Hay Pisey

តំណាង​​​កម្មករ​​​ និង​​​មន្ត្រី​​​ក្រសួង​​​ការងារ​​​បាន​​​ឲ្យដឹង​​​ថា កម្មការិនី​​​ជាង​​​៦០​​​នាក់​​​បាន​​​ដួល​​​សន្លប់​​​ពេល​​​កំពុង​​​ធ្វើ​​​ការ​​​នៅ​​​រោង​​​ចក្រ​​​ស្បែក​​​ជើង​​​មួយ​​​ក្នុង​​​ស្រុក​​​អង្គស្នួល​​​ ខេត្ត​​​កណ្តាល​​​កាល​​​ពី​​​ព្រឹក​​​ម្សិលមិញ។ លោក លៀង ដា តំណាង​​​កម្មករ​​​បាន​​​មាន​​​ប្រសាសន៍​​​ថា កម្មការិនី​​​៦២​​​នាក់​​​បាន​​​ដួល​​​សន្លប់​​​បន្ទាប់​​​ពី​​​ឃើញ​​​​​​កម្មការិនី​​​មាន​​​ផ្ទៃ​​​ពោះ​​​ម្នាក់​​​ដួល​​​សន្លប់​​​នៅរោង​​​ចក្រ Grand East Footwear International ដែល​​​កាន់​​​កាប់​​​ដោយ​ជន​ជាត​ិ​​​ចិន​​​តៃវ៉ាន់​​​។ លោក ដា បាន​​​មាន​​​ប្រសាសន៍​​​ថា "ដំបូង​​​ស្ត្រី​​​មាន​​​ផ្ទៃ​​​ពោះ​​​រូប​​​នេះ​​​បាន​​​ដួល​​​សន្លប់ ហើយ​​​បន្ទាប់​​​មក​​​កម្មការិនី​​​ផ្សេង​​​ទៀត​​​បាន​​​ដួល​​​សន្លប់​​​ដែរ​​​។ ការ​​​ដួល​​​សន្លប់​​​នេះ​​​បណ្តាល​​​មក​​​ពី​​​សីតុណ្ហ​ភាពនៅ​​​រោង​​​ចក្រ​​​​ក្តៅ​​​ខ្លាំង​​​ដែល​​​មិន​​​មាន​​​កង្ហារ​​​ និង​​​កង្ហារ​​​បឺត​​​ក្លិន​​​គ្រប់​​​គ្រាន់​​​ បណ្តាល​​​ឲ្យ​​​ធុំ​​​ក្លិន​​​សារធាតុ​​​គីមី​​​យ៉ាង​ខ្លាំ​​​ង​​​នៅ​​​ក្នុង​​​រោង​​​ចក្រ​​​"។ លោក ប៉ុក វណ្ណថាត ប្រធាន​​​គណៈកម្មការ​​​ស្រាវ​​​ជ្រាវ​​​ និង​​​ទប់​​​ស្កាត់​​​ការ​​​ដួល​​​សន្លប់​​​នៅ​​​ក្រសួង​​​ការ​​​ងារ​​​បាន​​​មាន​​​ប្រសាសន៍​​​ថា ​​​សីតុណ្ហភាព​​​នៅ​​​ក្នុង​​​រោង​​​ចក្រ​​​បាន​​​ឡើង​​​ដល់​​​៣៣​​​.២អង្សាសេ កាល​​​ពី​​​ម្សិល​​​មិញ ហើយ​​​ថា រដ្ឋាភិបាល​​​បាន​​​ស្នើ​​​ឲ្យ​​​រោង​​​ចក្រ​​​នេះ​​​បិទ​​​រហូត​​​ដល់​​​ថ្ងៃ​​​ពុធ​​​ ខណៈ​​​ដែល​​​កំពុង​​​ជួស​​​ជុល​​​​​ប្រព័ន្ធ​​​ខ្យល​​​់​​​ចេញ​​​ចូល​​​ឲ្យ​​​បាន​​​ស្រួល​​​។ កាល​​​ពី​​​ថ្ងៃ​​​សៅរ៍ កម្មករ​​​ប្រហែល​​​៥០​​​នាក់​​​បាន​​​ដួល​​​សន្លប់​​​នៅ​​​រោង​​​ចក្រ​​​ស្បែក​​​ជើង​​​មួយ​​​ទៀត​​​ក្នុង​ខេត​្ត​កំពង់​ឆ្នាំង រីឯកាលពីសប្តាហ៍មុន រោង​ចក្រ​មួយ​ក្នុង​​​ខេត្ត​​​ស្វាយ​​​រៀង​​​ បាន​​​បិទ​​​​​​បណ្តោះ​​​អាសន្ន​​​ បន្ទាប់​​​ពី​​​កម្មករ​​​ជាង​​​១០០​​​នាក់​​​បាន​​​ដួល​​​សន្លប់​​​ក្នុង​​​​​​ចំនួន​​​ដ៏​​​ច្រើន​​​ពីរ​​​លើក​​​ផ្សេង​​​គ្នា​​​៕សារុន​​​  

នគរ​បាល​ជាតិ​​បានលើក​ឡើង​នៅ​ក្នុង​សេចក្ដី​ថ្លែង​ការណ៍មួយ​កាលពី​ម្សិលមិញ​​​ថា អតីត​ប្រធាន​សាលា​ដំបូង​រាជធានី​ដែល​ត្រូវ​បាន​ដក​តំណែង​​កាលពី​សប្ដាហ៍​មុន ជុំវិញ​ការ​ចោទ​ប្រកាន់​ពីបទ​ប្រព្រឹត្តអំពើ​ពុក​រលួយ​ដ៏ធំ​បាន​ឲ្យ​រថយន្ត​ស៊េរី​ទំនើប​មួយគ្រឿង​ទៅ​កូន​ប្រុស​របស់​ខ្លួន ដែល​ជា​មន្ត្រី​នគរ​បាល​មូលដ្ឋាន​ម្នាក់​ បន្ទាប់ពី​រថយន្ត​មួយ​គ្រឿង​នេះ​ត្រូវ​បាន​រឹប​អូស​ពី​ជន​សង្ស័យ​​ជួញដូរ​គ្រឿង​ញៀន​ម្នាក់។ យោង​តាម​សេចក្ដី​ថ្លែងការណ៍​នេះ​ ដែល​​បង្ហោះ​នៅ​លើ​គេហទំព័រ​របស់​នគរ​បាល​ជាតិ​បាន​លើក​ឡើង​ថា នគរ​បាល​​ប្រឆាំង​​ការ​ជួញដូរ​​គ្រឿង​ញៀន​រាជធានី​ភ្នំពេញ​ បាន​ចាប់​ខ្លួន​លោក ថាវ ថាវី ពីបទ​សង្ស័យ​ថា ជាប់ពាក់ព័ន្ធ​​នៅ​ក្នុង​ការ​ជួញដូរ​គ្រឿង​ញៀន​​បន្ទាប់ពី​ទទួល​បាន​​បទ​បញ្ជា​ពី​ចៅក្រម​សាលា​ដំបូង​រាជធានី​ភ្នំពេញ​ម្នាក់​កាលពី​ខែ​វិច្ឆិកាឆ្នាំមុន។ សេចក្ដី​ថ្លែងការណ៍​នេះ​បានលើក​ឡើង​បន្ត​ថា ក្រោយ​មក​ លោក ថាវី ​ត្រូវ​បាន​ដោះ​លែង​ឲ្យ​នៅ​ក្រៅ​ឃុំ ប៉ុន្តែ​​ត្រូវ​បាន​ចាប់​ខ្លួន​ម្ដង​ទៀត​កាលពី​ថ្ងៃ​សុក្រ ពីបទ​មិន​គោរព​​តាម​​សេចក្ដី​បង្គាប់​របស់​តុលាការ។ ហើយ​បន្ទាប់ពី​ការ​ចាប់​ខ្លួន​លើក​ដំបូង​នោះ​រួច លោក អាំង មាលតី ​ប្រធាន​សាលា​ដំបូង​រាជធានី​ភ្នំពេញ​ដែល​ត្រូវ​បាន​​ដក​តំណែង​ បាន​ឲ្យ​រថយន្ត​ស៊េរី​ទំនើប​ម៉ាក​អូឌី...

