អ្នកឃ្លាំមើលសង្គមអះអាងថា ការរៀបចំអំណាចបែបគ្រួសារនិយមរបស់គណបក្សប្រជាជនកម្ពុជា កំពុងបង្កជាឧបសគ្គធ្ងន់ធ្ងរដល់ស្វ័យភាពតំណែងជានាយករដ្ឋមន្ត្រីរបស់លោក ហ៊ុន ម៉ាណែត ដែលធ្វើឱ្យប្រទេសជាតិអាចនឹងប្រឈមនឹងគ្រោះថ្នាក់ធ្ងន់ធ្ងរ នៅពេលដែលលោក ហ៊ុន សែន មិនអាចបន្តធ្វើជាបង្គោលគ្រឹះបានទៀត។
អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក លោក សេង វណ្ណលី សរសេរលើគណនីហ្វេសប៊ុករបស់ខ្លួននៅថ្ងៃទី២ កុម្ភៈ នេះថា នៅពេលដែលលោក ហ៊ុន សែន មិនអាចបន្តធ្វើជាបង្គោលគ្រឹះបានទៀតនោះ វាសនារបស់លោក ហ៊ុន ម៉ាណែត និងប្រទេសជាតិ អាចនឹងប្រឈមនឹងសេណារីយ៉ូគ្រោះថ្នាក់ធ្ងន់ធ្ងរជាច្រើនទៅថ្ងៃមុខ។
លោក សេង វណ្ណលី លើកឡើងថា សេណារីយ៉ូគ្រោះថ្នាក់ដែលអាចកើតមាន ដូចជា វិបត្តិនៃការបែកបាក់ផ្ទៃក្នុង ព្រោះបច្ចុប្បន្ននេះមានតែលោក ហ៊ុន សែន ប៉ុណ្ណោះជាមេអាជ្ញាកណ្ដាលដែលមន្ត្រីគ្រាក់ៗ និងក្រុមគ្រួសារមានឥទ្ធិពលដទៃទៀតកោតខ្លាច។
ជាងនេះទៀត លោកថា ភាពទន់ជ្រាយនៃបទបញ្ជារបស់លោកនាយករដ្ឋមន្ត្រី ហ៊ុន ម៉ាណែត ក៏ជាសេណារីយ៉ូគ្រោះថ្នាក់ដែរ ព្រោះគណៈរដ្ឋមន្ត្រីបច្ចុប្បន្នមានការបែងចែកអំណាចតាមប្រព័ន្ធបណ្ដាញខ្សែរយៈដែលសុទ្ធតែជាកូនចៅមន្ត្រីជាន់ខ្ពស់ដែលមានឪពុក ម្តាយ និងសាច់ញាតិរបស់ពួកគេជាខ្នងបង្អែករៀងៗខ្លួន។
លោកបន្តថា ការណ៍នេះ អាចនាំឱ្យរដ្ឋាភិបាលរបស់លោក ហ៊ុន ម៉ាណែត ទាំងមូលជួបភាពជាប់គាំង ឬការមិនគោរពបទបញ្ជា ដែលប៉ះពាល់ដល់ការអនុវត្តច្បាប់ និងគោលនយោបាយជាតិយ៉ាងធ្ងន់ធ្ងរទៅថ្ងៃមុខ។ លើសពីនេះ ហានិភ័យនៃអន្តរកាលដែលមិនបានត្រៀមខ្លួន ក៏ជាសេណារីយ៉ូគ្រោះថ្នាក់ដែរ ដែលអាចកើតឡើងដោយចៃដន្យនៅពេលណាមួយនោះ ព្រោះថាស្ថាប័នរដ្ឋ ដូចជាតុលាការ ឬស្ថាប័នសភា ជាដើម ត្រូវបានប្រើប្រាស់ដើម្បីបម្រើឆន្ទៈអ្នកមានអំណាចប៉ុណ្ណោះ ដូច្នេះនៅពេលមេដឹកនាំទាំងនោះជួបបញ្ហា ស្ថាប័នទាំងនេះក៏មិនអាចដើរតួជាសំណាញ់សុវត្ថិភាពរក្សាលំនឹងប្រទេសជាតិបានដែរ។
