ប្រធានាធិបតីរុស្ស៊ី លោក វ៉្លាឌីមៀ ពូទីន កាលពីថ្ងៃព្រហស្បតិ៍ ទី២៧ ខែវិច្ឆិកា បាននិយាយថា លោកនឹងបិទបញ្ចប់សង្គ្រាមអ៊ុយក្រែន ប្រសិនបើទីក្រុងគៀវ យល់ព្រមដកទ័ពចេញពីសមរភូមិដែលទ័ពអ៊ុយក្រែន កំពុងប្រយុទ្ធដណ្ដើមពីកងទ័ពរុស្ស៊ី ដោយព្រមានថា កងកម្លាំងរុស្ស៊ី នឹងបន្តធ្វើសង្គ្រាមដើម្បីដណ្ដើមយកទឹកដីទាំងនោះឱ្យទាល់តែបាន។ នេះបើតាមការចេញផ្សាយដោយទីភ្នាក់ងារសារព័ត៌មានអ៊ុយក្រែន RBC។
កងទ័ពរុស្ស៊ី កំពុងមានភាពរីកចម្រើននៅក្នុងតំបន់ភាគខាងកើត និងភាគខាងត្បូងអ៊ុយក្រែន ដោយវាយដណ្ដើមបានទឹកដីអ៊ុយក្រែន ជាបន្តបន្ទាប់ បើទោះជាកងទ័ពអ៊ុយក្រែន ព្យាយាមវាយបកយ៉ាងណាក៏ដោយ។
ក្នុងទស្សនកិច្ចទៅកាន់ប្រទេសកៀហ្ស៉ីស៊ីស្ថាន (Kyrgyzstan) ជាថ្មីម្ដងទៀត លោក ពូទីន បានទាមទារថា ប្រសិនបើកងកម្លាំងអ៊ុយក្រែន ដកចេញពីទឹកដីដែលទ័ពរុស្ស៊ី កំពុងដណ្ដើមបាន នោះរុស្ស៊ី នឹងព្រមអនុវត្តបទឈប់បាញ់ភ្លាម តែប្រសិនបើអ៊ុយក្រែន មិនព្រមទេ រុស្ស៊ីនឹងបន្តសង្គ្រាមលុះត្រាតែសម្រេចគោលដៅរបស់ខ្លួន។
ចាប់តាំងពីសង្គ្រាមផ្ទុះឡើង ទ័ពរុស្ស៊ី វាយកាន់កាប់បានផ្ទៃដីពីអ៊ុយក្រែន ជិត ២០ភាគរយ រាប់ទាំងតំបន់គ្រីមៀរ ដែលរុស្ស៊ី ឱបក្រសោបយកពីអ៊ុយក្រែន នៅឆ្នាំ២០១៤ តាមរយៈលោក Viktor Yanukovych ប្រធានាធិបតីអ៊ុយក្រែន ដែលចុះហត្ថលេខាកាត់ដែនដីជ្រោយសមុទ្រខ្មៅទៅឱ្យលោកពូទីន ជាថ្នូរនឹងសន្តិភាព។ ប្រទេសអ៊ុយក្រែន មានផ្ទៃដីសរុប ៦០៣៦២៨គីឡូម៉ែត្រការ៉េ។
បញ្ហាទឹកដីនេះដែរ ត្រូវបានទីក្រុងគៀវ ជាពិសេសលោក ហ្សេឡេនស្គី សច្ចាថានឹងមិនបោះបង់ចោលដាច់ខាត បើទោះជាវាក្លាយជាឧបសគ្គរាំងស្ទះដល់ដំណើរការស្វែងរកសន្តិភាពក៏ដោយ។
លោក វ៉្លាឌីមៀ ពូទីន ប្រធានាធិបតីរុស្ស៊ី បានប្រកាសថា សេចក្តីព្រាងផែនការសន្តិភាពដែលបានពិភាក្សាដោយសហរដ្ឋអាមេរិក និងអ៊ុយក្រែន អាចក្លាយជាមូលដ្ឋានសម្រាប់កិច្ចព្រមព្រៀងបញ្ចប់សង្គ្រាម ប៉ុន្តែលោក ពូទីន បានព្រមានថា រុស្ស៊ីនឹងបន្តសង្គ្រាម ប្រសិនបើលក្ខខណ្ឌរបស់រុស្ស៊ី ដាក់ទៅលើអ៊ុយក្រែន មិនត្រូវបានគាំទ្រ និងព្រមព្រៀង។
