CATEGORY
ព័ត៌មានជាតិ
លោកនាយករដ្ឋមន្ត្រី ហ៊ុន សែន ព្រមានសកម្មជនជុំវិញបញ្ហាអារ៉ែង
មួយថ្ងៃបន្ទាប់ពីរដ្ឋាភិបាលបាននិរទេសសកម្មជនបរទេសម្នាក់ ដែលប្រឆាំងនឹងគម្រោងសាងសង់ទំនប់វារីអគ្គិសនីក្នុងតំបន់អារ៉ែង ខេត្តកោះកុង កាលពីម្សិលមិញ លោកនាយករដ្ឋមន្ត្រី ហ៊ុន សែន បានជំរុញឲ្យសកម្មជននៅតំបន់អារ៉ែងផ្ដាច់ខ្លួនចេញពីប្រទេសកម្ពុជា ប៉ុន្តែលោកបានព្រមានថា...
កាលពីម្សិលមិញ លោក សុន ឆ័យ អនុប្រធានគណៈកម្មការធនាគារ និងហិរញ្ញវត្ថុនៃរដ្ឋសភា បានចោទប្រកាន់លោក ជាម យៀប ប្រធានគណៈកម្មការនេះថា មានចេតនាគេចវេះមិនកោះហៅប្រធានរដ្ឋបាលនៃរដ្ឋសភាដើម្បីធ្វើការសាកសួរជុំវិញភាពមិនប្រក្រតីនៃការចំណាយ។
កាលពីថ្ងៃទី១១ ខែកុម្ភៈ លោក សុន ឆ័យ បានចោទប្រកាន់លោក ឡេង ប៉េងឡុង អគ្គលេខាធិការនៃរដ្ឋសភាថា ជាអ្នកមើលការខុសត្រូវថវិកាជាតិឆ្នាំ២០១៥ ដែលរួមមានការចំណាយ២៥.០០០ដុល្លារសម្រាប់បង្គោលដងទង់ជាតិមួយដើម និងការទិញរថយន្តថ្មីៗចំនួន៣០ គ្រឿង ដែលក្នុងមួយគ្រឿងៗមានតម្លៃ២០០.០០០ដុល្លារ ហើយបានមានប្រសាសន៍ថា សមាជិកទាំងប្រាំបួនរូបនៃគណៈកម្មការនេះ បានយល់ព្រមកោះហៅលោក ឡេង ប៉េងឡុង ឲ្យចូលខ្លួនដើម្បីធ្វើការបកស្រាយ។
តំណាងរាស្ត្រគណបក្សសង្គ្រោះជាតិរូបនេះ បានមានប្រសាសន៍ថា កាលពីព្រឹកម្សិលមិញ លោកបានជំរុញឲ្យធ្វើការសាកសួរ ប៉ុន្តែ ថា លោក ជាម យៀប តំណាងរាស្ត្រមកពីគណបក្សប្រជាជនកម្ពុជាកំពុងកាន់អំណាច និងដែលត្រូវចុះហត្ថលេខាលើលិខិតកោះហៅលោក ឡេង ប៉េងឡុង មិនបានធ្វើតាមទេ។
លោកបានមានប្រសាសន៍ថា "លោក ជាម យៀប ស្ទាក់ស្ទើរក្នុងការគោរពតាមសេចក្តីសម្រេចរបស់គណៈកម្មការ។ បន្ទាប់ពីកិច្ចប្រជុំកាលពីសប្តាហ៍មុន គាត់បានចាត់តាំងខ្ញុំឲ្យកំណត់កាលបរិច្ឆេទដើម្បីជួបជាមួយលោក ឡេង ប៉េងឡុង ប៉ុន្តែ នៅពេលខ្ញុំកំណត់កាលបរិច្ឆេទរួចហើយ បែរជាគ្មានការឆ្លើយតប។ ខ្ញុំបានសួរគាត់អំពីរឿងនេះកាលពីម្សិលមិញ ហើយគាត់ហាក់ដូចជាមួម៉ៅ ហើយធ្វើដូចជាគាត់មិនសប្បាយចិត្តជាមួយខ្ញុំ។ ខ្ញុំមិនអាចទទួលយកបែបនេះបានទេ ពីព្រោះជាសេចក្តីសម្រេចរបស់គណៈកម្មការដែលសម្រេចថា ត្រូវនាំខ្លួនលោក ឡេង ប៉េងឡុង មកចំពោះមុខគណៈកម្មការដើម្បីធ្វើការសាកសួរ"។
