រដ្ឋាភិបាលកម្ពុជា ប្ដេជ្ញាចិត្តរួមគ្នាជាមួយប្រទេសថៃ គោរពតាមស្មារតីសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) ថ្ងៃទី២៧ ខែធ្នូ ឆ្នាំ២០២៥ ខណៈថៃ កំពុងដាក់ពង្រាយដ្រូនតាមព្រំដែនដើម្បីត្រៀមធ្វើសង្គ្រាមជុំទី៣។
ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា បានលើកឡើងក្នុងកម្មវិធីស្ដីពីបច្ចុប្បន្នភាពព្រំដែនកម្ពុជា-ថៃ នៅថ្ងៃទី២៥ មីនា នេះថា កិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) បានទទួលស្គាល់ពីសារសំខាន់នៃការពិភាក្សាស្ដីពីដំណោះស្រាយជម្លោះដោយសន្តិវិធី និងការគោរពគ្នាទៅវិញទៅមកស្របតាមគោលការណ៍នៃធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។
លោក ប៉ែន បូណា អះអាងថា កិច្ចប្រជុំនេះក៏បានរំលឹកឡើងវិញនូវសេចក្តីប្រកាសរបស់ប្រធានអាស៊ានក្នុងកិច្ចប្រជុំពិសេសរបស់រដ្ឋមន្ត្រីការបរទេសអាស៊ាន ស្ដីពីស្ថានភាពបច្ចុប្បន្នរវាងកម្ពុជា និងថៃ ដែលបានរៀបចំឡើងកាលពីថ្ងៃទី២២ ខែធ្នូ ឆ្នាំ២០២៥ នៅទីក្រុងកូឡាឡាំពួរ និងបញ្ជាក់សាជាថ្មីអំពីការប្ដេជ្ញាចិត្តយ៉ាងមុតមាំក្នុងការជៀសវាងការគំរាមកំហែង ឬការប្រើប្រាស់កម្លាំងផងដែរ។
ជាងនេះទៅទៀត ក៏បញ្ជាក់ឡើងវិញនូវការប្ដេជ្ញាចិត្តដ៏មុតមាំចំពោះការអនុវត្តពេញលេញ និងមានប្រសិទ្ធភាពនៃបទឈប់បាញ់ចុះថ្ងៃទី២៨ ខែកក្កដា ឆ្នាំ២០២៥ និងកិច្ចព្រមព្រៀងពាក់ព័ន្ធទាំងអស់ដែលសម្រេចបានក្រោយបទឈប់បាញ់នេះ ព្រមទាំងកិច្ចព្រមព្រៀងផ្សេងៗដែលសម្រេចបាន និងកិច្ចព្រមព្រៀងដែលមានស្រាប់រវាងកម្ពុជា និងថៃ នាពេលកន្លងមកនោះ។
អ្នកនាំពាក្យរូបនេះបញ្ជាក់ថា កម្ពុជាប្ដេជ្ញាអនុវត្តយ៉ាងខ្ជាប់ខ្ជួននូវបទឈប់បាញ់ និងប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម គោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris)។
ជាងនេះទៀត ក៏គោរពនូវអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក ព្រោះកម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ។
កាលពីថ្ងៃទី២៤ ខែមីនា កាសែតថៃ Thai Enquirer ស្រង់សម្ដីអ្នកនាំពាក្យកងទ័ពថៃ លោក វីនថៃ សុវារី ថាយោធាថៃ បានដាក់ពង្រាយដ្រូនវាយប្រហារ និងដ្រូនទម្លាក់គ្រាប់បែកជំនាន់ថ្មីដែលបំពាក់បច្ចេកវិទ្យាបញ្ញាសិប្បនិម្មិត (AI) នៅតាមតំបន់ព្រំដែនជាប់ប្រទេសកម្ពុជា ដើម្បីត្រៀមសង្គ្រាមលើកទី៣។
ប្រភពដដែល បញ្ជាក់ថា ដ្រូនដែលត្រូវបានដាក់ពង្រាយ មានទាំងដ្រូនដែលទើបនឹងដាក់ដំណើរការថ្មី និងដ្រូនដែលធ្លាប់វាយប្រហារកម្ពុជាកាលពីលើកមុនផងដែរ ហើយដ្រូនទាំងនេះអាចធ្វើប្រតិបត្តិការដោយគ្មានការរំខានអ្វីទាំងអស់ ទោះមានឧបករណ៍ប្រឆាំងពួកវាក៏ដោយ។
ចំណែកកាសែតថៃ The Nation បានស្រង់សម្ដីប្រធានចារកម្មថៃ លោក Theeranan Nanthakwang កាលពីថ្ងៃទី២៤ មីនា ដោយព្រមានថា ការប៉ះទង្គិចគ្នាជុំទី៣ ជាមួយកម្ពុជា តាមបណ្តោយព្រំដែន អាចនឹងកើតមានក្នុងរយៈពេល ៤ខែ ឬ ៥ខែខាងមុខ ដោយយោងទៅលើស្ថានការណ៍បោះឆ្នោតនៅកម្ពុជា និងការដែលកម្ពុជា បានទិញអាវុធពីអឺរ៉ុបខាងកើត។
យ៉ាងណាក៏ដោយ អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា កាលពីថ្ងៃទី២៤ ខែមីនា ឆ្នាំ២០២៦ បានចេញមកច្រានចោលការចោទប្រកាន់របស់ភាគីថៃ ទាំងស្រុង ដែលចោទកម្ពុជាថាកំពុងត្រៀមផ្ទុះអាវុធលើកទី៣ ជាមួយថៃ នោះ។
អ្នកនាំពាក្យរូបនេះចាត់ទុកការផ្សព្វផ្សាយរបស់ភាគីថៃ អំពីបញ្ហានេះថាគ្មានមូលដ្ឋានច្បាស់លាស់ និងអាចបង្កការភាន់ច្រឡំដល់សាធារណជន៕
© 2026, . All rights reserved.