រាបឧក្រិដ្ឋកម្មអនឡាញ

រដ្ឋមន្ត្រីក្រសួងការបរទេសកូរ៉េខាងត្បូង លោក Cho Hyun នឹងមកបំពេញទស្សនកិច្ចផ្លូវការនៅកម្ពុជា រយៈពេល ៣ថ្ងៃ ចាប់ពីថ្ងៃទី៩ ដល់ថ្ងៃទី១១ ខែវិច្ឆិកា ឆ្នាំ២០២៥ ដើម្បីពិភាក្សា និងបង្កើនកិច្ចសហប្រតិបត្តិការបង្ក្រាបឧក្រិដ្ឋកម្មអនឡាញ។

យោងតាមការជូនដំណឹងរបស់ការិយាល័យអ្នកនាំពាក្យនៃក្រសួងការបរទេសកូរ៉េខាងត្បូង កាលពីថ្ងៃទី៦ ខែវិច្ឆិកា ឆ្នាំ២០២៥ បានឲ្យដឹងថា ក្នុងដំណើរទស្សនកិច្ចរយៈពេល ៣ថ្ងៃនៅកម្ពុជា ចាប់ពីថ្ងៃទី៩ ដល់ថ្ងៃទី១១ វិច្ឆិកា រដ្ឋមន្ត្រីក្រសួងការបរទេស លោក Cho Hyun នឹងត្រៀមជួបជាមួយថ្នាក់ដឹកនាំជាន់ខ្ពស់ក្នុងជួររដ្ឋាភិបាលកម្ពុជា ដូចជា លោក ស សុខា រដ្ឋមន្ត្រីក្រសួងមហាផ្ទៃ និងលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា ដើម្បីជជែកអំពីការបង្កើនទំនាក់ទំនងទ្វេភាគី ជាពិសេសការបង្ក្រាបបទល្មើសឆបោកតាមប្រព័ន្ធបច្ចេកវិទ្យា។

ប្រភពដដែលបានលើកឡើងថា តាមរយៈដំណើរទស្សនកិច្ចរបស់លោក Cho Hyun នៅកម្ពុជា បញ្ហាឆបោកអនឡាញនៅប្រទេសកម្ពុជា ឬប្រទេសក្នុងតំបន់អាស៊ាន នឹងអាចដោះស្រាយបាន និងអាចជួយសង្គ្រោះពលរដ្ឋកូរ៉េខាងត្បូង ដែលធ្លាក់ចូលក្នុងសកម្មភាពខុសច្បាប់ទាំងនោះ។

កាលពីថ្ងៃទី១៦ ខែតុលា លោក ហ៊ុន ម៉ាណែត នាយករដ្ឋមន្ត្រីកម្ពុជា បានជួបពិភាក្សាការងារជាមួយអ្នកស្រី គីម ជីណា អនុរដ្ឋមន្ត្រីទី២ នៃក្រសួងការបរទេសកូរ៉េខាងត្បូង។ ក្នុងជំនួបនោះ ប្រមុខរាជរដ្ឋាភិបាលកម្ពុជា អះអាងថា ប្រទេសទាំងពីរមានសមត្ថភាព និងលទ្ធភាពគ្រប់គ្រាន់ក្នុងកិច្ចសហការទ្វេភាគី ដើម្បីដោះស្រាយបញ្ហាឆបោកអនឡាញ ជាពិសេសពាក់ព័ន្ធនឹងជនជាតិកូរ៉េ នៅកម្ពុជា។

ទាក់ទងទៅនឹងបទល្មើសឆបោកអនឡាញ (online scams) នេះ កាលពីថ្ងៃទី២២ ខែតុលា ឆ្នាំ២០២៥ ដោយមានការចូលរួមដោយផ្ទាល់ពីក្រុមតំណាងកូរ៉េខាងត្បូង សមត្ថកិច្ចកម្ពុជា បានឃាត់ខ្លួនជនបរទេសចំនួន ៨៦នាក់ ក្នុងនោះមានជនជាតិកូរ៉េ ចំនួន ៥៧នាក់ និងជនជាតិចិន ចំនួន ២៩នាក់។

បើតាមរបាយការណ៍របស់លេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ដែលចេញផ្សាយកាលពីថ្ងៃទី១៥ ខែតុលា ឆ្នាំ២០២៥ ឲ្យដឹងថា រយៈពេល ៤ខែចុងក្រោយឆ្នាំ២០២៥ នេះ គឺចាប់ពីថ្ងៃទី២៧ ខែមិថុនា ដល់ថ្ងៃទី១៤ ខែតុលា ឆ្នាំ២០២៥ សមត្ថកិច្ចឃាត់ខ្លួនជនបរទេសដែលសង្ស័យជាប់ពាក់ព័ន្ធនឹងបទល្មើសឆបោកតាមអនឡាញសរុបចំនួន ៣៤៥៥នាក់។

របាយការណ៍ដដែលបង្ហាញថា ជនសង្ស័យចម្រុះជាតិសាសន៍ចំនួន ២០សញ្ជាតិនេះ ត្រូវបានឃាត់ខ្លួននៅតាមបណ្តារាជធានី-ខេត្ត ចំនួន១៨ ហើយសមត្ថកិច្ចក៏បានបញ្ជូនមុខសញ្ញាមេខ្លោង និងបក្ខពួកចំនួន ៧៥នាក់ទៅតុលាការផងដែរ៕

ព័ត៌មានជាតិ

By ឌឹ ខេមបូឌា ដេលី

November 09, 2025