ស្ថាប័នសារព័ត៌មាន និងអង្គការសង្គមស៊ីវិល ជំរុញឱ្យរដ្ឋាភិបាលពង្រឹងវិធានការការពារសេរីភាពសារព័ត៌មាននៅកម្ពុជា។
អង្គការសង្គមស៊ីវិលទាំងនេះ ព្រមានថា កម្ពុជានឹងត្រូវបានគ្របដណ្ដប់ដោយព័ត៌មានមិនពិត និងក្លែងបន្លំ ដោយសារកង្វះការការពារសុវត្ថិភាពអ្នកសារព័ត៌មាន និងការរាយការណ៍ដោយឯករាជ្យ។
ស្ថាប័នសារព័ត៌មាន និងអង្គការសង្គមស៊ីវិលជាង ១០ រួមមាន មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) មជ្ឈមណ្ឌលសិទ្ធិមនុស្សកម្ពុជា (CCHR) និងសមាគមសម្ព័ន្ធអ្នកសារព័ត៌មានកម្ពុជា (ខេមបូចា) ជាដើម បានចេញសេចក្តីថ្លែងការណ៍រួមនៅថ្ងៃទី៣០ មេសា នេះ ដោយបញ្ជាក់ជាថ្មីនូវការប្ដេជ្ញាចិត្តចំពោះគោលការណ៍គ្រឹះនៃសេរីភាពបញ្ចេញមតិ និងតួនាទីមិនអាចខ្វះបាននៃប្រព័ន្ធផ្សព្វផ្សាយសេរី ឯករាជ្យ និងចម្រុះ ទាំងនៅក្នុងប្រទេសកម្ពុជា ក្នុងតំបន់ និងនៅទូទាំងពិភពលោក។
ប្រភពដដែលលើកឡើងថា បរិយាកាសដែលអំណោយផលពិតប្រាកដមួយ មិនអាចកើតមានឡើងបានឡើយ បើគ្មានការធានានូវសុវត្ថិភាព និងកិច្ចការពារផ្លូវច្បាប់សម្រាប់អ្នកដែលបំពេញការងារដ៏សំខាន់នេះ ខណៈអ្នកសារព័ត៌មានដែលបានរាយការណ៍អំពីជម្លោះព្រំដែនតែងតែប្រឈមការរឹតត្បិតសិទ្ធិ និងការយាយីតាមផ្លូវច្បាប់ ដោយសារតែការបំពេញវិជ្ជាជីវៈរបស់ពួកគេ។
ស្ថាប័នសារព័ត៌មាន និងអង្គការសង្គមស៊ីវិលទាំងនេះ ជំរុញឱ្យរាជរដ្ឋាភិបាលកម្ពុជា លុបចោលលក្ខខណ្ឌគុណវឌ្ឍ និងវិជ្ជាជីវៈសារព័ត៌មាន និងលក្ខខណ្ឌក្នុងការផ្ដល់បណ្ណសារព័ត៌មាន រួមទាំងបញ្ឈប់ការប្រើប្រាស់បទចោទប្រកាន់ព្រហ្មទណ្ឌទៅលើអ្នកសារព័ត៌មានផងដែរ។
ជាងនេះទៀត រដ្ឋាភិបាលត្រូវតែទម្លាក់បទចោទប្រកាន់ប្រឆាំងនឹងអ្នកសារព័ត៌មានទាំងអស់ និងពិនិត្យឡើងវិញនូវទោសព្រហ្មទណ្ឌទៅលើពួកគេ ដើម្បីធានាថាអ្នកសារព័ត៌មានអាចបំពេញការងារបានដោយគ្មានការភ័យខ្លាច ឬការគាបសង្កត់។
ស្ថាប័នសារព័ត៌មាន និងអង្គការសង្គមស៊ីវិលដដែលនេះ បញ្ជាក់ថា ស្ថានភាពសេរីភាពសារព័ត៌មាននៅកម្ពុជាសព្វថ្ងៃនេះ ក៏ត្រូវបានឆ្លុះបញ្ចាំងនៅក្នុងសន្ទស្សន៍សេរីភាពសារព័ត៌មានពិភពលោកឆ្នាំ២០២៦ របស់អង្គការអ្នកសារព័ត៌មានគ្មានព្រំដែន (RSF) ផងដែរ ដោយដាក់ចំណាត់ថ្នាក់ក្នុងកម្រិត «ធ្ងន់ធ្ងរ» ដដែល។
ការអះអាងនេះ ធ្វើឡើងស្របពេលដែលអង្គការសង្គមស៊ីវិល និងស្ថាប័នសារព័ត៌មានជាច្រើន នាំគ្នាប្រារព្ធពិធីរំលឹកខួបទិវាសេរីភាពសារព័ត៌មានពិភពលោក ៣ ឧសភា សម្រាប់ឆ្នាំ២០២៦ នៅថ្ងៃព្រហស្បតិ៍នេះ។
