CATEGORY
ព័ត៌មានជាតិ
ក្រសួងនៅតែមិនច្បាស់លាស់ជុំវិញអ្នកដែលចាំបាច់ត្រូវមានលិខិតអនុញ្ញាតបម្រើការងារ
ប្រហែលបីសប្ដាហ៍បន្ទាប់ពីក្រសួងមហាផ្ទៃ និងក្រសួងការងារបានប្រកាសបង្ក្រាបជនបរទេសដែលគ្មានលិខិងអនុញ្ញាតបម្រើការងារ នៅសប្ដាហ៍នេះមន្ត្រីអាចផ្ដល់ចម្លើយបានតិចតួចប៉ុណ្ណោះស្ដីពីវិធីដែលជនបរទេសអាចអនុវត្តតាមច្បាប់ការងាររបស់ប្រទេសកម្ពុជា។
យោងតាមច្បាប់ការងារឆ្នាំ១៩៩៧ ជនបរទេសទាំងអស់ដែលធ្វើការនៅក្នុងប្រទេសកម្ពុជា ត្រូវបានតម្រូវឲ្យមានលិខិតអនុញ្ញាតបម្រើការងារ ប៉ុន្តែច្បាប់នេះមិនត្រូវបានអនុវត្តរហូតមកទល់នឹងពេលថ្មីៗនេះ។ ច្បាប់នេះមិនមានចែងអំពីនិវត្តន៍ជន ឬជនបរទេសដែលរស់នៅក្នុងប្រទេសកម្ពុជា ប៉ុន្តែដែលទទួលបានប្រាក់ចំណូលពីបរទេសឡើយ។
ឧត្ដមសេនីយ៍ឯក...
នៅពេលភាពហ្មងសៅនៅតែបន្តកើតមានក្នុងចំណោមអ្នកភូមិដែលធ្វើតេស្តឈាមរកឃើញថាមានផ្ទុកមេរោគអេដស៍នៅក្នុងឃុំរកា ខេត្តបាត់ដំបង គ្រួសាររបស់គ្រូពេទ្យគ្មានអាជ្ញាប័ណ្ណ ដែលត្រូវបានចោទប្រកាន់ពីបទធ្វើឲ្យមេរោគអេដស៍ឆ្លងរាលដាលបានភៀសខ្លួនចេញពីផ្ទះ ព្រោះព្រួយបារម្ភអំពីសុវត្ថិភាពរបស់ខ្លួន។
អ្នកភូមិជាង២០០នាក់ដែលរស់នៅក្នុងឃុំរកាស្រុកសង្កែ បានធ្វើតេស្តឈាមរកឃើញថាមានផ្ទុកមេរោគអេដស៍ ចាប់តាំងពីការធ្វើតេស្តឈាមបានចាប់ផ្តើមកាលពីដើមខែធ្នូមក។ មូលហេតុដែលបណ្តាលឲ្យមេរោគអេដស៍ឆ្លងរាលដាលនេះនៅមិនទាន់ដឹងនៅឡើយទេ ប៉ុន្តែ ការសិក្សាដឹកនាំដោយរដ្ឋាភិបាល ដែលត្រូវបានចេញកាលពីថ្ងៃសុក្រ សន្និដ្ឋានថា មេរោគអេដស៍នេះ ភាគច្រើនទំនងជាឆ្លងតាមរយៈការចាក់ឆ្នាំ ឬការព្យួរសេរ៉ូម។
លោក យ៉ែម ជ្រិន គ្រូពេទ្យគ្មានអាជ្ញាប័ណ្ណដែលព្យាបាលអ្នកភូមិអស់ជាច្រើននាក់តាមរយៈការចាក់ថ្នាំ និងដែលសារភាពថា បានប្រើសឺរ៉ាំងឡើងវិញជាច្រើនលើកច្រើនសាត្រូវផ្តន្ទាទោសឲ្យជាប់ពន្ធនាគារពីបទមនុស្សឃាត កាលពីថ្ងៃទី២២ ខែធ្នូ។
អ្នកស្រី ជ្រិន រក្សា កូនស្រីរបស់លោក យ៉ែម ជ្រិន បានឲ្យដឹងកាលពីម្សិលមិញថា អ្នកភូមិដែលពោរពេញដោយកំហឹងមួយក្រុមបានគំរាមប្រើអំពើហិង្សាលើគ្រួសាររបស់គាត់កាលពីចុងសប្តាហ៍មុន។
