ប្រធានសភាពាណិជ្ជកម្មអាមេរិកប្រចាំកម្ពុជា លោក Casey Barnett ចាត់ទុកការលុបបម្រាមហាមឃាត់លើការលក់អាវុធឱ្យប្រទេសកម្ពុជា ពីក្រសួងការបរទេស និងក្រសួងពាណិជ្ជកម្មសហរដ្ឋអាមេរិក កាលពីថ្ងៃអង្គារ គឺជានិមិត្តរូបដ៏សំខាន់មួយដល់ទំនុកចិត្តរវាងសហរដ្ឋអាមេរិក និងប្រទេសកម្ពុជា នាពេលនេះ ហើយក៏ជាការបើកផ្លូវដ៏ធំមួយឱ្យរាជរដ្ឋាភិបាលកម្ពុជា មានសិទ្ធិពេញលេញស្របច្បាប់ក្នុងការទិញបច្ចេកវិទ្យាទំនើបៗពីសហរដ្ឋអាមេរិកទៅថ្ងៃមុខដែរ។
លោក Casey Barnett បញ្ជាក់ថា នៅថ្ងៃពុធនេះ លោកកំពុងមានវត្តមាននៅប្រទេសសិង្ហបុរី ដើម្បីជួបជាមួយក្រុមហ៊ុនអាកាសចរណ៍ និងក្រុមហ៊ុនផលិតអាវុធអាមេរិកាំង ដើម្បីជួយជំរុញ និងលើកទឹកចិត្តឱ្យពួកគេលក់ផលិតផលដែលមានគុណភាពខ្ពស់របស់គេ ដើម្បីជួយដល់សន្តិសុខ និងសេដ្ឋកិច្ចនៃប្រទេសកម្ពុជា។
កាលពីថ្ងៃទី៣ ខែកុម្ភៈ ឆ្នាំ២០២៦ ក្រសួងពាណិជ្ជកម្មសហរដ្ឋអាមេរិក តាមរយៈការិយាល័យឧស្សាហកម្ម និងសន្តិសុខ (BIS) បានចេញបទបញ្ជាចុងក្រោយ (Final Rule) ស្ដីពីការវិសោធនកម្មលើបទបញ្ជាគ្រប់គ្រងការនាំចេញ (EAR) ដោយលុបឈ្មោះកម្ពុជា ចេញពីបញ្ជី “Country Group D:5” ដែលជាក្រុមប្រទេសរងការហាមឃាត់ការនាំចេញអាវុធពីសហរដ្ឋអាមេរិក។
ប្រភពដដែល អះអាងថា តាមរយៈបទបញ្ជាថ្មីនេះ ក្រសួងពាណិជ្ជកម្មសហរដ្ឋអាមេរិក បានលុបសញ្ញា “X” នៅក្នុងតារាង Group D:5 ត្រង់ឈ្មោះប្រទេសកម្ពុជា ដែលមានន័យថា រាល់ការរឹតត្បិតក្នុងនាមជាប្រទេសរងទណ្ឌកម្មអាវុធ ត្រូវបានបញ្ចប់ជាផ្លូវការចាប់ពីថ្ងៃទី០៣ ខែកុម្ភៈ ឆ្នាំ២០២៦ នេះតទៅ។
ជុំវិញបញ្ហានេះ ក្រោយពីប្រធានាធិបតីអាមេរិក លោក ដូណាល់ ត្រាំ ធ្វើជាសាក្សីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា-ថៃ កាលពីថ្ងៃទី២៦ ខែតុលា ឆ្នាំ២០២៥ សេតវិមានបានចេញសេចក្តីប្រកាសព័ត៌មានថា សហរដ្ឋអាមេរិកបានប្រកាសដកបម្រាមការលក់សព្វាវុធលើកម្ពុជា រួមទាំងបង្កើនកៅអីសម្រាប់សិក្ខាកាមជនជាតិខ្មែរទៅសាលាយោធាសហរដ្ឋអាមេរិក ដូចជា សាលា West Point, Air Force Academy និងសាលាផ្សេងៗទៀតដែរ រួមទាំងការបើកឲ្យមានការរៀបចំធ្វើសមយុទ្ធយោធាឆ្មាំអង្គររវាងប្រទេសទាំងពីរឡើងវិញថែមទៀត។
ទាក់ទិននឹងបញ្ហានេះ គេសង្កេតឃើញថាទំនាក់ទំនងទ្វេភាគីកម្ពុជា-អាមេរិក រយៈពេលប្រមាណជា ៣០ឆ្នាំមកនេះ ភាគច្រើនមានភាពរកាំរកូស និងតានតឹង ជាពិសេសចាប់តាំងពីកម្ពុជា ប្រកាសផ្អាកធ្វើសមយុទ្ធយោធាជាមួយអាមេរិកពីឆ្នាំ២០១៧ មក ហើយទំនាក់ទំនងប្រទេសទាំងពីរកាន់តែធ្លាក់ចុះបន្ថែមទៀត នៅពេលដែលកម្ពុជាបានវាយកម្ទេចអគារដែលជាជំនួយអាមេរិកនៅកំពង់ផែរាមកាលពីឆ្នាំ២០១៩ កន្លងទៅ។
