មន្ត្រីជាន់ខ្ពស់នៃក្រសួងការងារ និងបណ្ដុះបណ្ដាលវិជ្ជាជីវៈ ស្នើឱ្យនាយករដ្ឋមន្ត្រីកម្ពុជា លោក ហ៊ុន ម៉ាណែត ស៊ើបអង្កេតអំពើពុករលួយ និងប្រសិទ្ធភាពការងាររបស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ដើម្បីតម្លាភាព និងជួយដល់ពលករដែលចេញទៅធ្វើការនៅក្រៅប្រទេស។
មន្ត្រីជាន់ខ្ពស់ក្នុងក្រសួងការងារ និងបណ្តុះបណ្តាលវិជ្ជាជីវៈ ជាច្រើននាក់ បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះដើម្បីសុវត្ថិភាពការងារ កាលពីថ្ងៃពុធ សប្ដាហ៍នេះថា ប្រសិនបើរដ្ឋាភិបាលមិនបោសសម្អាតអំពើពុករលួយនៅក្នុងក្រសួងការងារ បានទេ វានឹងរាំងស្ទះដល់ពលករខ្មែរដែលស្វែងរកការងារធ្វើនៅបរទេសផង និងបង្កអំពើពុករលួយក្នុងស្ថាប័នរដ្ឋដែលនាំទៅដល់ការបំផ្លាញថវិកាជាតិយ៉ាងធ្ងន់ធ្ងរផង។
ប្រភពដដែល រៀបរាប់ថា ក្នុងពេលប្រឡងទៅធ្វើការនៅប្រទេសកូរ៉េខាងត្បូង ម្តងៗ យ៉ាងហោចណាស់មានបេក្ខជនមកដាក់ពាក្យចន្លោះពី ២ម៉ឺននាក់ទៅ ៣ម៉ឺន ៥ពាន់នាក់ក្នុងមួយលើក ខណៈការប្រឡងត្រូវបានធ្វើឡើងពី ២ ទៅ ៣លើកក្នុង ១ឆ្នាំ ចំណែកលិខិតស្នើសុំការប្រឡង ឬពាក្យប្រឡង ក្នុងមួយសន្លឹកត្រូវបានក្រសួងការងារ លក់ទៅឱ្យបេក្ខជនទាំងនោះក្នុងមួយច្បាប់តម្លៃ ២៨ដុល្លារអាមេរិក។ ដូច្នេះ បើគិតទំហំទឹកប្រាក់សរុបពីការលក់ពាក្យប្រឡងឱ្យបេក្ខជនទាំងនេះ ក្រសួងការងារ អាចទទួលបានទឹកប្រាក់ចន្លោះពីជិត ៦សែនដុល្លារ (៥៦០០០០ដុល្លារ) ទៅជិត ១លានដុល្លារអាមេរិក (៩៨០០០០ដុល្លារ) ក្នុង ១លើកៗ។
ជាងនេះទៀត បេក្ខជនដែលប្រឡងជាប់ ក្រសួងតម្រូវឱ្យទិញពាក្យពិនិត្យសុខភាពក្នុងមួយច្បាប់តម្លៃ ៣៨ដុល្លារថែមទៀត ខណៈបេក្ខជនដែលប្រឡងជាប់ក្នុងមួយលើកៗមានប្រមាណជា ១ម៉ឺន ៥ពាន់នាក់ ដូច្នេះក្រសួងក៏អាចទទួលបានលុយពីបេក្ខជនដែលបានទិញពាក្យពិនិត្យសុខភាពទាំងនោះសរុបជិត ៦សែនដុល្លារអាមេរិក (៥៧០០០០ដុល្លារ) បន្ថែមទៀតដែរក្នុងមួយលើក។
មន្ត្រីក្រសួងការងារទាំងនេះត្អូញត្អែរថា ពាក្យប្រឡង និងពាក្យពិនិត្យសុខភាព ត្រូវបានក្រសួងការងារ តម្រូវឱ្យបេក្ខជនទិញដាច់ខាត ប៉ុន្តែក្រសួងបែរជាមិនគិតគូរពីពួកគេឡើយ ព្រោះបេក្ខជនដែលប្រឡងជាប់ហើយមិនបានចេញទៅធ្វើការនៅប្រទេសកូរ៉េខាងត្បូង រាប់ម៉ឺននាក់ឯណោះក្នុងមួយឆ្នាំៗ។
