អភិបាលស្រុកស្រីសន្ធរ ខេត្តកំពង់ចាម ព្រមានមន្ត្រីក្រោមឱវាទឱ្យទប់ស្កាត់សកម្មជន និងមន្ត្រីគណបក្សកម្លាំងជាតិ រួមទាំងគណបក្សក្រៅរដ្ឋាភិបាលដទៃទៀតដែលកំពុងធ្វើសកម្មភាពប្រមូលស្នាមមេដៃប្ដឹងថៃ ទៅតុលាការយុត្តិធម៌អន្តរជាតិ (ICJ) រឿងព្រំដែន។
នៅថ្ងៃទី១៦ ខែកុម្ភៈ ឆ្នាំ២០២៦ នេះ ខ្សែអាត់សំឡេងប្រវែង ១,៣២នាទីពីអភិបាលស្រុកស្រីសន្ធរ លោក ប៊ិន ឡាដា ត្រូវបានគេទម្លាយលើបណ្ដាញសង្គមហ្វេសប៊ុក ដោយធ្វើការណែនាំឱ្យមន្ត្រីថ្នាក់ក្រោមរបស់ខ្លួន ដូចជា មេឃុំ និងមេភូមិ ទប់ស្កាត់សកម្មភាពមន្ត្រីគណបក្សកម្លាំងជាតិ ដែលកំពុងប្រមូលស្នាមមេដៃពលរដ្ឋក្រោមហេតុផលថា ដាក់ពាក្យប្ដឹងថៃ ទៅតុលាការយុត្តិធម៌អន្តរជាតិ (ICJ) នាពេលនេះ។
លោក ប៊ិន ឡាដា អះអាងក្នុងខ្សែអាត់សំឡេងនោះថា សកម្មភាពប្រមូលស្នាមមេដៃដោយមន្ត្រីគណបក្សកម្លាំងជាតិ ឬគណបក្សក្រៅរដ្ឋាភិបាលដទៃទៀតក្នុងបំណងដាក់ពាក្យប្ដឹងថៃ ទៅតុលាការអន្តរជាតិនោះ មិនត្រូវឱ្យកើតមានក្នុងមូលដ្ឋានភូមិ-ស្រុករបស់ពួកគេឡើយ ព្រោះទង្វើនេះគ្រាន់តែជាលេស និងជាការភូតកុហកប៉ុណ្ណោះ។
អភិបាលស្រុករូបនេះ បញ្ជាក់ថា ចំពោះបណ្តឹងដែលថាមានករណីឈ្លានពានពីប្រទេសថៃ មកលើប្រទេសកម្ពុជា រដ្ឋាភិបាលបានយកចិត្តទុកដាក់បំផុត ដូច្នេះសម្រាប់ការប្តឹងថៃ ទៅតុលាការអន្តរជាតិចំពោះករណីព្រំដែននេះ មិនអាចធ្វើតាមតែអំពើចិត្តបានឡើយ។
លោក ប៊ិន ឡាដា គូសបញ្ជាក់ថា ក្នុងករណីដែលអាជ្ញាធរមូលដ្ឋានទប់ស្កាត់មិនបាន គឺត្រូវតែដាក់កម្លាំងសមត្ថកិច្ចចុះទៅបង្ក្រាបតែម្តង ដើម្បីកុំឱ្យករណីនេះកើតមានបន្តទៀត។
ជុំវិញបញ្ហានេះ លិខិតចុះថ្ងៃទី១៤ ខែកុម្ភៈ ឆ្នាំ២០២៦ ពីនាយប៉ុស្តិ៍នគរបាលរដ្ឋបាលស្វាយពោធិ៍ លោក សុខ ប៉ោឈីម ដែលបានអញ្ជើញលោក មិន វុទ្ធី មន្ត្រីគណបក្សកម្លាំងជាតិ រស់នៅភូមិទ្រា ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម ឱ្យចូលមកបំភ្លឺនៅថ្ងៃទី១៥ ខែកុម្ភៈ វេលាម៉ោង ៨ និង ៣០នាទីព្រឹក មិនបានបញ្ជាក់ថានឹងសាកសួរពីការប្រមូលស្នាមមេដៃនេះទេ ប៉ុន្តែដាក់ថាសាកសួរដំណើររឿងផ្ទាល់ខ្លួនទៅវិញ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត បានអះអាងនៅថ្ងៃទី១៧ កុម្ភៈ នេះថា នេះជាការគំរាមកំហែងសិទ្ធិពលរដ្ឋយ៉ាងធ្ងន់ធ្ងរ។ តើពលរដ្ឋសុំស្រឡាញ់ជាតិ និងចូលរួមការពារទឹកដីដែលឈ្លានពានពីបរទេសជិតខាងផងបានដែរឬទេ ព្រោះការដាក់ពាក្យប្តឹងនេះក៏ជាបំណងរដ្ឋាភិបាលដែរ?
ពាក់ព័ន្ធនឹងបញ្ហានេះ នាយករដ្ឋមន្ត្រី ហ៊ុន ម៉ាណែត បានលើកឡើងក្នុងពិធីជួបជាមួយសិស្សជាប់និទ្ទេសអេ (A) កាលពីថ្ងៃទី១០ ខែកុម្ភៈ ឆ្នាំ២០២៦ នេះថា ការបញ្ចេញមតិឈឺចាប់ និងការខឹងសម្បារចំពោះទង្វើថៃ មកលើទឹកដីខ្មែរ មិនមានអ្វីខុសនោះទេ ព្រោះពលរដ្ឋមានសិទ្ធិសេរីភាពក្នុងការបញ្ចេញមតិ។
យ៉ាងណាក៏ដោយ រាជរដ្ឋាភិបាលក្រោមការគ្រប់គ្រងរបស់បក្សកាន់អំណាចសព្វថ្ងៃនេះ ត្រូវគេមើលឃើញថាបានអនុវត្តផ្ទុយពីមាត្រាដែលបានចែងក្នុងរដ្ឋធម្មនុញ្ញទាំងស្រុង គឺតែងតែគំរាមកំហែងរហូតឈានដល់ការចាប់ខ្លួនដាក់ពន្ធនាគារ នៅពេលដែលពលរដ្ឋប្រើសិទ្ធិបំពេញកាតព្វកិច្ចចំពោះសង្គមជាតិតាមច្បាប់ជាធរមាន រួមទាំងសិទ្ធិសេរីភាពបញ្ចេញមតិផងដែរ។
សារព័ត៌មាន The Cambodia Daily មិនទាន់អាចទាក់ទងអភិបាលស្រុកស្រីសន្ធរ លោក ប៊ិន ឡាដា និងលោក មិន វុទ្ធី សុំការពន្យល់ពីបញ្ហានេះបាននៅឡើយទេ រហូតដល់ម៉ោងផ្សាយនេះ៕
© 2026, . All rights reserved.