អ្នកតាមដានបទល្មើសធនធានធម្មជាតិ ទម្លាយវីដេអូឃ្លីបស្ដីពីបទល្មើសព្រៃឈើជាបន្តបន្ទាប់នៅលើបណ្ដាញទំនាក់ទំនងសង្គមហ្វេសប៊ុក ក្រោយមន្ទីរបរិស្ថានខេត្តក្រចេះ ចេញមុខបដិសេធមិនទទួលស្គាល់នូវបទល្មើសព្រៃឈើដែលកើតមានក្នុងខេត្តរបស់ខ្លួន។
អ្នកតាមដានបទល្មើសព្រៃឈើ លោក តាន់ គឹមសួរ នៅថ្ងៃទី២៨ វិច្ឆិកា បានទម្លាយពីសកម្មភាពបទល្មើសព្រៃឈើជារូបថតសន្លឹកផង និងជាវីដេអូឃ្លីបផងលើបណ្ដាញទំនាក់ទំនងសង្គមរបស់ខ្លួនជាបន្តបន្ទាប់ ក្នុងនោះមានទាំងវីដេអូឃ្លីបដែលបានថតសកម្មភាពដឹកឈើតាមគោយន្តនៅក្នុងព្រៃសហគមន៍ និងសកម្មភាពដឹកឈើលើដងផ្លូវនៅក្នុងខេត្តក្រចេះ។
អ្នកតាមដានបទល្មើសព្រៃឈើរូបនេះអះអាងថា វីដេអូឃ្លីបដែលថតជាប់សកម្មភាពដឹកឈើខុសច្បាប់ ត្រូវបានថតទុកជាភស្តុតាងក្នុងព្រៃសហគមន៍ត្រពាំងកណ្ដឹង ឃុំស្រែជិះ ស្រុកអូរគ្រៀង ខេត្តក្រចេះ កាលពីចុងខែតុលា ឆ្នាំ២០២៥ កន្លងទៅថ្មីៗនេះ។
លោក តាន់ គឹមសួរ ទាមទារឱ្យប្រធានមន្ទីរបរិស្ថានខេត្តក្រចេះ លោក គា ប៊ូ ចេញមុខបំភ្លឺចំពោះបទល្មើសព្រៃឈើក្នុងវីដេអូឃ្លីបដែលថតបានទាំងនេះ ថាតើជារូបភាព និងជាវីដេអូពិត ឬជារូបភាព និងវីដេអូឃ្លីបដែលត្រូវបានបង្កើតដោយកម្មវិធីបញ្ញាសិប្បនិម្មិត។
ប្រធានមន្ទីរបរិស្ថានខេត្តក្រចេះ លោក គា ប៊ូ បានចេញលិខិតបដិសេធមួយនៅថ្ងៃទី២៨ ខែវិច្ឆិកា ឆ្នាំ២០២៥ នេះ ដោយចាត់ទុកការកើតមានបទល្មើសព្រៃឈើក្នុងខេត្តក្រចេះ ដែលត្រូវបានផ្សព្វផ្សាយលើបណ្ដាញទំនាក់ទំនងសង្គមនាពេលនេះ ថាជាការចោទប្រកាន់ដោយគ្មានមូលដ្ឋាន ជាការមួលបង្កាច់ និងបង្ខូចកិត្តិយសដល់សមត្ថកិច្ចរបស់មន្ទីរបរិស្ថានខេត្តប៉ុណ្ណោះ។
លិខិតដដែល បញ្ជាក់ថា មន្ទីរបរិស្ថានខេត្តក្រចេះ តែងតែផ្តល់កិច្ចសហការល្អជាមួយអាជ្ញាធរមូលដ្ឋាន អង្គការសង្គមស៊ីវិល សហគមន៍ និងភាគីពាក់ព័ន្ធទាំងអស់ ក្នុងការអនុវត្តច្បាប់ចំពោះបទល្មើសធនធានធម្មជាតិរហូតមក។
