អភិបាលខេត្តកណ្តាល លោក គួច ចំរើន ដែលរងការចោទប្រកាន់ពីការជាប់ពាក់ព័ន្ធនឹងអំពើឆបោកតាមអនឡាញ អំពាវនាវឱ្យពលរដ្ឋរាយការណ៍ដល់អាជ្ញាធរមានសមត្ថកិច្ច ឬរាយការណ៍ទៅកាន់រូបលោកដោយផ្ទាល់ បើដឹងពីទីតាំងប្រព្រឹត្តអំពើឆបោកតាមអនឡាញ (Scam Online)។
លោក គួច ចំរើន បានសរសេរលើទំព័រហ្វេសប៊ុករបស់ខ្លួននៅថ្ងៃទី១៦ មីនា នេះថា ខ្មែរស្រឡាញ់ខ្មែរ ខ្មែរគាំទ្រខ្មែរ ខ្មែរជួយខ្មែរ ដូច្នេះបើប្រជាជនខ្មែរបានឃើញទីតាំងណាមានជនបរទេសស្នាក់នៅដោយប្រមូលផ្ដុំ និងសង្ស័យការប្រព្រឹត្តស្គេមអនឡាញ (Scam Online) សូមផ្តល់ព័ត៌មានដល់អាជ្ញាធរជាបន្ទាន់។
លោក គួច ចំរើន អំពាវនាវឱ្យពលរដ្ឋរាយការណ៍ ឬផ្តល់ព័ត៌មានទៅកាន់ប្រព័ន្ធទូរសព្ទលេខ ០៣១ ៣៧៤ ៩៨ ៣៤ ដោយធានាបាននូវការរក្សាការសម្ងាត់ ព្រោះពលរដ្ឋខ្មែរត្រូវតែរួមគ្នាបង្ក្រាបអំពើឆបោកតាមអនឡាញឱ្យអស់ពីទឹកដីកម្ពុជា។
ជុំវិញបញ្ហានេះ អតីតអ្នកឧកញ៉ា ហេង សិទ្ធី ដែលត្រូវបានរដ្ឋាភិបាលចាប់ឃុំខ្លួនក្រោយទម្លាយអាថ៌កំបាំងអំពីមន្ត្រីរដ្ឋាភិបាលគ្រាក់ៗមួយចំនួនដែលជាប់ពាក់ព័ន្ធនឹងអំពើឆបោកតាមអនឡាញ បានស្នើឱ្យនាយករដ្ឋមន្ត្រីកម្ពុជា លោក ហ៊ុន ម៉ាណែត បើកការស៊ើបអង្កេតលើអភិបាលខេត្តកណ្តាល លោក គួច ចំរើន កាលពីចុងឆ្នាំ២០២៤ កន្លងទៅ។
អតីតឧកញ៉ា ហេង សិទ្ធី ទម្លាយថា លោក គួច ចំរើន គឺជាជនពុករលួយធំបំផុតដែលពាក់ព័ន្ធនឹងអំពើឧក្រិដ្ឋកម្មខុសច្បាប់នានា ពេលដែលគាត់នៅជាអភិបាលខេត្តព្រះសីហនុ ខណៈលុយរាប់រយលានដុល្លារអាមេរិក ត្រូវបានផ្ញើឱ្យគាត់ដោយសុវត្ថិភាពបំផុតតាមរយៈរូបិយប័ណ្ណគ្រីបតូ ដូចជា USDT USDC និង Bitcoin ជាដើម។
អតីតឧកញ៉ារូបនេះបញ្ជាក់ថា ក្រៅពីលោក គួច ចំរើន រដ្ឋមន្ត្រីក្រសួងមហាផ្ទៃ លោក ស សុខា អគ្គស្នងការនគរបាលជាតិ លោក ស ថេត ស្នងការនគរបាលរាជធានីភ្នំពេញ លោក ជួន ណារិន្ទ រដ្ឋមន្ត្រីក្រសួងយុត្តិធម៌ លោក កើត រិទ្ធ រួមទាំងមន្ត្រីអន្តោប្រវេសន៍មួយចំនួនទៀត សុទ្ធតែជាប់ពាក់ព័ន្ធជាមួយក្រុមឧក្រិដ្ឋជនដែលបើកល្បែងអនឡាញខុសច្បាប់ និងការជួញដូរមនុស្សតាមប្រព័ន្ធអនឡាញនៅកម្ពុជា។
