លោក ហ៊ុន ម៉ាណែត បញ្ជាឱ្យរដ្ឋមន្ត្រីក្រសួងយុត្តិធម៌ លោក កើត រិទ្ធ និងអគ្គស្នងការនគរបាលជាតិ លោក ស ថេត ចាប់ខ្លួនជនបង្កពិតប្រាកដ ដែលបើកបររថយន្តបុកមនុស្សស្លាប់ ៦នាក់ យកមកកាត់ទោសតាមផ្លូវច្បាប់ ដើម្បីផ្ដល់ភាពយុត្តិធម៌ដល់ជនរងគ្រោះ។
លោក ហ៊ុន ម៉ាណែត បានសរសេរលើទំព័រហ្វេសប៊ុករបស់លោកនៅថ្ងៃទី៣១ មីនា នេះថា មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងនៅស្រុកមោងឫស្សី ខេត្តបាត់ដំបង កាលពីថ្ងៃទី២៧ ខែមីនា ដែលបណ្តាលឱ្យមនុស្សចំនួន ៦នាក់ស្លាប់ ក្នុងនោះក៏មានទារកនៅក្នុងផ្ទៃមាតាផងដែរ។
លោក ហ៊ុន ម៉ាណែត លើកឡើងថា ពេលនេះ ជនបង្កបានរត់គេចខ្លួនបាត់ស្រមោល ខណៈពលរដ្ឋមានការព្រួយបារម្ភចំពោះអ្នកប្រព្រឹត្តដែលអាចមិនត្រូវបានទទួលទោសតាមច្បាប់ ដោយសារមានគ្រួសារជាមន្ត្រី។
លោកនាយករដ្ឋមន្ត្រីបញ្ជាក់ថា ចំពោះការបើកបរដែលមិនគោរពច្បាប់ ជាពិសេសការបើកបរដោយស្ថិតក្រោមស្ថានភាពស្រវឹង និងបង្កឱ្យមានគ្រោះថ្នាក់ដល់អាយុជីវិតអ្នកដទៃ គឺត្រូវទទួលខុសត្រូវតាមច្បាប់យ៉ាងតឹងរ៉ឹងបំផុត ដោយគ្មានការលើកលែងឡើយ។
កាលពីយប់ថ្ងៃទី២៧ ខែមីនា ឆ្នាំ២០២៦ វេលាម៉ោង ២២ និង ៤០នាទីនៅចំណុចផ្លូវជាតិលេខ៥ ស្ថិតក្នុងភូមិកកោះ ឃុំកកោះ ស្រុកមោងឫស្សី ខេត្តបាត់ដំបង មានគ្រោះថ្នាក់ចរាចរណ៍មួយបានកើតឡើង ដែលបណ្តាលឱ្យមនុស្សស្លាប់ចំនួន ០៦នាក់ ដែលក្នុងនោះ គឺមនុស្សប្រុសចំនួន ០២នាក់ ស្ត្រីចំនួន ០៣នាក់ រួមទាំងទារកក្នុងផ្ទៃ ១នាក់ផងដែរ។ ជនបង្កត្រូវគេស្គាល់ថាឈ្មោះ ស៊ីវ ជ័យសិដ្ឋ បើកបររថយន្តម៉ាក MERC EDES BENZ ពាក់ផ្លាកលេខ កម្ពុជា-C.S.6168 ដែលត្រូវជាកូនប្រុសបង្កើតរបស់ស្នងការរងខេត្តបន្ទាយមានជ័យ លោក ស៊ីវ សុជាតិ ដែលជាទីប្រឹក្សារបស់ប្រធានព្រឹទ្ធសភា លោក ហ៊ុន សែន សព្វថ្ងៃនេះ។
យោងតាមរបាយការណ៍នគរបាលចរាចរណ៍ផ្លូវគោកខេត្តបាត់ដំបង បញ្ជាក់ថា រថយន្តម៉ាក MERCEDES BENZ បានបើកបរមកពីទិសខាងភ្នំពេញ ឆ្ពោះទៅទិសខាងបាត់ដំបង និងបានបុកម៉ូតូចំនួន ២គ្រឿងពីខាងក្រោយលើគន្លងផ្លូវម៉ូតូ ក្នុងទិសដៅស្របគ្នា ដែលបណ្តាលឱ្យមនុស្ស ៦នាក់ស្លាប់ ខណៈជនរងគ្រោះគឺមានទាំងមនុស្ស និងកុមារ។
