ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា ស្នើឱ្យរដ្ឋាភិបាលកម្ពុជាលុបបំបាត់អំពើពុករលួយ និងការិយាធិបតេយ្យ ដើម្បីកុំឱ្យក្លាយជាឧបសគ្គដល់កម្ពុជាដែលត្រៀមខ្លួនក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០ ខាងមុខនោះ។
បណ្ឌិត គិន ភា បានសរសេរលើគណនីហ្វេសប៊ុករបស់ខ្លួននៅថ្ងៃទី៣១ មីនា នេះថា អំពើពុករលួយគឺជាមេរោគស៊ីរូងផ្ទៃក្នុងដែលបំផ្លាញជំនឿចិត្តរបស់ពលរដ្ឋ និងធ្វើឱ្យប្រព័ន្ធអភិបាលកិច្ចរដ្ឋរខេករខាក ហើយក៏ធ្វើឱ្យអំណាចរដ្ឋទន់ខ្សោយផងដែរ ជាពិសេសចំពោះមុខសត្រូវឈ្លានពាននាពេលនេះ។
លោកព្រមានថា កម្ពុជាមិនអាចចាត់វិធានការចំពោះអំពើពុករលួយបែបពន្លត់អគ្គិភ័យដោយការដោះស្រាយតាមករណីចាំបាច់ម្ដងម្កាលបានទេ ប៉ុន្តែត្រូវបង្កើតប្រព័ន្ធអភិបាលកិច្ចមួយដែលមាននិរន្តរភាព និងតម្លាភាពជាក់លាក់។
លោកបន្តថា ការធ្វើបែបនេះ គឺដើម្បីដោះស្រាយបញ្ហាជាក់ស្តែងដែលអ្នកការទូតបរទេស និងវិនិយោគិននានាបានលើកឡើងកន្លងមក ជាពិសេសដើម្បីកសាងរូបភាពវិជ្ជមានក្នុងក្រសែភ្នែកអន្តរជាតិចំពោះបញ្ហានេះ ជាពិសេសមិត្តបរទេសដែលយល់ឃើញថានៅតែមានភាពលំបាក និងភាពមិនច្បាស់លាស់ក្នុងការវិនិយោគនៅកម្ពុជារហូតមកនោះ។
មន្ត្រីជាន់ខ្ពស់រដ្ឋាភិបាលកម្ពុជារូបនេះ បញ្ជាក់ថា កន្លងមក ឯកអគ្គរាជទូត ឯកអគ្គរដ្ឋទូត និងមន្ត្រីការទូតជាន់ខ្ពស់ទទួលបន្ទុកកិច្ចការនយោបាយ និងសេដ្ឋកិច្ចនៃបណ្តាប្រទេសធំៗមួយចំនួន រួមទាំងតំណាងក្រុមហ៊ុនបរទេសខ្លះ តែងតែត្អូញត្អែរអំពីអំពើពុករលួយ និងភាពសាំញ៉ាំនៃប្រព័ន្ធការិយាធិបតេយ្យរបស់កម្ពុជា ចាប់តាំងពីដំណាក់កាលចុះបញ្ជីក្រុមហ៊ុន រហូតដល់ដំណើរការនាំចេញទំនិញ។
ពាក់ព័ន្ធនឹងបញ្ហាអំពើពុករលួយនេះ កាលពីថ្ងៃទី១៩ មីនា ប្រធានអង្គភាពប្រឆាំងអំពើពុករលួយ (ACU) លោក ឱម យ៉ិនទៀង បានលើកឡើងក្នុងកម្មវិធីផ្សព្វផ្សាយស្ដីពីគណនេយ្យភាព និងតម្លាភាពនៃប្រព័ន្ធគាំពារសង្គម ACU បានកំណត់មុខព្រួញចំនួនបីសំខាន់ៗក្នុងការប្រយុទ្ធប្រឆាំងនឹងអំពើពុករលួយនៅកម្ពុជា។
លោក ឱម យ៉ិនទៀង បញ្ជាក់ថា មុខព្រួញទាំងបីនេះ រួមមាន ការងារអប់រំ ការបង្ការ និងទប់ស្កាត់កុំឱ្យមានកើតអំពើពុករលួយ និងការអនុវត្តច្បាប់បញ្ជូនទៅតុលាការផងដែរ ដែលស្របទៅនឹងគោលការណ៍របស់រាជរដ្ឋាភិបាលដែលប្ដេជ្ញាប្រយុទ្ធប្រឆាំងអំពើពុករលួយជាបន្តបន្ទាប់មកនោះ។
យ៉ាងណាក៏ដោយ អង្គការតម្លាភាពអន្តរជាតិ (Transparency International) ដែលមានទីតាំងនៅទីក្រុងប៊ែរឡាំង បានចេញរបាយការណ៍ស្តីអំពីអំពើពុករលួយនៅកម្ពុជា សម្រាប់ឆ្នាំ២០២៥ កាលពីថ្ងៃទី១០ ខែកុម្ភៈ ឆ្នាំ២០២៦ នេះថា កម្ពុជាជាប់ចំណាត់ថ្នាក់លេខរៀងទី១៦៣ ក្នុងចំណោមប្រទេសសរុប ១៨២ នៅលើពិភពលោក៕
© 2026, . All rights reserved.