មេដឹកនាំបក្សកាន់អំណាច លោក ហ៊ុន សែន សង្ឃឹមថាគោលដៅពាណិជ្ជកម្ម ២០ពាន់លានដុល្លារអាមេរិក នឹងអាចសម្រេចបាននៅពេលដ៏ខ្លីខាងមុខ ខណៈការផ្សារភ្ជាប់ហេដ្ឋារចនាសម្ព័ន្ធកម្ពុជា-វៀតណាម គឺអំណោយផលដល់ការធ្វើកិច្ចសហប្រតិបត្តិការពាណិជ្ជកម្មរវាងប្រទេសទាំងពីរក្នុងពេលបច្ចុប្បន្ននេះ។
ប្រធានព្រឹទ្ធសភា លោក ហ៊ុន សែន សរសេរលើទំព័រហ្វេសប៊ុករបស់ខ្លួនក្រោយពីជំនួបជាមួយឧបនាយករដ្ឋមន្ត្រីវៀតណាម លោក Bui Thanh Son នៅថ្ងៃទី២៨ វិច្ឆិកា ថា កម្ពុជា-វៀតណាម គ្រោងនឹងសម្ពោធច្រកព្រំដែនអន្តរជាតិម៉ឺនជ័យ ជាមួយគ្នានៅដើមខែធ្នូ ខាងមុខនេះ។
លោក ហ៊ុន សែន អះអាងថា គម្រោងនេះគឺជាសញ្ញាបង្ហាញយ៉ាងវិជ្ជមានចំពោះការផ្លាស់ប្ដូររវាងប្រជាជន និងប្រជាជន ការដឹកជញ្ជូនទំនិញ ផលិតផលទៅវិញទៅមក និងកាន់តែមានភាពរីកចម្រើន ព្រមទាំងធ្វើឱ្យវិស័យផ្សេងៗមានទំនាក់ទំនងកាន់តែល្អប្រសើរបន្ថែមទៀតរវាងប្រទេសទាំងពីរ។
មេដឹកនាំបក្សកាន់អំណាចរូបនេះឯកភាពទាំងស្រុងចំពោះការលើកឡើងរបស់មន្ត្រីជាន់ខ្ពស់វៀតណាម ក្នុងការរក្សាឱ្យបាននូវសន្តិសុខតាមព្រំដែន ដើម្បីឱ្យក្លាយជាព្រំដែនសន្តិភាព និងដើម្បីផ្សារភ្ជាប់ហេដ្ឋារចនាសម្ព័ន្ធរវាងប្រទេសទាំងពីរ ដែលនេះក៏ជាបំណងប្រាថ្នាផ្ទាល់របស់លោកដែរ ដើម្បីឱ្យប្រជាជនរស់នៅកាន់តែមានភាពល្អប្រសើរ។
ក្នុងជំនួបជាមួយអគ្គលេខាធិការបក្សកុម្មុយនីស្តវៀតណាម លោក តូ ឡឹម កាលពីថ្ងៃទី១៤ ខែសីហា ឆ្នាំ២០២៥ លោក ហ៊ុន សែន បានព្រមព្រៀងសម្រេចឲ្យបាននូវផែនការទំហំពាណិជ្ជកម្មជាមួយវៀតណាម ២០ពាន់លានដុល្លារអាមេរិកនៅពេលខាងមុខ ដើម្បីឱ្យទំហំពាណិជ្ជកម្មរវាងប្រទេសទាំងពីរកាន់តែមានភាពរីកចម្រើន និងកើនឡើងជាបន្តបន្ទាប់ទៀត។
អគ្គនាយកដ្ឋានគយ និងរដ្ឋាករកម្ពុជា (GDCE) បានបង្ហាញរបាយការណ៍កាលពីពេលថ្មីៗនេះថា រយៈពេល ៣ត្រីមាស (៩ខែ) ដំបូងនៃឆ្នាំ២០២៥ ការនាំចេញនាំចូលទំនិញរវាងកម្ពុជា-វៀតណាម ឈានដល់ទំហំទឹកប្រាក់សរុបជាង ៦,០៥ពាន់លានដុល្លារអាមេរិក ក្នុងនោះ កម្ពុជានាំទំនិញទៅវៀតណាម ជិត ៣ពាន់លានដុល្លារ (២,៩៤ពាន់លានដុល្លារ) ខណៈវៀតណាម ក៏បាននាំមកកម្ពុជា វិញជាង ៣ពាន់លានដុល្លារ (៣,១១ពាន់លានដុល្លារអាមេរិក) ដែរ។
ជុំវិញបញ្ហានេះ អនុប្រធានរដ្ឋសភា និងជាប្រធានសមាគមមិត្តភាពវៀតណាម-កម្ពុជា អ្នកស្រី ង្វៀន ធីថាញ បានលើកឡើងក្នុងវេទិកាធុរកិច្ចវៀតណាម-កម្ពុជា ឆ្នាំ២០២៥ កាលពីថ្ងៃទី១១ ខែតុលា ឆ្នាំ២០២៥ នេះថា កម្ពុជា គឺជាប្រទេសមួយដែលវិនិយោគិនវៀតណាម ចូលចិត្តមកបណ្ដាក់ទុន ព្រោះពេលបច្ចុប្បន្ននេះមានគម្រោងវិនិយោគរបស់វៀតណាម ជាង ២០០គម្រោងហើយដែលកំពុងដំណើរការនៅកម្ពុជា។
ប្រធានសមាគមរូបនេះបញ្ជាក់ថា កម្ពុជាគឺជាទីតាំងសំខាន់មួយក្នុងចំណោមទីតាំងសំខាន់ៗដែលមានការវិនិយោគមុនគេនៅក្នុងយុទ្ធសាស្ត្រវិនិយោគក្រៅប្រទេសរបស់វៀតណាម ដូចជា សេដ្ឋកិច្ចបៃតង ថាមពលកកើតឡើងវិញ កសិកម្ម បច្ចេកវិទ្យា ទេសចរណ៍ និងពាណិជ្ជកម្ម ជាដើម។
ចំណែកឯកអគ្គរដ្ឋទូតវៀតណាម ប្រចាំនៅកម្ពុជា លោក ង្វៀន មិញវូ បានអះអាងកាលពីចុងខែមិថុនា ឆ្នាំ២០២៥ នេះថា វៀតណាមមានគម្រោងវិនិយោគនៅកម្ពុជា សរុបចំនួន ២១៥គម្រោង ដោយមានទុនចុះបញ្ជីសរុបជិត ៣ពាន់លានដុល្លារអាមេរិក (២,៩៤ពាន់លានដុល្លារ)៕
© 2025, . All rights reserved.