អ្នកស្រីបាននិយាយថា "បុរសប្រហែលប្រាំពីរនាក់ប្រដាប់ដោយកាំបិត និងពូថៅបានមកផ្ទះរបស់យើង។ ពួកគេបានស្រែក ហើយទាត់បាវអង្ករទាល់តែរហែកអស់មួយបាវ។ ខ្ញុំនៅផ្ទះតែម្នាក់ឯងជាមួយកូនអាយុ៣ឆ្នាំ ខណៈប្តីរបស់ខ្ញុំចេញទៅធ្វើការនៅខាងក្រៅ"។
អ្នកស្រី រក្សា បានលើកឡើងទៀតថា បន្ទាប់មកអ្នកភូមិមួយក្រុមបានរៀបចំការជួបប្រជុំមួយកាលពីថ្ងៃច័ន្ទ ដើម្បីស្នើឲ្យអាជ្ញាធរបិទកន្លែងលក់គ្រឿងទេសនៅផ្ទះរបស់អ្នកស្រី។
លោក ជិន រ៉ាំង នាយប៉ុស្តិ៍ឃុំបានបញ្ជាក់ថា ពិតជាមានការជួបប្រជុំគ្នាបែបនេះមែន ប៉ុន្តែ ថា លោកមិនដឹងថា អ្នកភូមិបានប៉ុនប៉ងបំភិតបំភ័យកូនស្រីរបស់គ្រូពេទ្យគ្មានអាជ្ញាប័ណ្ណរូបនេះឡើយ។
លោក ជិន រ៉ាំង ដែលបានចូលរួមនៅក្នុងការជួបប្រជុំគ្នានេះ ដើម្បីប្រាប់ឲ្យអ្នកភូមិស្ងប់ចិត្តបានមានប្រសាសន៍ថា "ពួកគាត់ បានរៀបចំការជួបប្រជុំមួយ ហើយបានពិភាក្សាជាមួយអាជ្ញាធរដើម្បីស្នើឲ្យបិទផ្ទះ និងកន្លែងលក់ដូររបស់អ្នកស្រី រក្សា "។
លោក ជិន រ៉ាំង បានលើកឡើងថា លោកបានចុះទៅសួរសុខទុក្ខអ្នកស្រី រក្សា បន្ទាប់ពីការជួបប្រជុំរួច ហើយបានណែនាំឲ្យគាត់បិទកន្លែងរកស៊ីជាបណ្តោះអាសន្ន ហើយចាកចេញពីផ្ទះសិន។
លោកបានមានប្រសាសន៍បន្ថែមថា "ខ្ញុំបានស្នើឲ្យម្ចាស់ផ្ទះបិទផ្ទះរបស់ខ្លួនដើម្បីសុវត្ថិភាពរបស់ពួកគេ។ ប្រសិនបើខ្ញុំមិនស្នើឲ្យមានការបិទផ្ទះនោះទេ អ្នកភូមិនឹងនាំគ្នាតវ៉ានៅទីនោះ"។
អ្នកស្រី រក្សា បានឲ្យដឹងថា បន្ទាប់ពីចាក់សោផ្ទះរួច កាលពីថ្ងៃច័ន្ទ អ្នកស្រីបានចាកចេញពីផ្ទះទាំងគ្រួសារទៅរស់នៅក្នុងផ្ទះម្តាយក្មេករបស់អ្នកស្រី។
អ្នកស្រីបាននិយាយថា "ខ្ញុំព្រួយបារម្ភអំពីសុវត្ថិភាពរបស់គ្រួសារខ្ញុំ។ ខ្ញុំមិនឲ្យកូនស្រីរបស់ខ្ញុំចេញក្រៅតែម្នាក់ឯងដូចពីមុនឡើយ ព្រោះខ្ញុំខ្លាចគេចាប់ធ្វើបាបនាង។ ខ្ញុំពិបាករស់នៅកន្លែងនេះខ្លាំងណាស់ឥឡូវនេះ។ ខ្ញុំធុញទ្រាន់នឹងជីវិតណាស់"៕ស៊ុយឈាង
តុលាការផ្តន្ទាទោសក្រុមភេរវជន ហើយបញ្ជូនទៅតុលាការ
កាលពីម្សិលមិញ សាលាដំបូងរាជធានីភ្នំពេញបានផ្តន្ទាទោសលោក សួន សេរីរដ្ឋា អ្នកប្រឆាំងដែលនិរទេសខ្លួនឯងពីបទញុះញង់ឲ្យមានផែនការផ្តួលរំលំរដ្ឋាភិបាល និងរារាំងការបោះឆ្នោត ចំណែកអ្នកឃុបឃិតបីនាក់ទៀតក៏ត្រូវបានកាត់ឲ្យជាប់ទោសពីបទមានផែនការផ្តួលរំលំ និងរារាំងការបោះឆ្នោតផងដែរ។
