សង្គ្រាមវាយប្រហារលើរបបសាធារណរដ្ឋឥស្លាមអ៊ីរ៉ង់ ដែលបញ្ឆេះដោយប្រទេសមហាអំណាចសហរដ្ឋអាមេរិក រួមដៃជាមួយអ៊ីស្រាអែល នាំឱ្យមានស្នាមប្រេះឆារវាងថ្នាក់ដឹកនាំរដ្ឋាភិបាល និងមេទ័ពអ៊ីរ៉ង់ លេចត្រដែតឡើងយ៉ាងច្បាស់ជុំវិញបញ្ហាសង្គ្រាម និងសេដ្ឋកិច្ច ដែលជាវិបត្តិដ៏ធ្ងន់ធ្ងរសង្កត់លើរដ្ឋាភិបាលរបស់ប្រធានាធិបតីអ៊ីរ៉ង់ លោក Masoud Pezeshkian។
ការខ្វែងគំនិតគ្នាបានកើតឡើងរវាងប្រធានាធិបតីអ៊ីរ៉ង់ Masoud Pezeshkian និងមេបញ្ជាការនៃកងឆ្មាំបដិវត្តន៍ឥស្លាម ឧត្ដមសេនីយ៍ Ahmad Vahidi អំពីរបៀបដឹកនាំសង្គ្រាម និងផលប៉ះពាល់ទៅលើជីវភាពរស់នៅ និងសេដ្ឋកិច្ចរបស់ប្រទេស។
ប្រភពដែលដឹងអំពីបញ្ហានេះ បានប្រាប់សារព័ត៌មាន Iran International ថា លោក Masoud Pezeshkian បានរិះគន់វិធីសាស្ត្ររបស់ក្រុមឧត្ដមសេនីយ៍នៃកងឆ្មាំបដិវត្តន៍ឥស្លាម ដែលបន្តបង្កភាពតានតឹង និងវាយប្រហារទៅលើប្រទេសជិតខាង បណ្ដាឱ្យមានវិបត្តិសេដ្ឋកិច្ចធ្ងន់ធ្ងរ។
លោក Pezeshkian បញ្ជាក់ថា ប្រសិនបើមិនមានបទឈប់បាញ់ សេដ្ឋកិច្ចអ៊ីរ៉ង់ អាចដួលរលំក្នុងរយៈពេលពីរបីសប្តាហ៍ ឬមួយខែទៀតនេះ។
កាលពីថ្ងៃទី០៧ ខែមីនា លោក Masoud Pezeshkian បានចេញសារវីដេអូសុំទោសចំពោះការវាយប្រហារដោយមីស៊ីល និងដ្រូនដែលបាញ់ចេញពីប្រទេសអ៊ីរ៉ង់ ដោយកងឆ្មាំបដិវត្តន៍ឥស្លាមអ៊ីរ៉ង់។
លោកអះអាងថា ការវាយសងសឹករបស់កងទ័ពអ៊ីរ៉ង់ ជាភ្លើងឆេះឆន្ទៈ ព្រោះតែផ្ដើមចេញពីការអនុញ្ញាតឱ្យកងកម្លាំងយោធាមីស៊ីល និងដ្រូនរបស់អ៊ីរ៉ង់ បើកការវាយប្រហារដោយសេរី ដោយមិនចាំបាច់រង់ចាំពាក្យបញ្ជាបន្ថែមពីថ្នាក់លើ។ លោកបានទាមទារថា កងកម្លាំងគួរតែបញ្ឈប់សកម្មភាពវាយប្រហារទៅលើប្រទេសដែលមិនមានជម្លោះផ្ទាល់ជាមួយអ៊ីរ៉ង់។
ទោះជាមានការស្នើឡើងដោយលោក Masoud Pezeshkian ក៏កងឆ្មាំបដិវត្តន៍ឥស្លាមអ៊ីរ៉ង់ នៅតែវាយប្រហារទៅលើប្រទេសទាំងនោះ ព្រោះធ្វើតាមបទបញ្ជារបស់មេទ័ព គឺឧត្ដមសេនីយ៍ Ahmad Vahidi។