មន្ត្រី​​​សហជីព​​​ម្នាក់​​​បាន​​​និយាយ​​​កាលពី​​​ម្សិលមិញ​​​ថា កម្មការិនី​​​ប្រហែល​​​​​​៥០នាក់​​​​​​បាន​​​ដួល​​​សន្លប់​​​នៅ​​​រោងចក្រ​​​ស្បែក​​​ជើង​​​មួយ​​​​​​ក្នុង​​​ខេត្ត​​​កំពង់​​​ឆ្នាំង​​​​​​កាលពី​​​ថ្ងៃសៅរ៍​​​នៅ​​​ពេល​​​​​​ឆេះ​​​ម៉ាស៊ីន​​​​​​​​​​​​បណ្តាល​​​ឲ្យ​​​​​​មាន​​​ផ្សែង​​​ពេញ​​​រោង​​​ចក្រ​​​។ លោក យិន សុខុម​​​ អនុប្រធាន​​​​​​សហជីព​​​សេរី​​​កម្មករ​​​​​​នៅ​​​រោង​​​ចក្រ​​​ Long Lead ក្នុង​​​ឃុំ​​​សេដ្ឋី ស្រុក​​​​​​សាមគ្គី​​​មាន​​​ជ័យ​​​​​​បាន​​​មាន​​​ប្រសាសន៍​​​ថា ម៉ាស៊ីន​​​បាន​​​ឆេះ​​​នៅ​​​ម៉ោង​​​ប្រហែល​​​១រសៀល ថ្ងៃសៅរ៍។ លោក សុខុម បាន​​​មាន​​​ប្រសា​​​សន៍​​​ថា "​​​វា​​​បាន​​​បង្ក​​​ឲ្យ​​​មាន​​​ផ្សែង​​​ជាច្រើន... ហើយ​​​​​​កម្មករ​​​បាន​​​ឈ្លក់​​​ផ្សែង​​​​​​លាយ​​​ឡំ​​​នឹង​​​ក្លិន​​​អាក្រក់​​​នៃ​​​ក្រណាត់​​​ដែល​​​ឆេះ"។ លោក​​​បាន​​​បន្ថែម​​​ថា កម្មករ​​​២៩នាក់​​​បាន​​​ដួល​​​សន្លប់​​​​​​បន្ទាប់ពី​​​ពន្លត់​​​ភ្លើង​​​រួច ហើយ​​​កម្មករ​​​ប្រហែល​​​​​​២០នាក់ទៀត​​​​​​បាន​​​សន្លប់​​​​​​ប្រហែល​​​១៥នាទី​​​ក្រោយ​​​មក​​​។ មេដឹកនាំ​​​សហជីព​​​រូប​​​នេះ​​​បាន​​​មាន​​​ប្រសា​​​សន៍​​​ថា កម្មការិនី​​​ភាគច្រើន​​​ត្រូវ​​​បាន​​​បញ្ជូន​​​ទៅ​​​មន្ទីរ​​​ពេទ្យ​​​បង្អែក​​​ស្រុក​​​ ឬ​​​គ្លី​​​និក​​​ក្នុង​​​មូលដ្ឋាន​​​កាលពី​​​ថ្ងៃសៅរ៍ ប៉ុន្តែ​​​​​​នឹង​​​ត្រឡប់​​​ទៅ​​​កន្លែង​​​របស់​​​ខ្លួន​​​​​​វិញ​​​នៅ​​​ថ្ងៃ​​​នេះ។ ​​​លោក​​​បាន​​​មាន​​​ប្រសា​​​សន៍​​​ថា "យើង​​​បាន​​​ប្តូរ​​​​​​ម៉ា​​​ស៊ីន​​​ថ្មី​​​ហើយ ហើយ​​​កម្មករ​​​នឹង​​​ធ្វើការ​​​ដូច​​​ធម្មតា។ យើង​​​បាន​​​សម្អាត​​​រោង​​​ចក្រ​​​រួច​​​ហើយ"។ តំណាង​​​រោង​​​ចក្រ​​​​​​មិន​​​អាច​​​ទាក់ទង​​​បាន​​​ទេ​​​កាល​​​ពី​​​ម្សិលមិញ។ រោង​​​ចក្រ​​​​​​កាត់​​​ដេរ​​​មួយ​​​ដែល​​​កាន់​​​កាប់​​​ដោយ​​​ចិន​​​តៃ​​​វ៉ាន់​​​ក្នុង​​​ខេត្ត​​​ស្វាយ​​​រៀង​​​​​​បាន​​​បិទ​​​ជា​​​បណ្តោះ​​​អាសន្ន​​​កាលពី​​​សប្តាហ៍​​​មុន​​​ បន្ទាប់ពី​​​កម្មករ​​​ជាង​​​១០០នាក់​​​​​​បាន​​​ដួល​​​សន្លប់​​​​​​ក្នុង​​​ចំនួន​​​ដ៏​​​ច្រើន​​​ពីរ​​​លើក​​​ផ្សេង​​​គ្នា​​​កាលពី​​​ចុង​​​សប្តាហ៍​​​​​​មុន៕សារុន   

មួយ​​​ឆ្នាំ​​​បន្ទាប់​​​ពី​​​បុរស​​​ជន​​​ជាតិ​​​វៀតណាម​​​ម្នាក់​​​ត្រូវ​​​បាន​​​ចាប់​​​ខ្លួន​​​ពេល​​​កំពុង​​​ព្យាយាម​​​ផ្ញើ​​​តុក្កតា​​​ខ្លា​​​ឃ្មុំ​​​ដែល​​​មានលាក់ស្យូដូហ្វេឌ្រីន (Pseudoephedrine) ជា​​​​​​សារធាតុ​​​គីមី​​​ម៉្យាង​​​សម្រាប់​​​ផលិត​​​គ្រឿង​​​ញៀន​​ ពី​​​ភ្នំពេញ​​ទៅ​​​កាន់​​​ប្រទេស​​​អូស្ត្រាលី បុរស​​​វ័យ​​​៤៧​​​ឆ្នាំ​​​រូប​​​នេះ​​​កាល​​​ពី​​​ម្សិលមិញ​​​ បាន​​​បង្ហាញ​មុខ​​​ក្នុង​​​តុលាការ​​​ពីបទ​​​គម្រោង​​​រត់​​​ពន្ធ​​​គ្រឿង​​​ញៀន​​​មួយ​​​ទៀត