មន្ត្រីដដែលនេះអះអាងថា រឿងដែលគួរឱ្យសោកស្តាយជាងនេះទៀតនោះ គឺថាប្រសិនបើបេក្ខជនដែលប្រឡងជាប់ទាំងឡាយណាមិនបានចេញទៅធ្វើការរយៈពេល ២ឆ្នាំ នោះពួកគេនឹងត្រូវទុកជាអសារបង់ ហើយក្រសួងតម្រូវឱ្យពួកគេប្រឡងសាជាថ្មី ដោយកំណត់ឱ្យពួកគេទិញពាក្យប្រឡង និងទិញពាក្យពិនិត្យសុខភាពឡើងវិញដូចមុនដដែល។
ប្រភពដដែលបញ្ជាក់ថា ខាងរោងចក្រតែងកាត់លុយពីកម្មករជិត ៦ដុល្លារ (៥,៩៩ដុល្លារ) ជារៀងរាល់ខែ ដើម្បីបង់ទៅបេឡាជាតិសន្តិសុខសង្គម ឬ ប.ស.ស ប៉ុន្តែនៅពេលដែលកម្មករទៅព្យាបាលនៅមន្ទីរពេទ្យដោយប្រើបណ្ណនេះ បែរជាខាងមន្ទីរពេទ្យអះអាងថា បណ្ណ ប.ស.ស របស់ពួកគេបានផុតកំណត់ទៅវិញ ខណៈប្រាក់ខែរបស់ពួកគេ គឺបង់មិនដែលខកខានម្តងណានោះ។
លោក ហេង សួរ គឺជាមន្ត្រីលេចធ្លោមួយរូបទាំងក្នុងជួររដ្ឋាភិបាលរបស់លោក ហ៊ុន ម៉ាណែត និងគណបក្សប្រជាជនកម្ពុជារបស់លោក ហ៊ុន សែន ប៉ុន្តែលោកបានរងនូវការរិះគន់យ៉ាងខ្លាំងពីក្រុមអង្គការក្រៅរដ្ឋាភិបាលដែលធ្វើការការពារ និងលើកកម្ពស់សិទ្ធិពលករ ថាជាមនុស្សកោងកាច និងបំពានច្បាប់ការងារនៅកម្ពុជាយ៉ាងធ្ងន់ធ្ងររហូតមក។
ពាក់ព័ន្ធនឹងបញ្ហានេះ សមាជិកជាន់ខ្ពស់ក្នុងជួរគណបក្សប្រជាជនកម្ពុជាមួយរូប ធ្លាប់បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកាលពីពេលកន្លងទៅថា លោក ហេង សួរ កាក់កបនឹងមុខរបរនាំពលករចេញទៅក្រៅប្រទេសយ៉ាងខ្លាំង ដោយមានការបើកដៃពីលោក ហ៊ុន ម៉ាណែត។
ប្រភពដដែល បញ្ជាក់ថា ដើម្បីធានាភាពមានបាន និងអំពើល្មើសច្បាប់របស់ខ្លួន លោក ហេង សួរ ក៏បានសូកប៉ាន់ដីទំហំជាង ៤០០ហិកតាក្នុងស្រុកម៉ាឡៃ ខេត្តបន្ទាយមានជ័យ កាលពីអំឡុងឆ្នាំ២០២៤ ទៅឱ្យលោក ហ៊ុន ម៉ាណែត ដែរ ក្នុងពេលដែលលោក ហេង សួរ មានដីរាប់ពាន់ហិកតានៅតំបន់នោះ។
អង្គការតម្លាភាពអន្តរជាតិ (Transparency International) បានចេញរបាយការណ៍ស្តីអំពីអំពើពុករលួយកាលពីថ្ងៃទី១០ ខែកុម្ភៈ ឆ្នាំ២០២៦ នេះថា ប្រទេសកម្ពុជាជាប់ចំណាត់ថ្នាក់លេខរៀងទី១៦៣ ក្នុងចំណោមប្រទេសសរុប ១៨២ នៅលើពិភពលោក។ របាយការណ៍នេះបានរកឃើញថា ក្នុងចំណោមប្រទេសអាស៊ានទាំង ១០ គឺកម្ពុជាមានពិន្ទុល្អជាងប្រទេសភូមា មួយប៉ុណ្ណោះ៕
© 2026, . All rights reserved.