លើសពីនេះទៀត បងប្អូនជីដូនមួយរបស់លោក ហ៊ុន ម៉ាណែត គឺឧកញ៉ា ហ៊ុន តូ ក៏ជាប់ពាក់ព័ន្ធទាំងការប្រព្រឹត្តអំពើឆបោកតាមអនឡាញ និងការធ្វើជាខ្នងបង្អែកឱ្យឧក្រិដ្ឋជនខុសច្បាប់សម្ងំប្រព្រឹត្តអំពើឆបោកតាមអនឡាញនៅកម្ពុជាដូចមន្ត្រីគ្រាក់ៗទាំងនោះដែរ។
ពាក់ព័ន្ធនឹងបញ្ហានេះ កាលពីចុងឆ្នាំ២០២៥ សភាអាមេរិក បានចេញសេចក្តីព្រាងច្បាប់លេខ H.R 5490 ក្នុងគោលបំណងដាក់ប្រទេសកម្ពុជាក្នុងបញ្ជីខ្មៅ និងស្នើដាក់ទណ្ឌកម្មលើមន្ត្រីរដ្ឋាភិបាលគ្រាក់ៗ និងឧកញ៉ាខ្មែរមួយចំនួន រួមទាំងក្រុមហ៊ុនខ្មែរសហការជាមួយចិន ជាច្រើនទៀតផងដែរ។
ក្នុងសេចក្តីព្រាងច្បាប់នេះ បានកំណត់មុខសញ្ញាដាក់ទណ្ឌកម្មលើមន្ត្រីជាន់ខ្ពស់ក្នុងជួររដ្ឋាភិបាលកម្ពុជា និងឧកញ៉ាខ្មែរ ដូចជា លោក ឌី វិជ្ជា ឧបនាយករដ្ឋមន្ត្រីកម្ពុជា លោក នេត សាវឿន អភិបាលខេត្តកណ្តាល លោក គួច ចំរើន និងរដ្ឋមន្ត្រីក្រសួងមហាផ្ទៃ លោក ស សុខា ជាដើម។
បន្ថែមពីនេះ ក៏មានឧកញ៉ា ចេន ហ្ស៊ី ជនជាតិចិនសញ្ជាតិខ្មែរដែលជាទីប្រឹក្សាលោក ហ៊ុន សែន លោក យឹម លក្ខណ៍ ប្អូនថ្លៃលោក ហ៊ុន ម៉ានី ឧកញ៉ា ហ៊ុន តូ ក្មួយប្រុសបង្កើតលោក ហ៊ុន សែន ឧកញ៉ា កុក អាន ក្នុងនោះក៏មានឈ្មោះមេឧក្រិដ្ឋជនឈ្មោះ យ៉ាន ណារ៉ុង ផងដែរ រួមទាំងមនុស្សជាង ៣០នាក់ផ្សេងទៀតដែលភាគច្រើនជាឧក្រិដ្ឋជនជនជាតិចិន។
យ៉ាងណាក៏ដោយ កាលពីដើមខែកុម្ភៈ ឆ្នាំ២០២៦ ក្រសួងមហាផ្ទៃ បានប្រកាសអនុវត្តវិធានការបោសសម្អាតបទល្មើសអនឡាញឱ្យអស់ត្រឹមខែមេសា ឆ្នាំ២០២៦ ខាងមុខនេះ ដើម្បីផ្តាច់ដង្ហើមជនឆបោកតាមប្រព័ន្ធបច្ចេកវិទ្យាដែលបន្លំជ្រកក្រោមស្លាកអាជីវកម្មផ្សេងៗកុំឱ្យមាននៅក្នុងទឹកដីខ្មែរបន្តទៀត៕
© 2026, . All rights reserved.