ប្រធានាធិបតីសហរដ្ឋអាមេរិក លោក ដូណាល់ ត្រាំ ប្រកាសថា សហរដ្ឋអាមេរិកបានត្រៀមលក្ខណៈរួចជាស្រេចដើម្បីធ្វើអន្តរាគមន៍ ប្រសិនបើរដ្ឋអំណាចនៅប្រទេសអ៊ីរ៉ង់ សម្លាប់ក្រុមបាតុករ ដែលនៅខណៈនេះសកម្មភាពតវ៉ាប្រឆាំងនឹងការកើនឡើងថ្លៃទំនិញនៅក្នុងប្រទេសអ៊ីរ៉ង់ បានឈានដល់ការបង្កឱ្យមានមនុស្សបាត់បង់ជីវិត ដំណាលពេលបាតុកម្មផ្ទុះរីករាលដាលដល់ ២១ខេត្ត-ក្រុងហើយបើគិតត្រឹមថ្ងៃសុក្រ ទី២ ខែមករា ឆ្នាំ២០២៦។
ក្នុងសារបង្ហោះលើបណ្ដាញសង្គម Truth Social លោក ដូណាល់ ត្រាំ អះអាងថា ប្រសិនបើរដ្ឋអំណាចនៅអ៊ីរ៉ង់ បាញ់សម្លាប់ក្រុមអ្នកតវ៉ាដោយហិង្សាដែលជាទម្លាប់របស់អាជ្ញាធរ ចំពោះសហរដ្ឋអាមេរិកនឹងចូលទៅជួយសង្គ្រោះអ្នកទាំងនោះ។
លោកប្រធានាធិបតី បានសង្កត់ធ្ងន់បន្ថែមថា សហរដ្ឋអាមេរិកត្រៀមខ្លួនរួចជាស្រេចដើម្បីបំពេញកាតព្វកិច្ចមួយដែលសហរដ្ឋអាមេរិកមើលឃើញតម្លៃមនុស្សធម៌នៃពិភពលោក។
បើតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី២ ខែមករា ឆ្នាំ២០២៦ ក្រុមបាតុករ និងកងកម្លាំងសន្តិសុខ បានប៉ះទង្គិចគ្នានៅទីក្រុងមួយចំនួនកាលពីថ្ងៃព្រហស្បតិ៍ ទី១ ខែមករា ឆ្នាំ២០២៦ នេះ បណ្ដាលឱ្យមនុស្ស ៦នាក់ត្រូវបានរាយការណ៍ថាបានបាត់បង់ជីវិត។ នេះជាសេចក្តីរាយការណ៍លើកដំបូងអំពីអ្នកស្លាប់ចាប់តាំងពីអំពើហិង្សាបានកើនឡើង ៦ថ្ងៃជាប់គ្នាមកនេះ។
ប្រជាជនអ៊ីរ៉ង់ នៅរដ្ឋធានីតេហេរ៉ង់ បាននាំគ្នាធ្វើបាតុកម្មកាលពីថ្ងៃអាទិត្យ ទី២៨ ខែធ្នូ ឆ្នាំ២០២៥។ បាតុករតវ៉ាព្រោះតែការកើនឡើងថ្លៃទំនិញ និងបញ្ហាសេដ្ឋកិច្ចដែលមិនមានកំណើនរយៈពេលជាងមួយទសវត្សចុងក្រោយនេះ។
កាលពីថ្ងៃព្រហស្បតិ៍ ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា មនុស្ស ២នាក់បានស្លាប់ក្នុងការប៉ះទង្គិចគ្នារវាងកងកម្លាំងសន្តិសុខ និងក្រុមបាតុករនៅទីក្រុង Lordegan នៃខេត្ត Chaharmahal និងខេត្ត Bakhtiari ហើយ ៣នាក់ទៀតបានស្លាប់ក្នុងទីក្រុង Azna នៃខេត្ត Lorestan ដែលស្ថិតជាប់គ្នា។
