CATEGORY
ព័ត៌មានជាតិ
តុលាការក្រុងភ្នំពេញលើកពេលសវនាការទាក់ទិននឹងការប៉ះទង្គិចគ្នានៅទីលានប្រជាធិបតេយ្យ
តុលាការក្រុងភ្នំពេញបានលើកពេលសវនាការមនុស្ស១១នាក់ ដែលគ្រោងធ្វើនៅថ្ងៃនេះ ក្នុងនោះមានមន្ត្រីជាន់ខ្ពស់គណបក្សសង្គ្រោះជាតិ គឺលោក មាជ សុវណ្ណារ៉ា ដែលជាប់ចោទពីបទកុបកម្ម និងបទល្មើសផ្សេងទៀតទាក់ទិននឹងការប៉ះទង្គិចគ្នាដ៏បង្ហូរឈាមនៅទីលានប្រជាធិបតេយ្យក្នុងក្រុងភ្នំពេញកាលពីខែកក្កដា។
ការលើកពេលនេះត្រូវបានប្រកាសឲ្យដឹងក្នុងលិខិតមួយពីព្រះរាជអាជ្ញារង លោក...
បុរសជនជាតិដើមភាគតិចម្នាក់រត់គេចខ្លួនបន្ទាប់ពីចាក់គេឲ្យរបួសពីរនាក់នៅមន្ទីរពេទ្យ
នគរបាល និងសាក្សីបានឲ្យដឹងកាលពីម្សិលមិញថា បុរសម្នាក់ដែលមកដេកកំដរប្អូនប្រុសរបស់ខ្លួននៅក្នុងមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ បានចាកមនុស្សពីរនាក់នៅក្នុងបន្ទប់ផ្នែកក្រពះពោះវៀន កាលពីរសៀលថ្ងៃសុក្រ មុនពេលគេចខ្លួនចេញពីអគារមន្ទីរពេទ្យនេះ។
យោងតាមលោក ផន អូន...
ភាពស្ទាក់ស្ទើររបស់រដ្ឋាភិបាលក្នុងការនិរទេសសកម្មជនអង្គការមាតាធម្មជាតិ
មន្ត្រីអន្តោប្រវេសន៍ម្នាក់បាននិយាយកាលពីម្សិលមិញថា នាយកដ្ឋានរបស់លោករង់ចាំបទបញ្ជាពីប្រធាននាយកដ្ឋានរបស់ខ្លួនមុនឈានដល់ការបណ្ដេញសកម្មជនបរិស្ថានលោក អាឡិច ហ្គន់ហ្សាឡេស ដាវីដសុន(Alex Gonzalez-Davidson) ដែលទិដ្ឋាការរបស់លោកត្រូវរដ្ឋាភិបាលបដិសេធមិនបន្តឲ្យទេ បន្ទាប់ពីវាបានអស់សុពលភាពកាលពីថ្ងៃសុក្រ។
រដ្ឋាភិបាលនិយាយថា ខ្លួនមិនបន្តទិដ្ឋាការរបស់ជនជាតិអេស្ប៉ាញរូបនេះទេ...
