នៅក្នុងឱកាសថ្លែងការណ៍ប្រចាំឆ្នាំទៅកាន់ពលរដ្ឋអាមេរិកាំង អំពីស្ថានភាពប្រទេសជាតិចំពោះមុខសភាទាំងពីរ នៅយប់ថ្ងៃអង្គារ ទី២៤ ខែកុម្ភៈ ប្រធានាធិបតី ដូណាល់ ត្រាំ ព្រមានថា ប្រទេសអ៊ីរ៉ង់ កំពុងអភិវឌ្ឍមីស៊ីលផ្លោងដែលអាចបាញ់ដល់ទឹកដីសហរដ្ឋអាមេរិក។
លោក ត្រាំ បន្តព្រមានថា ទាំងដែនដីអឺរ៉ុប ក៏មីស៊ីលរបស់អ៊ីរ៉ង់ បាញ់ទៅដល់យ៉ាងងាយបំផុត ដែលចាំបាច់ត្រូវទប់ស្កាត់អ៊ីរ៉ង់។
ការព្រមានរបស់លោក ត្រាំ ក៏ជួនពេលលោកកំពុងដាក់ផែនការវាយប្រហារអ៊ីរ៉ង់ ប្រសិនបើការចរចាស្តីអំពីការរំលាយចោលរចនាសម្ព័ន្ធនុយក្លេអ៊ែររបស់អ៊ីរ៉ង់ នៅតែបន្តបរាជ័យពុំមានកិច្ចព្រមព្រៀង។ លោក ត្រាំ ថាអ៊ីរ៉ង់នឹងក្លាយជាប្រភពដ៏គ្រោះថ្នាក់ចំពោះសហរដ្ឋអាមេរិក និងអឺរ៉ុប បើអ៊ីរ៉ង់ក្លាយជាឃ្លាំងស្តុកគ្រាប់មីស៊ីលផ្លោងដ៏ធំបំផុតនៃពិភពលោក។
រដ្ឋមន្ត្រីការបរទេសអូម៉ង់ Badr Albusaidi បានប្រកាសថា អ៊ីរ៉ង់ និងសហរដ្ឋអាមេរិក នឹងបន្តកិច្ចចរចានុយក្លេអ៊ែរជុំទីបី នៅថ្ងៃទី២៦ ខែកុម្ភៈ នៅទីក្រុងហ្សឺណែវ ខណៈភាពតានតឹងកាន់តែកើនឡើងអំពីហានិភ័យនៃការប្រឈមមុខយោធារវាងភាគីទាំងពីរ។ ប្រទេសអូម៉ង់ តែងតែដើរតួនាទីជាអ្នកសម្របសម្រួលសំខាន់ក្នុងកិច្ចចរចារវាងទីក្រុងវ៉ាស៊ីនតោន និងទីក្រុងតេហេរ៉ង់ ជាពិសេសក្នុងបញ្ហានុយក្លេអ៊ែរ។
ទីភ្នាក់ងារសារព័ត៌មាន Reuters បានរាយការណ៍ថា អ៊ីរ៉ង់កំពុងផ្តល់សម្បទានថ្មីលើកម្មវិធីនុយក្លេអ៊ែររបស់ខ្លួន ដើម្បីឈានដល់កិច្ចព្រមព្រៀងមួយ ដរាបណាត្រូវបានរួមបញ្ចូលទាំងការលើកលែងទណ្ឌកម្មសេដ្ឋកិច្ច និងការទទួលស្គាល់សិទ្ធិរបស់ទីក្រុងតេហេរ៉ង់ ចំពោះការបង្កើនសារធាតុនុយក្លេអ៊ែរដោយសន្តិវិធី។
ប្រធានាធិបតីអ៊ីរ៉ង់ Masoud Pezeshkian បានសម្ដែងសុទិដ្ឋិនិយមដោយប្រុងប្រយ័ត្ន ដោយនិយាយថា ការចរចាថ្មីៗនេះ «បានផ្តល់សញ្ញាវិជ្ជមានខ្លះហើយ»។ ទោះជាយ៉ាងណា លោកក៏បានបញ្ជាក់ថា ទីក្រុងតេហេរ៉ង់ ត្រៀមខ្លួនសម្រាប់ «សេណារីយ៉ូដែលអាចកើតមានណាមួយ» ដែលបង្ខំអ៊ីរ៉ង់ ត្រូវវាយការពារខ្លួន។
យ៉ាងណា លោក ដូណាល់ ត្រាំ កំពុងពិចារណាលើលទ្ធភាពនៃការវាយប្រហារយោធាលើប្រទេសអ៊ីរ៉ង់ បើទោះជានាយឧត្ដមសេនីយ៍កំពូលម្នាក់ជានាយសេនាធិការកងទ័ពអាមេរិក ចេញមុខព្រមានដោយត្រង់ៗថា អាមេរិកកំពុងប្រឈមនឹងកង្វះខាតគ្រាប់រំសេវយុទ្ធសាស្ត្រ និងការមិនគាំទ្រពីសម្ពន្ធមិត្ត ដែលអាចបង្កគ្រោះថ្នាក់ធ្ងន់ធ្ងរដល់កងទ័ពអាមេរិកក៏ដោយ។