ហើយ​​​បាន​​​ច្រាន​​​ចោល​​​ការ​​​ចោទ​​​ប្រកាន់​​​ទាំង​​​នេះ។ បុរស​​​ឈ្មោះ វ៉ាន វ៉ៃ ត្រូវ​​​បាន​​​ចាប់ខ្លួន​​​កាល​​​ពី​​​ខែ​​​មករា​​​ ឆ្នាំ​​​២០១៤​​​ពេល​​​កំពុង​​​​​​ប៉ុន​​​ប៉ង​​​ផ្ញើ​​​តុក្កតា​​​ខ្លា​​​ឃ្មុំ​​​ធំៗ​​​ចំនួន​​​ប្រាំ​​​ ដែល​​​ផ្ទុក​​​ទៅ​​​ដោយ​​​ស្យូដូហ្វេឌ្រីន ​​​ទម្ងន់​​​​​​១២​​​គីឡូក្រាម​​​ ជា​​​ថ្នាំ​​​បន្ធូរ​​​តឹង​​​ច្រមុះ​​​ម្យ៉ាង​​​ដែល​​​ជា​​​ទូទៅ​​​ប្រើ​​​សម្រាប់​​​ផលិត​​​ថ្នាំ​​​ញៀន​​​មេតាំហ្វេតាមីន​​​។ មួយ​​​ខែ​​​ក្រោយ​​​មក​​​កន្សែង​​​ពោះ​​​គោ​​​ចំនួន​​​៣៨​​​ ​​​ជ្រលក់​​​ត្រាំ​​​ជាមួយ​​​​អ្វី​​​​​​​​​​​​​​​ដែល​​​នគរ​​​បាល​​​បាន​​​និយាយ​​​នៅ​​​ពេល​​​នោះ​​​ថា កេតាមីន​​​(Ketamine) ត្រូវ​​​បាន​​​រក​​​ឃើញ​​​រុំ​​​​​​ថង់​​​ប្លា​​​ស្ទិក​​​ក្នុង​​​អាផាត​​​មិន​​​មួយ​​​កន្លែង​​​ដែល​​​ជន​​​នេះ​​​បាន​​​ស្នាក់​​​នៅ​​​ជា​​​មួយ​​​បុរស​​​ម្នាក់​​​ឈ្មោះ​​​ ឡេ វីឡាំ អាយុ​​​៣០​​​ឆ្នាំ​​​ដែល​​​បច្ចុប្បន្ន​​​នគរ​​​បាល​​​កំពុង​​​តាម​​​ចាប់ខ្លួន​​​។ វរសេនីយ៍​​​ទោ ឈូក គា មក​​​ពី​​​នាយក​​​ដ្ឋាន​​​ប្រឆាំង​​​ការ​​​ជួញ​​​ដូរ​​​គ្រឿង​​​ញៀន​​​នៃ​​​ក្រសួង​​​មហាផ្ទៃ បាន​​​ប្រាប់​​​សាលា​​​ដំបូង​​​រាជ​​​ធានី​​​ភ្នំពេញ​​​កាល​​​ពី​​​ម្សិល​​​មិញ​​​ថា “​​​ ទទួល​​​បាន​​​ព័ត៌​​​មានសម្ងាត់​​​​​​ពី​​​ភ្នាក់​​​ងារ​​​នគរ​​​បាល​​​ថា  ខណៈ​​​ជាប់​​​ពន្ធនាគារ វ៉ាន វ៉ៃ បាន​​​ហៅ​​​ ឡេ វីឡាំ ​​​ឲ្យ​​​ទៅ​​​ជួយ​​​​​​​​​យក​​​កន្សែង​​ពោះ​​​គោ​​​ទាំង​​​នោះ​​​ចេញ​​​ពី​​​កុនដូ​​​ក្នុង​​​ខណ្ឌ​​​ទួល​​​គោក​​​ខាង​​លើ​​​នេះ​​​​​​ ហើយ​​​បាន​​​សន្យា​​​ឲ្យ​​​ជន​​​នេះ​​​​​​៣.០០០​​​ដុល្លារ​​​"។ លោក​​​បាន​​​មាន​​​ប្រសាសន៍​​​ទៀត​​​ថា បន្ទាប់​​​ពី​​​នគរ​​​បាល​​​ដក​​​ហូត​​​កន្សែង​​​ពោះ​​​គោ​​​ទាំង​​​នេះ​​​ដែល​​​ក្នុង​​​កន្សែង​​​នីមួយ​​​ៗ​​​មាន​​​ទំហំ​​​​​​១,៨​​​ម៉ែត្រ​​​​​​គុណ​​​នឹង​​​០,៩១​​​ម៉ែត្រ​​​ ពួកគេ​​​បាន​​​កំណត់ដឹង​​​​​​ថា កន្សែង​​​ទាំង​​​នោះ​​​ត្រូវ​​​បាន​​​ជ្រលក់​​​ត្រាំ​​​ស្យូដូហ្វេឌ្រីន។ "​​​បន្ទាប់​​​ពី​​​​​​ពិនិត្យ​​​​​​មើល​​​គ្រឿង​​​ញៀន​​​រួច​​​​​​ យើង​​​បាន​​​បញ្ជាក់​​​ថា ម្ស៉ៅ​​​ផ្សំ​​​គ្រឿង​​​ញៀន​​​ទាំង​​​នោះ​​​ត្រូវ​​​បាន​​​ជ្រលក់​​​ត្រាំ​​​​​​ចូល​​​ក្នុង​​​កន្សែង​​​ទាំង​​​នោះ​​​"។ លោក​​​បាន​​​មាន​​​ប្រសាសន៍​​​បន្ថែម​​​ថា គីមី​​​ដែល​​​ប្រមូល​​​បាន​​​​​​មាន​​​ទម្ងន់​​​ត្រឹម​​​តែ​​​ជាង​​​១២​​​គីឡូក្រាម​​​ប៉ុណ្ណោះ។ ដំបូង​​​ឡើយ​​​អាជ្ញាធរ​​​កម្ពុជា​​​បាន​​​ចាប់​​​ខ្លួន​​​ វ៉ាន វ៉ៃ ក្រោយ​​​ពី​​​ទទួល​​​បាន​​​ព័ត៌​​​មាន​​​សម្ងាត់​​​ពី​​​នគរ​​​បាល​​​សហព័ន្ធ​​​អូស្ត្រាលី​​​ដែល​​​បាន​​​ជូន​​​ដំណឹង​​​ពួក​​​គេ​​​ថា តុក្កតា​​​ខ្លា​​​ឃ្មុំ​​​ចំនួន​​​ប្រាំ​​​មួយ​​​ប្រអប់​​​មាន​​​ផ្ទុក​​​​​​ពេញ​​​ទៅ​​​ដោយ​​​ស្យូដូហ្វេឌ្រីន