លោក សេង វណ្ណលី ផ្តល់យោបល់ថា ដើម្បីចៀសវាងគ្រោះថ្នាក់នេះ កម្ពុជាត្រូវតែផ្លាស់ប្ដូរពីការគ្រប់គ្រងដោយបុគ្គល ទៅជាការគ្រប់គ្រងតាមគោលការណ៍ច្បាប់ និងស្ថាប័នវិញ ដូចជា ការផ្តល់អំណាចដល់ស្ថាប័ននីតិប្បញ្ញត្តិ ស្ថាប័ននីតិប្រតិបត្តិ និងស្ថាប័នតុលាការ ដើម្បីឱ្យមានភាពឯករាជ្យម្ចាស់ការដាច់ដោយឡែកពីគ្នា និងការអនុវត្តតាមនីតិវិធីរដ្ឋបាលដែលចំហ និងមានការចូលរួមពីមតិសាធារណៈ ជាដើម។
អ្នកឃ្លាំមើលសង្គមរូបនេះបញ្ជាក់ថា សន្តិភាពដែលផ្អែកលើបុគ្គលម្នាក់ គឺជាសន្តិភាពដែលផុយស្រួយបំផុត ប៉ុន្តែស្ថិរភាពពិតប្រាកដដែលកើតចេញពីការផ្តល់ជំនឿទុកចិត្តលើស្ថាប័នរដ្ឋ និងការគោរពច្បាប់ជាធំ ទើបជាគន្លឹះតែមួយគត់ដើម្បីឱ្យលោក ហ៊ុន ម៉ាណែត និងកម្ពុជា រួចផុតពីហានិភ័យនៃភាពទន់ជ្រាយនយោបាយបច្ចុប្បន្នទៅថ្ងៃអនាគត។
គេសង្កេតឃើញថា រយៈពេលដឹកនាំប្រទេសកម្ពុជា ជាង ២ឆ្នាំមកនេះ លោក ហ៊ុន ម៉ាណែត មិនបានដើរតួនាទីពេញលេញជានាយករដ្ឋមន្ត្រីដោយសមត្ថភាពខ្លួនឯងទេ ព្រោះគាត់នៅតែចាំទទួលបញ្ជា និងការសម្រេចរាល់កិច្ចការផ្សេងៗពីលោក ហ៊ុន សែន ដែលជាឪពុករបស់គាត់រហូតមក។
យ៉ាងណាក៏ដោយ លោក ហ៊ុន សែន បានអះអាងកាលពីថ្ងៃទី២៣ ខែសីហា ឆ្នាំ២០២៥ ថា លោក ហ៊ុន ម៉ាណែត បានបន្តវេនដឹកនាំប្រទេសកម្ពុជាអស់រយៈពេល ២ឆ្នាំមកនេះ គ្រប់គ្រាន់ក្នុងការយល់ដឹងពីការដឹកនាំ និងគ្រប់គ្រងបានល្អពីសំណាក់ថ្នាក់ដឹកនាំជំនាន់ថ្មីលើគ្រប់វិស័យ ទាំងនៅក្នុងរាជរដ្ឋាភិបាលទាំងមូល ទាំងនៅគ្រប់ស្ថាប័នថ្នាក់ជាតិ និងថ្នាក់ក្រោមជាតិ។
បែបនេះក្តី ប្រធានអង្គការប្រជាធិបតេយ្យខ្មែរ (KOD) លោក ស៊ឹង សែនករុណា បានលើកឡើងកាលពីពេលថ្មីៗនេះថា តាមការសង្កេតរយៈពេល ២ឆ្នាំក្នុងតំណែងជានាយករដ្ឋមន្ត្រីរបស់លោក ហ៊ុន ម៉ាណែត បង្ហាញថា ការដឹកនាំរបស់គាត់ គឺស្ថិតក្រោមការចាត់ចែងរបស់លោក ហ៊ុន សែន ជាជាងការដឹកនាំដោយសមត្ថភាព និងការយល់ដឹងផ្ទាល់ខ្លួន៕
© 2026, . All rights reserved.