គណបក្សឆន្ទៈខ្មែរ និងគណបក្សភ្លើងទៀន គ្រោងស្នើសុំជួបលោកនាយករដ្ឋមន្ត្រី ហ៊ុន ម៉ាណែត ក្រោយពិធីបុណ្យចូលឆ្នាំប្រពៃណីខ្មែរ ដើម្បីជជែកពីស្ថានភាពនយោបាយ និងវិបត្តិសង្គមក្នុងពេលបច្ចុប្បន្ន។
អនុប្រធានគណបក្សឆន្ទៈខ្មែរ លោក សុន ឆ័យ បានប្រាប់ក្រុមអ្នកសារព័ត៌មានបន្ទាប់ពីពិធីសន្និសីទសារព័ត៌មានស្ដីពីពិធីចុះហត្ថលេខាលើកិច្ចព្រមព្រៀងធ្វើសម្ពន្ធភាពនយោបាយរវាងគណបក្សភ្លើងទៀន និងគណបក្សឆន្ទៈខ្មែរ នារសៀលថ្ងៃអាទិត្យ ទី២២ ខែមីនា ឆ្នាំ២០២៦ ថា គណបក្សប្រឆាំងគ្រោងពិភាក្សាជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត អំពីបញ្ហាព្រំដែន វិបត្តិទំនិញឡើងថ្លៃ និងស្ថានភាពបំណុល ដែលពលរដ្ឋខ្មែរកំពុងជួបប្រទះ។
លោក សុន ឆ័យ បន្ថែមទៀតថា គណបក្សភ្លើងទៀន និងគណបក្សឆន្ទៈខ្មែរ គ្រោងនឹងសុំជួបនាយករដ្ឋមន្ត្រីកម្ពុជា លោក ហ៊ុន ម៉ាណែត នៅក្រោយពិធីបុណ្យចូលឆ្នាំប្រពៃណីខ្មែរ ដោយគ្រោងពិភាក្សាអំពីការឈ្លានពានរបស់ថៃ លើដែនអធិបតេយ្យកម្ពុជា ពលករដែលត្រឡប់ពីប្រទេសថៃ គ្មានការងារធ្វើ និងវិបត្តិប្រេងឥន្ធនៈឡើងថ្លៃ។
ប្រភពដដែលបន្ថែមទៀតថា មានតែវប្បធម៌សន្ទនាជួបគ្នាដោយផ្ទាល់ទេ ទើបផ្តល់លទ្ធផលផ្លែផ្កា។ លោកក៏សង្ឃឹមថាប្រមុខរដ្ឋាភិបាលកម្ពុជា នឹងទទួលយកសំណើសុំជួបពិភាក្សាពីសំណាក់ក្រុមមន្ត្រីគណបក្សក្រៅរដ្ឋាភិបាលរបស់លោកផងដែរ។
កាលពីថ្ងៃទី២២ ខែមីនា ឆ្នាំ២០២៦ គណបក្សភ្លើងទៀន និងគណបក្សឆន្ទៈខ្មែរ បានធ្វើពិធីចុះកិច្ចព្រមព្រៀងចងសម្ពន្ធនឹងគ្នា ដែលមានឈ្មោះថា «សម្ពន្ធភាពឆ្ពោះទៅអនាគត»។ ខ្លឹមសារសំខាន់នៃកិច្ចព្រមព្រៀងសម្ពន្ធភាពឆ្ពោះទៅអនាគតនេះ ធ្វើឡើងក្នុងគោលបំណងចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៦ ឆ្នាំ២០២៧ និងការបោះឆ្នោតជ្រើសតាំងតំណាងរាស្ត្រនីតិកាលទី៨ ឆ្នាំ២០២៨។
កន្លងមក គណបក្សឆន្ទៈខ្មែរ ដែលជាសមាជិកព្រឹទ្ធសភាកម្ពុជានីតិកាលទី៥ នេះ ក៏ធ្លាប់បានជួបសន្ទនាអស់ពេលជាង ៣ម៉ោងជាមួយនឹងប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា លោក ហ៊ុន សែន កាលពីឆ្នាំ២០២៤ ដោយលើកយកបញ្ហាសេដ្ឋកិច្ច និងបញ្ហានយោបាយផ្ទៃក្នុងកម្ពុជា ទៅជជែកពិភាក្សាគ្នាជាមួយលោក ហ៊ុន សែន។
ទាក់ទងទៅនឹងវប្បធម៌សន្ទនា កាលពីថ្ងៃទី២២ ខែកក្កដា ឆ្នាំ២០១៤ គឺជាថ្ងៃប្រវត្តិសាស្ត្រដែលពលរដ្ឋកម្ពុជា មើលឃើញថា មេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ មានការបង្រួបបង្រួមជាតិ ដោយប្រើប្រាស់វប្បធម៌សន្ទនាជាធំ ធ្វើឲ្យម្ចាស់ឆ្នោតមានក្ដីសង្ឃឹម ដោយឃើញស្ថានភាពនយោបាយបានបញ្ចប់ការតានតឹង បញ្ចប់ជម្លោះក្រោយពេលបោះឆ្នោត ហើយគណបក្សជាប់ឆ្នោតអភិវឌ្ឍប្រទេសរួមគ្នា៕
© 2026, . All rights reserved.