បាន​​​​​​ចូល​​​ទៅ​​​ដល់​​​ប្រទេស​​​នោះ​​​កាល​​​ពី​​​ខែ​​​ធ្នូ​​​ឆ្នាំ​​​២០១៤​​​។ ពេល​​​បង្ហា​​​ញ​​​មុខ​​​ក្នុង​​​តុលាការ​​​កាល​​​ពី​​​ម្សិលមិញ​​​ ពីបទ​​​រក្សា​​​ទ​​​ុក​​​និង​​​រត់​​​ពន្ធ​​​គ្រឿង​​​ញៀន​​​ពាក់​​​ព័ន្ធ​​​នឹង​​​កន្សែង​​​​​​ពោះ​​​​​​គោ​​​ដែល​​​​​​ដក​​​ហូត​​​បាន​​​ វ៉ាន វ៉ៃ បាន​​​បដិសេធ​​​ថា ខ្លួន​​​មិន​​​បាន​​​ធ្វើ​​​អ្វី​​​ខុស​​​ទេ​​​ ដោយ​​​លើក​​​ឡើង​​​ថា ខ្លួន​​​​​​មិនមែន​​​ជា​​​ម្ចាស់​​​កន្សែង​​​ពោះ​​​គោ​​​ទាំង​​​នោះ​​​ទេ​​​ ហើយ​​​ខ្លួន​​ក៏មិន​​​មែន​​​ជា​​​អ្នក​​​ចុះ​​​​​​ហត្ថលេខា​​​លើ​​​កិច្ច​​​សន្យា​​​ជួល​​​អាផាត​​​មិន​​​នោះ​​​ដែរ​​​។ វ៉ាន វ៉ៃ និយាយ​​​ទៀត​​​ថា "ខ្ញុំ​​​មិ​​​ន​​​បាន​​​ប្រព្រឹត្ត  ទេ​​​។ ផ្ទះ​​​នោះ​​​គឺ​​​ ឈ្មោះ ឡាំ ជា​​​អ្នកជួល​​ហើយ​​​ខ្ញុំ​​​គឺ​​​ជា​​​សាក្សី​​​ដឹង​​​ឮ​​​នៅ​​​ក្នុង​​​កិច្ច​​​សន្យា​​​ជួល​​​នេះ​​​"។ ក្រឡា​​​បញ្ជី​​​មួយ​​​រូប​​​បាន​​​អាន​​​ចម្លើយ​​​បំភ្លឺ​​​របស់​​​​​​ម្ចាស់​​​ផ្ទះ​​​ជួល​​​​​​ដែល​​​បាន​​​លើក​​​ឡើង​​​ថា វ៉ាន វ៉ៃ "កម្រ​​​មក​​​លេង​​​" ផ្ទះ​​​នេះ​​​ណាស់​​​។លោក តុបឈុន​​​ ហេង​​​ ចៅ​​​ក្រម​​​ជំនុំ​​​ជម្រះ​​​ បាន​​​មាន​​​ប្រសាសន៍​​​ថា សាល​​​ក្រម​​ផ្តន្ទា​​​ទោស​​​​​​នឹង​​​ត្រូវ​​​ប្រកាស​​​នៅ​​​ថ្ងៃ​​​ទី​​​១៣​​​ ខែ​​​មីនា៕​​​សុខុម  

ជន​​​ជាតិ​​​អង់​​​គ្លេស​​​​​​អាយុ​​​៥៤​​​ឆ្នាំម្នាក់​​​​​ដែល​ត្រូវ​​​បាន​​​ចោទ​​​ប្រកាន់​​​ពី​​​បទ​​រំលោភ​បំពាន​​​​ក្មេង​ស្រី​​​បួន​​​នាក់​​​​កាល​ពី​​​ម្សិល​មិញ​​​ បាន​​​បដិសេធ​​ការ​​​ចោទ​​​ប្រកាន់ពី​​​បទ​​​ទិញ​​​ពេស្យាចារ​​​កុមារ​​​ និង​​​ប្រព្រឹត្ត​​​​អំពើ​អនាចារ​​​លើ​​​អនីត​​ិជន​​​​​​អំឡុង​​​ថ្ងៃទី​​​១នៃសវនាការ​​​ជំនុំជម្រះ​​​នៅ​​​សាលា​​​ដំបូង​​​រាជ​​ធានី​ភ្នំពេញ។ លោក ម៉ៃឃើល ហ្គ្លីនចូន ត្រូវ​​​បាន​​​ចាប់​ខ្លួន​​​នៅ​​​ខាង​ក្រៅ​​​ផ្សារ​​​អូឡាំពិក​​​​​​កាលពី​​​ថ្ងៃ​​​ទី​​​២៤ ខែ​​​មិថុនា បន្ទាប់​ពី​​​ម្តាយ​​​ក្មេង​ស្រី​​​រង​គ្រោះ​​​ទាំងនេះ​​​បាន​​​ដាក់ពាក្យ​​​បណ្តឹង​​​​​​ពី​​​បទ​​​រំលោភ​បំពាន​​​​ ហើយ​​​នគរ​បាល​​​ប្រឆាំង​​​ការ​​​ជួញ​​​ដូរ​​​មនុស្ស​​​​​រាជ​​​ធានី​​​​​​បាន​​​ធ្វើការ​​​ស៊ើប​​​អង្កេត​​​រួមគ្នា​​​ជាមួយ​​​អង្គការ​​​​​​សកម្ម​​​ភាព​​​ដើម្ប​ី​​កុមារ ​​​ជា​​​អង្គការ​​​ការ​​​ពារ​​​កុមារ។ លោក លី សុខឡេង​​​ ចៅ​​​ក្រម​​​ប្រធាន​​​ក្រុម​​​ប្រឹក្សា​​​ជំនុំ​​​ជម្រះ​​​បាន​​​មាន​​​ប្រសាសន៍​​​កាលពី​​​ម្សិល​មិញ​​​ថា លោក ចូន ប្រឈម​​​ការ​​​ចោទប្រកាន់​​​ពីបទ​​​រួម​​​ភេទ​​​​​​ជាមួយ​​​​​​ក្មេង​​​ស្រី​​​អាយុ​​​១១​​​ឆ្នាំ​ម្នាក់ ហើយ​​​បន្ទាប់មកបាន​​​​ឲ្យ​​​លុយ​​​ក្មេងស្រីនោះ​​​និង​​​ម្តាយ​​​របស់​​​នាង។ ចៅក្រម​​​រូប​នេះ​​​បាន​​​លើក​​​ឡើង​​​ថា