កាលពីថ្ងៃសៅរ៍ ក្រុមអ្នកភូមិខេត្តបន្ទាយមានជ័យបានធ្វើការតវ៉ាជំទាស់នឹងផែនការរបស់មន្ត្រីយោធាក្នុងមូលដ្ឋានម្នាក់ក្នុងការសាងសង់អាងស្តុកទឹកលើដីរបស់ពួកគាត់ បន្ទាប់មកលក់អាចម៍ដីនោះយកចំណេញ។
អាងស្តុកទឹកនេះនឹងជីកលើផ្ទៃដីទំហំជាង៥២ហិកតាក្នុងសង្កាត់កំពង់ស្វាយ ក្រុងសេរីសោភ័ណដោយឧត្តមសេនីយ៍ត្រី ផ្លុន តារា មេបញ្ជាការកងយោធពលខេមរភូមិន្ទក្នុងខេត្តបន្ទាយមានជ័យ។
យោងតាមអ្នកភូមិឈ្មោះ ណែម ឈុន អាយុ៣៩ឆ្នាំបានឲ្យដឹងថា អ្នកភូមិ១២០នាក់មកពី៨៥គ្រួសារដែលប្រឈមនឹងការបាត់បង់ដីស្រែរបស់ខ្លួនទៅលើអាងស្តុកទឹកនេះបានធ្វើការតវ៉ានៅខាងក្រៅសាលាខេត្តកាលពីថ្ងៃសៅរ៍បន្ទាប់ពីគេបានយកត្រាក់ទ័រមកដល់
ហើយបានចាប់ផ្តើមជីកដី។
អតីតប្រធានសាលាដំបូងរាជធានីឲ្យរថយន្តស៊េរីទំនើបដែលរឹបអូសបានទៅកូនប្រុសរបស់ខ្លួន
នគរបាលជាតិបានលើកឡើងនៅក្នុងសេចក្ដីថ្លែងការណ៍មួយកាលពីម្សិលមិញថា អតីតប្រធានសាលាដំបូងរាជធានីដែលត្រូវបានដកតំណែងកាលពីសប្ដាហ៍មុន ជុំវិញការចោទប្រកាន់ពីបទប្រព្រឹត្តអំពើពុករលួយដ៏ធំបានឲ្យរថយន្តស៊េរីទំនើបមួយគ្រឿងទៅកូនប្រុសរបស់ខ្លួន ដែលជាមន្ត្រីនគរបាលមូលដ្ឋានម្នាក់ បន្ទាប់ពីរថយន្តមួយគ្រឿងនេះត្រូវបានរឹបអូសពីជនសង្ស័យជួញដូរគ្រឿងញៀនម្នាក់។
យោងតាមសេចក្ដីថ្លែងការណ៍នេះ ដែលបង្ហោះនៅលើគេហទំព័ររបស់នគរបាលជាតិបានលើកឡើងថា នគរបាលប្រឆាំងការជួញដូរគ្រឿងញៀនរាជធានីភ្នំពេញ បានចាប់ខ្លួនលោក ថាវ...
កម្មករ៥០នាក់ដួលសន្លប់បន្ទាប់ពីឆេះម៉ាស៊ីននៅរោងចក្រស្បែកជើង
មន្ត្រីសហជីពម្នាក់បាននិយាយកាលពីម្សិលមិញថា កម្មការិនីប្រហែល៥០នាក់បានដួលសន្លប់នៅរោងចក្រស្បែកជើងមួយក្នុងខេត្តកំពង់ឆ្នាំងកាលពីថ្ងៃសៅរ៍នៅពេលឆេះម៉ាស៊ីនបណ្តាលឲ្យមានផ្សែងពេញរោងចក្រ។
លោក យិន សុខុម អនុប្រធានសហជីពសេរីកម្មករនៅរោងចក្រ Long Lead ក្នុងឃុំសេដ្ឋី ស្រុកសាមគ្គីមានជ័យបានមានប្រសាសន៍ថា ម៉ាស៊ីនបានឆេះនៅម៉ោងប្រហែល១រសៀល ថ្ងៃសៅរ៍។
