មន្ត្រីក្រសួងម្នាក់បាននិយាយកាលពីថ្ងៃអាទិត្យថា នៅខែកក្កដាខាងមុខ ក្រសួងព័ត៌មាននឹងចាប់ផ្តើមពិនិត្យឡើងវិញចំពោះ អាជ្ញាប័ណ្ណរបស់ប្រព័ន្ធព័ត៌មានទាំងឡាយណាដែលមិនធ្វើតាមបទបញ្ជានាពេលថ្មីៗ ឲ្យពួកគេនិយាយសំដៅចំពោះលោកនាយករដ្ឋមន្ត្រី ហ៊ុន សែន ដោយប្រើគោរមងារ “សម្តេច” របស់លោក ដែលប្រទានដោយព្រះមហាក្សត្រ។
ក្រសួងបានហៅអ្នកកាសែតមកប្រជុំកាលពីសប្តាហ៍មុន ដើម្បីរំឭកពួកគេអំពីសំណើមួយ ដែលខ្លួនបានធ្វើកាលពីខែធ្នូ ឲ្យពួកគេចាប់ផ្តើមប្រើពាក្យហៅលោក ហ៊ុន សែន ជា “សម្តេច” វិញ ជាគោរមងារប្រោសព្រះរាជប្រទានដល់រូបលោកដោយព្រះមហាក្សត្រ ដែលបកប្រែសឹងតែមានន័យថា “ឧត្តមបំផុត”។
កាលពីថ្ងៃព្រហស្បតិ៍ លោក ផុស សុវណ្ណ អគ្គនាយកព័ត៌មាននិងសោតទស្សន៍នៃក្រសួងព័ត៌មាន បាននិយាយថា រដ្ឋាភិបាលនឹងមិនបន្តអាជ្ញាប័ណ្ណរបស់អង្គភាពព័ត៌មានក្នុងស្រុកដែលមិនធ្វើតាមការណែនាំទេ នៅពេលដែលអាជ្ញាប័ណ្ណរបស់ពួកគេផុតកំណត់នោះ។
កាលពីម្សិលមិញ លោក អ៊ុក គឹមសេង អនុរដ្ឋលេខាធិការនៃក្រសួងព័ត៌មាន ដែលបានរៀបចំការប្រជុំនៅសប្តាហ៍មុនជាមួយអ្នកកាសែត បាននិយាយថា “វិធានការ” អាចចាប់ផ្តើមធ្វើឆាប់ៗនេះ។
លោក គឹមសេង បាននិយាយថា ក្រសួងព័ត៌មាននឹងទុកពេលឲ្យប្រព័ន្ធព័ត៌មានរហូតដល់ចុងខែមិថុនា ដើម្បីចាប់ផ្តើមភ្ជាប់គោរមងារទៅនឹងឈ្មោះរបស់លោក ហ៊ុន សែន។
លោកបាននិយាយថា “ក្រសួងនឹងគិតអំពីរឿងនេះពីឥឡូវនេះទៅដល់ចុងខែមិថុនា បន្ទាប់មក ក្រសួងនឹងចាត់វិធានការដូចខ្ញុំបាននិយាយក្នុងកិច្ចប្រជុំនេះអ៊ីចឹង”។ នៅពេលសួរថាតើ “វិធានការ” មានន័យថា ពិនិត្យឡើងវិញចំពោះអាជ្ញាប័ណ្ណរបស់ប្រព័ន្ធព័ត៌មានដែលមិនធ្វើតាមឬយ៉ាងណានោះ លោក គឹមសេង បាននិយាយថា “មែនហើយ”។
អនុរដ្ឋលេខាធិការរូបនេះបានផ្តល់ជម្រើសខ្លះដល់អ្នកកាសែតដែរ។
លោកបាននិយាយថា គេអាចទុកគោរមងារពេញរបស់លោក ហ៊ុន សែន គឺ សម្តេចអគ្គមហាសេនាបតីតេជោ ឬ “សម្តេចនាយករដ្ឋមន្ត្រី” ដែលងាយស្រួលជាង។
លោកបាននិយាយថា “តាមគំនិតរបស់ខ្ញុំ វាមិនខុសទេ…។ ខ្ញុំគិតថា យើងជាញឹកញាប់ប្រើ ‘សម្តេច នាយករដ្ឋមន្ត្រី’។ អ្នកអាចសរសេរអ្វីដែលអ្នកគិតថាសមហេតុផល ហើយធ្វើតាមការណែនាំរបស់យើង”។
លោក គឹមសេង បាននិយាយថា រដ្ឋាភិបាលមានសិទ្ធិឲ្យប្រើគោរមងារដែលចេញដោយព្រះរាជក្រឹត្យ។
លោកបាននិយាយថា “ពីព្រោះគោរមងារនេះត្រូវបានចេញដោយព្រះរាជក្រឹត្យពីព្រះមហាក្សត្រ”។
នៅពេលទទូចសួរថាតើច្បាប់អ្វីដែលផ្តល់ឲ្យរដ្ឋាភិបាលនូវអំណាចដើម្បីពិនិត្យឡើងវិញ ឬដកហូតអាជ្ញាប័ណ្ណរបស់ប្រព័ន្ធព័ត៌មាន ចំពោះការមិនប្រើគោរមងារនេះ លោក គឹមសេង បាននិយាយអំពី “ការព្រមព្រៀង” ដោយស្រពិចស្រពិល។