លោក ពូទីន ទទួលស្គាល់ថាវាជាមូលដ្ឋានសម្រាប់កិច្ចព្រមព្រៀងនាពេលអនាគត។ មេដឹកនាំវិមានក្រឹមឡាំង ក៏បានបង្ហាញឆន្ទៈក្នុងការសន្យាថានឹងមិនវាយប្រហារអឺរ៉ុប ឱ្យតែអឺរ៉ុប គាបអ៊ុយក្រែន ឱ្យព្រមកាត់ទឹកដីឱ្យរុស្ស៊ី។
មេដឹកនាំរុស្ស៊ី រូបនេះបានដាក់លក្ខខណ្ឌថា កងទ័ពអ៊ុយក្រែន ត្រូវតែដកចេញពីទឹកដីដែលទ័ពអ៊ុយក្រែន កាន់កាប់នៅសមរភូមិជួរមុខ ដូចជានៅតំបន់ដូណែត។ ជាមួយគ្នានេះ លោក ពូទីន នៅតែបន្តចាត់ទុកលោក ហ្សេឡេនស្គី មិនអាចក្លាយជាមេដឹកនាំអ៊ុយក្រែន ស្របច្បាប់ ដែលលោក ពូទីន ថាលោក ហ្សេឡេនស្គី បានខកខានការបោះឆ្នោតប្រធានាធិបតីអាណត្តិថ្មីកាលពីខែមេសា ឆ្នាំ២០២៥ ដែលធ្វើឱ្យការចុះហត្ថលេខាលើកិច្ចព្រមព្រៀងណាមួយជាមួយនឹងលោក ហ្សេឡេនស្គី គឺជាអំពើខុសច្បាប់។
ជាមួយនឹងការសច្ចាបន្តសង្គ្រាមជាមួយអ៊ុយក្រែន រហូតដល់អ៊ុយក្រែន ព្រមចាញ់សង្គ្រាម លោក ពូទីន អះអាងថា កងកម្លាំងរុស្ស៊ី កំពុងឡោមព័ទ្ធ និងគ្រប់គ្រងបាន ៧០ភាគរយនៃទីក្រុងយុទ្ធសាស្ត្រ Pokrovsk របស់អ៊ុយក្រែន ប៉ុន្តែវាផ្ទុយនឹងមេបញ្ជាការកំពូលអ៊ុយក្រែន ឧត្ដមសេនីយ៍ Oleksandr Syrskyi ដែលអះអាងថា កងទ័ពអ៊ុយក្រែន កំពុងវាយរុញច្រានទៅវិញយ៉ាងខ្លាំងក្លាដោយកាន់កាប់បានផ្ទៃដី ៣ភាគ៤ នៃផ្ទៃដីរបស់តំបន់ទីក្រុង Pokrovsk ៣០គីឡូម៉ែត្រការ៉េ។
កងទ័ពរុស្ស៊ី បានព្យាយាមគ្រប់គ្រងទីក្រុង Pokrovsk ចាប់តាំងពីពាក់កណ្តាលឆ្នាំ២០២៤ មក ដែលទីក្រុង Pokrovsk ជាតំបន់ឧស្សាហកម្មដ៏សំខាន់នៅដូណែត នៃតំបន់ Donbas ភាគខាងកើតអ៊ុយក្រែន។
ក្រុងមូស្គូ និយាយថា ការចាប់យកបានទីក្រុង Pokrovsk នឹងផ្តល់ច្រកផ្លូវមួយឱ្យពួកគេឆ្ពោះទៅកាន់ទីក្រុងដែលគ្រប់គ្រងដោយអ៊ុយក្រែន ដែលនៅសេសសល់ក្នុងតំបន់ដូណែត ដូចជាទីក្រុង Kramatorsk និង Sloviansk។