លោក សុខុម បានមានប្រសាសន៍ថា "វាបានបង្កឲ្យមានផ្សែងជាច្រើន... ហើយកម្មករបានឈ្លក់ផ្សែងលាយឡំនឹងក្លិនអាក្រក់នៃក្រណាត់ដែលឆេះ"។ លោកបានបន្ថែមថា កម្មករ២៩នាក់បានដួលសន្លប់បន្ទាប់ពីពន្លត់ភ្លើងរួច ហើយកម្មករប្រហែល២០នាក់ទៀតបានសន្លប់ប្រហែល១៥នាទីក្រោយមក។
មេដឹកនាំសហជីពរូបនេះបានមានប្រសាសន៍ថា កម្មការិនីភាគច្រើនត្រូវបានបញ្ជូនទៅមន្ទីរពេទ្យបង្អែកស្រុក ឬគ្លីនិកក្នុងមូលដ្ឋានកាលពីថ្ងៃសៅរ៍ ប៉ុន្តែនឹងត្រឡប់ទៅកន្លែងរបស់ខ្លួនវិញនៅថ្ងៃនេះ។
លោកបានមានប្រសាសន៍ថា "យើងបានប្តូរម៉ាស៊ីនថ្មីហើយ ហើយកម្មករនឹងធ្វើការដូចធម្មតា។ យើងបានសម្អាតរោងចក្ររួចហើយ"។ តំណាងរោងចក្រមិនអាចទាក់ទងបានទេកាលពីម្សិលមិញ។
រោងចក្រកាត់ដេរមួយដែលកាន់កាប់ដោយចិនតៃវ៉ាន់ក្នុងខេត្តស្វាយរៀងបានបិទជាបណ្តោះអាសន្នកាលពីសប្តាហ៍មុន បន្ទាប់ពីកម្មករជាង១០០នាក់បានដួលសន្លប់ក្នុងចំនួនដ៏ច្រើនពីរលើកផ្សេងគ្នាកាលពីចុងសប្តាហ៍មុន៕សារុន
កាលពីថ្ងៃសុក្រ ក្រសួងរៀបចំដែនដី នគរូបនីយកម្មនិងសំណងបានច្រានចោលតួលេខថ្មីរបស់អង្គការសិទ្ធិមនុស្សលីកាដូ ដែលបង្ហាញពីការកើនឡើងយ៉ាងខ្លាំងអំពីចំនួនគ្រួសារដែលជាប់ពាក់ព័ន្ធនឹងវិវាទដីធ្លីកាលពីឆ្នាំមុន ដោយអះអាងថា តាមពិតវិវាទដីធ្លីបានថយចុះ។
នៅក្នុងរបាយការណ៍កាលពីសប្តាហ៍មុន អង្គការលីកាដូ បានលើកឡើងថា បុគ្គលិករបស់ខ្លួននៅក្នុងខេត្តភាគកណ្តាលនិងខេត្តភាគខាងលិចចំនួន១៣ ដែលខ្លួនបានឃ្លាំមើលបានរាប់ចំនួនអ្នកភូមិ១០.៦២៥គ្រួសារដែលបានជាប់ពាក់ព័ន្ធនៅក្នុងវិវាទដីធ្លីថ្មីៗនិងវិវាទដីធ្លីដែលមានស្រាប់កាលពីឆ្នាំ២០១៤ គឺកើនឡើងបីដងកាលពីឆ្នាំមុន។
កាលពីថ្ងៃសុក្រ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានចោទប្រកាន់អង្គការមិនមែនរដ្ឋាភិបាលនេះថាបានបំប៉ោងតួលេខរបស់ខ្លួនដោយចេតនាដើម្បីទាក់ទាញលទ្ធផល។
លោកបានជំទាស់នឹងរបាយការណ៍របស់អង្គការលីកាដូដោយធ្វើការប្រៀបធៀបចំនួនគ្រួសារថ្មីដែលមានវិវាទដីធ្លីក្នុងឆ្នាំ២០១៤ជាមួយពាក្យបណ្តឹងចំនួន ១.៧៦៦បណ្តឹងដែលអាជ្ញាធរជាតិដោះស្រាយវិវាទដីធ្លីរបស់រដ្ឋាភិបាលបានដោះស្រាយក្នុងរយៈពេលប្រាំបីខែដំបូងនៃឆ្នាំដដែលនោះ។