លោកបាននិយាយថា “យើងផ្អែកលើការព្រមព្រៀងរវាងយើងនិងស្ថានីយទូរទស្សន៍ ឬអង្គភាពព័ត៌មានណាមួយ ដូច្នេះ ពួកគេនឹងគោរពតាមការណែនាំរបស់ក្រសួង ឬ អាជ្ញាធរ”។
លោកបាននិយាយបន្ថែមថា “ប្រសិនបើការណែនាំរបស់យើងរំលោភច្បាប់ អ្នកអាចនិយាយថា វាខុស។ ប៉ុន្តែការណែនាំរបស់យើងគឺផ្អែកលើច្បាប់នៃព្រះរាជាណាចក្រកម្ពុជា។ អ្នកគួរតែដឹង”។
លោក មឿន ឈានណារិទ្ធិ ប្រធានវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន បាននិយាយថា មិនមានមូលដ្ឋានច្បាប់សម្រាប់ការដកហូត ឬ មិនបន្តអាជ្ញាប័ណ្ណទាក់ទិននឹងការប្រើងារបែបនេះទេ។
លោកបាននិយាយថា “រដ្ឋាភិបាលមិនមានសិទ្ធិណាមួយដើម្បីដកហូតអាជ្ញាប័ណ្ណទេ លុះត្រាតែកាសែតនោះបានប្រព្រឹត្តបទល្មើសព្រហ្មទណ្ឌកម្រិតធ្ងន់”។
លោកបាននិយាយបន្ថែមថា “ច្បាប់សារព័ត៌មានមិននិយាយអ្វីមួយពាក់ព័ន្ធនឹងការហៅមន្ត្រីសាធារណៈណាម្នាក់តាមងារនោះទេ។ ក្រោមច្បាប់នេះ យើងពិតជាមិនចាំបាច់ហៅគាត់សម្តេចទេ”។
រដ្ឋាភិបាលនិយាយថា គោរមងារជាការគោរពទំនៀមទម្លាប់ខ្មែរ។ ច្បាប់សារព័ត៌មានឆ្នាំ១៩៩៥មានខជាច្រើនស្តីពីការគោរពទំនៀមទម្លាប់ខ្មែរ ប៉ុន្តែ លោក ឈានណារិទ្ធ បាននិយាយថា ការបញ្ចូលគោរមងារក្នុងច្បាប់ទាំងនោះគឺជ្រុលពេកហើយ។ មាត្រាជាក់លាក់ផ្តោតលើពាក្យជេរប្រទេច និងរឿងអាសអាភាសផ្លូវភេទ ហើយដាក់ទោសអ្នកបំពានទាំងនោះដោយការពិន័យ មិនមែនដោយបិទកាសែតទេ។
លោកបាននិយាយថា “ជាសង្គមប្រជាធិបតេយ្យមានសេរីភាពសារព័ត៌មាន សារព័ត៌មានគួរទទួលបានការអនុញ្ញាតឲ្យជ្រើសរើស [គោរមងារណាមួយ] ប្រសិនបើវាមិនប៉ះពាល់ខ្លាំងដល់សេចក្តីថ្លៃថ្នូររបស់មន្ត្រីនោះ។ ខ្ញុំមិនគិតថា ការមិនហៅមន្ត្រីថាសម្តេចគឺធ្វើឲ្យមានការប៉ះពាល់ខ្លាំងដល់សេចក្តីថ្លៃថ្នូរនោះទេ”។
វិធានការថ្មីរបស់ក្រសួងព័ត៌មានកើតមានឡើងចំពេលមានគោលជំហររករឿងប្រទូសកាន់តែខ្លាំងរបស់រដ្ឋាភិបាលទៅលើប្រព័ន្ធព័ត៌មានឯករាជ្យរបស់ប្រទេសនេះ។
ក្នុងពេលពីរបីសប្តាហ៍កន្លងមកនេះ អ្នកនាំពាក្យគណបក្សប្រជាជនកម្ពុជាម្នាក់បានប្តឹងអ្នកវិភាគនយោបាយម្នាក់ពីបទបរិហារកេរ្តិ៍ទាក់ទងនឹងការអត្ថាធិប្បាយរបស់លោកតាមវិទ្យុអាស៊ីសេរី អំពីការស៊ើបអង្កេតរបស់រដ្ឋាភិបាលលើរឿងអាស្រូវផ្លូវភេទរបស់មេដឹកនាំបក្សប្រឆាំងមួយរូប ហើយលោក ហ៊ុន សែន បានគំរាមចាត់វិធានការផ្លូវច្បាប់លើកាសែត ខេមបូឌា ដេលី ទាក់ទិននឹងចំណងជើងអត្ថបទមួយអំពីសុន្ទរកថារបស់លោក ដែលលោកបានមានប្រសាសន៍ថា បានបំភ្លៃសម្តីរបស់លោក៕ និត