ក្រោយហេតុការណ៍នេះ ស្នងការដ្ឋាននគរបាលខេត្តបាត់ដំបង កាលពីថ្ងៃទី៣០ ខែមីនា ឆ្នាំ២០២៦ បានចេញលិខិតកោះហៅឈ្មោះ ស៊ីវ ជ័យសិដ្ឋ ចូលមកបំភ្លឺនៅថ្ងៃទី១ មេសា នេះជាកំហិត។
នៅថ្ងៃទី៣១ មីនា នេះ រដ្ឋមន្ត្រីក្រសួងមហាផ្ទៃ លោក ស សុខា បញ្ចេញឃ្លីបវីដេអូមួយ ដោយបញ្ជាឱ្យស្នងការរងខេត្តបន្ទាយមានជ័យ លោក ស៊ីវ សុជាតិ សហការជាមួយសមត្ថកិច្ច នាំខ្លួនកូនប្រុសដែលបង្កគ្រោះថ្នាក់ចរាចរណ៍មកទទួលខុសត្រូវចំពោះមុខច្បាប់ ខណៈអគ្គនាយកដ្ឋានអត្តសញ្ញាណកម្ម និងអគ្គនាយកដ្ឋានអន្តោប្រវេសន៍ ក៏បានដាក់ឈ្មោះជនបង្កក្នុងបញ្ជីខ្មៅមិនឱ្យចាកចេញពីប្រទេសផងដែរ។
លោក ស សុខា បញ្ជាឱ្យអគ្គស្នងការនគរបាលជាតិ និងស្នងការដ្ឋាននគរបាលខេត្តបាត់ដំបង អនុវត្តករណីនេះឱ្យបានលឿន ដើម្បីឈានទៅឃាត់ខ្លួនជនបង្ក ហើយលោកជឿជាក់ថាស្នងការរងខេត្តបន្ទាយមានជ័យ លោក ស៊ីវ សុជាតិ ដែលជាឪពុក ប្រាកដជាដឹងថាកូនរបស់គាត់កំពុងលាក់ខ្លួននៅទីណា។
យ៉ាងណាក៏ដោយ បើតាមការអះអាងរបស់លោក ស៊ីវ សុជាតិ ស្នងការរងនគរបាលខេត្តបន្ទាយមានជ័យ ដែលត្រូវជាឪពុករបស់ជនសង្ស័យឈ្មោះ ស៊ីវ ជ័យសិដ្ឋ បានចូលខ្លួនទៅបំភ្លឺនៅស្នងការដ្ឋាននគរបាលខេត្តបាត់ដំបង កាលពីល្ងាចថ្ងៃទី៣០ ខែមីនា បានឱ្យដឹងថា កូនប្រុសរបស់គាត់ពេលនេះកំពុងបាត់ខ្លួន។
លោក ស៊ីវ សុជាតិ បញ្ជាក់ថា នៅយប់ថ្ងៃកើតហេតុ ភរិយា និងកូនប្រុសរបស់លោកបានធ្វើដំណើរពីភ្នំពេញទៅខេត្តបន្ទាយមានជ័យ ដោយជិះរថយន្តម្នាក់មួយគ្រឿងដាច់ដោយឡែកពីគ្នា ដូច្នេះមានតែភរិយារបស់លោកប៉ុណ្ណោះទើបអាចបញ្ជាក់បានថានរណាជាអ្នកបើកបរពិតប្រាកដ។
ជុំវិញបញ្ហានេះ អ្នកស្រាវជ្រាវអំពីការអភិវឌ្ឍសង្គម បណ្ឌិត មាស នី សរសេរលើគណនីហ្វេសប៊ុករបស់ខ្លួននៅថ្ងៃទី៣១ មីនា នេះថា នៅតាមហាងកាហ្វេនានា ពលរដ្ឋបង្ហាញការព្រួយបារម្ភចំពោះការអនុវត្តច្បាប់នៅកម្ពុជា ដែលជាញឹកញាប់ជនបង្កតែងត្រូវបានរួចខ្លួនដោយការប្រើលុយ។
លោកបញ្ជាក់ថា បើពិតជាមានករណីបែបនេះមែន នោះមានន័យថា អំពើនិទណ្ឌភាពអាចនឹងពង្រីកខ្លួនកាន់តែធំទៅៗ ទាំងនៅក្នុងប្រព័ន្ធដឹកនាំរដ្ឋ និងនៅក្នុងសង្គមខ្មែរទាំងមូល៕
© 2026, . All rights reserved.