ជាធម្មតា គ្រួសារជាច្រើនជាប់ពាក់ព័ន្ធក្នុងពាក្យបណ្តឹងតែមួយ ឬវិវាទដីធ្លីតែមួយ ជាការខុសគ្នាដែលលោក ផៃ ស៊ីផាន មិនបានលើកឡើង។
នៅក្នុងសេចក្តីថ្លែងការណ៍កាលពីថ្ងៃសុក្រ គណៈកម្មាធិការសុរិយោដីរបស់ក្រសួងរៀបចំ ដែនដីក៏បានច្រានចោលរបាយការណ៍របស់អង្គការលីកាដូផងដែរ ដោយមិនបានបែងចែកឲ្យដាច់ស្រឡះរវាងគ្រួសារអ្នកភូមិ និងករណីទាំងនោះ។
សេចក្តីថ្លែងការណ៍ដដែលនេះបានឲ្យដឹងទៀតថា "គណៈកម្មាធិការសុរិយោដី បានដោះស្រាយវិវាទដីធ្លីជាបន្តបន្ទាប់ចាប់តាំងពីឆ្នាំ២០០២មក ហើយបានធ្វើឲ្យវិវាទដីធ្លីថយចុះមួយចំនួនពីមួួយឆ្នាំទៅមួយឆ្នាំ ផ្ទុយគ្នាស្រឡះទៅនឹងសេចក្តីប្រកាសរបស់អង្គការលីកាដូ"។
គណៈកម្មាធិការនេះបានលើកឡើងទៀតថា ខ្លួនដោះស្រាយបាន ៦.៥៥៦ ករណីចាប់តាំងពីឆ្នាំ២០០២ ហើយនៅសល់៧៥០ករណីកាលពីចុងឆ្នាំមុន បើប្រៀបធៀបទៅនឹង៩៩០ករណីដែលខ្លួនកំពុងប្រឈមមុខកាលពីចុងឆ្នាំ២០១៣។
នៅពេលត្រូវបានទាក់ទងកាលពីម្សិលមិញ លោក វុទ្ធី វណ្ណារ៉ា ប្រធានគណៈកម្មាធិការសុរិយោដីបានបដិសេធមិនផ្តល់ព័ត៌មានលម្អិតណាមួយស្តីពីថាតើករណីទាំងនេះត្រូវបានដោះស្រាយដូចម្តេចនោះឡើយ។
នៅពេលត្រូវបានសួរដដែលៗថា តើមានអ្នកភូមិប៉ុន្មានគ្រួសារជាប់ពាក់ព័ន្ធនៅក្នុងករណីដែលនៅសេសសល់ចំនួន៧៥០ករណី លោកបានគេចវេះមិនឆ្លើយសំណួរនេះទេ។
លោក វណ្ណារ៉ា បានមានប្រសាសន៍ថា គណៈកម្មាធិការរបស់លោកបានស្នើសុំច្បាប់ចម្លងនៃទិន្នន័យថ្មីបំផុតរបស់អង្គការលីកាដូដើម្បីយកទៅសិក្សាឲ្យបានល្អិតល្អន់បន្ថែមទៀត។
លោកបានមានប្រសាសន៍ថា "ខ្ញុំបានសុំឲ្យអង្គការលីកាដូផ្តល់តួលេខលម្អិតស្តីពីវិវាទដីធ្លីបន្ថែមទៀតរួចហើយ ដើម្បីយើងអាចប្រៀបធៀបជាមួយតួលេខដែលក្រសួងត្រូវរកឲ្យឃើញថាតើ តួលេខរបស់អង្គការនេះនៅក្នុងរបាយការណ៍ត្រូវឬខុស។ លោកបានមានប្រសាសន៍ថា បន្ទាប់មក យើងនឹងបញ្ជូនលទ្ធផលទៅអ្នកនាំពាក្យក្រសួងរៀបចំដែនដី"។
