អ៊ីរ៉ង់ ត្រូវបានគេមើលឃើញថាជាប្រទេសមួយដែលជាដៃគូយុទ្ធសាស្ត្រយោធាដ៏ទូលំទូលាយជាមួយមហាអំណាចរុស្ស៊ី និងចិន។
នៅខណៈភាពតានតឹងជាមួយសហរដ្ឋអាមេរិក បាននិងកំពុងកើនឡើង ក៏មានការចោទសួរជុំវិញស្ថានការណ៍ដូចនេះថា តើរុស្ស៊ី និងចិន អាចបណ្តោយឱ្យអ៊ីរ៉ង់ ធ្លាក់ទៅក្នុងសង្គ្រាមជាមួយមហាអំណាចសហរដ្ឋអាមេរិកឬទេ ហើយបើអាចផ្ទុះសង្គ្រាមវាយប្រហារពីសហរដ្ឋអាមេរិក តើប្រទេសទាំងពីរនេះនឹងជួយអ៊ីរ៉ង់ ក្នុងទម្រង់បែបណា?
ការវិភាគដ៏សំខាន់មួយបានបង្ហាញថា ទាំងរុស្ស៊ី និងចិន មិនចង់ឲ្យអ៊ីរ៉ង់ ចូលទៅក្នុងជម្លោះផ្ទាល់នោះទេ។ វិធីសាស្ត្ររបស់ពួកគេច្រើនផ្អែកលើការគាំទ្រផ្នែកយុទ្ធសាស្ត្រ និងសេដ្ឋកិច្ច ដូចជា ការពង្រឹងសមត្ថភាពយោធារួម ក្នុងការធ្វើសមយុទ្ធកងទ័ពជើងទឹក ការវិនិយោគ និងការផ្តល់ការការពារសេដ្ឋកិច្ច ដើម្បីបន្ថែមភាពរឹងមាំទៅឱ្យអ៊ីរ៉ង់ ទប់ទល់នឹងទណ្ឌកម្មអាមេរិកតែប៉ុណ្ណោះ ខណៈប្រទេសទាំងពីរនេះត្រូវបានគេមើលឃើញថាពុំមានឆន្ទៈច្បាស់លាស់ក្នុងការធានាការពារអ៊ីរ៉ង់ ពីការវាយប្រហារពីសំណាក់សហរដ្ឋអាមេរិក ឬអ៊ីស្រាអែល នោះទេ។
ក្នុងវិស័យនយោបាយវិញ រុស្ស៊ី ចិន និងអ៊ីរ៉ង់ កំពុងបង្កើតសម្ពន្ធភាពយុទ្ធសាស្ត្រដើម្បីកាត់បន្ថយឥទ្ធិពលអាមេរិក និងពង្រឹងសន្តិសុខតំបន់ ប៉ុន្តែការចូលរួមផ្ទាល់ក្នុងសង្គ្រាមត្រូវប្រុងប្រយ័ត្នខ្ពស់ ដើម្បីជៀសវាងការសងសឹក និងផលប៉ះពាល់ធ្ងន់ធ្ងរ។ ទោះបីមានការគាំទ្រយុទ្ធសាស្ត្រ និងសេដ្ឋកិច្ចពីរុស្ស៊ី និងចិន ក៏ដោយ ក៏អ៊ីរ៉ង់ នៅតែងាយរងគ្រោះ ប្រសិនបើធ្លាក់ទៅក្នុងជម្លោះផ្ទាល់ជាមួយអាមេរិក ឬអ៊ីស្រាអែល។
ចិន អ៊ីរ៉ង់ និងរុស្ស៊ី ត្រូវបានគេដឹងថា បានចុះហត្ថលេខាលើកតិកាសញ្ញាយុទ្ធសាស្ត្រទូលំទូលាយមួយ ខណៈអ៊ីរ៉ង់ កំពុងស្ថិតក្រោមសម្ពាធយោធាយ៉ាងខ្លាំងពីសហរដ្ឋអាមេរិក ដែលអ្នកវិភាគមើលឃើញថា អាចផ្លាស់ប្ដូរសក្ដានុពលថាមពលសកល និងបង្កើនភាពតានតឹងជាមួយសហរដ្ឋអាមេរិក។
