ប្រធានាធិបតីហ្វីលីពីន លោក Ferdinand Marcos Jr ព្រមានថា ជនទាំងឡាយណាដែលនៅពីក្រោយការប្រព្រឹត្តអំពើពុករលួយក្នុងគម្រោងហេដ្ឋារចនាសម្ព័ន្ធគ្រប់គ្រងទឹកជំនន់ នឹងត្រូវចាប់ខ្លួន។
តាមទីភ្នាក់ងារព័ត៌មាន AFP ការព្រមានរបស់លោក Marcos Jr បន្ទាប់ពីប្រទេសដែនកោះមួយនេះទើបទទួលរងគ្រោះសាជាថ្មីដោយសារព្យុះទីហ្វុងធំៗចំនួនពីរ បណ្ដាលឱ្យជន់លិចយ៉ាងធ្ងន់ធ្ងរ។ ម្ចាស់ក្រុមហ៊ុនសំណង់ មន្ត្រីរដ្ឋាភិបាល និងសមាជិកសភាជាច្រើននាក់ដែលរួមមានទាំងបងប្អូនជីដូនមួយលោក Macros ផ្ទាល់ផង ត្រូវបានចោទប្រកាន់ថាលួចកិបកេងមូលនិធិសម្រាប់គម្រោងកសាងហេដ្ឋារចនាសម្ព័ន្ធការពារគ្រោះទឹកជំនន់។
ក្រសួងហិរញ្ញវត្ថុនៃប្រទេសហ្វីលីពីន ប្រកាសថា សេដ្ឋកិច្ចក្នុងប្រទេសបានរងការខាតបង់ខ្ទង់ ២ពាន់លានដុល្លារ ចាប់ពីឆ្នាំ២០២៣ ដល់ឆ្នាំ២០២៥ ដោយសារតែអំពើពុករលួយដ៏អសោចក្នុងគម្រោងនេះ។
លោកប្រធានាធិបតីហ្វីលីពីន បានថ្លែងប្រាប់អ្នកសារព័ត៌មានថា ការកសាងសំណុំរឿងព្រហ្មទណ្ឌដើម្បីចោទជនសង្ស័យជាប់ពាក់ព័ន្ធក្នុងរឿងអាស្រូវពុករលួយនេះ នឹងត្រូវបញ្ចប់ឆាប់ៗនេះ ដែលបុគ្គលទាំងនោះនឹងមិនមានឱកាសនៅប្រារព្ធថ្ងៃបុណ្យកំណើតព្រះយេស៊ូ Christmas ឬណូអែល (Noel) ខាងមុខនេះទេ។
កាលពីខែកក្កដា លោក Marcos បានលើកបញ្ហានេះឡើង ខណៈសាធារណជនហ្វីលីពីន បានផ្ទុះកំហឹងយ៉ាងខ្លាំង។ ពួកគេចេញតវ៉ាដើរតាមដងផ្លូវនៅទីក្រុងម៉ានីល រាប់ពាន់នាក់។
ជាមួយគ្នានេះ អ្នកសារព័ត៌មានបានចោទសួរអំពីករណីលោក Martin Romualdez ជាបងជីដូនមួយរបស់លោក ដែលមានមុខនាទីជាប្រធានរដ្ឋសភាហ្វីលីពីន ក្នុងសំណុំរឿងពុករលួយនេះ។ លោក Marcos បានឆ្លើយតបថា រដ្ឋអាជ្ញាកំពុងតែពិនិត្យភស្តុតាង។ លោក Marcos ព្រមានថានឹងពុំមានបុគ្គលណាម្នាក់ត្រូវបានលើកលែងពីការស៊ើបអង្កេតឡើយ រួមទាំងលោក Martin Romualdez ផង៕
© 2025, . All rights reserved.