អង្គការលីកាដូ បានលើកឡើងកាលពីម្សិលមិញថា ខ្លួននឹងផ្តល់ទិន្នន័យតាមការស្នើសុំដល់ក្រសួងនេះនៅសប្តាហ៍នេះ៕សារុន
អង្គការលីកាដូរកឃើញថា វិវាទដីធ្លីមានការកើនឡើងខ្លាំងក្នុងឆ្នាំ២០១៤
អង្គការមិនមែនរដ្ឋាភិបាលបានលើកឡើងកាលពីម្សិលមិញថា ចំនួននៃគ្រួសារដែលរងផលប៉ះពាល់ដោយវិវាទដីធ្លីថ្មីកាលពីឆ្នាំមុនបានកើនឡើងដល់ជាង១០.០០០គ្រួសារ នៅក្នុងខេត្តចំនួន១៣ដែលអង្គការសិទ្ធិមនុស្សលីកាដូបានឃ្លាំមើល ពោលគឺកើនឡើង៣ដងបើធៀបទៅនឹងឆ្នាំ២០១៣ ដែលវិវាទដីធ្លីមានភាពស្ងប់ស្ងាត់មួយរយៈ ដោយសារេហតុផលនយោបាយ។
យោងតាមសេចក្ដីថ្លែងការណ៍មួយចេញដោយអង្គការសិទ្ធិមនុស្សលីកាដូបានលើកឡើងថា អ្នកឃ្លាំមើលរបស់ខ្លួននៅតំបន់ភាគកណ្ដាល និងភាគខាងលិចនៃប្រទេសកម្ពុជាបានសិក្សារកឃើញថា មានអ្នកភូមិចំនួន១០.៦២៥គ្រួសារបានជាប់ពាក់ព័ន្ធនៅក្នុងវិវាទដីធ្លីថ្មី...
ប្រវត្តិអតីតកាលរបស់ចៅក្រមផ្តល់នូវសេចក្តីសង្ឃឹមតិចតួចដល់កំណែទម្រង់ពិតប្រាកដ
ក្នុងការបណ្តេញចេញពីមុខតំណែងដ៏លេចធ្លោបំផុតចាប់តាំងពីលោកនាយករដ្ឋមន្ត្រី ហ៊ុន សែន បានសន្យាកម្ចាត់អំពើពុករលួយក្នុងជួររដ្ឋាភិបាល បន្ទាប់ពីគណបក្សប្រជាជនកម្ពុជាបាត់បង់សំឡេងឆ្នោតដ៏ច្រើនរបស់ខ្លួន ក្នុងការបោះឆ្នោតខែកក្កដាឆ្នាំ២០១៣មកនោះ ប្រធានតុលាការក្រុងភ្នំពេញត្រូវបានដកចេញពីតំណែងនៅសប្តាហ៍នេះ ចំពេលមានការអះអាងថា ប្រាក់រាប់លានដុល្លារបានធ្វើឲ្យមានការប្រែក្រឡាស់សាលក្រមសុំនៅក្រៅឃុំ។
សេចក្តីសម្រេចកាលពីថ្ងៃអង្គារ...
កាលពីយប់មិញ កងរាជអាវុធហត្ថខេត្តតាកែវ បានចាប់ខ្លួនឧត្តមសេនីយ៍មួួយរូបដែលជាមនុស្សជំនិតរបស់លោក អាំង មាលតី ប្រធានសាលាដំបូងរាជធានីភ្នំពេញ ដែលត្រូវបានដកចេញពីតំណែងជាផ្លូវការកាលពីថ្ងៃពុធ ចំពេលមានការចោទប្រកាន់ពីបទអំពើពុករលួយ
ដ៏ធំ។
ឧត្តមសេនីយ៍ត្រី ឡា ឡាយ មេបញ្ជាការកងរាជអាវុធហត្ថខេត្តតាកែវ បានមានប្រសាសន៍ថា កូនចៅរបស់លោកបានសហការជាមួយកងរាជអាវុធហត្ថលើផ្ទៃប្រទេសដើម្បីចាប់ខ្លួនឧត្តមសេនីយ៍ត្រី ពេជ្រ ព្រហ្មមុន្នី នាយសេនាធិការរងនៃកងកងទ័ពជើងគោក។