ក្នុងសន្និសីទសារព័ត៌មាននៅប្រទេសកៀហ្ស៉ីស៊ីស្ថាន លោក ពូទីន អះអាងថា តំបន់ Pokrovsk និង Myrnohrad កំពុងធ្លាក់ក្នុងការឡោមព័ទ្ធទាំងស្រុងរបស់កងទ័ពរុស្ស៊ី។ តាមលោក ពូទីន ៧០ភាគរយនៃទឹកដី Pokrovsk ស្ថិតនៅក្នុងដៃរបស់កងកម្លាំងប្រដាប់អាវុធរុស្ស៊ី។
តែបែបនេះក្ដី មេបញ្ជាការទ័ពអ៊ុយក្រែន ឧត្ដមសេនីយ៍ Oleksandr Syrskyi បានឱ្យដឹងថា កងទ័ពរបស់លោកកំពុងវាយខ្ទប់ការវាយលុករបស់កងកម្លាំងរុស្ស៊ី ជាការវាយប្រហារមកលើទីក្រុង Pokrovsk និង Myrnohrad ជាថ្មីទៀត។
តាមឧត្ដមសេនីយ៍ Oleksandr Syrskyi បញ្ជាការទ័ពភូមិភាគខាងកើតអ៊ុយក្រែន ថាកំពុងបន្តការវាយបកវិញនៅភាគខាងត្បូងស្ថានីយរថភ្លើង Pokrovsk។ ឧត្ដមសេនីយ៍ Oleksandr Syrskyi បដិសេធការអះអាងរបស់លោក ពូទីន ដែលថាទ័ពរុស្ស៊ី កំពុងឡោមព័ទ្ធទីក្រុង Myrnohrad និងទីក្រុង Pokrovsk។
ក្រោយពីចាកចេញពីប្រទេសកៀហ្ស៉ីស៊ីស្ថាន ត្រឡប់ទៅទីក្រុងមូស្គូ វិញ វិមានក្រឹមឡាំង និងក្រសួងការបរទេសឥណ្ឌា បានប្រកាសនៅថ្ងៃសុក្រ ទី២៨ វិច្ឆិកា ថា លោក ពូទីន នឹងទៅបំពេញទស្សនកិច្ចនៅប្រទេសឥណ្ឌា នាថ្ងៃទី៤ ដល់ថ្ងៃទី៥ ខែធ្នូ ខាងមុខ តាមការអញ្ជើញរបស់នាយករដ្ឋមន្ត្រី លោក ណារិនដ្រា ម៉ូឌី ដើម្បីពិភាក្សាអំពីចំណងទាក់ទងទ្វេភាគី និងបញ្ហាអន្តរជាតិ។
វិមានក្រឹមឡាំង បាននិយាយថា អំឡុងទស្សនកិច្ចនេះ លោក ពូទីន នឹងបើកកិច្ចពិភាក្សាជាមួយលោក ម៉ូឌី ហើយក៏មានជំនួបដាច់ដោយឡែកជាមួយប្រធានាធិបតីឥណ្ឌា លោកស្រី Droupadi Murmu ផងដែរ។
បើលោក ពូទីន ទៅកាន់ទីក្រុងញូដែលី តាមការគ្រោងទុក គឺជាលើកទីពីរ ដែលលោក ពូទីន បានទៅប្រទេសឥណ្ឌា កាលពីខែធ្នូ ឆ្នាំ២០២១។
ទស្សនកិច្ចរបស់លោក ពូទីន ទៅកាន់ក្រុងញូដែលី ជាការគាប់ជួនដែលលោក ពូទីន កំពុងពង្រឹងសម្ពន្ធភាពប្រឆាំងនឹងទណ្ឌកម្មរបស់អាមេរិក និងអឺរ៉ុប។
ប្រធានាធិបតីសហរដ្ឋអាមេរិក លោក ដូណាល់ ត្រាំ បានទទូចឥណ្ឌា ឱ្យឈប់បន្តទិញប្រេងពីរុស្ស៊ី ខណៈឥណ្ឌា គឺជាអតិថិជនដ៏ធំបំផុតមួយនាំប្រេងពីរុស្ស៊ី បន្ទាប់ពីប្រទេសចិន។
