អាជ្ញាធរខេត្តបន្ទាយមានជ័យ ប្រកាសត្រៀមដី ៤០០ហិកតាដើម្បីសាងសង់ផ្ទះឱ្យពលរដ្ឋភៀសសឹកដែលត្រូវយោធាថៃ ហ៊ុមព័ទ្ធយកដីធ្លី ក្រោយយោធាថៃ បើកប្រតិបត្តិការឈ្លានពានទឹកដីខ្មែរបន្ទាប់ពីមានបទឈប់បាញ់។
បើតាមសេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យ នៅថ្ងៃទី៨ ខែមេសា ឆ្នាំ២០២៦ បញ្ជាក់ថា អាជ្ញាធរបានរៀបចំដីធ្លីដើម្បីសង់ផ្ទះសម្រាប់ពលរដ្ឋដែលមានលំនៅឋានអចិន្ត្រៃយ៍ក្នុងតំបន់ដែលយោធាថៃ ហ៊ុមព័ទ្ធអាចមករស់នៅជាបណ្ដោះអាសន្នលើផ្ទៃដីទំហំ ៤០០ហិកតា ស្ថិតនៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ។
បើតាមប្រភពដដែល ទីតាំងដែលយោធាថៃ ហ៊ុមព័ទ្ធបន្លាលួស ដាក់ទូកុងតឺន័រយកដីធ្លី ផ្ទះសម្បែងមានដូចជា នៅក្នុងភូមិជោគជ័យ ភូមិព្រៃចាន់ ស្ថិតនៅឃុំអូរបីជាន់ ស្រុកអូរជ្រៅ និងភូមិសាមគ្គី ភូមិត្រពាំងសំរោង ភូមិផ្លូវបំបែក និងភូមិបន្ទាយមានឫទ្ធិ ស្ថិតនៅឃុំគោករមៀត ស្រុកថ្មពួក ខេត្តបន្ទាយមានជ័យ។
រដ្ឋបាលខេត្តបន្ទាយមានជ័យ គូសបញ្ជាក់ថា បច្ចុប្បន្ន ក្រុមការងារខេត្តបានចាប់ផ្ដើមដំណើរការសាងសង់ផ្ទះបានមួយចំនួន និងផ្តល់ជូនសម្រាប់ជនភៀសសឹកដែលមានលំនៅឋានអចិន្ត្រៃយ៍ក្នុងតំបន់ហ៊ុមព័ទ្ធចូលទៅរស់នៅជាបណ្ដោះអាសន្ន ទៅតាមជំហានៗតាមរយៈនៃការចាប់ឆ្នោតយកលេខក្បាលដីឡូត៍។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត គាំទ្រចំពោះវិធានការរបស់អាជ្ញាធរខេត្តដែលគិតគូរផ្តល់ដីឱ្យជនភៀសសឹក ក្រោយពីការឈ្លានពានរបស់ថៃ តែលោកចង់ឃើញតំបន់នោះមានហេដ្ឋារចនាសម្ព័ន្ធត្រឹមត្រូវ និងត្រូវបែងចែកដីធ្លីឱ្យមានតម្លាភាព គ្មានអំពើពុករលួយ បក្សពួកនិយម ដើម្បីធានាថាពលរដ្ឋភៀសសឹកអាចទទួលបានផ្ទះគ្រប់ៗគ្នា។
បន្ថែមលើនេះ អ្នកឃ្លាំមើលកិច្ចការព្រំដែនរូបនេះនៅតែជំរុញឱ្យរដ្ឋាភិបាលកម្ពុជា ត្រូវប្រញាប់ប្តឹងថៃ ទៅតុលាការយុត្តិធម៌អន្តរជាតិ (ICJ) ដើម្បីទាមទារទឹកដីខ្មែរដែលយោធាថៃ ឈ្លានពានយកមកវិញ។ បើមិនពន្លឿនប្តឹងថៃ ទៅតុលាការយុត្តិធម៌អន្តរជាតិ (ICJ) យោធាថៃ មិនព្រមប្រគល់ទឹកដីឱ្យកម្ពុជាវិញទេ។
ក្រសួងការបរទេសកម្ពុជា ធ្លាប់បានបញ្ជាក់ថា ទីតាំងដែលយោធាថៃ វាយសម្រុកចូលទន្ទ្រានកាន់កាប់ និងឈរជើងគ្រប់គ្រងដីកម្ពុជា ក្នុងអំឡុងពេលប្រតិបត្តិការយោធាទ្រង់ទ្រាយធំចាប់ពីថ្ងៃទី៧ ដល់ថ្ងៃទី២៧ ខែធ្នូ ឆ្នាំ២០២៥ មានចំនួន ១៤ទីតាំង ស្ថិតក្នុងខេត្តចំនួន៤ រួមមាន ខេត្តបន្ទាយមានជ័យ ខេត្តពោធិ៍សាត់ ខេត្តព្រះវិហារ និងខេត្តឧត្ដរមានជ័យ៕
© 2026, . All rights reserved.