នៅថ្ងៃទី៣០ មេសា នេះ ស្ថាប័នសារព័ត៌មាន និងអង្គការសង្គមស៊ីវិល បានប្រារព្ធសន្និសីទជាតិស្ដីពីសេរីភាពសារព័ត៌មានដើម្បីរំលឹកខួបទិវាសេរីភាពសារព័ត៌មានពិភពលោក ៣ ឧសភា សម្រាប់អ្នកសារព័ត៌មាន សង្គមស៊ីវិល និងភាគីពាក់ព័ន្ធ ដើម្បីពិភាក្សា និងស្វែងរកដំណោះស្រាយរួម ក្នុងការលើកកម្ពស់សេរីភាពសារព័ត៌មាននៅកម្ពុជា។
អ្នកនាំពាក្យក្រសួងព័ត៌មាន លោក ទេព អស្នារិទ្ធ បានលើកឡើងនៅសន្និសីទជាតិស្ដីពីសេរីភាពសារព័ត៌មាននៅថ្ងៃទី៣០ មេសា នេះ ដោយស្នើឱ្យតួអង្គពាក់ព័ន្ធទាំងអស់ក្នុងវិស័យប្រព័ន្ធផ្សព្វផ្សាយ ចូលរួមលើកកម្ពស់សេរីភាពដែលមានទំនួលខុសត្រូវ និងការគោរពច្បាប់ ពោលគឺត្រូវលើកតម្កើងរបៀបធ្វើការក្នុងប្រព័ន្ធនីតិរដ្ឋសម្រាប់ជាមូលដ្ឋានគ្រឹះនៃសេរីភាព។
អ្នកនាំពាក្យរូបនេះ បញ្ជាក់ថា ការគ្រប់គ្រងព័ត៌មានសម័យថ្មីមិនមែនជាការគ្រប់គ្រងមធ្យោបាយផ្សព្វផ្សាយប៉ុណ្ណោះទេ ប៉ុន្តែជាការធានាទំនុកចិត្តសង្គមមកលើការអនុវត្តវិជ្ជាជីវៈ និងគុណភាព។
យ៉ាងណាក៏ដោយ លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា (ខេមបូចា) បានលើកឡើងនៅថ្ងៃទី៣០ មេសា នេះដែរថា សព្វថ្ងៃនេះ នៅតែមានរបាយការណ៍អំពីអំពើហិង្សា ការប្ដឹងផ្ដល់ ការគំរាមកំហែង ការចាប់ខ្លួនអ្នកសារព័ត៌មានដាក់ពន្ធនាគារជាបន្តបន្ទាប់។
លោក ណុប វី ស្នើឱ្យរដ្ឋាភិបាលយកចិត្តទុកដាក់បន្ថែមទៀត ដើម្បីធានាថារូបភាពគំរាមកំហែងនានានឹងមិនបន្តកើតមានលើអ្នកសារព័ត៌មានក្នុងការបំពេញការងាររបស់ពួកគេ។
ជុំវិញបញ្ហានេះ របាយការណ៍សង្គមស៊ីវិល បានបង្ហាញនៅថ្ងៃទី៣០ មេសា នេះថា ចាប់ពីខែមករា ដល់ខែមេសា ឆ្នាំ២០២៦ មានករណីរំលោភបំពានសិទ្ធិអ្នកសារព័ត៌មានចំនួន ១៤ករណី ក្នុងនោះអ្នកសារព័ត៌មាន ២នាក់ ត្រូវបានឃុំខ្លួនបណ្ដោះអាសន្ន ៦នាក់ត្រូវបានឃាត់ខ្លួន ចំណែក ៥នាក់ត្រូវបានកោះហៅ និង ១ករណីទៀត គឺជាការគំរាមកំហែង។
ចំណែកឆ្នាំ២០២៥ កន្លងទៅ មានការរំលោភបំពានសិទ្ធិលើអ្នកសារព័ត៌មានចំនួន ៦១ករណី ដែលប៉ះពាល់ដល់អ្នកសារព័ត៌មាន ៥៧នាក់ ក្នុងចំណោមនោះមាន ៤៥ករណី ជាការគំរាមកំហែងតាមផ្លូវច្បាប់ ចំណែកអ្នកសារព័ត៌មាន ២នាក់ត្រូវបានកាត់ទោសឱ្យជាប់ពន្ធនាគារ ១៤ឆ្នាំ ក្រោមបទចោទប្រកាន់ពីបទប្រគល់ឱ្យរដ្ឋបរទេសនូវព័ត៌មានជាអាទិ៍ដែលអាចធ្វើឱ្យអន្តរាយដល់ការការពារជាតិ។
សន្ទស្សន៍សេរីភាពសារព័ត៌មានពិភពលោកឆ្នាំ២០២៦ របស់អង្គការអ្នកសារព័ត៌មានគ្មានព្រំដែន (RSF) បានចេញផ្សាយនៅថ្ងៃទី៣០ មេសា នេះថា សេរីភាពសារព័ត៌មាននៅកម្ពុជាស្ថិតនៅលេខរៀងទី១៥១ ក្នុងចំណោម ១៨០ប្រទេស៕
© 2026, . All rights reserved.