អង្គភាពអ្នកនាំពាក្យរាជរដ្ឋាភិបាល អះអាងថា កម្ពុជាចេញតតាំងអំពើឈ្លានពានរបស់ថៃ គ្រប់ទម្រង់ជិត ៧០០លើក តាមរយៈកំណត់ទូត សេចក្តីថ្លែងការណ៍ ញត្តិថ្កោលទោស និងលិខិតផ្សេងៗ ខណៈពលរដ្ឋខ្មែរទាំងក្នុងស្រុក និងក្រៅស្រុក ក៏បង្ហាញពីស្មារតីការពារជាតិប្រឆាំងការឈ្លានពានរបស់ថៃគ្រប់ទិសទីដែរ។
ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា លើកឡើងក្នុងកម្មវិធីធ្វើបច្ចុប្បន្នភាពជុំវិញស្ថានការណ៍កម្ពុជា-ថៃ នៅថ្ងៃទី២៦ មករា នេះថា រយៈពេល ៦ខែចុងក្រោយនេះ កម្ពុជាបានចេញមុខតវ៉ាប្រឆាំងការឈ្លានពានរបស់យោធាថៃ ជិត ៧០០លើក ដោយគិតចាប់តាំងពីថ្ងៃទី២៤ ខែកក្កដា ឆ្នាំ២០២៥ មក ដើម្បីការពារអធិបតេយ្យជាតិរបស់កម្ពុជា។
លោក ប៉ែន បូណា អះអាងថា រយៈពេល ៦ខែចុងក្រោយនេះ ក្រសួង និងស្ថាប័ននានារបស់កម្ពុជា បានចេញតវ៉ាការឈ្លានពានរបស់ថៃ ជាបន្តបន្ទាប់ ក្នុងនោះ ក្រសួងការពារជាតិ បានចេញតវ៉ាជិត ៤០លើក (៣៨លើក) ក្រសួងមហាផ្ទៃ ជិត ៩០លើក (៨៣លើក) ខណៈក្រសួងវប្បធម៌ និងវិចិត្រសិល្បៈ ក៏បានចេញតវ៉ាជិត ៧០លើក (៦៤លើក) ផងដែរ។
ជាងនេះទៀត ក្រសួងការបរទេស និងសហប្រតិបត្តិការអន្តរជាតិ បានចេញតវ៉ាជិត ៥០លើក (៤៩លើក) គណៈកម្មាធិការសិទ្ធិមនុស្សកម្ពុជា ជិត ៣០លើក (២៧លើក) អាជ្ញាធរកម្ពុជា គ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន ជិត ៣០លើក (២៥លើក)។
ចំណែករដ្ឋលេខាធិការដ្ឋានកិច្ចការព្រំដែន ចេញតវ៉ាចំនួន ២០លើក មជ្ឈមណ្ឌលកម្ចាត់មីនកម្ពុជា ជិត ២០លើក (១៦លើក) និងក្រសួងធម្មការ និងសាសនា ក៏បានចេញតវ៉ាចំនួន ១លើកផងដែរ។
លើសពីនេះ ក្រសួងការបរទេសកម្ពុជា បានដឹកនាំអង្គទូត និងអង្គការអន្តរជាតិ ចុះពិនិត្យមើលស្ថានភាពជាក់ស្តែងតាមបណ្តាខេត្តជាប់ព្រំដែនចំនួន ៤លើក ហើយក៏បានធ្វើបទបង្ហាញចំនួន ១៤លើកដែរដល់ស្ថានបេសកកម្មការទូត និងអង្គការអន្តរជាតិ។
ដោយឡែកអង្គភាពអ្នកនាំពាក្យរាជរដ្ឋាភិបាល បានសហការជាមួយក្រសួងស្ថាប័ននានា បានធ្វើបច្ចុប្បន្នភាពប្រចាំថ្ងៃជិត ២០០លើក ដើម្បីឆ្លើយតបជាមួយភាគីថៃ។ ក្រសួងព័ត៌មាន ក៏បានសម្របសម្រួលឱ្យអ្នកសារព័ត៌មានជាតិ និងអន្តរជាតិ ចុះទៅដល់តំបន់ព្រំដែន ដើម្បីរាយការណ៍អំពីការខូចខាតហេដ្ឋារចនាសម្ព័ន្ធស៊ីវិល និងផលប៉ះពាល់លើជនស៊ីវិលដោយសារការវាយប្រហារពីយោធាថៃ បំពានមកលើដែនអធិបតេយ្យភាពរបស់កម្ពុជា ផងដែរ។
ចំណែកក្រសួងការពារជាតិ ក៏បានសម្របសម្រួលក្រុមអនុព័ន្ធយោធាបរទេសប្រចាំកម្ពុជា និងអ្នកសង្កេតការណ៍អាស៊ាន (AOT) ចុះទៅសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពនៅតាមព្រំដែនជាបន្តបន្ទាប់ និងសម្របសម្រួលគណៈកម្មាធិការព្រំដែនថ្នាក់យោធភូមិភាគ (RBC) និងគណៈកម្មាធិការព្រំដែនទូទៅរវាងកម្ពុជា-ថៃ (GBC) ជាច្រើនលើកថែមទៀត។
ជុំវិញបញ្ហានេះ កាសែតថៃ ខៅស៊ុត (Khaosod) បានស្រង់សម្ដីនាយករដ្ឋមន្ត្រីថៃ លោក អនុធីន ឆានវីរៈគុល កាលពីចុងខែធ្នូ ឆ្នាំ២០២៥ ថា ថៃមិនដែលឈ្លានពានកម្ពុជា ទេ ប៉ុន្តែថៃ គឺជាភាគីដែលត្រូវបានឈ្លានពាន និងរងការវាយប្រហារមុនពីកម្ពុជា ហើយអ្វីដែលថៃ បានធ្វើ គឺជាការសងសឹកដើម្បីការពារអធិបតេយ្យភាពរបស់ខ្លួនប៉ុណ្ណោះ។
សង្គ្រាមកម្ពុជា-ថៃ បានផ្ទុះឡើងចំនួន ២លើក គឺលើកទី១ នៅថ្ងៃទី២៤ រហូតដល់ថ្ងៃទី២៨ ខែកក្កដា ឆ្នាំ២០២៥ ចំណែកលើកទី២ គឺនៅថ្ងៃទី៧ រហូតដល់ថ្ងៃទី២៧ ខែធ្នូ ឆ្នាំ២០២៥ ខណៈសង្គ្រាមទាំងពីរលើកនេះ ភាគីថៃ បានចោទថា កម្ពុជាបើកការវាយប្រហារលើថៃ មុន ប៉ុន្តែខាងកម្ពុជា ក៏បានចោទថា ថៃគឺជាអ្នកវាយប្រហារលើកម្ពុជា មុនដែរ។
យ៉ាងណាក៏ដោយ ប្រធានាធិបតីអាមេរិក លោក ដូណាល់ ត្រាំ ថ្លែងក្នុងពិធីប្រកាសការផលិតនាវាចម្បាំងខ្នាតយក្សថ្មីជាមួយរដ្ឋមន្ត្រីក្រសួងសង្គ្រាម និងរដ្ឋមន្ត្រីកងទ័ពជើងទឹកអាមេរិក កាលពីថ្ងៃទី២២ ខែធ្នូ ឆ្នាំ២០២៥ ដោយចោទថា ប្រទេសថៃ គឺជាអ្នកចាប់ផ្តើមសង្គ្រាមមុនទៅលើប្រទេសកម្ពុជា៕
© 2026, . All rights reserved.