ក្រសួងការបរទេសនៃប្រទេសកម្ពុជា អះអាងថា ជនបរទេសជាង ៨ពាន់នាក់ ត្រូវបានបញ្ជូនចេញពីកម្ពុជា ក្នុងប្រតិបត្តិការប្រឆាំងនឹងឧក្រិដ្ឋកម្មឆបោកតាមប្រព័ន្ធបច្ចេកវិទ្យា ខណៈបណ្ដាញឆបោកដែលនៅសេសសល់ បានប្តូរទៅជាប្រតិបត្តិការនៅតាមទីតាំងតូចៗ ឬតាមលំនៅឋានដែលបង្កើតជាបញ្ហាប្រឈមថ្មីក្នុងការបង្ក្រាប។
រដ្ឋាភិបាលប្រទេសឥណ្ឌូនេស៊ី តាមរយៈស្ថានទូតប្រចាំនៅភ្នំពេញ បានចេញបណ្ណធ្វើដំណើរបណ្ដោះអាសន្នដល់ជនរងគ្រោះពីឧក្រិដ្ឋកម្មឆបោកចំនួនជាង ២ពាន់នាក់។
ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មានកាលពីថ្ងៃទី១៩ កុម្ភៈ ដែលទើបនឹងត្រូវបានផ្សព្វផ្សាយនៅថ្ងៃទី២០ កុម្ភៈ ថា ដើមឆ្នាំនេះ ប្រទេសកម្ពុជាបានបង្ក្រាបការឆបោកតាមប្រព័ន្ធបច្ចេកវិទ្យានៅទូទាំងប្រទេសបាន ២០០ករណី និងបានចាត់វិធានការតាមផ្លូវច្បាប់លើមេខ្លោងជាតិសាសន៍ចម្រុះបានប្រមាណ ៥០០នាក់។
ប្រភពដដែលអះអាងថា ការស៊ើបអង្កេតនៅតែបន្តតាមដានលំហូរហិរញ្ញវត្ថុ និងកម្ចាត់បណ្ដាញលាងលុយកខ្វក់តាមរយៈការផ្ទេរ ឬដោះដូររូបិយប័ណ្ណអន្តរជាតិ ដែលជាប់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា។
ប្រធានលេខាធិការដ្ឋាននៃគណៈកម្មការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា លោក ឆៃ ស៊ីណារិទ្ធ កាលពីថ្ងៃទី១៨ កុម្ភៈ បានធ្វើបទបង្ហាញទៅកាន់អង្គទូតនានា អំពីកិច្ចខិតខំប្រឹងប្រែងរបស់កម្ពុជា ក្នុងការប្រយុទ្ធប្រឆាំងនឹងឧក្រិដ្ឋកម្មតាមប្រព័ន្ធព័ត៌មានវិទ្យា។
លោក ឆៃ ស៊ីណារិទ្ធ បញ្ជាក់ថា ក្នុងយុទ្ធនាការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យានេះ ប្រទេសកម្ពុជាបានសហការជាមួយដៃគូបរទេសនានា រួមមាន ប្រទេសចិន វៀតណាម សាធារណរដ្ឋកូរ៉េ ជប៉ុន ឥណ្ឌា អូស្ត្រាលី ចក្រភពអង់គ្លេស សហរដ្ឋអាម៉េរិក និងការិយាល័យអង្គការសហប្រជាជាតិប្រឆាំងបទល្មើសគ្រឿងញៀន និងឧក្រិដ្ឋកម្ម (UNODC) ជាដើម។
