អង្គការការពារសិទ្ធិមនុស្ស ស្នើឱ្យតុលាការខេត្តបន្ទាយមានជ័យ ពិចារណាដោះលែងចាងហ្វាងកាសែតអនឡាញ HVNN លោក ហែម វណ្ណា ដែលអាជ្ញាធរឃុំខ្លួនបណ្ដោះអាសន្នពាក់ព័ន្ធនឹងការរាយការណ៍អំពើហិង្សាលើជនជាតិចិន មួយក្រុម នៅទីតាំងមួយកន្លែងដែលសង្ស័យថាជាមូលដ្ឋានឆបោកតាមអ៊ីនធឺណិតនៅក្រុងប៉ោយប៉ែត កាលពីពេលថ្មីៗនេះ។
អង្គការការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) បានដាក់សំណើទៅកាន់ប្រធានតុលាការខេត្តបន្ទាយមានជ័យ កាលពីថ្ងៃទី១១ ខែកុម្ភៈ ដែលទើបនឹងបានផ្សព្វផ្សាយនៅថ្ងៃទី១២ កុម្ភៈ នេះ ដោយស្នើឱ្យតុលាការពិចារណាទៅលើហេតុផលមួយចំនួនចំពោះការសម្រេចឃុំខ្លួនលោក ហែម វណ្ណា នាពេលនេះ។
សមាគមការពារសិទ្ធិមនុស្សអាដហុក លើកឡើងថា ការធ្វើសេចក្តីរាយការណ៍ដោយលោក ហែម វណ្ណា អំពីករណីដែលសង្ស័យថាជាមូលដ្ឋានឆបោកតាមអ៊ីនធឺណិត គឺបង្ហាញពីការចូលរួមយ៉ាងសកម្មជាមួយរាជរដ្ឋាភិបាល ក្នុងការកម្ចាត់អំពើឆបោកតាមអនឡាញ (Online Scam) ចេញពីប្រទេសកម្ពុជា ក្នុងប្រតិបត្តិការ XXL ដែលប្រកាសដោយក្រសួងមហាផ្ទៃ នាពេលនេះ។
ក្រៅពីនេះទៀត ក្រោយការធ្វើសេចក្តីរាយការណ៍នោះ មិនមានស្ថាប័នណាមួយ ឬជនណាម្នាក់បានដាក់លិខិតជាលាយលក្ខណ៍អក្សរ ឬដោយផ្ទាល់មាត់ សុំធ្វើការកែតម្រូវចំពោះការផ្សព្វផ្សាយនោះឡើយ ដូច្នេះការចុះផ្សាយព័ត៌មានរបស់លោក ហែម វណ្ណា ចំពោះករណីនេះ គឺស្របទៅតាមក្រមសីលធម៌ វិជ្ជាជីវៈពេញលេញ។
ច្បាប់ជាតិ និងច្បាប់អន្តរជាតិ មានដូចជា មាត្រា៣១ នៃរដ្ឋធម្មនុញ្ញ សេចក្តីប្រកាសជាសកលស្ដីពីសិទ្ធិមនុស្សឆ្នាំ១៩៤៨ មាត្រា១៩ ច្បាប់ស្ដីពីរបបសារព័ត៌មានឆ្នាំ១៩៩៥ មាត្រា១០ និងក្រមព្រហ្មទណ្ឌរបស់កម្ពុជា ឆ្នាំ២០០៩ មាត្រា៣០៦ ជាដើម ការពារសិទ្ធិសេរីភាពសារព័ត៌មាន។
កាលពីថ្ងៃទី៣ ខែមករា ឆ្នាំ២០២៦ ចាងហ្វាងកាសែតអនឡាញ (HVNN TV Online) លោក ហែម វណ្ណា ត្រូវបានព្រះរាជអាជ្ញាចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» តាមបញ្ញត្តិមាត្រា៤៩៤ និងមាត្រា៤៩៥ និងបទ «ស្តាប់ ឬថតពាក្យសម្ដីឯកជន» តាមបញ្ញត្តិមាត្រា៣០១ នៃក្រមព្រហ្មទណ្ឌ។
ការចោទប្រកាន់នេះ ធ្វើឡើងបន្ទាប់ពីចាងហ្វាងកាសែតអនឡាញ (HVNN TV Online) លោក ហែម វណ្ណា បានផ្សាយវីដេអូរាយការណ៍អំពីហិង្សាលើជនជាតិចិន មួយក្រុម នៅទីតាំងមួយកន្លែងដែលសង្ស័យថាជាមូលដ្ឋានឆបោកតាមអ៊ីនធឺណិតក្នុងក្រុងប៉ោយប៉ែត កាលពីថ្ងៃទី៣០ ខែមករា ឆ្នាំ២០២៦ កន្លងទៅ។
ក្នុងរបាយការណ៍នោះ បញ្ជាក់ថា ទីតាំងនេះស្ថិតនៅប្រហែល ១០០ម៉ែត្រខាងក្រោយទីស្នាក់ការកងរាជអាវុធហត្ថក្រុងប៉ោយប៉ែត ដែលបង្ហាញថាអាជ្ញាធរអាចបានដឹងពីករណីទាំងនេះដែរ។
កាលពីថ្ងៃទី៥ ខែមករា ឆ្នាំ២០២៦ នាយករដ្ឋមន្ត្រីកម្ពុជា លោក ហ៊ុន ម៉ាណែត បានចេញអនុក្រឹត្យស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំថា ចំពោះសមត្ថកិច្ចដែលមិនបានបំពេញមុខនាទីរបស់ខ្លួនដោយភាពស្មោះត្រង់ និងមានចេតនាលាក់បាំងជនបរទេសដែលចូលមកកម្ពុជាដោយខុសច្បាប់ ឱ្យស្នាក់នៅក្នុងទីតាំងរស់នៅប្រមូលផ្ដុំណាមួយក្នុងដែនសមត្ថកិច្ចរបស់ខ្លួន នឹងរងនូវការបណ្ដេញចេញពីក្របខ័ណ្ឌការងារ ព្រមទាំងត្រូវផ្ដន្ទាទោសតាមក្រមព្រហ្មទណ្ឌដែលបានកំណត់ក្នុងច្បាប់ជាធរមានថែមទៀត៕
© 2026, . All rights reserved.