នៅពេលនោះ លោក Masoud Pezeshkian បានអំពាវនាវឱ្យស្ដារឡើងវិញនូវអំណាចប្រតិបត្តិនៃរដ្ឋាភិបាលរបស់លោក ដោយស្នើឱ្យអំណាចគ្រប់គ្រងប្រទេសត្រឡប់ទៅស្ថិតនៅក្នុងដៃរដ្ឋបាលស៊ីវិលវិញ ប៉ុន្តែការទាមទាររបស់លោក Masoud Pezeshkian ត្រូវបានច្រានចោលដោយឧត្ដមសេនីយ៍ Ahmad Vahidi មេបញ្ជាការកងឆ្មាំបដិវត្តន៍ឥស្លាម។
ជាការឆ្លើយតបទៅនឹងការលើកឡើងរបស់លោក Pezeshkian លោក Vahidi បានស្ដីបន្ទោសរដ្ឋាភិបាលថាមិនបានអនុវត្តកំណែទម្រង់សំខាន់ៗមុនសង្គ្រាមបានចាប់ផ្តើម ដែលថានេះជាកំហុសរបស់លោក Masoud Pezeshkian។
ជាមួយគ្នានេះ ប្រព័ន្ធផ្សព្វផ្សាយអ៊ីស្រាអែល បានរាយការណ៍អំពីសញ្ញាបែកបាក់នៅក្នុងប្រព័ន្ធអំណាចរដ្ឋនៅអ៊ីរ៉ង់។
សារព័ត៌មាន The Times of Israel បានដកស្រង់សម្ដីមន្ត្រីជាន់ខ្ពស់ម្នាក់ដែលនិយាយថាមានសញ្ញានៃការបែកបាក់នៅក្នុងរបបនៅអ៊ីរ៉ង់ ហើយកំពុងបង្កើតលក្ខខណ្ឌសម្រាប់ការផ្លាស់ប្ដូរ ប៉ុន្តែលទ្ធផលចុងក្រោយអាស្រ័យលើប្រជាជនអ៊ីរ៉ង់។
ប្រភពសារព័ត៌មាន Ynet នៃប្រទេសអ៊ីរ៉ង់ ក៏បានរាយការណ៍អំពីការបែងចែកផ្ទៃក្នុងនៃប្រព័ន្ធអំណាចរដ្ឋនៅអ៊ីរ៉ង់ ផងដែរ។
ខណៈសង្គ្រាមឈានចូលសប្តាហ៍ទី៥ គេសង្កេតឃើញផលប៉ះពាល់សេដ្ឋកិច្ចកាន់តែបង្ហាញច្បាស់ និងធ្ងន់ធ្ងរ។
នៅទីក្រុងធំៗមានការរាយការណ៍ថា ម៉ាស៊ីន ATM ជាច្រើនលែងមានសាច់ប្រាក់ ឬមិនដំណើរការ ខណៈសេវាធនាគារអនឡាញរបស់ធនាគារធំៗ រួមទាំង Bank Melli ក៏គ្មានសាច់ប្រាក់ដែរ។
មន្ត្រីរដ្ឋាភិបាលបាននិយាយថា ប្រាក់ខែ និងអត្ថប្រយោជន៍របស់កម្មករជាច្រើនមិនត្រូវបានបើកទៀងទាត់អស់រយៈពេលបីខែមកហើយ។ ចំណែកប្រាក់ខែកងទ័ព កងប៉ូលិសកងសន្តិសុខ ក៏ចាប់ផ្ដើមកាត់បន្ថយ ហើយបើកមិនទៀងទាត់ទៀតផង៕
© 2026, . All rights reserved.