ការបង្ក្រាបរបស់អាជ្ញាធរអ៊ីរ៉ង់ កំពុងរីករាលដាលទៅលើវិស័យសុខាភិបាល ជាមួយនឹងការកំណត់គោលដៅទៅលើវេជ្ជបណ្ឌិត និងគិលានុបដ្ឋាយិកាដែលបានផ្តល់ការព្យាបាលដល់អ្នកតវ៉ារងរបួសក្នុងអំឡុងការផ្ទុះមហាកុបកម្ម។
តាមការចុះផ្សាយដោយសារព័ត៌មាន Iran International បានឱ្យដឹងថា បុគ្គលិកមន្ទីរពេទ្យជាច្រើនសិបនាក់ហើយត្រូវបានឃុំខ្លួនដោយកងសន្តិសុខរដ្ឋនៃរដ្ឋាភិបាលសាធារណរដ្ឋឥស្លាមិកអ៊ីរ៉ង់។
តាមប្រភពព័ត៌មានដដែលនេះ ឱ្យដឹងថា គ្រូពេទ្យដែលបានព្យាបាលបាតុករនៅទីក្រុង Qazvin Rasht Tabriz Mashhad និង Gorgan ត្រូវបានចាប់ខ្លួន ឬបាត់ខ្លួនជាច្រើននាក់។ តាម Iran International សកម្មជនសិទ្ធិមនុស្សបានហៅថាសកម្មភាពទាំងនេះមិនត្រឹមជាការរំលោភសិទ្ធិមនុស្សប៉ុណ្ណោះទេ ប៉ុន្តែក៏ជាការបំភិតបំភ័យដល់វិជ្ជាជីវៈវេជ្ជសាស្ត្រ និងការរារាំងសិទ្ធិមូលដ្ឋានរបស់ប្រជាពលរដ្ឋក្នុងការទទួលបានការព្យាបាលខ្លួន។
ប្រធានក្រុមប្រឹក្សាវេជ្ជសាស្ត្រអ៊ីរ៉ង់ លោក Mohammad Raiszadeh បានបញ្ជាក់ថា សមាជិករបស់ក្រុមប្រឹក្សាវេជ្ជសាស្ត្រចំនួន ១៧នាក់កំពុងប្រឈមមុខនឹងសំណុំរឿងឡើងតុលាការ ទាក់ទងនឹងចលនាពេលថ្មីៗនេះ ប៉ុន្តែលោកបានទទូចសុំកុំឱ្យមានវេជ្ជបណ្ឌិត ឬគិលានុបដ្ឋាយិកាណាម្នាក់ត្រូវបានកាត់ទោសពីបទផ្តល់ការព្យាបាលអ្នកជំងឺ និងបាតុករដែលរងរបួស។
សារព័ត៌មាន Kayhan London ដែលមានមូលដ្ឋាននៅចក្រភពអង់គ្លេស បានរាយការណ៍ថា វេជ្ជបណ្ឌិត Masoud Ebadi-Fard Azari និងប្រពន្ធរបស់គាត់ គឺអ្នកស្រី Parisa Porkar ត្រូវបានចាប់ខ្លួននៅទីក្រុង Qazvin ពីបទព្យាបាលអ្នកតវ៉ាដែលរងរបួស ខណៈទីតាំងឃុំខ្លួនរបស់ពួកគេនៅតែមិនត្រូវបានបង្ហាញជាសាធារណៈ។
ករណីមួយផ្សេងទៀតពាក់ព័ន្ធនឹង Golnaz Naraqi អ្នកឯកទេសផ្នែកវេជ្ជសាស្ត្រសង្គ្រោះបន្ទាន់អាយុ ៤១ឆ្នាំ ដែលធ្វើការនៅមន្ទីរពេទ្យ Hasheminejad និង Shohada-ye Tajrish ក្នុងទីក្រុង Tehran ត្រូវបានរាយការណ៍ថា អ្នកស្រីត្រូវបានចាប់ខ្លួននៅផ្ទះរបស់ខ្លួនកាលពីជាងដប់ថ្ងៃមកនេះ។
ទន្ទឹមនឹងនេះ អ្នកប្រើប្រាស់បណ្ដាញសង្គមជាច្រើនបានរាយការណ៍អំពីសម្ពាធដែលកាន់តែខ្លាំងឡើងពីអាជ្ញាធរអ៊ីរ៉ង់ ទៅលើបុគ្គលិកពេទ្យ ដែលត្រូវបានចោទប្រកាន់ថាបានជួយសង្គ្រោះជីវិតបាតុករ។
