ក្រុមហ៊ុនរុករករ៉ែមួយ ដែលបានចុះបញ្ជីនៅផ្សារមូលបត្រអូស្ត្រាលី បានប្រកាសថា ខ្លួនមានគម្រោងចំណាយប្រាក់១៤លានដុល្លារដើម្បីទទួលបានអាជ្ញាប័ណ្ណរុករករ៉ែទង់ដែង នៅខេត្តព្រះវិហារ តាមរយៈកិច្ចព្រមព្រៀងមួយ ដែលពាក់ព័ន្ធនឹងក្រុមហ៊ុនពហុជំនួញក្នុងស្រុក រ៉ូយ៉ាល់ គ្រុប (Royal Group)។
តាមរយៈសេចក្តីប្រកាស កាលពីថ្ងៃព្រហស្បតិ៍សប្តាហ៍មុន ក្រុមហ៊ុន ជីអូប៉ាស៊ីហ្វិករីសស អិន អែល (Geopacific Resources NL) បានឲ្យដឹងថា ខ្លួននឹងកាន់កាប់ World Wide Mining Projects Limited (WWM) ដើម្បីអនុវត្តគម្រោងរុករករ៉ែ កៅសា (Kao Sa) នៅស្រុក ឆែប។
យោងតាមសេចក្តីប្រកាសនេះ អាជ្ញាប័ណ្ណរុករករ៉ែ បច្ចុប្បន្ន ស្ថិតក្រោមការរក្សាទុក ដោយក្រុមហ៊ុនកូរ៉េខាងត្បូង Golden Resources Development Co., Ltd. (GDR) ដែលបានរុករករ៉ែខ្លះ ប៉ុន្តែ មិនទាន់បានបញ្ជាក់ធនធានណាមួយតាមស្តង់ដារអន្តរជាតិនៅឡើយទេ។
សេចក្តីប្រកាសនេះមានខ្លឹមសារថា “ដើម្បីធានាសិទ្ធិផ្តាច់មុខលើគម្រោងនេះ ក្រុមហ៊ុន WWM នឹងបង់៧០០.០០០ដុល្លារឲ្យក្រុម GDR យ៉ាងយូរនៅថ្ងៃទី៣១ ខែមករា ឆ្នាំ២០១៣”។
បន្ទាប់មក ក្រុមហ៊ុនទាំងនេះនឹងបង់ប្រាក់១៤លានដុល្លារ ប្រសិនបើខ្លួនសម្រេចចាប់យកគម្រោងនេះក្នុងនោះ ដែលក្រុមហ៊ុនរ៉ូយ៉ាល់ គ្រុប នឹងមានភាគហ៊ុន១៥ភាគរយ។
គេហទំព័ររបស់ក្រុមហ៊ុន WWM បានបង្កើតក្រុមហ៊ុនវិនិយោគរួមមួយ ជាមួយក្រុមហ៊ុនរ៉ូយ៉ាល់ គ្រុប។
ដំណើរវិវឌ្ឍថ្មីនេះហាក់ដូចជា បានបង្ហាញទិសដៅថ្មីសម្រាប់ក្រុមហ៊ុនក្នុងស្រុក ដែលស្ថិតក្រោមការកាន់កាប់ដោយលោក គិត ម៉េង ដែលជាអ្នកជំនួញដ៏ល្បីមួយរូបនៅក្នុងប្រទេសកម្ពុជា និងចាប់អារម្មណ៍ លើវិស័យធនាគារ និងវិស័យផ្សេងៗទៀត ។ លោក គិត ម៉េង បានបដិសេធមិនធ្វើសេចក្តីអត្ថាធិប្បាយទេ កាលពីម្សិលមិញ៕
ប្រែសម្រួលដោយ កង សុធា