អ្នកទាំងបួនត្រូវបានផ្តន្ទាទោសឲ្យជាប់ពន្ធនាគារពីប្រាំឆ្នាំដល់ប្រាំពីរឆ្នាំពីបទចោទប្រកាន់មួយចំនួនដែលកើតចេញពីពីការខិតខំប្រឹងប្រែងរបស់ខ្លួនក្នុងការចែកផ្កា និងអាវយឺតចំពេលដែលមានភាពចលាចលនៃការបោះឆ្នោតកាលពីឆ្នាំ២០១៣។
អង្គការសិទ្ធិមនុស្សលីកាដូបានលើកឡើងថា ករណីប្រឆាំងបុរសទាំងនេះដែលព្រះរាជអាជ្ញាបានលើកឡើងថា ជាសមាជិកក្រុមប្រឆាំងដែលហៅថា ចលនាអំណាចពលរដ្ឋខ្មែរនោះ គឺជាហេតុផលនយោបាយ។
លោក តុប ឈុនហេង ចៅក្រុមប្រធានក្រមប្រឹក្សាជំនុំជម្រះបានប្រកាសប្រាប់តុលាការថា "យើងសម្រេចផ្តន្ទាទោសលោក សួន សេរីរដ្ឋា ឲ្យជាប់ពន្ធនាគារប្រាំពីរឆ្នាំ ពីបទញុះញង់ឲ្យប្រព្រឹត្តបទឧក្រិដ្ឋ មានផែនការផ្តួលរំលំរដ្ឋាភិបាល និងរារាំងប្រជាជនកុំឲ្យទៅបោះឆ្នោត និងពិន័យជាប្រាក់២៥លានរៀល"។
លោក សួន សេរីរដ្ឋា ដែលរស់នៅសហរដ្ឋអាមេរិក និងធ្វើដំណើរទៅប្រទេសថៃជាញឹកញាប់នោះត្រូវបានផ្តន្ទាទោសកំបាំងមុខ ហើយលោកកំពុងស្ថិតនៅក្រៅប្រទេសនៅឡើយ។ បុរសបីនាក់ទៀតកំពុងត្រូវឃុំខ្លួន ហើយនឹងចាប់ផ្តើមអនុវត្តទោសរបស់ខ្លួន។ លោក សេង សុខម៉េង ត្រូវបានផ្តន្ទាទោសឲ្យជាប់ពន្ធនាគាររយៈពេលប្រាំមួយឆ្នាំ។ លោក សេរី ប៊ុនឡុង និងលោក អ៊ំុ ភារុណ ត្រូវបានផ្តន្ទាទោសឲ្យជាប់ពន្ធនាគារក្នុងម្នាក់ៗប្រាំឆ្នាំ។
បុរសទាំងបីនាក់ដែលត្រូវផ្តន្ទាទោសឲ្យជាប់ ពន្ធនាគារនេះ ពាក់ព័ន្ធអាវយឺតរបស់ចលនាអំណាចពលរដ្ឋខ្មែរ ដែលពួកគេបានដឹកយកទៅចែកក្នុងខេត្តបាត់ដំបងកាលពីឆ្នាំ២០១៣ ដោយមានរូបសញ្ញារបស់ក្រុមនេះ និងសារជំរុញឲ្យប្រជាជនកុំទៅបោះឆ្នោតនៅក្នុងការបោះឆ្នោតជាតិនាពេលខាងមុខ។ ពួកគេក៏មានរបស់របរម៉ាកចលនាអំណាចពលរដ្ឋខ្មែរផ្សេងទៀត រួមមាននាឡិកាដៃ និងវិទ្យុផងដែរ។
លោក សួន សេរីរដ្ឋា ដែលបានរៀបចំបោះពុម្ពអាវយឺតនិងរបស់របរផ្សេងៗទៀតក៏ត្រូវបានផ្តន្ទាទោសពីបទ ញុះញង់ចំពោះការប៉ុនប៉ងចែកផ្កាកុលាបពណ៌លឿងចំនួន១.០០០ទងដល់ប្រជាជន និងទាហាននៅក្នុងរាជធានីភ្នំពេញផងដែរ បន្ទាប់ ពីការបោះឆ្នោតដ៏ចម្រូងចម្រាស។