ជន​​​ជាតិ​​​អង់​​​គ្លេស​​​រូបនេះ​​​​​​ក៏ត្រូ​​​វ​​​បាន​​​ចោទប្រកាន់ថាបាន​​​រំលោភ​​​​​​បំពាន​​​ក្មេងស្រី​​​បីនាក់​​​ទៀត​​​អាយុ​​​៧ឆ្នាំ ដល់​​​​៩ឆ្នាំផងដែរ។ ថ្លែង​នៅ​​​សាល​​​សវនាការ​​​ លោក ចូន បាន​​​បដិសេធ​​​​​​ការ​​​ចោទ​​​ប្រកាន់​​​មក​​​លើ​​​រូបលោក ហើយ​​​បាន​​​អះ​​​អាង​​​ថា លោក​​​គ្រាន់តែ​​​​​​នាំក្មេងស្រី​​​ទាំង​​​នេះ ដែល​​​បាន​​​ដើរ​​​សុំលុយ នៅ​​​ជិត​​​កាស៊ីណូ​​ណាហ្គាវើល​​​​​​ទៅញ៉ាំ​​​ការ៉េម​​​ និង​​​បាន​​​ទៅជាមួយ​ក្មេងស្រី​​​អាយុ​​​១១ឆ្នាំ​​​ទៅ​​​មើល​កុន​​​នៅ​​​ផ្សារ​​​សូរិយា​​​។ លោក​​​បាន​​​និយាយថា "ខ្ញុំ​​​បាន​​​ឲ្យ​​​លុយ​​ក្មេងស្រី​​​ទាំងនោះ​​​១ទៅ​​​២ដុល្លារ​​​​​​នៅពេល​​​ពួកគេ​​​សុំ​ខ្ញុំ"។ លោក​​​បាន​​​បន្ថែម​ថា "​​​ខ្ញុំបាន​​​នាំ​ពួកគេ​​​ទៅ​​​ញ៉ាំ​ការ៉េម​​​​​​ ហើយ​​​បន្ទាប់​មក​​​បាន​​​នាំពួក​គេ​​​ទៅ" ​កន្លែង​​​នោះ​វិញ​​​នៅ​​​ខាង​ក្រៅ​​​កាស៊ីណូ​។ លោក​​ ចូន ក៏​​​បាន​​​ចោទ​​​ប្រកាន់​​​​​​អង្គ​ការ​​​សកម្ម​​​ភាព​​​ដើម្បី​​​កុមារ​​​​​​ថា​​​​បានបង្ខិតបង្ខំ​​ឲ្យ​​​ក្រុម​គ្រួសារ​​​ក្មេងស្រី​​​ទាំង​​​នេះ​​​ដាក់ពាក្យ​​​បណ្តឹង​​​ប្តឹង​​​រូបគាត​​​់ ហើយ​​​បាន​​​ចោ​​​ទប្រកាន់​​​ជន​​​រង​​​គ្រោះ​​​ទាំង​​​នេះ​​​ថា បាន​​​និយាយ​​​កុហក។ លោក​​​បាន​​​និយាយ​​​ពី​​​មូល​ហេតុ​​​ដែលលោក​​​បាន​​​ឲ្យ​​​លុយ​​​ក្មេង​​​ស្រីទាំង​​​នេះ​​​ថា "​​​ខ្ញុំគ្រាន់តែ​​ជា​​​ភ្ញៀវ​​​ទេសចរ​​​ប៉ុណ្ណោះ​។ ខ្ញុំ​​​ចង់​​​​​​ធ្វើជាមនុស្ស​​​ល្អ។ ខ្ញុំមាន​​​លុយ ​​​ពួកគេ​​​មិន​​​មាន​​​លុយ"។ លោក ឈួន ស៊ីថាន់ ​​​មេធាវី​​​តំណាងជន​​​រងគ្រោះ​​​ទាំងបួននាក់​​​​បាន​​​មាន​​​ប្រសាសន៍​​​នៅ​​​ខាង​ក្រៅ​​​តុលាការ​​​ថា លោក ចូន​​​​​​ បាន​​​នាំក្មេងស្រី​​​បីនាក់ទៅ​​​កន្លែង​​​មួយ​​​ក្រោម​​​ស្ពាន​កោះ​ពេជ្រ កន្លែងដែលគាត់​​​បាន​​​រំលោភ​​​បំពាន​ពួកគេ។ លោក ស៊ីថាន់ បានមាន​​​ប្រសាសន៍​​​ថា ក្មេង​ស្រី​​​អាយុ​​​១១ឆ្នាំ​​​​​​ត្រូវ​​​បាន​​​បៀត​​​បៀន​​​នៅ​​​កន្លែង​មើល​កុន។ លោក ខឹម វ៉ាន់ដូ ​​​អនុប្រធាន​​​ប្រតិបត្តិការ​​​របស់​​​អង្គការ​​​សកម្មភាព​​​ដើម្បី​​​កុមារ​​​បាន​​​​​​​​​បដិសេ​ធ​​​ការ​​​ដែលថា អង្គការ​​​របស់លោក​​​​​​បាន​​​បញ្ចុះ​​​បញ្ចូល​​​​​​ក្រុមគ្រួសារ​​​​​​ជន​​រងគ្រោះ​។ លោក​​​បាន​​​មាន​​​ប្រសាសន៍ថា "លោក ចូន បាន​​​ចោទប្រកាន់​​​យើង​​​ ពីព្រោះ​​​គាត់​​​ចង់​​​ឲ្យ​​​គេ​​​ដោះ​លែង​​​គាត់"​​​ ដោយ​​​លោក​​​កត់សម្គាល់ថា ជន​​​សង្ស័យ​​​មួយ​​​ចំនួន​​​ទៀត​​​​​​បាន​​​អះ​​​អាង​​​ស្រដៀង​​​គ្នានេះ​​​​​ប្រឆាំង​​​អង្គការ​​​របស់លោក។ លោកចៅ​​​ក្រម​​​ សុខឡេង បាន​​​មានប្រសាសន៍ថា មិន​ទាន់កំណត់​កាលបរិច្ឆេទបើក​សវនាការ​​​ជំនុំ​​​ជម្រះ​​​នៅពេល​ក្រោយ​​​​នៅឡើយ​ទេ៕សារុន​​​  