តែយ៉ាងណា ក៏មានសេចក្តីរាយការណ៍ដែរថា សមាជិកម្នាក់នៃកងកម្លាំងសន្តិសុខ ត្រូវបានសម្លាប់អំឡុងការតវ៉ានៅទីក្រុង Kouhdasht ភាគខាងលិច។
អ្នកសង្កេតការណ៍កត់ត្រាថា បាតុកម្មនេះនៅមានទំហំតូចជាងឆ្នាំ២០២២ ដែលបានផ្ទុះឡើងដោយសារការស្លាប់នារីម្នាក់ឈ្មោះ Mahsa Amini ដែលត្រូវបានអាជ្ញាធរអ៊ីរ៉ង់ ចាប់ឃុំខ្លួន ដោយសារបំពានច្បាប់ដ៏តឹងរ៉ឹងស្ដីពីការស្លៀកពាក់របស់ស្ត្រី។ ការបាត់បង់ជីវិតរបស់ស្ត្រីម្នាក់នោះ បានដុតបញ្ឆេះកំហឹងទូទាំងប្រទេស រុញមហាបាតុកម្ម ដែលបានបណ្តាលឱ្យមនុស្សរាប់រយនាក់ស្លាប់ ក្នុងនោះរាប់សិបនាក់ជាសមាជិកកងកម្លាំងសន្តិសុខអ៊ីរ៉ង់។
តែជាមួយគ្នានេះ លោកប្រធានាធិបតីអ៊ីរ៉ង់ Massoud Pezeshkian បានចេញមុខថ្លែងថា លោកយល់អំពីទុក្ខលំបាករបស់ប្រជាជន ដោយសារតែវិបត្តិសេដ្ឋកិច្ច ទំនិញឡើងថ្លៃរួមរឹតជីវភាពឲ្យកាន់តែលំបាក។
សេដ្ឋកិច្ចអ៊ីរ៉ង់ កំពុងស្ថិតក្នុងវិបត្តិដ៏ធ្ងន់ធ្ងរមិនធ្លាប់មានទេ ដោយសារតែទណ្ឌកម្មអន្តរជាតិដែលរុញតម្លៃរូបិយប័ណ្ណអ៊ីរ៉ង់ បានធ្លាក់ថ្លៃរហូតដល់គ្រោះថ្នាក់ដល់សេដ្ឋកិច្ច។ អត្រាអតិផរណាបានឡើងប៉ោងដល់ទៅ ៥២% ក្នុងរយៈពេល ១ឆ្នាំនៅឆ្នាំ២០២៥។
បញ្ហានេះបានធ្វើឱ្យទំនិញគ្រប់មុខឡើងថ្លៃកប់ពពក ខណៈដែលសេដ្ឋកិច្ចដាំក្បាលចុះព្រោះគ្មានការវិនិយោគ និងគ្មានទំនាក់ទំនងល្អជាមួយបរទេសលោកខាងលិច។ ជីវភាពប្រជាជនកាន់តែលំបាកនេះ ដែលជាការរុញឲ្យផ្ទុះបាតុកម្មរបស់ប្រជាជនយ៉ាងខ្លាំងដូចនេះ។
អ្នកវិភាគនៅក្រុងវ៉ាស៊ីនតុន ថ្លែងតាមទូរទស្សន៍ NBC ថា ឃើញស្ថានការណ៍ដូច្នេះ មេដឹកនាំប្រទេសអ៊ីស្រាអែល បានទៅពិភាក្សាជាមួយប្រធានាធិបតី ដូណាល់ ត្រាំ អំពីគម្រោងទម្លាក់គ្រាប់បែកកម្ទេចទីតាំងផលិតអាវុធបរមាណូអ៊ីរ៉ង់ ម្តងទៀត។ លោក ត្រាំ ប្រាប់កាសែតថា លោកយល់ព្រម។
ជាមួយគ្នានេះ អ្នកសង្កេតការណ៍យល់ថា បាតុកម្មកាលពីឆ្នាំ២០២២ វាខុសនឹងបាតុកម្មដើមខែមករា ឆ្នាំ២០២៦ នេះ ព្រោះពេលនេះ ជាការតវ៉ាដើម្បីសេរីភាពផង និងជីវភាពរស់នៅមួយឱ្យសមរម្យនឹងសម័យកាលពិភពលោក ដែលគេត្រូវលើកតម្កើងជីវភាពគ្រួសារ និងសិទ្ធិសេរីភាពរបស់មនុស្ស៕
© 2026, . All rights reserved.