អ្នកឃ្លាំមើលស្ថានការណ៍ប្រទេសកម្ពុជា លើកឡើងថា ការដែលគ្មានអ្នកសារព័ត៌មានអន្តរជាតិចោទសួរប្រធានអាស៊ាន អំពីបញ្ហាព្រំដែនកម្ពុជា-ថៃ ក្នុងកិច្ចប្រជុំសំណេះសំណាលក្រៅផ្លូវការនៃរដ្ឋមន្ត្រីការបរទេសប្រទេសសមាជិកអាស៊ាន នៅសណ្ឋាគារ Nustar នាក្រុងសេប៊ូ ប្រទេសហ្វីលីពីន គឺដោយសារកត្តារួមផ្សំនៃភូមិសាស្ត្រនយោបាយសកលផង និងដោយសាររូបភាពអវិជ្ជមាននៃប្រទេសជម្លោះផ្ទាល់ផងដែរ។
អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក លោក សេង វណ្ណលី សរសេរលើគណនីហ្វេសប៊ុករបស់ខ្លួននៅថ្ងៃទី៣០ មករា ថា មូលហេតុចម្បងដែលទាញការចាប់អារម្មណ៍ពីសំណាក់អ្នកសារព័ត៌មានអន្តរជាតិទាំងស្រុងនោះ គឺជម្លោះនៅសមុទ្រចិនខាងត្បូង និងដំណើរការនៃក្រមប្រតិបត្តិសមុទ្រចិនខាងត្បូង ដែលត្រូវបានគេចាត់ទុកថាជាចំណុចក្តៅនៃសមរភូមិមហាអំណាចរវាងអាមេរិក និងចិន។
លោក សេង វណ្ណលី លើកឡើងថា ស្របពេលជាមួយគ្នានេះ វិបត្តិនៅក្នុងប្រទេសភូមា និងគំនិតផ្ដួចផ្ដើមថ្មីៗរបស់ប្រទេសហ្វីលីពីន ក្នុងការដោះស្រាយបញ្ហានេះ ក៏បានក្លាយជាបេសកកម្មអាទិភាពដែលអាស៊ានត្រូវតែបង្ហាញពិភពលោកដើម្បីរក្សាមុខមាត់ និងសាមគ្គីភាពរបស់ខ្លួនដែរ។
អ្នកឃ្លាំមើលសង្គមរូបនេះបញ្ជាក់ថា ដោយសារតែកត្តាទាំងនេះហើយដែលជាហេតុធ្វើឱ្យបញ្ហាព្រំដែនកម្ពុជា-ថៃ ក្លាយជាបញ្ហាបន្ទាប់បន្សំសម្រាប់របៀបវារៈដែលនឹងត្រូវបានលើកឡើងសម្រាប់ជាព័ត៌មានអន្តរជាតិចំពោះបញ្ហាតំបន់ និងពិភពលោកនោះ។
ការអះអាងនេះ ធ្វើឡើងបន្ទាប់ពីប្រធានអាស៊ាន សម្ដែងការភ្ញាក់ផ្អើលក្រោយបញ្ហាព្រំដែនកម្ពុជា-ថៃ មិនត្រូវបានសារព័ត៌មានអន្តរជាតិលើកឡើងក្នុងកិច្ចប្រជុំរដ្ឋមន្ត្រីការបរទេសអាស៊ាន នៅប្រទេសហ្វីលីពីន កាលពីថ្ងៃទី២៩ មករា។
រដ្ឋមន្ត្រីការបរទេសហ្វីលីពីន អ្នកស្រី Theresa Lazaro និងជាប្រធានអាស៊ានប្តូរវេនឆ្នាំ២០២៦ នេះ បានសម្ដែងការភ្ញាក់ផ្អើលនៅចុងបញ្ចប់នៃការធ្វើសន្និសីទកាសែតរបស់ខ្លួនកាលពីថ្ងៃទី២៩ ខែមករា ឆ្នាំ២០២៦ ដោយសារតែគ្មានអ្នករាយការណ៍ព័ត៌មានអន្តរជាតិណាម្នាក់លើកជាសំណួរទៅកាន់អ្នកស្រីអំពីជម្លោះកម្ពុជា-ថៃ អំឡុងពេលក្រោយកិច្ចប្រជុំ។
អ្នកស្រី Theresa Lazaro បញ្ជាក់ថា អាស៊ានស្វាគមន៍កិច្ចប្រជុំពិសេសនៃគណៈកម្មាធិការព្រំដែនទូទៅកម្ពុជា-ថៃ (GBC) លើកទី៣ កាលពីថ្ងៃទី២៧ ខែធ្នូ ឆ្នាំ២០២៥ កន្លងទៅ ស្ដីពីដំណោះស្រាយជម្លោះព្រំដែនរបស់ប្រទេសទាំងពីរ ដោយឈរលើដំណោះសន្តិវិធី និងផ្អែកលើច្បាប់អន្តរជាតិ។
យ៉ាងណាក៏ដោយ ប្រធានក្លិបអ្នកកាសែតកម្ពុជា លោក ពុយ គា បានសរសេរលើគណនីហ្វេសប៊ុករបស់ខ្លួននៅថ្ងៃទី៣០ មករា នេះថា កិច្ចប្រជុំសំណេះសំណាលក្រៅផ្លូវការនៃរដ្ឋមន្ត្រីការបរទេសអាស៊ាននេះ មិនមានអ្នកសារព័ត៌មានបរទេសច្រើនទេ ក្រៅតែពីអ្នកសារព័ត៌មានជនជាតិហ្វីលីពីន ហើយក៏មិនមានអ្នកសារព័ត៌មានមកពីកម្ពុជា ដែរ។