មេដឹកនាំ​សហជីព​ម្នាក់​​​បាន​​​ឲ្យ​​​ដឹង​​​​កាលពី​ម្សិល​​​មិញ​ថា កម្មករ​ជាង​៦០​នាក់​បាន​ដួល​សន្លប់​នៅ​រោងចក្រ​កាត់​ដេរ You Li International ក្នុង​ក្រុង​បាវិត​ ខេត្ត​ស្វាយរៀង កាលពី​ព្រឹក​ថ្ងៃ​​​សុក្រ ដោយ​សារ​ក្លិន​សារធាតុ​គីមី និង​ក្លិន​លូ​​​ទឹក​ស្អុយ​។ លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​បាន​មាន​ប្រសាសន៍​ថា កម្មករ​៦១​នាក់​បាន​ដួល​សន្លប់​បន្ទាប់ពី​កម្មករ​ម្នាក់​បាន​ដួលសន្លប់​​​នៅ​ក្នុង​រោងចក្រ​កាត់​ដេរ​ ដែល​កាន់​កាប់​ដោយ​​​ជនជាតិ​តៃ​​​វ៉ាន់​​ ដែល​នាំ​ចេញ​សម្លៀក​បំពាក់​ឈុត​ក្នុង​ទៅ​ប្រទេស​ជប៉ុន។ លោក ប៉ាវ ស៊ីណា បាន​មាន​ប្រសាសន៍​ថា កម្មករ​បាន​ដួល​សន្លប់​ភ្លាមៗ​បន្ទាប់​​​ពី​​​ធុំ​ក្លិន​សារ​​​ធាតុ​គីមី​ដែល​គេ​​​បាញ់​លើ​ក្រណាត់​​​ដើម្បី​​​ការ​​​ពារ​​​​នៅ​ក្នុង​រោងចក្រ​។ លោក​បាន​​​មាន​ប្រសាសន៍​ថា "មាន​មូលហេតុ​ពីរ គឺ​ទី១​បញ្ហា​បរិស្ថាន គឺ​ក្លិន​អាក្រក់​ជះ​មក​​​ពី​បង្គន់​​​​អនាម័យ​។ ទី២​ក្លិន​អាក្រក់​មក​​​ពី​សារធាតុគីមី​ដែល​គេ​ប្រើ​ដើម្បី​ការ​ពារ​ក្រណាត់"។ លោក...

មន្ត្រី​​​នគរ​​​បាល​​​បាន​​​ឲ្យ​​​ដឹង​​​កាល​​​ពី​​​ម្សិល​​​មិញ​​​ថា កាល​​​ពី​​​ថ្ងៃ​​​ពុធ សាលា​​​រាជធានី​​​ភ្នំពេញ បាន​​​ចោទ​​​ប្រកាន់​​​អង្គរក្ស​​​ទី​​​៥​​​ម្នាក់​​​របស់​​​លោក ថោង សារ៉ាត់ ​​​មន្ត្រី​​​នៅ​​​ក្រសួង​​​ការពារ​​​ជាតិ​​​ដែល​​​កំពុង​​​រត់​​​គេច​​​ខ្លួន​​​​​​ពី​​​បទ​​​​​​ជួយ​​​នៅ​​​ក្នុង​​​ការ​​​អនុវត្ត​​ផែន​​​ការ​​​ធ្វើ​​​ឃាត​​​លោក​​​ឧកញ៉ា អឹុង​​​ ម៉េង​​​ជឺ កាល​​​ពី​​​ឆ្នាំ​​​មុន​​​។​​​ លោក​​​ឧកញ៉ា អឹុង ម៉េងជឺ ប្រធាន​​​ក្រុមហ៊ុន Shimmex Group ត្រូវ​​​បាន​​​បាញ់​​​សម្លាប់​​​នៅ​​​ខាង​​​ក្រៅ​​​ហាង​​​លក់​​​ផ្លែ​​​ឈើ​​​មួយ​​​​​កន្លែង​​​ក្នុង​​​ខណ្ឌ​​​ចំការ​​​មន​​​ រាជ​​​ធានី​​​ភ្នំពេញ​​​ កាល​​​ពី​​​ថ្ងៃទី​​​២២​​​ ខែ​​​វិច្ឆិកា។ សាលា​​​ដំបូង​​​រាជ​​​ធានី​​​ភ្នំពេញ​​​បាន​​​ចោទ​​​ប្រកាន់​​​អង្គរក្ស​​​របស់​​​ឧត្តម​​​សេនីយ៍​​​ទោ ថោង​​​ សារ៉ាត់​​​ ចំនួន​​​បួន​​​​​​នាក់​​​ ពី​​​បទ​​​អនុវត្ត​​​ផែន​​​ការ​​​ធ្វើ​​​ឃាត​​​ ហើយ​​​ចោទ​​​ប្រកាន់​​​​​​ឧត្តម​​​សេនីយ៍​​​ទោ​​​រូប​​​នេះ​​​ដែល​​​ឥឡូវ​​​នេះ​​​កំពុង​​​រត់​​​គេច​​​ខ្លួន​​​ពី​​​បទ​​​ចេញ​​​​​បទ​​​បញ្ជា​​​ឲ្យ​​​មាន​​​ការ​​​ធ្វើ​​​ឃាត​​​។ លោក ជួន ណារិន ស្នង​​​ការ​​​រង​​​នគ​​​របាល​​​​​​រាជ​​​ធានី​​​ភ្នំពេញ​​​បាន​​​លើក​​​ឡើង​​​ថា លោក ឈុន ចិត្រា ដែល​​​ជា​​​អង្គរក្ស​​​ទី​​​​​​៥​​​របស់​​​លោក ថោង​​​ សារ៉ាត់ ត្រូវ​​​បាន​​​​​​ចាប់​​​ខ្លួន​​​ដោយ​​​មន្ត្រី​​​មក​​​ពី​​​នាយក​​​ដ្ឋាន​​​​​​សន្តិសុខ​​​ផ្ទៃ​​​ក្នុង នៅ​​​ក្រសួង​​​មហាផ្ទៃ​​​កាល​​​ពី​​​ថ្ងៃ​​​ពុធ ហើយ​​​ត្រូវ​​​បាន​​​ចោទ​​​ប្រកាន់​​​ដោយ​​​ចៅ​​​ក្រម​​​ស៊ើុប​​​សួរ​​​ លី សុខ​​​ឡេង តាម​​​ក្រោយ​​​នៅ​​​ថ្ងៃ​​​ដដែល​​​នោះ​​​។ លោក ជូន ណារិន​​ បាន​​​លើក​​​ឡើង​​​ទៀត​​​ថា លោក ចិត្រា