កិច្ចព្រមព្រៀងនេះ ត្រូវបានប្រកាសក្នុងពេលដំណាលគ្នារវាងទីក្រុងតេហេរ៉ង់ ទីក្រុងប៉េកាំង និងក្រុងមូស្គូ ហើយត្រូវបានរដ្ឋាភិបាលនៃប្រទេសទាំងបីពណ៌នាថា ជាមូលដ្ឋានសម្រាប់ការបង្កើត “ពហុប៉ូលថ្មី”។
ក្រុមមន្ត្រីនៃប្រទេសទាំងបីនេះបានបញ្ជាក់ថា កតិកាសញ្ញានេះគ្របដណ្ដប់កិច្ចសហប្រតិបត្តិការលើវិស័យថាមពល ពាណិជ្ជកម្ម ការសម្របសម្រួលយោធា និងយុទ្ធសាស្ត្រការទូត។
ប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានដកស្រង់សម្ដីមន្ត្រីឱ្យដឹងថា កតិកាសញ្ញានេះឆ្លុះបញ្ចាំងពីការប្ដេជ្ញាចិត្តរួមក្នុងការគោរពគ្នា ការរក្សាឯករាជ្យ និងប្រព័ន្ធអន្តរជាតិដោយផ្អែកលើច្បាប់ដែលបដិសេធការបង្ខិតបង្ខំពីភាគីណាមួយ។
សេចក្តីថ្លែងការណ៍ស្រដៀងគ្នានេះ ត្រូវបានផ្សព្វផ្សាយចេញពីទីក្រុងប៉េកាំង និងទីក្រុងមូស្គូ ផងដែរ ដើម្បីបង្ហាញពីការរួមកម្លាំងគ្នាទប់ទល់ឥទ្ធិពលរបស់លោកខាងលិច។
កតិកាសញ្ញាត្រីភាគីនេះ បានកើតឡើងក្នុងឆ្នាំនៃការពង្រីកទំនាក់ទំនងទ្វេភាគីរវាងប្រទេសទាំងបី។ កាលពីខែមករា ឆ្នាំ២០២៥ អ៊ីរ៉ង់ និងរុស្ស៊ី បានចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្ររយៈពេល ២០ឆ្នាំ ដើម្បីពង្រឹងសហប្រតិបត្តិការសេដ្ឋកិច្ច និងសន្តិសុខ និងទប់ទល់នឹងទណ្ឌកម្មរបស់លោកខាងលិច។ លើសពីនេះ អ៊ីរ៉ង់ និងចិន ក៏បានចុះហត្ថលេខាលើកិច្ចព្រមព្រៀងសហប្រតិបត្តិការរយៈពេល ២៥ឆ្នាំ កាលពីឆ្នាំ២០២១ ដែលផ្ដោតលើការពង្រីកពាណិជ្ជកម្ម អភិវឌ្ឍន៍ ហេដ្ឋារចនាសម្ព័ន្ធ និងសមាហរណកម្មថាមពល។
អ្វីដែលធ្វើឲ្យកតិកាសញ្ញាថ្មីនេះមានសារសំខាន់ គឺការបញ្ចូលអំណាចទាំងបីប្រទេសចូលក្នុងសម្ពន្ធភាពដែលមានការសម្របសម្រួលជាក់លាក់លើបញ្ហាអធិបតេយ្យនុយក្លេអ៊ែរ សេដ្ឋកិច្ច និងយោធា។