លោក សុន ឆ័យ បានមានប្រសាសន៍ថា លោកនឹងសរសេរលិខិតផ្ញើជូនលោក ហេង សំរិន ប្រធានរដ្ឋសភា ដើម្បីស្នើសុំឲ្យលោកជួយអន្តរាគមន៍ ហើយបង្ខំឲ្យគោរពតាមសេចក្តីសម្រេចរបស់គណៈកម្មការ ប្រសិនបើមិនចេញលិខិតកោះហៅត្រឹមសប្តាហ៍ក្រោយទេនោះ។
លោកបានមានប្រសាសន៍ទៀតថា "ប្រហែលជាត្រូវឡើងទៅហួសគណៈកម្មការនេះហើយមើលទៅ ពីព្រោះលោក ជាម យៀប កំពុងរារាំងវា គាត់បានប្រាប់យើងអំឡុងកិច្ចប្រជុំគណៈកម្មការថា គាត់យល់ថា វិធានការនេះមិនសូវស្រួល ពីព្រោះគាត់មិនចង់ប្រឆាំងអ្នកដែលមានអំណាចនៅក្នុងបក្ស។ យើងប្រហែលជាត្រូវឡើងទៅដល់លោក ហេង សំរិន ឬថ្នាក់កំពូល គឺលោកនាយករដ្ឋមន្ត្រី ហ៊ុន សែន ។ យើងត្រូវតែដោះស្រាយរឿងនេះ"។
លោក ជាម យៀប មិនអាចទាក់ទងសុំការអត្ថាធិប្បាយបានទេ ប៉ុន្តែ លោកស្រី លី គឹមឡេង តំណាងរាស្ត្រមួយរូបទៀតរបស់គណបក្សប្រជាជនកម្ពុជា ដែលជាអគ្គលេខាធិការនៃគណៈកម្មការធនាគារ និងហិរញ្ញវត្ថុនៃរដ្ឋសភា បានបដិសេធថា លោក ជាម យៀប មិនខ្លាចលោក ឡេង ប៉េងឡុង ទេ ហើយបានមានប្រសាសន៍ថា គណៈកម្មការកំពុងរង់ចាំឲ្យលោក សុន ឆ័យ ជ្រើសរើសកាលបរិច្ឆេទ។
លោកស្រីបានលើកឡើងបន្តថា "ទេ វាមិនមែនជាការពិតទេ។ បញ្ហាគឺនៅត្រង់កាលបរិច្ឆេទ។នោះគឺដោយសារតែលោកអគ្គលេខាធិការ មមាញឹកខ្លាំងពេកជាមួយនឹងកិច្ចប្រជុំជាច្រើនក្នុងពេលថ្មីៗនេះ។ ដូច្នេះប្រធានគណៈកម្មការចង់ឲ្យគាត់ កំណត់កាលបរិច្ឆេទច្បាស់លាស់សម្រាប់កិច្ចប្រជុំ។ នៅពេលណាគាត់ផ្តល់កាលបរិច្ឆេទជាក់លាក់ហើយនោះ ពេលនោះយើងអាចជូនដំណឹងទៅអគ្គលេខាអំពីកិច្ចប្រជុំនេះ។ ខ្ញុំគិតថា លោក សុន ឆ័យ អនុប្រធានគណៈកម្មការមានការគោរពគ្នាទៅវិញទៅមកចំពោះលោកប្រធានគណៈកម្មការ ដូច្នេះហើយគាត់ចង់ឲ្យលោកប្រធានជាអ្នកអ្នកសម្រេចកាលបរិច្ឆេទនេះ"។
លោក មិត្ត ការ៉េន អនុប្រធានរបស់លោក ឡេង ប៉េងឡុង បានច្រានចោលការចោទប្រកាន់លើលោក ឡេង ប៉េងឡុង ហើយបានមានប្រសាសន៍ថា ប្រធានរបស់លោកនឹងចូលខ្លួនឆ្លើយបំភ្លឺ ប្រសិនបើមានការកោះហៅ៕សុខុម
គណបក្សហ្វុ៊នស៊ិនប៉ិចខ្វែងគំនិតគ្នាជុំវិញការតែងតាំងអគ្គលេខាធិការ
ព្រះអង្គម្ចាស់ នរោត្ដម រណឫទ្ធិ ជាប្រធានគណបក្សបក្សរាជានិយមហ្វុ៊នស៊ិនប៉ិចដែលត្រូវបានតែងតាំងតែងតាំងថ្មីៗ និងលោក ញឹក ប៊ុនឆៃ អនុប្រធានទី២គណបក្សបានខ្វែងគំនិតគ្នាកាលពីម្សិលមិញជុំវិញសុពលភាពនៃការតែងតាំងលោក សាយ...