ដែល​​​កំពុង​​​​​​ឃុំ​​​ខ្លួន​​​​​​​​​​​​​​​ជា​​​បណ្តោះ​​​អាសន្ន​​​នៅ​​​ពន្ធនាគារ​​​ព្រៃ​​​ស​​​ជាប់​​​ចោទ​​​ពី​​​បទ​​​ឲ្យ​​​ម៉ូតូ​​​ម៉ាក​​​ហុង​​​ដា​​​របស់​​​ខ្លួន​​​ទៅ​​​ សៀង វាសនា ជា​​​ខ្មាន់​​​កាំភ្លើង​​​​​​ខ្ចី​​​ ប៉ុន្តែ​​​ថា លោក​​​មិន​​​​​​ដឹង​​​ថា ​​​លោក​​​ ចិត្រា ត្រូវ​​​គេ​​​ចោទ​​​ប្រកាន់​​​ជា​​​ផ្លូវ​​​ការ​​​ពី​​​បទ​​​អ្វី​​​ឡើយ​​​​​​។ លោក​​​បាន​​​មាន​​​ប្រសាសន៍​​​ថា "គាត់​​​ត្រូវ​​​បាន​​​ចាប់​​​ខ្លួន​​​ដោយ​​​មាន​​​ជាប់​​​ពាក់​​​ព័ន្ធ​​​នឹង​​​ម៉ូតូ​​​ដែល​​​គាត់​​​ឲ្យ​​​ទៅ​​​ សៀង វាសនា ហេតុ​​​ដូច្នេះ​​​ទើ​​​ប​​​ជន​​​នេះ​​​អាច​​​បាញ់​​​ប្រហារ​​​ ​​​”។ លោក ជួន ណារិន​​​ បាន​​​លើក​​​ឡើង​​​បន្ត​​​ទៀត​​​ថា ក្រោយ​​​ការ​​​ធ្វើ​​​ឃាត​​​រួច​​​ លោក ចិត្រា ក៏​​​បាន​​​ប្តូរ​​​​​​តែម​​​​​​​​​ម៉ូតូ​​​ទៅជា​​​ម៉ូតូ​​​ថ្មី​​​មួយ​​​ទៀត​​​ផង​​​ដែរ​​​។ គេ​​​មិន​​​អាច​​​ទាក់​​​ទង​​​ចៅ​​​ក្រម​​​សើុប​​​សួរ​​​ លី សុខ​​​ឡេង បាន​​​ឡើយ​​​៕ស៊ុយឈាង  

អ្នក​ស្រី ឡាយ ហួង​ ដែល​ត្រូវ​បាន​បញ្ជូន​ទៅ​ពន្ធនាគារ​កាលពី​ខែ​មុន​ពី​បទ​ជាប់​ពាក់​ព័ន្ធ​នៅ​ក្នុង​ការ​រៀប​ផែន​ការ​​​មួួយ​​​​​ដើម្បី​រំលោភ​និង​ធ្វើ​ឃាត​​ភរិយា​និង​កូនស្រី​រប​ស់​​រដ្ឋ​មន្ត្រី​ក្រសួង​ពាណិជ្ជកម្ម​ ត្រូវ​បាន​សាក​សួរ​នៅ​សាលា​ដំបូង​រាជ​ធានី​ភ្នំពេញ​កាលពី​ម្សិលមិញ​ជុំវិញ​​ពាក្យ​បណ្ដឹង​​​​​ពី​​​បទ​​រំលោភ​​សេចក្ដី​​ទុកចិត្ត​ដាច់​ដោយ​ឡែក​មួយ​ទៀត​។ អ្នក​​ស្រី​ ឡាយ​ ហួង អាយុ​៤៩​ឆ្នាំ ដែល​ក្នុង​រយៈពេល​ប៉ុន្មាន​ឆ្នាំនេះ​ មាន​​ជម្លោះ​​​យ៉ាង​ខ្លាំង​ជា​មួយ​អតីត​ស្វាមី​មិន​​បាន​រៀប​ការ​របស់​អ្នក​ស្រី​ គឺ​លោក​ ខូវ​ ផល្លាបុត្រ​ ដែល​រក​ស៊ី​ខាង​គ្រឿង​សំណង់​ ត្រូវ​បាន​សាក​សួរ​ជុំ​វិញ​បណ្ដឹង​​ដែល​លោក​ ខូវ ផល្លា​បុត្រ​ បាន​ប្ដឹង​ទៅកាន់​តុលាការ​​ ដោយ​អះអាង​ថា អ្នកស្រី​ បាន​​ប្រើ​ប្រាស់​សម្ភារ​​របស់​ក្រុម​ហ៊ុន​ ខូវ ជឺលី​ គ្រុប​...

បុរស​ពីរនាក់​ក្នុង​ចំណោម​បីនាក់​ដែល​ត្រូវ​បាន​ចោទ​ប្រកាន់ពីបទ​ប្រើ​ប្រាស់​និង​ជួញ​ដូរ​ថ្នាំ​មេ​តំហ្វេ​តាមីន​​នៅក្នុង​ពន្ធនាគារ​ព្រៃស​ដែល​មាន​ការ​យាម​កាមតឹង​រ៉ឹង​នោះ បាន​បដិសេធ​ការ​ចោទ​ប្រកាន់​ពីបទ​ជួញ​ដូរ​ថ្នាំញៀន អំឡុង​សវនាការ​ជំនុំជម្រះ​នៅ​សាលា​ដំបូង​​រាជ​ធានី​ភ្នំពេញ​កាលពី​ម្សិលមិញ។ អ្នកទោស​ឈ្មោះ​ នុត កែវ​រចនា និង​ ទូច សុវណ្ណ ដែល​មានអាយុ​៣២ឆ្នាំដូចគ្នា​ និង​ លី ធៀនម៉ម​ អាយុ​៣៩ឆ្នាំ ត្រូវ​បាន​ចោទ​ប្រកាន់​ពីបទ​​ប្រើ​ប្រាស់​និង​ជួញដូរ​​ថ្នាំញៀន ខណៈ​ពេល​ជាប់​ឃុំ​ក្នុង​ពន្ធ​នាគារ​ព្រៃស​កាលពី​ឆ្នាំ​២០១៣។ បច្ចុប្បន្ននេះ កែវរចនា កំពុង​អនុវត​្ត​ទោស​​របស់ខ្លួន​នៅ​ខេត្ត​ពោធិ៍សាត់ ហើយ​មិន​បាន​ចូល​រួម​ក្នុង​សវនាការ​កាលពី​ម្សិលមិញ​ឡើយ។ សុវណ្ណ និង​ ធៀនម៉ម បាន​សារភាព​នៅក្នុង​ត​ុលាការ​ថា បាន​ប្រើ​ប្រាស់​​ថ្នាំមេត​ំ​ហ្វេ​តាមីនមែន ​...