ទោះបីជាមានវិសាលភាព តែកតិកាសញ្ញានេះមិនមែនជាសន្ធិសញ្ញាការពារជាផ្លូវការដូចដែលមានក្នុងអង្គការណាតូ (NATO) ដែលមានកាតព្វកិច្ចយោធាការពារគ្នាទៅវិញទៅមកនោះទេ។ កតិកាសញ្ញាថ្មីនេះត្រូវបានគេមើលឃើញថាវាដូចជាការបន្តតាមបន្ទាត់ប្រុងប្រយ័ត្ន ដោយផ្ដោតលើការតម្រឹមនយោបាយ និងយុទ្ធសាស្ត្រដើម្បីទប់ទល់នឹងឥទ្ធិពលរបស់សហរដ្ឋអាមេរិក។
អ្នកវិភាគបានលើកឡើងថា កិច្ចព្រមព្រៀងនេះឆ្លុះបញ្ចាំងពីការប្ដេជ្ញាចិត្តរួមគ្នា ដើម្បីទប់ទល់នឹងទណ្ឌកម្មសំដៅកាត់បន្ថយការពឹងផ្អែកលើប្រព័ន្ធហិរញ្ញវត្ថុអាមេរិក និងពង្រឹងអំណាចក្នុងតំបន់សំខាន់នៃពិភពលោក។
យ៉ាងណា ការចុះហត្ថលេខាលើកតិកាសញ្ញាត្រីភាគីនៅពេលនេះ កើតឡើងខណៈមានភាពតានតឹងកើនឡើងរវាងអ៊ីរ៉ង់ និងសហរដ្ឋអាមេរិក។ ទីក្រុងវ៉ាស៊ីនតោន បានចោទប្រកាន់អ៊ីរ៉ង់ ថាបានបង្កើនសារធាតុអ៊ុយរ៉ាញ៉ូមលើសពីដែនកំណត់ក្នុងកិច្ចព្រមព្រៀងនុយក្លេអ៊ែរ ឆ្នាំ២០១៥ ដែលនាំឱ្យរដ្ឋការលោក ដូណាល់ ត្រាំ សម្រេចដកខ្លួនចេញពីកិច្ចព្រមព្រៀងនុយក្លេអ៊ែរនេះក្នុងឆ្នាំ២០១៨ និងបានដាក់ទណ្ឌកម្មឡើងវិញ ដែលធ្វើឱ្យសេដ្ឋកិច្ចអ៊ីរ៉ង់ រងផលប៉ះពាល់យ៉ាងខ្លាំង។
កិច្ចខិតខំប្រឹងប្រែងក្នុងការស្ដារកិច្ចព្រមព្រៀងឡើងវិញ បានជាប់គាំងម្តងហើយម្តងទៀត។ កិច្ចចរចានៅប្រទេសអូម៉ាន់ និងទីក្រុងរ៉ូម ប្រទេសអ៊ីតាលី ក្នុងឆ្នាំ២០២៥ បានបញ្ចប់ដោយគ្មានកិច្ចព្រមព្រៀង និងកាន់តែបន្ថែមការមិនទុកចិត្តគ្នារវាងអាមេរិក និងអ៊ីរ៉ង់ កាន់តែធ្ងន់មួយកម្រិតទៀត។
ការដាក់ពង្រាយកងនាវាចម្បាំងរបស់សហរដ្ឋអាមេរិកនៅឈូងសមុទ្រតំបន់មជ្ឈិមបូព៌ា បានបង្កើនភាពភ័យខ្លាចលើការកើនឡើងនៃភាពតានតឹង។ នាវាផ្ទុកយន្តហោះ USS Abraham Lincoln និងនាវាចម្បាំងជាច្រើន ត្រូវបានបញ្ជូនទៅសមុទ្រនៅតំបន់មជ្ឈិមបូព៌ាក្នុងពេលនេះ ក្រោមហេតុផលថាជាការឆ្លើយតបនឹង «ការគំរាមកំហែងកាន់តែខ្លាំង» ពីអ៊ីរ៉ង់។