លោកបានមានប្រសាសន៍ថា "យើងបានសហការជាមួយកងរាជអាវុធហត្ថលើផ្ទៃប្រទេសដើម្បីចាប់ខ្លួន ពេជ្រ ព្រហ្មមុន្នី នៅឃុំរវៀង ស្រុកសំរោង។ ខ្ញុំមិនដឹងពីមូលហេតុទេ អស់លោកអាចសួរទៅកងរាជអាវុធហត្ថលើផ្ទៃប្រទេសបាន"។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានមានប្រសាសន៍កាលពីយប់មិញថា ឧត្តមសេនីយ៍ ពេជ្រ ព្រហ្មមុន្នី ត្រូវបានឃាត់ខ្លួនក្រោយពីមានដីកាឃាត់ខ្លួនចេញដោយសាលាដំបូងរាជធានីភ្នំពេញ។
លោកបានមានប្រសាសន៍ថា "យើងបានចាប់ខ្លួនគាត់នៅម៉ោងប្រហែល៦ល្ងាច ហើយយើងបាននាំខ្លួនគាត់ទៅកាន់សាលាដំបូងរាជធានីភ្នំពេញ។ គាត់ត្រូវបានចោទប្រកាន់ពីបទរារាំងការងារមន្ត្រីសាធារណៈ"។
លោក អាំង មាលតី ត្រូវបានដកចេញពីតំណែងជាផ្លូវការក្នុងថ្ងៃដែលលោកនាយករដ្ឋមន្ត្រី ហ៊ុន សែន បានលើកឡើងនៅក្នុងសុន្ទរកថាជាសាធារណៈថា ការសូកប៉ាន់ប្រាក់ចំនួន៥លានដុល្លារប្រហែលជាបានបណ្តាលឲ្យសាលាដំបូងរាជធានីកែប្រែសេចក្តីរបស់ខ្លួនក្នុងការច្រានចោលសំណើសុំនៅក្រៅឃុំសម្រាប់ឪពុកម្តាយរបស់ឧត្តមសេនីយ៍ទោ ថោង សារ៉ាត់ ដែលជាប់ចោទថាជាមេខ្លោងនៅពីក្រោយការធ្វើឃាតឧកញ៉ា អឹុង ម៉េងជឺ កាលពីខែវិច្ឆិកា។
លោក ខេង ទីតូ បានលើកឡើងបន្ថែមនៅលើទំព័រហ្វេសប៊ុកផ្ទាល់ខ្លួនរបស់លោកថា ឧត្តមសេនីយ៍ត្រី ពេជ្រ ព្រហ្មមុន្នី ត្រូវបានចាប់ខ្លួន ខណៈកំពុងបួងសួងនៅវត្តប្រាសាទនាងខ្មៅក្នុងស្រុកសំរោង ហើយក៏បានបង្ហោះវីដេអូរូបឧត្តមសេនីយ៍ត្រី ពេជ្រ ព្រហ្មមុន្នី ដែលពាក់អាវកបើកពណ៌ស និងមួកកាតិប ពណ៌ក្រហមពេលទៅដល់សាលាដំបូងរាជធានីភ្នំពេញ។
លោកបានមានប្រសាសន៍តាមទូរស័ព្ទថា "គាត់ត្រូវបានចោទប្រកាន់ពីបទរារាំងការងារមន្ត្រីសាធារណៈ និងពីបទប្រើប្រាស់ស្លាកលេខខេមរភូមិន្ទមិនត្រឹមត្រូវ"។ នៅពេលសាកសួរថា តើការចាប់ខ្លួននេះជាប់ពាក់ព័ន្ធនឹងការដោះលែងឪពុកម្តាយរបស់ ថោង សារ៉ាត់ ឲ្យនៅក្រៅឃុំ ឬយ៉ាងណានោះ លោក ខេង ទីតូ បានមានប្រសាសន៍ថា "មែន" ។