ក្នុងសារមួយផ្ញើទៅកាន់សារព័ត៌មាន Iran International អ្នកផ្តល់ព័ត៌មានម្នាក់បានអះអាងថា លោក Farshid Pourreza ប្រធានមន្ទីរពេទ្យ Golsar ក្នុងទីក្រុង Rasht ត្រូវបានបណ្តេញចេញពីតំណែង និងបណ្តេញចេញពីមន្ទីរពេទ្យ ដោយសារតែការព្យាបាលបាតុកររងរបួស។ ជាមួយគ្នានេះ រដ្ឋមន្ត្រីក្រសួងសុខាភិបាលអ៊ីរ៉ង់ Mohammad Reza Zafarghandi បានសរសេរនៅលើបណ្ដាញ X ថា ការផ្តល់ “សេវាវេជ្ជសាស្ត្រល្អបំផុតដែលអាចធ្វើទៅបានដល់អ្នកជំងឺគ្រប់រូបក្នុងបរិយាកាសថែទាំសុខភាពដែលមានសុវត្ថិភាព” ដោយមិនគិតពី “កត្តាខាងក្រៅណាមួយ” គឺជាអាទិភាពចម្បងរបស់ប្រព័ន្ធសុខាភិបាល។
ទោះជាយ៉ាងណាក្ដី សេចក្តីថ្លែងការណ៍នេះបានទាក់ទាញការរិះគន់យ៉ាងឆាប់រហ័សតាមអ៊ីនធឺណិត ដោយវេជ្ជបណ្ឌិតអ៊ីរ៉ង់មួយចំនួនបានសួរទៅកាន់អាជ្ញាធរថា តើអាចធានាសុវត្ថិភាពអ្នកជំងឺបានយ៉ាងដូចម្តេច ខណៈបុគ្គលិកពេទ្យខ្លួនឯងកំពុងប្រឈមនឹងការចាប់ខ្លួន និងការគំរាមកំហែង?
សេចក្តីថ្លែងការណ៍បានឱ្យដឹងថា អ្នករងគ្រោះបានបង្ហាញរោគសញ្ញាជាច្រើនដែលលើសពីការប៉ះពាល់ផ្ទាល់នឹងឧស្ម័នបង្ហូរទឹកភ្នែកធម្មតា រួមទាំងបញ្ហាផ្លូវដង្ហើម ការថយចុះនៃប្រព័ន្ធប្រសាទ អស្ថិរភាពនៃសរសៃឈាមបេះដូង ការឈឺក្បាលរាប់ម៉ោង វិលមុខ និងបញ្ហាផ្នែកប្រព័ន្ធរាងកាយរយៈពេលវែង។
ការអំពាវនាវនេះ កើតឡើងបន្ទាប់ពីការបង្ក្រាបដោយហិង្សាដែលធ្វើឡើងក្នុងការតវ៉ាទូទាំងប្រទេសអ៊ីរ៉ង់ កាលពីថ្ងៃទី៨ និងថ្ងៃទី៩ ខែមករា ដែលបណ្តាលឲ្យមនុស្សរាប់ពាន់នាក់ស្លាប់ និងជាច្រើនម៉ឺននាក់រងរបួស។
តាមការចុះផ្សាយដោយសារព័ត៌មាន Iran International ក្នុងអំឡុងកុបកម្មទ្រង់ទ្រាយធំពីថ្ងៃទី៨ ដល់ថ្ងៃទី១០ មករា ដែលមនុស្សជិត ៦លាននាក់បានផ្ទុះកុបកម្មនៅទូទាំងប្រទេស។ នៅរដ្ឋធានីតេហេរ៉ង់ មនុស្ស ១លាន ៥សែននាក់ ចុះតវ៉ាដ៏ហិង្សាតាមដងផ្លូវដោយបានប៉ះទង្គិចយ៉ាងខ្លាំងជាមួយកងសន្តិសុខ។
អំឡុងពេលនោះ កងឆ្មាំបដិវត្តន៍អ៊ីរ៉ង់ បើកប្រតិបត្តិការបាញ់សម្លាប់បាតុករយ៉ាងធ្ងន់ធ្ងរ។ បាតុករស្លាប់គរជើងលើគ្នា ជាពិសេសនៅរដ្ឋធានីតេហេរ៉ង់។ ក្រុមសិទ្ធិមនុស្សក្នុងប្រទេសអ៊ីរ៉ង់ បានឱ្យដឹងថា បាតុករអាចស្លាប់ពី ៣៦៥០០នាក់ទៅ ៤០០០០នាក់ និងរងរបួសអាចមានជាង ៣៣ម៉ឺននាក់៕
© 2026, . All rights reserved.