ផ្កាកុលាបទាំងនោះ មានទាំងស្ទីកគ័រ ជំរុញឲ្យកម្លាំងសន្តិសុខ "បែរកាណុងកាំភ្លើងរបស់ខ្លួនដាក់ជនផ្តាច់ការ" ដោយសំដៅដល់លោកនាយករដ្ឋមន្ត្រី ហ៊ុន សែន។
ក្រុមប្រឆាំងនេះបានសារភាពជាចំហចំពោះការចង់ជំរុញឲ្យមានការប៉ះបោរបែបអារ៉ាប់ស្ព្រីង ដើម្បីបណ្តេញលោក ហ៊ុន សែន ចេញពីអំណាច ប៉ុន្តែ បានច្រានចោលការប្រើប្រាស់អំពើហិង្សា។ លោកបានលើកឡើងថា ការអំពាវនាវដល់ទាហាន និងនគរបាលគឺដើម្បីជំរុញឲ្យពួកគេការពារសាធារណជនកុំឲ្យមានការរំលោភបំពានសិទ្ធិមនុស្សពីសំណាក់លោកនាយករដ្ឋមន្ត្រីតែប៉ុណ្ណោះ។
មានប្រសាសន៍ពីទីក្រុងបាងកក បន្ទាប់ពីការប្រកាសសាលក្រម លោក សួន សេរីរដ្ឋា បានអះអាងម្តងទៀតពីភាពគ្មានទោសរបស់លោក ហើយបានលើកឡើងថា លោកនឹងប្តឹងឧទ្ធរណ៍។
លោកបានមានប្រសាសន៍ថា "ខ្ញុំមិនដែលប្រព្រឹត្តបទឧក្រិដ្ឋណាមួយឡើយ...។ សាលក្រមផ្តន្ទាទោសនេះ ខ្ញុំមិនអាចទទួលយកបានឡើយ។ សវនាការជំនុំជម្រះនេះ មិនយុត្តិធម៌សម្រាប់រូបខ្ញុំទេ មិនត្រឹមតែសម្រាប់រូបខ្ញុំប៉ុណ្ណោះទេ ថែមទាំងសម្រាប់សកម្មជនរបស់ខ្ញុំនៅក្នុងពន្ធនាគារទៀតផង"។
នៅពេលចាកចេញពីតុលាការ បន្ទាប់ពីការផ្តន្ទាទោស លោក ប៊ុនឡុង បាននិយាយថា លោកក៏នឹងប្តឹងឧទ្ធរណ៍ដែរ។
លោកបានមានប្រសាសន៍ថា "សេចក្តីសម្រេចេនះមិនសមហេតុផល និងមិនយុត្តិធម៌ឡើយ ពីព្រោះខ្ញុំគ្រាន់តែចែកអាវយឺត និងវិទ្យុតែប៉ុណ្ណោះ។ ខ្ញុំមិនអាចទទួលយកបានទេ ហើយខ្ញុំនឹងប្តឹងឧទ្ធរណ៍។
អំឡុងសវនាការជំនុំជម្រះរយៈពេលពីរថ្ងៃ លោក ប៊ុនឡុង និងលោក សុខម៉េង បានទទួលស្គាល់ថា បានដឹករបស់របររបស់ចលនាអំណាចពលរដ្ឋខ្មែរជាច្រើនកញ្ចប់មែន ប៉ុន្តែ បានលើកឡើងថា ពួកគាត់មិនដឹងថា នៅក្នុងកញ្ចប់នោះមានអ្វីនោះឡើយ ហើយបានបដិសេធថា លោកមិនបានចូលរួមក្នុងក្រុមរបស់លោក សួន សេរីរដ្ឋា ឡើយ។
លោក ភារុណ បានបដិសេធថា លោកមិនបានចែកកញ្ចប់ណាមួយ ឬបានចូលរួមក្នុងចលនាអំណាចពលរដ្ឋខ្មែរឡើយ។
លោក សុក សំអឿន មេធាវីតំណាងបុរសទាំងបួននាក់បានមានប្រសាសន៍ថា កូនក្តីរបស់លោកគ្រាន់តែចង់ប្រើប្រាស់សិទ្្ធិរបស់ខ្លួនតាមរដ្ឋធម្មនុញ្ញតែប៉ុណ្ណោះ។
