តើរាជរដ្ឋាភិបាលគួរដោះលែងអ្នកដែលមានទោសដោយប្រើសិទ្ធិសេរីភាពបញ្ចេញមតិស្របច្បាប់ ហៅថាអ្នកទោសមនសិការម្តងម្នាក់ ឬទាំងអស់គ្នា?
កាលពីថ្ងៃពុធ លោក ម៉ែន ណាត អ្នកឃ្លាំមើលស្ថានការណ៍កម្ពុជា ផ្តល់គំនិតថា រាជរដ្ឋាភិបាលគួរដោះស្រាយបញ្ហាផ្ទៃក្នុងរវាងខ្មែរនិងខ្មែរ តាមរយៈការដោះលែងជនជាប់ពន្ធនាគារដោយអយុត្តិធម៌ទាំងអស់ ដើម្បីនាំមកនូវសាមគ្គីភាព និងឯកភាពជាតិជាមុន។
មន្ត្រីជាន់ខ្ពស់គណបក្សប្រជាធិបតេយ្យជឿនលឿន លោក សួន រីដា ជឿជាក់ថា ការផ្សះផ្សា និងការបង្រួបបង្រួមជាតិ នឹងកើតមានយ៉ាងពិតប្រាកដ បើរាជរដ្ឋាភិបាលខ្មែរស្នើព្រះមហាក្សត្រព្រះរាជទានលើកលែងទោសជាទ្រង់ទ្រាយធំនោះ ដែលមានប្រធានគណបក្សសង្គ្រោះជាតិ លោក កឹម សុខា អនុប្រធានគណបក្សភ្លើងទៀន លោក ថាច់ សេដ្ឋា សកម្មជនសិទ្ធិមនុស្ស កញ្ញា សេង ធារី រួមទាំងអ្នកទោសសង្គម និងអ្នកទោសនយោបាយដទៃទៀត។
លោក សួន រីដា បានសរសេរលើគណនីហ្វេសប៊ុករបស់ខ្លួននៅថ្ងៃទី២៦ កុម្ភៈ នេះថា បើពិតមានថ្ងៃនោះមែន ក៏ជាថ្ងៃប្រវត្តិសាស្ត្រសម្រាប់ប្រទេសកម្ពុជា អំពីការផ្សះផ្សា និងការបង្រួបបង្រួមជាតិរវាងខ្មែរនិងខ្មែរដែរ ព្រោះមិនថាតែពលរដ្ឋខ្មែរគ្រប់និន្នាការនយោបាយទេ សូម្បីមជ្ឈដ្ឋានអន្តរជាតិ ក៏នឹងសាទរចំពោះការលើកលែងទោសដល់អ្នកទោសមនសិការទាំងនោះដែរ។
កាលពីយប់ថ្ងៃទី២៤ ខែកុម្ភៈ ឆ្នាំ២០២៦ អតីតប្រធានគណបក្សកម្លាំងជាតិ លោក ស៊ុន ចន្ធី ត្រូវបានតុលាការដោះលែងឱ្យមានសេរីភាពឡើងវិញ បន្ទាប់ពីមានព្រះរាជក្រឹត្យប្រកាសលើកលែងទោសពីព្រះមហាក្សត្រតាមសំណើនាយករដ្ឋមន្ត្រីកម្ពុជា លោក ហ៊ុន ម៉ាណែត។
លោក ស៊ុន ចន្ធី ត្រូវបានសមត្ថកិច្ចចាប់ខ្លួនកាលពីថ្ងៃទី៩ ខែឧសភា ឆ្នាំ២០២៤ នៅព្រលានយន្តហោះអន្តរជាតិពោធិ៍ចិនតុង ពាក់ព័ន្ធនឹងការរិះគន់កម្មវិធីផ្តល់បណ្ណក្រីក្ររបស់រដ្ឋាភិបាល អំឡុងពេលដែលអតីតប្រធានបក្សក្រៅរដ្ឋាភិបាលរូបនេះជួបជាមួយអ្នកគាំទ្ររបស់ខ្លួននៅប្រទេសជប៉ុន។
ក្រោយឃុំខ្លួនរយៈពេល ៦ខែ ១៧ថ្ងៃ គឺនៅថ្ងៃទី២៦ ខែធ្នូ ឆ្នាំ២០២៤ សាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសលោក ស៊ុន ចន្ធី ដាក់ពន្ធនាគារ ២ឆ្នាំ និងពិន័យជាប្រាក់ ៤លានរៀល ព្រមទាំងដកសិទ្ធិពលរដ្ឋមិនឱ្យបោះឆ្នោត និងឈរឈ្មោះឱ្យគេបោះឆ្នោតអស់មួយជីវិតថែមទៀត ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ជុំវិញបញ្ហានេះ លោក សេង វណ្ណលី អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក បានសរសេរលើគណនីហ្វេសប៊ុករបស់ខ្លួនកាលពីថ្ងៃទី២៥ កុម្ភៈ នេះ ដោយចាត់ទុកការលើកលែងទោសដល់អតីតប្រធានគណបក្សកម្លាំងជាតិ លោក ស៊ុន ចន្ធី គ្រាន់តែជាយុទ្ធសាស្ត្របង្គ្រប់កិច្ច និងជាល្បែងនយោបាយច្រំដែលរបស់រដ្ឋាភិបាលលោក ហ៊ុន ម៉ាណែត ប៉ុណ្ណោះ។
លោក សេង វណ្ណលី លើកឡើងថា កន្លងមកការប្រើប្រាស់ប្រព័ន្ធតុលាការដើម្បីដាក់ទោសអ្នករិះគន់ ហើយបន្ទាប់មកក៏មានការលើកលែងទោស គឺដើម្បីដោះដូរនឹងការបន្ធូរបន្ថយសម្ពាធសេដ្ឋកិច្ចពីបរទេសប៉ុណ្ណោះ ដែលល្បិចកលបែបនេះបានក្លាយជាល្បែងនយោបាយដែលពិភពលោកមើលយល់អស់ទៅហើយ។
ជុំវិញបញ្ហានេះ ទិន្នន័យសង្គមស៊ីវិល បានបង្ហាញកាលពីពេលថ្មីៗនេះថា សព្វថ្ងៃនេះមានអ្នកជាប់ឃុំទាំងអយុត្តិធម៌ជិត ១០០នាក់ (៩៦នាក់) រួមមានមន្ត្រីបក្សក្រៅរដ្ឋាភិបាល សកម្មជននយោបាយ សកម្មជនសង្គម និងសកម្មជនសិទ្ធិមនុស្ស ជាដើម ដោយសារការបញ្ចេញមតិរបស់ពួកគេ៕
© 2026, . All rights reserved.