យោងតាមសេចក្ដីរាយការណ៍ពី The Washington Post ឧត្ដមសេនីយ៍ Dan Caine នាយអគ្គសេនាធិការកងកម្លាំងប្រដាប់អាវុធចម្រុះសហរដ្ឋអាមេរិក បានលើកឡើងក្នុងកិច្ចប្រជុំនៅសេតវិមាន កាលពីសប្តាហ៍មុនថា ស្តុកគ្រាប់រំសេវរបស់អាមេរិកមានភាពថយចុះយ៉ាងខ្លាំង ដោយសារការបញ្ជូនយកទៅជួយអ៊ីស្រាអែល និងអ៊ុយក្រែន។
ឧត្ដមសេនីយ៍ Dan Caine បានបង្ហាញក្ដីបារម្ភយ៉ាងខ្លាំងចំពោះកង្វះខាតគ្រាប់មីស៊ីល interceptors សម្រាប់ប្រព័ន្ធការពារ THAAD និង Patriot ដែលត្រូវបានប្រើប្រាស់យ៉ាងច្រើនក្នុងប្រតិបត្តិការកន្លងទៅនៅមជ្ឈិមបូព៌ា និងអ៊ុយក្រែន។
តាមការស្រាវជ្រាវពីក្រុមអង្គការ Iran Watch នៅរដ្ឋធានីវ៉ាស៊ីនតុន អ៊ីរ៉ង់មានកាំជ្រួចផ្ទុកក្បាលគ្រាប់ផ្ទុះប្រមាណ ៣០០០កាំជ្រួច បាញ់បានចម្ងាយជិត និងចម្ងាយមធ្យម គឺអស់ឆ្ងាយត្រឹម ២៥០០គីឡូម៉ែត្រ ប៉ុន្តែគ្មានកាំជ្រួចបាញ់ឆ្លងទ្វីប ឬអន្តរទ្វីប ICBM នោះទេ។
ក្រុមអ្នកវិភាគកិច្ចការសន្តិសុខជាតិនៅរដ្ឋធានីវ៉ាស៊ីនតុន ពីសម័យរដ្ឋការមុនៗ ដូចជាលោក Ben Rhode និងលោក Richard Stengel ជាដើម និយាយថា គេធ្លាប់ឮការបំពងបំភ័យអំពីមេដឹកនាំអ៊ីរ៉ាក់ សាដាំ ហ៊ូសសេន ដែលមានអាវុធប្រល័យលោកបាញ់ដល់ទ្វីបអឺរ៉ុបរលាយខ្ទេច ប៉ុន្តែប្រទេសអ៊ីរ៉ាក់ តូច មានពលរដ្ឋតិចជាងប្រទេសអ៊ីរ៉ង់ បួនដង។
ដំណាលពេលគ្នានេះ ឧត្ដមសេនីយ៍ Caine ក៏បានលើកឡើងពីបញ្ហាសម្ពន្ធមិត្តអារ៉ាប់ ដែលមិនផ្ដល់សិទ្ធិហោះហើរ។
បើតាមមន្ត្រីជាន់ខ្ពស់នៅតំបន់ឈូងសមុទ្រ ប្រទេសអារ៉ាប់មួយចំនួននឹងមិនអនុញ្ញាតឱ្យប្រើប្រាស់មូលដ្ឋានទ័ព ឬទឹកដីរបស់ខ្លួនសម្រាប់វាយប្រហារអ៊ីរ៉ង់ ឡើយ ព្រោះបារម្ភពីការសងសឹកពីប្រទេសអ៊ីរ៉ង់។
ទោះជាយ៉ាងណា លោក ដូណាល់ ត្រាំ បានឆ្លើយតបតាមបណ្ដាញសង្គមថា ព័ត៌មានដែលថាឧត្ដមសេនីយ៍ Dan Caine ប្រឆាំងនឹងការធ្វើសង្គ្រាមជាមួយអ៊ីរ៉ង់ គឺមិនត្រឹមត្រូវមួយរយភាគរយឡើយ។
តាមប្រភពផ្ទៃក្នុង ឧត្ដមសេនីយ៍ Dan Caine និយាយថា ការវាយប្រហារធ្វើចម្បាំងនឹងអ៊ីរ៉ង់ ជាការប្រថុយប្រថានដ៏ធំ។
លោក ត្រាំ បានបញ្ជាក់ថា៖ «ទោះបីជាឧត្ដមសេនីយ៍មិនចង់ឃើញការប្រឈមមុខដាក់គ្នាផ្នែកយោធា ប៉ុន្តែកងទ័ពអាមេរិកនឹងវាយឈ្នះអ៊ីរ៉ង់ យ៉ាងងាយបំផុត»៕
© 2026, . All rights reserved.