អង្គរក្ស​​​ម្នាក់​​​ដែល​​​ជាប់​​​ចោទ​​​ពី​​​បទ​​​សម្លាប់​​​ឧកញ៉ា អឹុង ម៉េងជឺ កាល​​​ពី​​​ឆ្នាំ​​​មុន​​​តាម​​​បញ្ជា​​​របស់​​​ ថោង សារ៉ាត់ មន្ត្រី​​​យោធា​​​ជាន់ខ្ពស់​​​នៅ​​​ក្រសួង​​​ការ​​​ពារ​​​ជាតិ​​​ដែល​​​ជា​​​ចៅ​​​ហ្វាយ​​​​​​របស់​​​ខ្លួន ត្រូវ​​​បាន​​​សាលា​​​ដំបូង​​​រាជ​​​ធានី​​​ភ្នំពេញ​​​សាក​​​សួរ​​​កាល​​​ពី​​​ម្សិលមិញ​​​ នេះ​​​បើ​​​តាម​​​ការ​​​លើក​​​ឡើង​​​ពី​​​​​​មេធាវី​​​ការ​​​ពារ​​​ចុង​​​ចោទ​​​រូប​​​នេះ​​​។ លោក អឹុង ម៉េង​​​ជឺ ប្រធាន​​​ក្រុមហ៊ុន ស៊ីមិុច​​​ គ្រុប ត្រូវ​​​បាន​​​ខ្មាន់​​​កាំភ្លើង​​​បាញ់​​​សម្លាប់​​​នៅ​​​ខាង​​​ក្រៅ​​​ហាង​​​លក់​​​ផ្លែ​​​ឈើ​​​មួយ​​​កន្លែង​​​ក្នុង​​​ខណ្ឌ​​​ចំការ​​​មន កាល​​​ពី​​​ថ្ងៃ​​​ទី​​​២២ ខែ​​​វិច្ឆិកា។ ឧត្តម​​​សេនីយ៍​​​ទោ​​​ ថោង សារ៉ាត់ បាន​​​រត់​​​គេច​​​ខ្លួន​​​ចាប់​​​តាំង​​​ពី​​​គេច​​​ពី​​​ការ​​​ឡោម​​​ព័ទ្ធ​​​របស់​​​នគរ​​​បាល​​​នៅ​​​ភូមិ​​​គ្រឹះ​​​របស់​​​ខ្លួន​​​​​​​​​​​​​​​​​​ចាប់​​​តាំង​​​ពី​​​ថ្ងៃ​​​ទី​​​៣ ខែ​​​ធ្នូ​​​មក។​​​​​​​​​សៀង វាសនា អាយុ​​​៤៥​​​ឆ្នាំ​​​ដែល​​​ជាប់​​​ចោទ​​​ពី​​​បទ​​​មនុស្ស​​​ឃាត​​គិត​​​ទុក​​​ជា​​​មុន​​​នៅ​​​ក្នុង​​​ការ​​​បាញ់​​​សម្លាប់​​​លោក អឹុ​​​ង​​​ ម៉េង​​​ជឺ និង​​​ដែល​​​​​​អង្គរក្ស​​​បី​​​នាក់​​​ទៀត​​​របស់​​​ ថោង​​​ សារ៉ាត់ ជា​​​បក្ខ​​​ពួក​​​សម​​​គំនិត​​​នោះ​​​​​​ ត្រូវ​​​បាន​​​ចៅ​​​ក្រម​​​សើុប​​​សួរ​​​ លី សុខឡេង​​​ សាក​​​សួរ​​​រយៈ​​​ពេល​​​២ម៉ោង​​​ នេះ​​​យោង​​​តាម​​​លោក គា អ៊ាវ មេធាវី​​​ការ​​​ពារ​​​ចុង​​​ចោទ​​​។ ដោយ​​​បញ្ជាក់​​​ពី​​​ភាព​​​គ្មាន​​​ទោស​​​របស់​​​កូន​​​ក្តី​​​លោក​​​ លោក គា អ៊ាវ បាន​​​​​​មាន​​​ប្រសាសន៍​​​ថា "​​​ចៅ​​​ក្រម​​​សាក​​​សួរ​​​គាត់​​​ម្តង​​​ទៀត​​​ ពី​​​ព្រោះ​​​គាត់​​​នៅ​​​ជា​​​ជន​​​សង្ស័យ​​​នៅ​​​ឡើយ​​​។ គាត់​​​មិន​​​បាន​​​សារភាព​​​ទេ​​​ ពី​​​ព្រោះ​​​នៅ​​​ថ្ងៃ​​​កើត​​​ហេតុ​​​ គាត់​​​កំពុង​​​ធ្វើ​​​ដំណើរ​​​ជា​​​មួយ​​​គ្រួសារ​​​គាត់​​​ពី​​​កំពង់​​​ឆ្នាំង​​​ឆ្ពោះ​​​មក​​​​​​រាជ​​​ធានី​​​ភ្នំពេញ​​​"។ និយាយ​​​ទៅ​​​​​​កាន​​​់អ្នក​​​យក​​​ព័ត៌​​​មាន​​​ម្នាក់​​​មុន​​​ពេល​​​ចូល​​​ទៅ​​​ក្នុង​​​ការិយាល័យ​​​ចៅ​​​ក្រម​​​កាល​​​ពីម្សិលមិញ សៀង វាសនា បាន​​​ស្នើ​​​សុំ​​​ឲ្យ​​​ប្រព័ន្ធ​​​ផ្សព្វ​​​ផ្សាយ​​​បន្ត​​​តាម​​​ដាន​​​រឿង​​​ក្តី​​​របស់​​​ខ្លួន​​​។ គាត់​​​និយាយ​​​ថា "យើង​​​មិន​​​បាន​​​ធ្វើ​​​ទង្វើ​​​ស្មោកគ្រោក​​​ទេ។ សូម​​​អ្នក​​​កាសែត​​​ជួយ​​​រក​​​យុត្តិធម៌​​​ឲ្យ​​​ខ្ញុំ​​​ផង។ តុលាការ​​​មិន​​​យុត្តិធម៌​​​ទេ"។ ពាក់​​​ព័ន្ធ​​​នឹង​​​បញ្ហា​​​នេះ ចៅ​​​ក្រម​​​ លី សុខឡេង​​​ ​​​បាន​​​បដិសេធ​​​មិន​​​ឆ្លើយ​​​បំភ្លឺ​​​ទេ​​​៕សុខុម​​​​​​​​​