ធនាគារអភិវឌ្ឍន៍អាស៊ី (Asian Development Bank) និងរដ្ឋាភិបាលកម្ពុជា កាលពីម្សិលមិញ បានចុះហត្ថលេខាលើកិច្ចព្រមព្រៀងឥណទាននិងជំនួយឥតសំណង គិតជាទឹកប្រាក់សរុបស្មើនឹង២៣០លានដុល្លារ សម្រាប់ប្រាំមួយគម្រោង ដែលមានគោលបំណងកាត់បន្ថយភាពក្រីក្រ នៅប្រទេសកម្ពុជា។
កិច្ចព្រមព្រៀងនេះត្រូវចុះហត្ថលេខាដោយលោក អេរីក សីជវីក (Eric Sidg wick) នាយកប្រចាំប្រទេសនៃធនាគារអភិវឌ្ឍន៍អាស៊ី និងលោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅក្នុងពិធីមួយនៅទីស្តីការក្រសួងសេដ្ឋកិច្ច និងហិរញ្ញវត្ថុ។
យោងតាមធនាគារអភិវឌ្ឍន៍អាស៊ី បានឲ្យដឹងថា ឥណទានចំនួន២១៨,៥លានដុល្លារនិងជំនួយឥតសំណងចំនួន១១,៧លានដុល្លារ នឹងត្រូវបានប្រើប្រាស់ ក្នុងគោលដៅលើកកម្ពស់សកម្មភាពធ្វើពិពិធកម្មសេដ្ឋកិច្ច ពង្រឹងសមត្ថភាពប្រកួតប្រជែងផ្នែកសេដ្ឋកិច្ចក្នុងតំបន់ កែលម្អហេដ្ឋារចនាសម្ព័ន្ធ និងសេវាកម្មនៅតំបន់ជនបទ លើកកម្ពស់វិស័យអប់រំ កែលម្អប្រព័ន្ធគ្រប់គ្រងគ្រោះទឹកជំនន់ និងគ្រោះរាំងស្ងួត និងដោះស្រាយបញ្ហាកង្វះថាមពលអគ្គិសនី។
លោក សីជវីក មានប្រសាសន៍ បន្ទាប់ពីពិធីនេះថា“ ធនាគារអភិវឌ្ឍន៍អាស៊ីមិនល្អគ្រប់យ៉ាងទេ ដូច្នេះ យើងមិនអាចជួយអ្វីគ្រប់យ៉ាងដែរ ក៏ប៉ុន្តែ វិស័យដែលយើងចូលរួមចំណែក គឺជាវិស័យដែលយើង… បានផ្តោតស្មារតីយកចិត្តទុកដាក់ ដូចជាវិស័យអប់រំ ហេដ្ឋារចនាសម្ព័ន្ធ វិស័យហិរញ្ញវត្ថុ អភិវឌ្ឍន៍កិច្ចសហប្រតិបត្តិការកម្រិតអនុតំបន់ ជាដើម។
លោក គាត ឈន់ បានមានប្រសាសន៍ថា “ប្រាក់កម្ចីទាំងនេះមានសារៈសំខាន់ណាស់ សម្រាប់គាំទ្រសេដ្ឋកិច្ចដែលកំពុងតែមានកំណើន។ ខ្ញុំសូមផ្តល់ទំនុកចិត្តចំពោះប្រជាជនកម្ពុជាថា ប្រាក់កម្ចីទាំងនេះនឹងត្រូវបានប្រើប្រាស់យ៉ាងមានប្រសិទ្ធភាព តម្លាភាព និងការទទួលខុសត្រូវ ដើម្បីទទួលបានការទុកចិត្តពីប្រជាជនកម្ពុជា និងដៃគូអភិវឌ្ឍន៍នានា”។
លោកបានបន្ថែមទៀតថា តាំងពីឆ្នាំ១៩៩២មក ធនាគារអភិវឌ្ឍន៍អាស៊ីបានផ្តល់ឥណទានសរុបចំនួន១,៥ពាន់លានដុល្លារ និងជំនួយឥតសំណងចំនួន៣៥១លានដុល្លារ៕
ប្រែសម្រួលដោយ កង សុធា