ក្រសួងពាណិជ្ជកម្ម ចេញតារាងកំណត់តម្លៃប្រេងឥន្ធនៈឡើងវិញនៅថ្ងៃទី២៦ ខែមីនា នេះ ដោយដំឡើងតម្លៃប្រេងម៉ាស៊ូត ៤០០រៀល ដែលស្មើនឹង ៧១០០រៀលក្នុងមួយលីត្រ ខណៈតម្លៃប្រេងសាំងក៏ត្រូវបានដំឡើង ៥០រៀលដែរ ដែលស្មើនឹង ៥៤៥០រៀលក្នុងមួយលីត្រ។
ក្រសួងពាណិជ្ជកម្មកម្ពុជា បានចេញសេចក្តីជូនដំណឹងកាលពីយប់ថ្ងៃទី២៥ ខែមីនា ឆ្នាំ២០២៦ នេះថា យោងតាមការប្រែប្រួលនៃតម្លៃប្រេងឥន្ធនៈលើទីផ្សារក្នុងតំបន់ និងអន្តរជាតិ រាជរដ្ឋាភិបាលបន្តបញ្ចុះតម្លៃលក់រាយប្រេងឥន្ធនៈនៅកម្ពុជា ចំនួន ៦,៥សេនដុល្លារក្នុង ១លីត្រ ក្នុងបំណងជួយសម្រួលដល់ជីវភាពរបស់ពលរដ្ឋ។
ប្រភពដដែល អះអាងថា រាជរដ្ឋាភិបាលក៏បានបញ្ចុះតម្លៃ ១សេនដុល្លារក្នុង ១លីត្របន្ថែមទៀតដែរ ដោយសារប្រេងសាំងអន្តរជាតិឡើងលើសពី ៩០ដុល្លារក្នុង ១បារ៉ែល និងប្រេងម៉ាស៊ូតអន្តរជាតិឡើងលើស ១០០ដុល្លារក្នុង ១បារ៉ែលដែរនោះ ខណៈពន្ធគយក៏ត្រូវបានទម្លាក់មកនៅត្រឹមសូន្យដុល្លារ។
ក្រសួងពាណិជ្ជកម្ម បញ្ជាក់ថា ផ្អែកតាមសភាពការណ៍ និងថ្លៃប្រេងឥន្ធនៈបន្តកើនឡើងនៅទីផ្សារអន្តរជាតិ នាយករដ្ឋមន្ត្រីកម្ពុជា លោក ហ៊ុន ម៉ាណែត បានសម្រេចបញ្ចុះពន្ធអាករបន្ថែមលើប្រេងសាំង និងប្រេងម៉ាស៊ូតមកនៅត្រឹមសូន្យដុល្លារ និងបញ្ចុះអាករពិសេសពី ៤% មកនៅសូន្យភាគរយថែមទៀត។
លើសពីនេះ ក៏បានបញ្ចុះអាករលើតម្លៃបន្ថែមពី ១០% មកនៅត្រឹម ៤% ផងដែរ ព្រោះ ៦% រដ្ឋាភិបាលជាអ្នកទទួលបន្ទុកជំនួស ដូច្នេះចាប់ពីថ្ងៃទី២៦ មីនា នេះតទៅ តម្លៃប្រេងម៉ាស៊ូត គឺត្រូវកំណត់ ៧១០០រៀលក្នុង ១លីត្រ ចំណែកតម្លៃប្រេងសាំងត្រូវកំណត់ ៥៤៥០រៀលក្នុង ១លីត្រ រហូតមានការកំណត់តម្លៃថ្មីឡើងវិញ។
ចាប់តាំងពីដើមខែមីនា មក តម្លៃប្រេងសាំងនៅកម្ពុជានៅតែបន្តហក់ឡើងជាបន្តបន្ទាប់។ ជាក់ស្តែង កាលពីថ្ងៃទី១ ខែមីនា ឆ្នាំ២០២៦ តម្លៃប្រេងសាំងធម្មតា និងប្រេងម៉ាស៊ូត ត្រូវបានកំណត់ត្រឹម ៣៨៥០រៀលប៉ុណ្ណោះក្នុង ១លីត្រ ប៉ុន្តែនៅថ្ងៃទី៨ ខែមីនា តម្លៃប្រេងសាំងត្រូវបានកំណត់ ៤៤០០រៀលក្នុង ១លីត្រ ខណៈតម្លៃប្រេងម៉ាស៊ូតត្រូវកំណត់ ៥១៥០រៀលក្នុង ១លីត្រ ដែលមានន័យថា តម្លៃប្រេងសាំងត្រូវដំឡើង ៥៥០រៀលក្នុង ១លីត្រ ខណៈប្រេងម៉ាស៊ូត ក៏ត្រូវបានបង្កើនតម្លៃ ១៣០០រៀលក្នុង ១លីត្រដែរ។
ក្នុងរយៈពេលជិត ៣០ថ្ងៃ ចាប់ពីថ្ងៃទី១ ដល់ថ្ងៃទី២៧ ខែមីនា នេះ តម្លៃប្រេងឥន្ធនៈកម្ពុជាបានហក់ឡើងដល់ ៣២៥០រៀលក្នុង ១លីត្រសម្រាប់ប្រេងម៉ាស៊ូត ចំណែកប្រេងសាំងក៏បានកើនឡើង ១៦០០រៀលក្នុង ១លីត្រដែរ។
កាលពីថ្ងៃទី១១ ខែមីនា សារព័ត៌មាន Aljazeera បានរាយការណ៍ថា តម្លៃប្រេងឥន្ធនៈក្នុងប្រទេសកម្ពុជាដែលត្រូវបានកំណត់សម្រាប់ស្ថានីយលក់រាយ បាននាំមុខគេក្នុងចំណោម ៩៥ប្រទេសនៅលើពិភពលោក ហើយក៏ខ្ពស់ជាងគេក្នុងចំណោមប្រទេសក្នុងតំបន់អាស៊ានដែរ។
នៅថ្ងៃទី២៦ ខែមីនា នេះ ស្ថានីយលក់រាយនៅកម្ពុជាមួយចំនួនបានកំណត់តម្លៃសាំងធម្មតា ៥៤៥០រៀលក្នុង ១លីត្រ ខណៈប្រភេទសាំងស៊ូពែរត្រូវបានកំណត់ ៦៥០០រៀលក្នុង ១លីត្រ ខណៈប្រេងម៉ាស៊ូតត្រូវបានកំណត់ ៧១០០រៀលក្នុង ១លីត្រ ចំណែកហ្គាស៍ត្រូវបានកំណត់ ៣២០០រៀលក្នុង១លីត្រដែរ ប៉ុន្តែសម្រាប់ស្ថានីយប្រេងឥន្ធនៈ កាល់តិច (CALTEX) បានកំណត់តម្លៃប្រភេទសាំងស៊ូពែរ ៦៨៥០រៀលក្នុង ១លីត្រលើសស្ថានីយផ្សេងៗរហូតដល់ទៅ ៣៥០រៀលឯណោះក្នុង ១លីត្រ៕
© 2026, . All rights reserved.