អាជ្ញាធរឃាត់រថយន្តផ្ទុកលើសទម្ងន់របស់ក្រុមហ៊ុនលោក ទ្រី ភាព ក្នុងខេត្តក្រចេះ
មន្ត្រីម្នាក់បាននិយាយកាលពីម្សិលមិញថា អាជ្ញាធរខេត្តក្រចេះបានងាកទៅឃាត់ក្បួនរថយន្តជាច្រើនគ្រឿងរបស់ឧកញ៉ា ទ្រី ភាព ដែលដឹកឈើប្រភេទលេខ១លើសទម្ងន់កាលពីថ្ងៃអាទិត្យ ប៉ុន្តែអាចឃាត់បានតែរថយន្តប្រាំគ្រឿងប៉ុណ្ណោះ ដែលត្រូវបានរកឃើញ ដឹកលើសទម្ងន់ជិតពីរដង ដែលអនុញ្ញាតដោយច្បាប់។
លោក...
នៅក្នុងសេចក្តីថ្លែងការណ៍មួយដែលបានចេញកាលពីម្សិលមិញដើម្បីរំឭកដល់ទិវាជាតិយល់ដឹងពីគ្រាប់មីន លោកនាយករដ្ឋមន្ត្រី ហ៊ុន សែន បានក្រើនរំឭកដល់ប្រជាជនកម្ពុជាទាំងអស់ឲ្យប្រុងប្រយ័ត្នចំពោះការកើនឡើងចំនួនគ្រោះថ្នាក់ដោយសារគ្រាប់មីនប្រឆាំងរថក្រោះ។
សេចក្តីថ្លែងការណ៍ដដែលនេះឲ្យដឹងទៀតថា "គ្រាប់មីននិងយុទ្ធភណ្ឌមិនទាន់ផ្ទុះដែលបន្សល់ទុកពីសង្គ្រាមឥណ្ឌូចិន និងជម្លោះផ្ទៃក្នុងនៅក្នុងប្រទេសកម្ពុជារយៈពេលបីទសវត្សរ៍ មិនត្រឹមតែបង្កឲ្យមានសោកនាដកម្មធ្ងន់ធ្ងរដល់អាយុជីវិតប្រជាជនរបស់យើងប៉ុណ្ណោះទេ ថែមទាំងបង្កជាឧបសគ្គក្នុងការស្តារ និងអភិវឌ្ឍជីវភាពរស់នៅរបស់ប្រជាជនទៀតផង"។
លោកនាយករដ្ឋមន្ត្រីបានកត់សម្គាល់ថា ក្នុងរយៈពេល២៣ឆ្នាំចុងក្រោយនេះ គ្រាប់មីនប្រឆាំងមនុស្សជាង១លានគ្រាប់ គ្រាប់មីនប្រឆាំងរថក្រោះ និងយុទ្ធភណ្ឌមិនទាន់ផ្ទុះជាង២.៥០០.០០០គ្រាប់ត្រូវបានបំផ្លាញ។
លោក ហ៊ុន សែន បានលើកឡើងថា ប៉ុន្តែក្នុងរយៈពេលបីឆ្នាំចុងក្រោយនេះ គ្រោះថ្នាក់ដោយសារគ្រាប់មីនប្រឆាំងរថក្រោះបានកើនឡើងដោយសារការប្រើប្រាស់គ្រឿងចក្រធុនធ្ងន់កាន់តែច្រើនឡើង។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជាបានមានប្រសាសន៍ថា គ្រោះថ្នាក់ដោយសារគ្រាប់មីន និងយុទ្ធភណ្ឌមិនទាន់ផ្ទុះបានកើនឡើងពី១១១ករណីក្នុងឆ្នាំ២០១៣ដល់១៥៤ករណីក្នុងឆ្នាំ២០១៤។
លោកបានមានប្រសាសន៍ថា "យើងបានកត់សម្គាល់ឃើញថា គ្រោះថ្នាក់បានកើនឡើងក្នុងឆ្នាំ២០១៤ ជាពិសេសក្នុងខេត្តបាត់ដំបង បន្ទាយមានជ័យ ឧត្តរមានជ័យ និងខេត្តពោធិ៍សាត់ ពីព្រោះប្រជាជនបានងាកទៅប្រើប្រាស់គ្រឿងចក្រធុនធ្ងន់សម្រាប់ការងារកសិកម្មរបស់ខ្លួន"៕សារុន
