អតីតតំណាងរាស្ត្រអតីតគណបក្សសង្គ្រោះជាតិ លោក សុន ឆ័យ អះអាងថា ប្រទេសកម្ពុជានឹងទទួលបានផលចំណេញធំពីការដោះលែងប្រធានអតីតគណបក្សសង្គ្រោះជាតិ លោក កឹម សុខា និងអនុប្រធានគណបក្សភ្លើងទៀន លោក ថាច់ សេដ្ឋា ព្រមទាំងសកម្មជននយោបាយ សកម្មជនបរិស្ថាន និងមេដឹកនាំសហជីព កម្មករនានា ដែលកំពុងជាប់ឃុំនាពេលនេះ។
អនុប្រធានគណបក្សឆន្ទៈខ្មែរ លោក សុន ឆ័យ បានសរសេរលើគណនីហ្វេសប៊ុករបស់ខ្លួននៅថ្ងៃទី១៩ កុម្ភៈ នេះថា ផលចំណេញពីការដោះលែងអ្នកទាំងនោះ រួមមានដូចជា ការបន្ធូរបន្ថយសម្ពាធអន្តរជាតិ និងចំណេញពីការលើកកម្ពស់មុខមាត់ប្រទេសជាតិលើឆាកអន្តរជាតិ ជាដើម។
ចំណែកផលចំណេញមួយទៀតនោះ គឺការបង្រួបបង្រួមជាតិ ព្រោះនេះគឺជាកត្តាដ៏សំខាន់ដែលអាចត្រូវបានប្រើជាសារនៃការផ្សះផ្សាជាតិ ដើម្បីកាត់បន្ថយភាពតានតឹងផ្នែកនយោបាយក្នុងស្រុក និងទាក់ទាញមនោសញ្ចេតនាពីអ្នកបោះឆ្នោត។
លោក សុន ឆ័យ ពន្យល់ថា ការបន្ធូរបន្ថយសម្ពាធអន្តរជាតិ អាចជាសន្លឹកបៀដ៏សំខាន់ក្នុងការចរចាជាមួយបណ្តាប្រទេសលោកខាងលិច ដូចជា សហរដ្ឋអាមេរិក និងអឺរ៉ុប ជាដើម ដើម្បីស្ដារភាពល្អប្រសើរនៃទំនាក់ទំនងការទូត និងទទួលបានផលប្រយោជន៍ផ្នែកសេដ្ឋកិច្ចផងដែរ។
អតីតមន្ត្រីជាន់ខ្ពស់បក្សប្រឆាំងរូបនេះ បញ្ជាក់ថា រីឯការបង្ហាញពីភាពធូរស្រាលនៃស្ថានភាពសិទ្ធិមនុស្ស និងប្រជាធិបតេយ្យនៅកម្ពុជា ក៏អាចជួយឱ្យរដ្ឋាភិបាលថ្មី លោក ហ៊ុន ម៉ាណែត ទទួលបានភាពស្របច្បាប់កាន់តែខ្លាំងពីសហគមន៍អន្តរជាតិដែរ។
ជុំវិញបញ្ហានេះ អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក លោក សេង វណ្ណលី សរសេរលើគណនីហ្វេសប៊ុករបស់ខ្លួនកាលពីថ្ងៃទី១៨ កុម្ភៈ នេះថា គិតត្រឹមដើមឆ្នាំ២០២៦ នេះ ទិដ្ឋភាពនយោបាយនៅកម្ពុជានៅតែបន្តស្ថិតក្នុងភាពមិនច្បាស់លាស់ ជាពិសេសសំណុំរឿងលោក កឹម សុខា ដែលត្រូវបានតុលាការកាត់ទោសឱ្យជាប់ឃុំក្នុងផ្ទះរយៈពេល ២៧ឆ្នាំ តាំងពីឆ្នាំ២០២៣ មក។
លោក សេង វណ្ណលី លើកឡើងថា ការរក្សាទុកលោក កឹម សុខា ក្នុងស្ថានភាពបែបនេះ គឺជាការទាញទម្លាក់កិត្យានុភាពរដ្ឋាភិបាលលោក ហ៊ុន ម៉ាណែត លើឆាកអន្តរជាតិ និងបង្កើតឱ្យមានគម្លាតនៃភាពស្របច្បាប់ ដែលបង្កផលប៉ះពាល់ដល់ប្រព័ន្ធអនុគ្រោះពាណិជ្ជកម្ម និងទំនាក់ទំនងជាមួយប្រទេសលោកខាងលិចដែលជាទីផ្សារនាំចេញដ៏ធំរបស់ប្រទេសកម្ពុជាប៉ុណ្ណោះ ហើយការដោះលែងលោក កឹម សុខា ក៏អាចចរចាស្ដារប្រព័ន្ធអនុគ្រោះពាណិជ្ជកម្ម EBA ឱ្យបានពេញលេញ និងអាចបញ្ចៀសការដាក់ទណ្ឌកម្មពន្ធខ្ពស់ពីសហរដ្ឋអាមេរិក ផងដែរ។
ទាក់ទិននឹងបញ្ហានេះ ទិន្នន័យសង្គមស៊ីវិល បានបង្ហាញកាលពីពេលថ្មីៗនេះ លោក កឹម សុខា ត្រូវបានឃុំខ្លួនទាំងអយុត្តិធម៌ក្នុងចំណោមអ្នកជាប់ឃុំទាំងអយុត្តិធម៌ជិត ១០០នាក់ផ្សេងទៀត (៩៦នាក់) ដែលរួមមាន មន្ត្រីបក្សក្រៅរដ្ឋាភិបាល សកម្មជននយោបាយ សកម្មជនសង្គម និងសកម្មជនសិទ្ធិមនុស្ស ជាដើម៕
© 2026, . All rights reserved.