ជុំវិញបញ្ហានេះ គណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បានចេញរបាយការណ៍របស់ខ្លួននៅថ្ងៃទី២០ កុម្ភៈ ថា រយៈពេល ១៥ថ្ងៃ គិតចាប់ពីថ្ងៃទី៣ ដល់ថ្ងៃទី១៨ ខែកុម្ភៈ ឆ្នាំ២០២៦ នេះ សមត្ថកិច្ចបានចុះត្រួតពិនិត្យទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online scams) ជាង ២ពាន់ទីតាំង (ជាង ២៧០០ទីតាំង) និងបានរកឃើញជនបរទេសស្នាក់នៅចំនួនជាង ២ម៉ឺននាក់ (២១១០៤នាក់) ក្នុងនោះ មានស្ត្រីជាង ៦ពាន់នាក់ផងដែរ (៦៦៨៣នាក់)។ ភាគច្រើននៃជនបរទេសទាំងនោះ ជាជនរងគ្រោះដែលចាញ់បោកមេខ្លោងដែលសន្យាថាឲ្យការងារធ្វើ និងបានប្រាក់ខែច្រើន។
ប្រភពដដែលអះអាងថា ទីតាំងដែលសមត្ថកិច្ចចុះបង្ក្រាប រួមមាន អគារខុនដូ អាផាតមិន បុរី ផ្ទះសំណាក់ និងសណ្ឋាគារ ដែលស្ថិតនៅក្នុងភូមិសាស្ត្រនៃរាជធានីភ្នំពេញ ក្នុងនោះ សមត្ថកិច្ចក៏បានបង្ក្រាបករណីឆបោកអនឡាញចំនួន ៤០ករណីផងដែរ។ ចំណែកជនសង្ស័យដែលត្រូវបានឃាត់ខ្លួន គឺមានចំនួនជិត ៣០០នាក់ (២៨៤នាក់) មកពី ១៣សញ្ជាតិ ដូចជា វៀតណាម ចិន មីយ៉ាន់ម៉ា កូរ៉េខាងត្បូង ម៉ាឡេស៊ី នេប៉ាល់ បង់ក្លាដេស ឥណ្ឌា ស្រីលង្កា ហ្វីលីពីន ឥណ្ឌូនេស៊ី ប៉ាគីស្ថាន និងជនជាតិសិង្ហបុរី ផងដែរ។
គណៈកម្មការដដែលនេះ បញ្ជាក់ថា ក្នុងចំណោមករណីបង្ក្រាបទាំងនេះ សមត្ថកិច្ចបានកសាងសំណុំរឿងបញ្ជូនទៅតុលាការចំនួន ១១ករណី ដែលមានមេខ្លោង និងអ្នកពាក់ព័ន្ធផ្ទាល់ជាជនជាតិចិន ២២នាក់ ជនជាតិសិង្ហបុរី ១នាក់ និងខ្មែរ ១នាក់ សរុបទាំងអស់ ២៤នាក់ ដើម្បីផ្ដន្ទាទោសតាមច្បាប់ជាធរមាន។
ជុំវិញបញ្ហានេះ ក្រសួងមហាផ្ទៃ បានផ្សព្វផ្សាយចំណាត់ការបង្ក្រាបឧក្រិដ្ឋកម្មតាមអនឡាញកាលពីថ្ងៃទី៥ ខែកុម្ភៈ ឆ្នាំ២០២៦ ថា កម្ពុជាប្ដេជ្ញាបោសសម្អាតបទល្មើសអនឡាញឱ្យអស់ត្រឹមខែមេសា ឆ្នាំ២០២៦ ខាងមុខ។
កាលពីថ្ងៃទី៩ ខែកុម្ភៈ សហរដ្ឋអាមេរិក សរសើរប្រទេសកម្ពុជា ថាជាដៃគូល្អប្រកបដោយវិជ្ជាជីវៈចំពោះកិច្ចសហការក្នុងការចាប់ខ្លួនឧក្រិដ្ឋជនដែលពាក់ព័ន្ធបទឧក្រិដ្ឋ។ សហរដ្ឋអាមេរិក បញ្ជាក់ថា កិច្ចសហការនេះក៏ជាសារមួយបង្ហាញឱ្យឃើញថា បុគ្គលទាំងឡាយណាដែលប៉ុនប៉ងគេចខ្លួនពីច្បាប់ នឹងត្រូវបានវែកមុខយកមកផ្ដន្ទាទោសតាមច្បាប់ឱ្យខាងតែបាន៕
© 2026, . All rights reserved.