មន្ត្រីមួយរូបបានលើកឡើងកាលពីម្សិលមិញថា ប្រជាពលរដ្ឋប្រហែល៤០នាក់ដែលអាជ្ញាធរអះអាងថា រស់នៅលើដីរដ្ឋដោយខុសច្បាប់ ត្រូវបានបណ្តេញចេញពីផ្ទះសំបែងរបស់ខ្លួនដើម្បីបើកផ្លូវសម្រាប់គម្រោងតំបន់វប្បធម៌ក្នុងក្រុងសៀមរាប។
លោក ខូយ គឹមទួ ប្រធានក្រុមការងារគណៈកម្មការអន្តរក្រសួងដោះស្រាយគោលនយោបាយដីធ្លីនៃអាជ្ញាធរអប្សរា បានមានប្រសាសន៍ថា អនុក្រឹត្យមួយរបស់រដ្ឋាភិបាលចេញក្រោយការបោះឆ្នោតជាតិឆ្នាំ២០១៣ បានប្រគល់ដីទំហំ១.០០៧ហិកតានៅក្នុងសង្កាត់នគរធំ ឲ្យទៅអាជ្ញាធរនេះសម្រាប់ធ្វើជា "ទីតាំងទេសចរណ៍វប្បធម៌។
លោកបានមានប្រសាសន៍ទៀតថា កាលពីថ្ងៃអង្គារ មន្ត្រី និងនគរបាលប្រហែល៥០នាក់បានចុះទៅដល់កន្លែងតាំងលំនៅដ្ឋានរបស់ប្រជាពលរដ្ឋខាងលើនេះដែលមានផ្ទះចំនួន២៦ដែលភាគច្រើនក្នុងចំណោមនោះត្រូវបានកាន់កាប់តិចជាងពីរឆ្នាំ។
លោកបានមានប្រសាសន៍បន្តថា "នៅពេលនគរបាលបណ្តេញអ្នកភូមិទាំងនេះចេញពួកគេបានប៉ះទង្គិចគ្នាពីរបីនាទី ប៉ុន្តែ មិនបានធ្វើឲ្យនរណាម្នាក់រងរបួសទេ"។
លោក ឈុយ វណ្ណថា អ្នកឃ្លាំមើលនៅអង្គការសិទ្ធិមនុស្សលីកាដូប្រចាំខេត្តសៀមរាបបានទទួលស្គាល់ថា អ្នកភូមិភាគច្រើនជា "អ្នកចំណូលថ្មី" ប៉ុន្តែ បានលើកឡើងថា បីគ្រួសារបានរស់នៅលើទីតាំងេនះតាំងពីឆ្នាំ១៩៩៧មកម្លេ៉ះ។ លោកមានប្រសាសន៍ទៀតថា "ពួកគាត់បានមើលថែដីនេះ ពួកគាត់គួរតែទទួលបានសំណង"។
អ្នកភូមិម្នាក់ឈ្មោះ ភៀង ទូច អាយុ៥៨ឆ្នាំដែលស្ថិតនៅក្នុងចំណោមគ្រួសារទាំងបីនេះបាននិយាយថា "ខ្ញុំនឹងចាកចេញ ពីព្រោះវាជាគម្រោងរបស់ពួកគេ ប៉ុន្តែតើខ្ញុំអាចទៅរស់នៅកន្លែងណាបាន បើខ្ញុំគ្មានលុយផងនោះ?”៕សុខុម
យុវជនមួយក្រុមប្រើកាំបិតកាប់ភ្ញៀវអំឡុងពិធីមង្គលការ ដោយធ្វើឲ្យមនុស្សម្នាក់ស្លាប់
នគរបាលនៅក្នុងខេត្តមណ្ឌលគិរីបានចាប់ខ្លួនយុវជនបីនាក់ បន្ទាប់ពីពួកគេបានសម្រុកចូលក្នុងពិធីមង្គលការមួយក្នុងស្រុកកែវសីមាកាលពីម្សិលមិញ ហើយបានយកកាំបិតកាប់ភ្ញៀវដោយបណ្ដាលឲ្យមនុស្សម្នាក់ស្លាប់។
លោក ស៊ុន ប៊ុនធឿន អធិការនគរបាលស្រុកនេះបានឲ្យដឹងកាលពីម្សិលមិញថា យុវជនអាយុ១៩ឆ្នាំចំនួនបីនាក់ និងបុរសទី៤ម្នាក់ទៀតបានបង្ហាញខ្លួននៅក្នុងពិធីមង្គលការ ក្នុងឃុំមេមង់នៅពេលពាក់កណ្ដាលអធ្រាត្រ។
លោកបានមានប្រសាសន៍ថា...
