រដ្ឋសភាកម្ពុជា នៅថ្ងៃទី៣០ ខែមីនា ឆ្នាំ២០២៦ នេះ បានអនុម័តជាឯកច្ឆន្ទលើសេចក្តីព្រាងច្បាប់ស្ដីពីការប្រឆាំងនឹងការឆបោកតាមប្រព័ន្ធបច្ចេកវិទ្យា ដោយមានសំឡេងគាំទ្រ ១១២ លើ ១១២។
ការសម្រេចនេះ ធ្វើឡើងក្នុងសម័យប្រជុំរដ្ឋសភាលើកទី៥ បន្ទាប់ពីសមាជិករដ្ឋសភា និងតំណាងរដ្ឋាភិបាលបានបកស្រាយ និងពិភាក្សាគ្នាពេញមួយព្រឹក។
កិច្ចពិភាក្សា និងការអនុម័តរបស់រដ្ឋសភាលើសេចក្តីព្រាងច្បាប់ស្ដីពីការប្រឆាំងនឹងការឆបោកតាមប្រព័ន្ធបច្ចេកវិទ្យា ធ្វើឡើងបន្ទាប់ពីគណៈកម្មាធិការអចិន្ត្រៃយ៍រដ្ឋសភាបានពិភាក្សា និងអនុម័តកាលពីថ្ងៃទី២៦ ខែមីនា ឆ្នាំ២០២៦។
បើតាមនីតិវិធី សេចក្តីព្រាងច្បាប់មួយនេះនឹងត្រូវបញ្ជូនបន្តទៅកាន់ព្រឹទ្ធសភា ដើម្បីពិនិត្យសម្រេច និងអនុម័ត ក្រោយការអនុម័តរបស់រដ្ឋសភា ប៉ុន្តែរដ្ឋសភាកម្ពុជាមិនបានបញ្ជាក់ថា តើសេចក្តីព្រាងច្បាប់នេះ នឹងត្រូវបញ្ជូនទៅកាន់ព្រឹទ្ធសភានៅថ្ងៃណានោះទេ។
សេចក្ដីព្រាងច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា រៀបចំឡើងដើម្បីបង្កើនប្រសិទ្ធភាពនៃការបង្ក្រាបបទល្មើសបច្ចេកវិទ្យា ដោយផ្ដោតសំខាន់លើបទល្មើសឆបោកតាមប្រព័ន្ធបច្ចេកវិទ្យា ការរៀបចំ ឬដឹកនាំមជ្ឈមណ្ឌលឆបោកបច្ចេកវិទ្យា ហើយនិងមានការដាក់ទោសធ្ងន់ធ្ងរ។ លើសពីនេះ អ្នកបណ្ដុះបណ្ដាលបុគ្គលផ្សេងឱ្យប្រព្រឹត្តបទល្មើស និងជួយផ្ដល់កន្លែងស្នាក់នៅ ព្រមទាំងអ្នកប្រមូលទិន្នន័យឯកជនក្នុងចេតនាទុច្ចរិត ក៏ត្រូវរងទោសទណ្ឌដែរ។
សេចក្តីព្រាងច្បាប់ស្ដីពីការប្រឆាំងនឹងការឆបោកតាមប្រព័ន្ធបច្ចេកវិទ្យា ត្រូវបានរៀបចំឡើងដោយក្រសួងយុត្តិធម៌ កាលពីថ្ងៃទី១១ ខែកុម្ភៈ ឆ្នាំ២០២៦ ដោយមានការចូលរួមពីក្រសួងស្ថាប័នពាក់ព័ន្ធនានា។ សេចក្តីព្រាងច្បាប់មួយនេះមាន ៥ជំពូក និង ២៤មាត្រា។
រដ្ឋមន្ត្រីក្រសួងយុត្តិធម៌ បង្ហើបប្រាប់អ្នកសារព័ត៌មានថា មានការដាក់ទោសធ្ងន់ធ្ងរដល់ជនល្មើសជាប់ក្នុងពន្ធនាគារអស់មួយជីវិត បើសិនមានបទល្មើសផ្សេងទៀតកើតឡើង ដូចជាការចាប់ជំរិត ឬការសម្លាប់មនុស្ស ជាដើម។
យោងតាមរបាយការណ៍របស់ក្រសួងយុត្តិធម៌ ក្នុងរយៈពេល ៨ខែចុងក្រោយនេះ តុលាការកម្ពុជាបានអនុវត្តនីតិវិធីផ្លូវច្បាប់លើសំណុំរឿងពាក់ព័ន្ធនឹងការឆបោកតាមអនឡាញសរុបចំនួន ៧៩សំណុំរឿង ដោយបានផ្ដន្ទាទោសមេខ្លោង និងបក្ខពួកចម្រុះជាតិសាសន៍ប្រមាណ ៧០០នាក់។
ទោះយ៉ាងណា ជនបរទេសដែលជាមេខ្លោង និងអ្នកពាក់ព័ន្ធនឹងឧក្រិដ្ឋកម្មឆបោកនេះចំនួនជាង ២២ម៉ឺននាក់ បានគេចចេញពីប្រទេសកម្ពុជាតាមផ្លូវគោក និងផ្លូវអាកាស៕
© 2026, . All rights reserved.