ឧត្តមក្រុមប្រឹក្សានៃអង្គចៅក្រមបានដក អាំង មាលតី ចេញពីតំណែងប្រធានសាលាដំបូងរាជធានីភ្នំពេញកាលពីថ្ងៃអង្គារ ពោលគឺតែប៉ុន្មានម៉ោងប៉ុណ្ណោះបន្ទាប់ពីលោកនាយករដ្ឋមន្ត្រី ហ៊ុន សែន ពានរិះគន់លោកខ្លាំងៗចំពោះការដោះស្រាយសំណុំរឿងដ៏ក្រក្រើកមួយប្រឆាំង ថោង សារ៉ាត់ ដែលជាប់ចោទថា ជាមេខ្លោងនៅពីក្រោយករណីធ្វើឃាតឧកញ៉ា អឹុង ម៉េងជឺ។
នៅពេលសាកសួរថា តើការចាប់ខ្លួនកាលពីម្សិលមិញពាក់ព័ន្ធនឹងការដោះខ្លួនឪពុកម្តាយរបស់ ថោង សារ៉ាត់ ដែលជាប់ចោទពីបទរក្សាទុកអាវុធខុសច្បាប់ និងដែលត្រូវបានចាប់ខ្លួនឡើងវិញកាលពីថ្ងៃអាទិត្យខណៈកំពុងព្យាយាមរត់គេចខ្លួនទៅកាន់ប្រទេសវៀតណាម ក្រោយពីទទួលបានការដោះលែងនៅក្រៅឃុំកាលពីដើមខែនេះ ឬយ៉ាងណានោះ លោក ខេង ទីតូ បានឆ្លើយថា "មែន"។
អ្នកនាំពាក្យកងរាជអាវុធហត្ថរូបនេះបានសរសេរនៅទំព័រហ្វេសប៊ុកផ្ទាល់ខ្លួនរបស់លោកកាលពីយប់មិញថា ឧត្តមសេនីយ៍ ពេជ្រ ព្រហ្មមុន្នី ត្រូវបានចាប់ខ្លួនខណៈកំពុងបួងសួងនៅវត្តប្រាសាទនាងខ្មៅ ក្នុងស្រុកសំរោង ហើយក៏បានបង្ហោះវីដេអូមួយបង្ហាញពីសកម្មភាពឧត្តមសនីយ៍ ពេជ្រ ព្រហ្មមុន្នី ពាក់អាវកបើក និងមួកកាតឹបពណ៌ក្រហមទៅដល់សាលាដំបូងរាជធានីផងដែរ។
លោក អាំង មាលតី ដែលបានឡើងកាន់តំណែងជាប្រធានសាលាដំបូងរាជធានីកាលពីខែមេសា បានស្នើសុំឧត្តមសេនីយ៍ត្រី ពេជ្រ ព្រហ្មមុន្នី កាលពីខែកក្កដាឲ្យមក "ជួយផ្តល់សន្តិសុខ និងរក្សាសណ្តាប់ធ្លាប់សាធារណៈនៅសាលាដំបូងរាជធានីភ្នំពេញ" នេះបើយោងតាមលិខិតមួយច្បាប់ដែលលោកបានផ្ញើជូនលោក មាស សុភា អគ្គមេបញ្ជាការរងនៃកងយោធពលខេរភូមិន្ទ។
កាលពីយប់មិញ ឧត្តមសេនីយ៍ត្រី ពេជ្រ ព្រហ្មមុន្នី បានស្ថិតនៅក្នុងសាលាដំបូងរាជធានីនៅឡើយ ហើយឧត្តមសេនីយ៍ត្រី ខេង ទីតូ បានមានប្រសាសន៍ថា លោក ពេជ្រ ព្រហ្មមុន្នី នឹងត្រូវឃុំខ្លួននៅទីបញ្ជាការកងរាជអាវុធហត្ថលើផ្ទៃប្រទេស នៅពេលព្រះរាជអាជ្ញារង លី សុផាណា បញ្ចប់ការសាកសួរគាត់។ ចំណែកឯលោក លី សុផាណា មិនអាចទាក់ទងសុំការបំភ្លឺបានទេពាក់ព័ន្ធនឹងបញ្ហានេះ៕សុខុម