ចំណុចមិនដាច់ស្រេចនៃកំណែទម្រង់ការបោះឆ្នោតត្រូវបានបញ្ជូនទៅថ្នាក់ដឹកនាំ
ក្រុមការងារកំណែទម្រង់ការបោះឆ្នោតមកពីគណបក្សប្រជាជនកម្ពុជានិងគណបក្សសង្គ្រោះជាតិ កាលពីថ្ងៃច័ន្ទបានបញ្ជូនការមិនព្រមព្រៀងគ្នា១០ចំណុចក្នុងការព្រាងច្បាប់បោះឆ្នោតថ្មីទៅថ្នាក់ដឹកនាំបក្សរបស់ខ្លួនដើម្បីពិភាក្សា។
កាលពីឆ្នាំមុន ក្រុមនេះបានព្រាងច្បាប់ថ្មីមួយដែលបង្កើតគណៈកម្មាធិការជាតិរៀបចំការបោះឆ្នោតទ្វេបក្សថ្មី ហើយតាំងពីពេលនោះមកបាននិងកំពុងធ្វើវិសោធនកម្មច្បាប់បោះឆ្នោតជាតិ ក្នុងបំណងបញ្ជូនច្បាប់ទាំងពីរសុំការយល់ព្រមពីសភារួមគ្នា។
លោក គួយ ប៊ុនរឿន មេដឹកនាំបក្សប្រឆាំងក្នុងការចរចា បានមានប្រសាសន៍ថា គោលដៅខែកុម្ភៈសម្រាប់ដាក់ទៅសភានឹងមិនអាចសម្រេចបានទេ...
អង្គភាពប្រឆាំងអំពើពុករលួយស្វែងរកភ័ស្តុតាងទទួលសំណូកនៅតុលាការ
ប្រធានអង្គភាពប្រឆាំងអំពើពុករលួយរបស់រដ្ឋាភិបាល (ACU) បាននិយាយកាលពីថ្ងៃច័ន្ទថា ខ្លួននឹងស៊ើបអង្កេតថាតើ អតីតប្រធានតុលាការក្រុងភ្នំពេញដែលរបូតតំណែងយ៉ាងទាន់ហន់កាលពីសប្តាហ៍មុននោះ បានទទួលសំណូកទាក់ទិននឹងរឿងក្តីឃាតកម្មដ៏ធំមួយឬយ៉ាងណា។
លោក អាំង មាលតី ត្រូវបានដកចេញជាផ្លូវការពីតំណែងប្រធានតុលាការក្រុងកាលពីថ្ងៃទី១៧ខែកុម្ភៈ...
អង្គការអន្តរជាតិទេសន្តរប្រវេសន៍កាលពីម្សិលមិញបាននិយាយថា ខ្លួនមានគម្រោងជួយដល់ការតាំងទីលំនៅជាថ្មីដ៏ចម្រូងចម្រាសដល់ជនភៀសខ្លួនពីប្រទេសដែនកោះណូរូ មកកាន់ប្រទេសកម្ពុជា ពោលគឺជាលើកទី១ហើយ ដែលអង្គការនេះ បានបញ្ជាក់ពីគោលបំណងរបស់ខ្លួនក្នុងការដើរតួនាទីជាផ្លូវការនៅក្នុងការផ្លាស់ប្តូរទីតាំងជនភៀសខ្លួន។
កាលពីខែកញ្ញា រដ្ឋាភិបាលក្រុងភ្នំពេញ បានទទួលយកសំណើរបស់ក្រុងកង់ប៊ឺរ៉ាក្នុងការតាំងទីលំនៅជនភៀសខ្លួនមួយចំនួន ដែលប្រទេសអូស្ត្រាលី កំពុងឃាត់ទុកនៅក្នុងប្រទេសដែនកោះណូរូ ជាថ្នូរនឹងជំនួយជាទឹកប្រាក់ចំនួន៣៥លានដុល្លារបន្ថែមទៀតសម្រាប់រយៈពេល៤ឆ្នាំទៀត។ នៅពេលដែលព័ត៌មាននៃការចរចាគ្នា បានបែកធ្លាយខ្ចរខ្ចាយកាលពីដើមឆ្នាំទៅមិញនោះ គម្រោងនេះបានទទួលរងការរិះគន់ភ្លាមៗនិងចាស់ដៃពីសំណាក់តំណាងរាស្ត្រគណបក្សប្រឆាំង និងក្រុមសិទ្ធិមនុស្សនៅក្នុងប្រទេសទាំងពីរ ដែលបានចោទប្រទេសអូស្ត្រាលីថា គេចវេះពីការទទួលខុសត្រូវរបស់ខ្លួន ដោយស្វែងរកការបញ្ជូនជនភៀសខ្លួនទៅកាន់ប្រទេសមួយដ៏ក្រតោកយាក និងពុករលួយបំផុតនៅក្នុងតំបន់។