សូមបញ្ជាក់ថា កិច្ចប្រជុំនេះគេហៅតាមអង់គ្លេសថា ASEAN Foreign Ministers Meeting (AMM) ឬ ASEAN Foreign Ministers Retreat (AFMR) ដែលប្រទេសជាប្រធានដូរវេន ធ្វើឡើងតាមទម្លាប់ដើម្បីផ្តល់ឱកាសឲ្យរដ្ឋមន្ត្រីការបរទេសជួបជុំក្រៅផ្លូវការ សំណេះសំណាលគ្នា ស្គាល់គ្នាទៅវិញទៅមក ប្តូរយោបល់គ្នាអំពីគោលការណ៍នយោបាយរួម និងកិច្ចអភិវឌ្ឍន៍សហគមន៍។
ក្រោយពីប្រជុំចប់ អ្នកស្រីរដ្ឋមន្ត្រីការបរទេសហ្វីលីពីន Maria Theresa Lazaro បានបើកសន្និសីទកាសែត ហើយក៏មានការងឿងឆ្ងល់ថា ហេតុអ្វីបានអ្នកកាសែតមិនលើកសំណួររឿងជម្លោះព្រំដែនខ្មែរ-ថៃ។
ចំណងជើងក្នុងកាសែត The Star សរសេរថា តើការប៉ះទង្គិចគ្នារវាងប្រទេសកម្ពុជា និងប្រទេសថៃឡង់ដ៍ វាមិនមែនរឿងធំដុំ ឬយ៉ាងណា?
លោក ពុយ គា អះអាងថា ក្រោយសន្និសីទសារព័ត៌មានចប់ អ្នកសារព័ត៌មានក៏បានសួរអ្នកស្រី Maria Theresa Lazaro អំពីជម្លោះព្រំដែនកម្ពុជា-ថៃ ដែរ ប៉ុន្តែគាត់បញ្ជាក់ថា មិនមានការសម្រេចអ្វីឡើយជុំវិញជម្លោះព្រំដែនកម្ពុជា-ថៃ នោះ។
គួរបញ្ជាក់ថា អ្នកស្រីថ្លែងថា អ្នកស្រីនឹកស្មានថាអ្នកកាសែតនឹងសួររឿងហ្នឹង ហើយបើមិនសួរ ក៏មិនអីដែរ សូមអរគុណ!
ជុំវិញបញ្ហានេះ ក្រុមអ្នកវិភាគបានលើកឡើងថា ករណីមិនមានអ្នកសារព័ត៌មានអន្តរជាតិចោទសួរប្រធានអាស៊ាន ស្ដីពីបញ្ហាព្រំដែនកម្ពុជា-ថៃ គឺដោយសារតែកម្ពុជា ជាប្រទេសដែលធ្លាប់បណ្តេញអ្នកសារព័ត៌មានអន្តរជាតិចេញពីប្រទេស ជាប្រទេសដែលមានកេរ្តិ៍ឈ្មោះអសោចរឿងឧក្រិដ្ឋកម្មអនឡាញ ជាប្រទេសដែលតែងតែមានឈ្មោះអាស្រូវរឿងមិនគោរពសិទ្ធិមនុស្ស និងប្រជាធិបតេយ្យ និងជាប្រទេសដែលមានវិស័យការទូតអន្តរជាតិទន់ខ្សោយ ជាដើម។
ជុំវិញបញ្ហានេះ រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប្រាក់ សុខុន បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២៩ មករា ថា រដ្ឋមន្ត្រីការបរទេសហ្វីលីពីន អ្នកស្រី Maria Theresa Lazaro ក្នុងនាមជាប្រធានអាស៊ាន បានសង្កត់ធ្ងន់លើការជំរុញឱ្យអាស៊ានដោះស្រាយបញ្ហាប្រឈមរួមក្នុងពេលបច្ចុប្បន្ន ក៏ដូចជាបញ្ហាប្រឈមលេចឡើងថ្មីៗ ដើម្បីកសាងសហគមន៍អាស៊ានមួយប្រកបដោយនិរន្តរភាព និងភាពធន់ ដែលស្របទៅនឹងមូលបទ “ដំណើរឆ្ពោះទៅកាន់អនាគតរួមគ្នា”។
លោក ប្រាក់ សុខុន បញ្ជាក់ថា ប្រទេសកម្ពុជាបានបញ្ជាក់សាជាថ្មីពីការប្ដេជ្ញាចិត្តរបស់ខ្លួនក្នុងការដោះស្រាយបញ្ហានានាដោយសន្តិវិធី ស្របតាមច្បាប់អន្តរជាតិ សន្ធិសញ្ញា និងកិច្ចព្រមព្រៀងដែលមានស្រាប់ ដើម្បីធានានូវសន្តិភាព និងស្ថិរភាពក្នុងតំបន់៕
© 2026, . All rights reserved.