គួរបញ្ជាក់ថា៖ ការលុបបម្រាមហាមលក់គ្រឿងអាវុធឲ្យប្រទេសកម្ពុជា ធ្វើឡើងថ្មីៗនេះ គឺយោងតាមមូលមតិគ្នាគ្រាមានជំនួបកំពូលនៅក្រុងកូឡាឡាំពួរ ថ្ងៃទី២៦ ខែតុលា ឆ្នាំ២០២៥ ដែលលោក ដូណាល់ ត្រាំ ធ្វើជាសាក្សីក្នុងសេចក្តីថ្លែងការណ៍រួមរកការបញ្ចប់ជម្លោះរវាងរាជាណាចក្រកម្ពុជា និងរាជាណាចក្រថៃឡង់ដ៍ រឿងព្រំដែន។ មូលហេតុដែលសហរដ្ឋអាមេរិកដាក់ឈ្មោះប្រទេសកម្ពុជា ក្នុងបញ្ជីបម្រាមលក់អាវុធ និងផ្ទេរបច្ចេកវិទ្យាក្នុងរដ្ឋការប្រធានាធិបតី ចូ បៃដិន (Joe Biden) កាលពីឆ្នាំ២០២១ ពីព្រោះគេរកឃើញថាប្រទេសកម្ពុជា អែបទៅកៀកកើយចិន ហួសពេក ដែលជារឿងសន្តិសុខជាតិនៃប្រទេសក្នុងតំបន់ និងខ្លាចបច្ចេកវិទ្យាអាមេរិកាំង ធ្លាក់ទៅក្នុងដៃចិន ដោយសារតែអំពើពុករលួយ។
ម្យ៉ាងទៀត សហរដ្ឋអាមេរិកមើលឃើញថា រាជរដ្ឋាភិបាលខ្មែររំលោភសិទ្ធិមនុស្សធ្ងន់ធ្ងរ ដែលមានពេលខ្លះប្រើអាវុធផលិតដោយសហរដ្ឋអាមេរិក។
ការហាមនៅឆ្នាំ២០២១ បានបង្កកំហឹងរហូតលោក ហ៊ុន សែន បញ្ជាឲ្យដុតអាវុធអាមេរិកាំងចោលទាំងអស់។
ការលុបឈ្មោះប្រទេសកម្ពុជា ពីបញ្ជីជាប់បម្រាម មិនមែនគ្មានលក្ខខណ្ឌនោះទេ ថ្វីបើក្រសួងការបរទេសសហរដ្ឋអាមេរិក បានផ្តើមចាត់ទុកប្រទេសកម្ពុជា ថាដូចជាចង់ធ្វើសហប្រតិបត្តិការជាមួយគ្នាឡើងវិញក្តី។ ខ្លឹមសារក្នុងសេចក្តីប្ដេជ្ញាសុខចិត្តទៅវិញទៅមករួមជាមួយសហរដ្ឋអាមេរិក នៅថ្ងៃទី២៦ ខែតុលា ឆ្នាំ២០២៥ ប្រទេសទាំងពីរព្រមព្រៀងផ្តើមធ្វើសមយុទ្ធយោធាឆ្មាំអង្គរជាមួយគ្នាឡើងវិញ; ព្រមព្រៀងពង្រីកកិច្ចសហប្រតិបត្តិការជាមួយគ្នាបង្ក្រាបបណ្ដាញរត់ពន្ធគ្រឿងញៀន និងឧក្រិដ្ឋកម្មឆបោកឆ្លងដែន ដែលបានលួចប្រាក់ពលរដ្ឋអាមេរិកាំងប្រមាណ ១០ពាន់លានដុល្លារក្នុងមួយឆ្នាំៗ។
សហរដ្ឋអាមេរិកប្រើភាសាការទូតដោយចាត់ទុកការលុបបម្រាមពីបញ្ជីហាមឃាត់លក់អាវុធ ថាបើកទ្វារផ្តល់ឱកាសឲ្យប្រទេសកម្ពុជា ចាប់ដៃសហរដ្ឋអាមេរិកជាថ្មី។ គេប្រើភាសាអំពីទំនាក់ទំនងសហរដ្ឋអាមេរិក-ថៃឡង់ដ៍ ថាពង្រឹងទំនាក់ទំនងយោធា ចែករំលែកព័ត៌មានស៊ើបអង្កេតនានាជាមួយគ្នា។ គេប្រើភាសាអំពីទំនាក់ទំនងសហរដ្ឋអាមេរិក-ម៉ាឡេស៊ី ថាបង្កើនទំនាក់ទំនងលើវិស័យផ្សេងៗឲ្យកាន់តែប្រសើរឡើងថែមទៀត។
កាលពីចុងឆ្នាំ២០២៥ សមាជិកជាន់ខ្ពស់នៃរដ្ឋសភាអាមេរិកាំងខាងគណៈកម្មាធិការកិច្ចការបរទេស លោក Gregory Meeks បានចេញសេចក្តីថ្លែងការណ៍រិះគន់ប្រធានាធិបតី ត្រាំ ថាបើកដៃលក់អាវុធឲ្យប្រទេសកម្ពុជា ដោយឥតពិចារណាអំពីរបបដឹកនាំពុករលួយ និងជិះជាន់ ក៏ដោយសារតែរដ្ឋាភិបាលប្រទេសកម្ពុជា បានផ្គាប់ចិត្តលោក ត្រាំ ដោយស្នើផ្តល់រង្វាន់ណូបែលសន្តិភាពដល់លោកតែប៉ុណ្ណោះ៕
© 2026, . All rights reserved.