ទោះបីជាមានភាពចម្រូងចម្រាសក៏ដោយ ក៏អង្គការអន្តរជាតិទេសន្តរប្រវេសន៍នេះ បាននិយាយកាលពីខែមុនថា ខ្លួននឹងទទួលយកសំណើរបស់កម្ពុជាដើម្បីជួយ ប្រសិនបើរដ្ឋាភិបាលយល់ព្រមតាមលក្ខខណ្ឌមួយចំនួនរបស់ខ្លួន ប៉ុន្តែអង្គការនេះ បានបដិសេធមិនបញ្ចេញឲ្យដឹងទេនៅពេលនោះ។
នៅក្នុងសេចក្តីថ្លែងការណ៍មួយកាលពីម្សិលមិញ អង្គការអន្តរជាតិទេសន្តរប្រវេសន៍និយាយថា ខ្លួនចាប់ផ្តើមគម្រោងជំនួយ បន្ទាប់ពីកម្ពុជាបានយល់ព្រមតាមលក្ខខណ្ឌទាំងនោះ ដែលរួមមានការផ្តល់ជូនជនភៀសខ្លួននូវឯកសារផ្លូវច្បាប់ ដែលពួកគេត្រូវការដើម្បីទទួលបានការគាំពារផ្នែកសុខភាព រកការងារធ្វើ និងបញ្ជូនកូនរបស់គេទៅសាលារៀនជាដើម។
កង្វះខាតឯកសារសម្រាប់ជនភៀសខ្លួនដែលរស់នៅក្នុងប្រទេសកម្ពុជារួចហើយ បានក្លាយជាចំណុចរិះគន់សំខាន់ៗ ដែលអ្នកប្រឆាំងនឹងកិច្ចព្រមព្រៀងស្តីពីការតាំងទីលំនៅជនភៀសខ្លួន បានប្រើប្រឆាំងតទល់នឹងគម្រោងនោះ។
សេចក្តីថ្លែងការណ៍និយាយថា "អង្គការអន្តរជាតិទេសន្តរប្រវេសន៍បានកសាងបទពិសោធជាសកលអស់រយៈពេលជាង៦៤ឆ្នាំមកហើយ ដោយបានតាំងទីលំនៅជនភៀសខ្លួនរាប់លាននាក់នៅក្នុងប្រទេសថ្មីរបស់គេ។ អង្គការនេះនឹងផ្តល់ជូនសេវាដូចៗគ្នា ក្នុងពេលដែលឋានៈនៃជនអន្តោប្រវេសន៍នៅក្នុងប្រទេសណូរូ ត្រូវបានកំណត់រួចរាល់ហើយ និងប្រសិនបើពួកគេជ្រើសយកការតាំងទីលំនៅថ្មីនៅក្នុងប្រទេសកម្ពុជា"។
ទោះបីជាមន្ត្រីអន្តោប្រវេសន៍ខ្មែរបានទៅប្រទេសណូរូ កាលពីខែមុនក៏ដោយ ក៏គ្មានជនភៀសខ្លួនណាម្នាក់នៅលើកោះនេះ បានយល់ព្រមមករស់នៅក្នុងប្រទេសកម្ពុជាដែរ។
រដ្ឋាភិបាលកម្ពុជាបាននិយាយកាលពីមុនថា ជនភៀសខ្លួនមកពីប្រទេសដែនកោះណូរូ នឹងត្រូវតាំងទីលំនៅនៅក្រៅក្រុង ភ្នំពេញ នៅពេលដែលពួកគេរៀនចេះភាសាខ្មែរ និងឆ្លងការត្រួតពិនិត្យសុខភាពរួចរាល់៕រើន