នៅក្នុងប្រទេសអ៊ីរ៉ង់ ការតវ៉ាទ្រង់ទ្រាយធំផ្នែកសេដ្ឋកិច្ចដែលចាប់ផ្តើមក្នុងចុងខែធ្នូ ឆ្នាំ២០២៥ បានបន្ថែមសម្ពាធលើរដ្ឋាភិបាលនៃរបបសាធារណរដ្ឋឥស្លាមអ៊ីរ៉ង់។ ទីក្រុងតេហេរ៉ង់ បានចោទប្រកាន់ពួកបស្ចិមប្រទេសពីការជ្រៀតជ្រែកក្នុងកិច្ចការផ្ទៃក្នុង ដោយចង្អុលទៅលើសេចក្តីថ្លែងការណ៍របស់ប្រធានាធិបតី ដូណាល់ ត្រាំ (Donald Trump) ក្នុងការគាំទ្រក្រុមបាតុករ។ មន្ត្រីអ៊ីរ៉ង់ បាននិយាយថា ការអត្ថាធិប្បាយរបស់លោក ត្រាំ បែបនេះ គឺជាការជ្រៀតជ្រែកក្នុងរឿងផ្ទៃក្នុង។
សម្រាប់រុស្ស៊ី និងចិន កិច្ចព្រមព្រៀងនេះបានផ្តល់ឱកាសឱ្យប្រទេសទាំងពីរចូលប្រើទុនបម្រុងថាមពលអ៊ីរ៉ង់ និងពង្រឹងសមត្ថភាពប្រកួតប្រជែងជាមួយសម្ពន្ធមិត្តអាមេរិកនៅមជ្ឈិមបូព៌ា និងឥណ្ឌូ-ប៉ាស៊ីហ្វិក។ ប្រទេសទាំងពីរបានពង្រីកការសហប្រតិបត្តិការយោធាជាមួយអ៊ីរ៉ង់ រួមទាំងសមយុទ្ធកងទ័ពជើងទឹកនៅឈូងសមុទ្រតំបន់មជ្ឈិមបូព៌ាជាញឹកញាប់។
ប៉ុន្តែសម្រាប់សហរដ្ឋអាមេរិក និងសម្ពន្ធមិត្ត ចំពោះកតិកាសញ្ញាត្រីភាគីនេះកាន់តែធ្វើឱ្យការប្រឹងប្រែង អ៊ីរ៉ង់មានអំនួតហ៊ានប្រឈមមុខនឹងបស្ចិមប្រទេសដែលមានអាមេរិក ជាមេខ្លោង។
នៅពេលនេះ កតិកាសញ្ញាត្រីភាគីនេះបានពង្រឹងដៃការទូតរបស់អ៊ីរ៉ង់ ប៉ុន្តែភាពតានតឹងជាមួយសហរដ្ឋអាមេរិកនៅតែបន្ត ដោយបង្ហាញសញ្ញាផុយស្រួយ ខណៈអ៊ីស្រាអែល សម្ពន្ធភាពយុទ្ធសាស្ត្រនឹងសហរដ្ឋអាមេរិក កំពុងដាក់ផែនការឱ្យទីក្រុងវ៉ាស៊ីនតោន លំបាកដកខ្លួនចេញពីស្ថានភាពដ៏តានតឹងនេះ ព្រោះអ៊ីស្រាអែល សច្ចាជួយប្រជាជនអ៊ីរ៉ង់ ផ្ដួលរបបផ្ដាច់ការនៃរដ្ឋាភិបាលសាធារណរដ្ឋឥស្លាមអ៊ីរ៉ង់ ដែលត្រូវបានពួកបស្ចិមប្រទេសចាត់ទុកជារបបភេរវកម្មដ៏គ្រោះថ្នាក់នៃពិភពលោក៕
© 2026, . All rights reserved.