នៅក្រោមទណ្ឌកម្មពីសំណាក់សហរដ្ឋអាមេរិក ក្រុមហ៊ុនប្រេងជាច្រើនរបស់ឥណ្ឌា សម្រេចការនាំប្រេងពីរុស្ស៊ី។
តាមការចុះផ្សាយរបស់សារព័ត៌មាន Politico ការចម្រាញ់ប្រេង ការនាំចូលប្រេងរុស្ស៊ី របស់ឥណ្ឌា ស្ថិតក្នុងកម្រិតទាបបំផុតនៅរយៈពេល ២ខែចុងក្រោយនេះ បើគិតក្នុងឆ្នាំ២០២៤ ស្របពេលដែលក្រុមហ៊ុនចម្រាញ់ប្រេងជាច្រើនបានងាកទៅរកជម្រើសផ្សេង ដើម្បីចៀសវាងបំពានទណ្ឌកម្មរបស់លោកខាងលិច ជាពិសេសពីសហរដ្ឋអាមេរិក។
អ្នកស្រី Diane Francis គឺជាអ្នកវិភាគសេដ្ឋកិច្ច និងភូមិសាស្ត្រនយោបាយជនជាតិអាមេរិក សញ្ជាតិកាណាដា។ អ្នកស្រីបានចងក្រងអត្ថបទវិភាគស្រាវជ្រាវមួយទាក់ទងនឹងការធ្លាក់ចុះយ៉ាងខ្លាំងនៃកម្លាំងសេដ្ឋកិច្ចរបស់រុស្ស៊ី។
អ្នកវិភាគ Diane Francis បានបង្ហាញថា ការប្រកួតប្រជែងភូមិសាស្ត្រនយោបាយ និងសេដ្ឋកិច្ចអន្តរជាតិ គេសង្កេតឃើញទីក្រុងមូស្គូ បានកំពុងទាញសេដ្ឋកិច្ចរបស់ខ្លួនឱ្យមានស្ថិរភាពឡើងវិញយ៉ាងលំបាក ព្រោះតែកំពុងដាំក្បាលចុះទៅរកទីកន្លែងមួយ គឺក្រឡាប់។
អ្នកវិភាគរូបនេះបានលើកឡើងថា វិបត្តិសេដ្ឋកិច្ច ការកំពុងដួលរលំនៃប្រាក់ចំណូលប្រេង និងការវាយប្រហារក្រោមយុទ្ធសាស្ត្រថ្មីរបស់អ៊ុយក្រែន ទៅលើរោងចក្រចម្រាញ់ប្រេង បានធ្វើឲ្យគោលដៅយុទ្ធសាស្ត្ររបស់រុស្ស៊ី កាន់តែច្របូកច្របល់។ អ្នកស្រីបានសង្កត់ធ្ងន់ថា កត្តាសេដ្ឋកិច្ច គឺជាចំណុចស្នូលដែលកំណត់សមត្ថភាពរបស់រុស្ស៊ី ក្នុងការបន្តសង្គ្រាម។
អត្ថបទវិភាគរបស់អ្នកស្រី Diane Francis បានឱ្យដឹងថា ប្រាក់ចំណូលប្រេងរបស់រុស្ស៊ី ធ្លាក់ចុះជិត ៣០% ដោយសារតែប្រសិទ្ធភាពនៃទណ្ឌកម្ម និងការទម្លាក់គ្រាប់បែកទ្រង់ទ្រាយធំពីសំណាក់អ៊ុយក្រែន ទៅលើរោងចក្រចម្រាញ់ប្រេងរបស់រុស្ស៊ី ដែលបង្ហាញថាការនាំចេញប្រេងរបស់រុស្ស៊ី ដែលជាប្រភពផ្តល់នូវហិរញ្ញប្បទានសម្រាប់សង្គ្រាមនៅអ៊ុយក្រែន កំពុងតែចុះខ្សោយយ៉ាងខ្លាំង៕
© 2025, . All rights reserved.