ប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ និងជាអគ្គមេបញ្ជាការកងរាជអាវុធហត្ថលើផ្ទៃប្រទេស ឧត្ដមសេនីយ៍ សៅ សុខា នៅថ្ងៃទី២៨ ខែវិច្ឆិកា នេះ បានព្រមានថា មន្ត្រីណាដែលពាក់ព័ន្ធនឹងការកាប់បំផ្លាញព្រៃឈើខុសច្បាប់ ដាច់ខាតគឺត្រូវតែបង្ក្រាបឱ្យបាន។
ទាក់ទិននឹងបញ្ហានេះ កាលពីថ្ងៃទី២២ ខែមេសា ឆ្នាំ២០២៥ នាយករដ្ឋមន្ត្រីកម្ពុជា លោក ហ៊ុន ម៉ាណែត អះអាងថា រាជរដ្ឋាភិបាលនឹងអនុវត្តដោយម៉ឺងម៉ាត់បំផុតក្នុងកិច្ចការពារធនធានធម្មជាតិ ក្នុងនោះ កងកម្លាំងអាចប្រើវិធានការការពារខ្លួន បើក្រុមជនល្មើសព្រៃឈើប្រើហិង្សា។
លោក ហ៊ុន ម៉ាណែត ព្រមានថា ក្រុមជនល្មើសព្រៃឈើកុំចង់សាកប្រើហិង្សាលើកងកម្លាំងដែលចុះបង្ក្រាបឱ្យសោះ ព្រោះលោកគឺជាអ្នកទទួលខុសត្រូវចំពោះសកម្មភាពរបស់កងកម្លាំងដែលប្រើវិធានការការពារខ្លួនបានពេលចុះបង្ក្រាបធនធានធម្មជាតិទាំងនេះ។
កាលពីចុងឆ្នាំ២០២៣ ប្រធានគណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិ លោក សៅ សុខា បានចោទថា បទល្មើសព្រៃឈើដែលតែងតែកើតមាននៅកម្ពុជា ទប់ស្កាត់មិនបាន គឺដោយសារតែមន្ត្រីមូលដ្ឋានជាអ្នកបើកដៃឱ្យឈ្មួញពីខាងក្រៅតែប៉ុណ្ណោះ។
យ៉ាងណាក៏ដោយ សារព័ត៌មានអន្តរជាតិ Mongabay បានចេញផ្សាយរបាយការណ៍ស៊ើបអង្កេតរបស់ខ្លួនកាលពីពេលកន្លងទៅថា បទល្មើសព្រៃឈើនៅកម្ពុជា មិនអាចបង្ក្រាបបានទេ ដោយសារបទល្មើសទាំងនោះជាប់ពាក់ព័ន្ធនឹងអ្នកមានអំណាច។
ប្រភពដដែល លាតត្រដាងថា លោក ហ៊ុន សែន ជាអ្នកគ្រប់គ្រងកំពូល ខណៈលោក ហ៊ុន ម៉ាណែត ដែលជានាយករដ្ឋមន្ត្រី គឺជាអ្នកគ្រប់គ្រងបន្ទាប់លើបណ្ដាញឧក្រិដ្ឋជនដែលជាថ្នាក់ក្រោមរបស់ខ្លួន ដូចជា ឧកញ៉ា ម៉ឹក សុផាន់ណារ៉េត ហៅឧកញ៉ាជ័យ ដែលល្បីល្បាញខាងរកស៊ីឈើខុសច្បាប់នៅកម្ពុជា រហូតមកនោះ។ លើសពីនេះ ក៏មានឧកញ៉ាផ្សេងទៀតដែរ ដូចជា ឧកញ៉ា ទ្រី ភាព ហៅស្តេចគ្រញូង និងឧកញ៉ា លី យ៉ុងផាត់ ហៅស្តេចកោះកុង ជាដើម៕
© 2025, . All rights reserved.