កងទ័ពរំដោះចិន បានប្រគល់នាវាចម្បាំងមួយគ្រឿងមុនដែលបានមកដល់កំពង់ផែរាម កាលពីថ្ងៃសៅរ៍អាទិត្យមុន។ នាវាខ្នាត Corvette ប្រភេទ Jiangdao Type 056 តម្លៃមួយគ្រឿងប្រមាណ ១០៥លានដុល្លារដែលប្រទេសចិន ថាជាអំណោយដល់ប្រទេសកម្ពុជា ជាប្រភេទនាវាពីរគ្រឿងត្រូវប្រគល់មកឲ្យនៅឆ្នាំ២០២៥ ជាថ្នូររាជរដ្ឋាភិបាលបើកដៃឲ្យចិន ឈានបោះទីតាំងក្នុងស្រុកខ្មែរ។
តាមវិទ្យាស្ថានកងនាវាចរណ៍អាមេរិកាំង នាវាចម្បាំង Corvette Jiangdao Type 056 ជានាវាធុនស្រាលសម្រាប់ធ្វើប្រតិបត្តិការតាមឆ្នេរសមុទ្រទឹករាក់ ទម្ងន់ ១៥០០តោន ដើរដោយថាមពលប្រេងម៉ាស៊ូត ប៉ុន្តែមានផ្ទុកអាវុធជាកាំជ្រួចកម្ទេចនាវា កាំជ្រួច ៣២៤មិល្លីម៉ែត្រ កម្ទេចនាវាមុជទឹកពីរគ្រាប់ កាំជ្រួចផ្ទៃទឹក-អាកាស និងរ៉ាដាមើលឃើញមួយជុំ ៣៦០អង្សា មានបុគ្គលិកនាវិកពី ៦០-៧០នាក់ មានល្បឿនពីប្រមាណជិត ៥៦គីឡូម៉ែត្រក្នុងមួយម៉ោង។ ប្រទេសប្រើនាវាប្រភេទនេះ រួមមានបង់ក្លាដេស នីហ្សេរី និងអាល់ហ្សេរី។
ក្នុងសប្តាហ៍ជាមួយគ្នា កងទ័ពជើងទឹកនៃសហព័ន្ធរុស្ស៊ី ក៏បានបញ្ជូននាវាចម្បាំងចំនួន ៣គ្រឿងចូលសំចតនៅកំពង់ផែស្វយ័តក្រុងព្រះសីហនុ រហូតដល់ថ្ងៃទី៨ ខែមេសា ឆ្នាំ២០២៦ ដើម្បីរឹតចំណងសាមគ្គីភាព មិត្តភាព និងកិច្ចសហប្រតិបត្តិការរវាងរដ្ឋាភិបាលនៃប្រទេសទាំងពីរ ជាពិសេសការផ្លាស់ប្ដូរបទពិសោធន៍រវាងកងទ័ពជើងទឹកទាំងពីរ។
បើតាមមន្ត្រីកងទ័ពជើងទឹកមូលដ្ឋានសមុទ្ររាម បានឲ្យដឹងថា នាវាចម្បាំងរុស្ស៊ី ចំនួន ៣គ្រឿងដែលចូលចតនៅកំពង់ផែស្វយ័តក្រុងព្រះសីហនុ នាថ្ងៃទី៥ ខែមេសា នេះមានដូចជា នាវាចម្បាំង Gromkiy នាវាមុជទឹក Petropavlovsk-Kamchatsky និងនាវាសណ្ដោង Andrey Stepanov។
ប្រភពដដែលបានឲ្យដឹងថា ដំណើរទស្សនកិច្ចរបស់នាវាចម្បាំងរុស្ស៊ី នៅកម្ពុជា នាពេលនេះ គឺដើម្បីរឹតចំណងសាមគ្គីភាព មិត្តភាព និងកិច្ចសហប្រតិបត្តិការរវាងរដ្ឋាភិបាលនៃប្រទេសទាំងពីរ ជាពិសេសការផ្លាស់ប្ដូរបទពិសោធន៍រវាងកងទ័ពជើងទឹកទាំងពីរផងដែរ។
ការមកដល់នៃនាវាចម្បាំងរុស្ស៊ី ទាំងបីគ្រឿងនេះ ត្រូវបានស្វាគមន៍ពីសំណាក់ឯកអគ្គរដ្ឋទូតរុស្ស៊ី ប្រចាំនៅកម្ពុជា លោក Anatoly Borovik និងឧត្ដមនាវីត្រី អ៊ិន សុខេមរា មេបញ្ជាការរងមូលដ្ឋានសមុទ្ររាម ជាមួយកងទ័ពជើងទឹកខ្មែរចំនួន ៦០នាក់។ ក្នុងឱកាសនៃការសំចតនាវានេះ កងទ័ពជើងទឹកខ្មែរ និងរុស្ស៊ី ក៏នឹងមានការប្រកួតបាល់ទាត់មិត្តភាពផងដែរ។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា ប្រាប់អ្នកសារព័ត៌មានថា ការចូលសំចតនាវាចម្បាំងសហព័ន្ធរុស្ស៊ី នាពេលនេះ ជាឱកាសល្អដល់កងទ័ពជើងទឹកនៃប្រទេសកម្ពុជា ក្នុងការដកស្រង់បទពិសោធន៍ និងបច្ចេកទេសយោធាជាមួយកងទ័ពជើងទឹករុស្ស៊ី។
បណ្ឌិត គិន ភា បន្ថែមថា វត្តមានរបស់នាវាចម្បាំងរុស្ស៊ី នៅកំពង់ផែស្វយ័តក្រុងព្រះសីហនុ ក៏បានបង្ហាញឱ្យឃើញពីទំនាក់ទំនងមិនចុះថយរវាងកម្ពុជា និងរុស្ស៊ី ថ្វីបើកន្លងមក កម្ពុជាបានបោះឆ្នោតគាំទ្រសេចក្តីសម្រេចក្នុងអង្គការសហប្រជាជាតិ ដោយថ្កោលទោសការឈ្លានពានរបស់រុស្ស៊ី ទៅលើប្រទេសអ៊ុយក្រែន នោះក្តី។
កាលពីថ្ងៃទី២៨ ខែមេសា ឆ្នាំ២០២៥ នាវាចម្បាំងរុស្ស៊ី ចំនួន ៣គ្រឿង មាននាវាចម្បាំង Rezkiy 343 នាវាចម្បាំង Aldar Tsydenzhapov និងនាវាដឹកប្រេង Pechenga ក៏ធ្លាប់ចូលចតនៅកំពង់ផែស្វយ័តក្រុងព្រះសីហនុ ដែរ។ ការចូលសំចតនាវារុស្ស៊ី ទាំង ៣គ្រឿងកាលនោះ ធ្វើឡើងបន្ទាប់ពីប្រទេសកម្ពុជា ទើបនឹងសម្ពោធមូលដ្ឋានកងទ័ពជើងទឹករាម៕
© 2026, . All rights reserved.