លោកបានមានប្រសាសន៍ដល់សាលក្រមនេះថា វាបង្ហាញថា នៅក្នុងប្រទេសកម្ពុជាមិនមានសេរីភាពក្នុងការបញ្ចេញមតិឡើយ ពីព្រោះការបញ្ចេញមតិបានក្លាយជាការរៀបចំផែនការអាក្រក់ទៅវិញ"។
លោក អំ សំអាត អ្នកគ្រប់គ្រងផ្នែកបច្ចេកទេសនៅអង្គការលីកាដូដែលបានចូលរួមក្នុងសវនាការជំនុំជម្រះនោះ បានមានប្រសាសន៍ថា រដ្ឋាភិបាលមិនបានបង្ហាញភ័ស្តុតាងគួរឲ្យទុកចិត្តទាក់ទងបទឧក្រិដ្ឋមកលើបុរសទាំងនោះឡើយ ហើយថា ករណីនេះគឺជាហេតុផលនយោបាយ។
លោកបានមានប្រសាសន៍ថា "អ្នកដែលត្រូវចាប់ដាក់ពន្ធនាគារជាមនុស្សស្លូតត្រង់ ។ 'សូមបញ្ឈប់ការប្រើប្រាស់ប្រជាជនជាឧបករណ៍នយោបាយទៀតទៅ'”។
គេមិនទាន់ច្បាស់ភ្លាមៗទេថា តើប្រទេសកម្ពុជាមានគម្រោងសុំឲ្យប្រទេសថៃឃាត់ខ្លួន និងធ្វើបត្យាប័ណ្ណលោក សួន សេរីរដ្ឋា ឬយ៉ាងណានោះឡើយ។ ក្រុមមន្ត្រីនៅក្រសួងមហាផ្ទៃ បានបដិសេធមិនធ្វើអត្ថាធិប្បាយ ឬអាចទាក់ទងបានឡើយ។
បើទោះជាករណីនេះប្រឆាំងរូបលោកក៏ដោយ ក៏លោក សួន សេរីរដ្ឋា កំពុងព្យាយាមចុះឈ្មោះគណបក្សនយោបាយនៅក្នុងប្រទេសកម្ពុជា គឺគណបក្សអំណាចខ្មែរផងដែរ៕សារុន(រាយការណ៍បន្ថែមដោយ Zsombor Peter)
តុលាការកោះហៅអ្នកភូមិដែលជាប់ពាក់ព័ន្ធវិវាទដីធ្លីមកសាកសួរ
អ្នកភូមិជនជាតិដើមភាគតិចព្នង៧នាក់ដែលជាប់ពាក់ព័ន្ធវិវាទដីធ្លីជាមួយក្រុមហ៊ុនចម្ការកៅស៊ូដែលកាន់កាប់ដោយវៀតណាមនៅក្នុងខេត្តមណ្ឌលគិរី ត្រូវសាលាដំបូងខេត្តកោះហៅមកសាកសួរបន្ទាប់ពីក្រុមហ៊ុននេះបានចោទប្រកាន់ពួកគាត់ថា បានកាន់កាប់ដីរបស់ខ្លួនដោយខុសច្បាប់នៅក្នុងស្រុកកែវ សីមា។
អ្នកភូមិជនជាតិដើមភាគតិចព្នងប្រហែល២០០គ្រួសារនៅក្នុងឃុំ ស្រែឈូក អះអាងថា ក្រុមហ៊ុនចម្ការកៅស៊ូ Binh Phuoc...
លោក សម រង្ស៊ី អះអាងថា គណបក្សប្រជាជនកម្ពុជានៅពីក្រោយក្រុមកំណែទម្រង់ “ខ្មែរដើម្បីខ្មែរ”
លោក សម រង្ស៊ី ប្រធានគណបក្សសង្គ្រោះជាតិបានបន្តវាយប្រហារទៅលើក្រុមកំណែទម្រង់"ខ្មែរដើម្បីខ្មែរ" របស់លោក កែម ឡី អ្នកវិភាគនយោបាយកាលពីម្សិលមិញ ដោយថ្លែងទៅកាន់អ្នកគាំទ្រថា ក្រុមនេះគឺជាការបង្កើតឡើងរបស់គណបក្សប្រជាជនកម្ពុជា។
លោក កែម ឡី បានមានប្រសាសន៍ថា ក្រុមរបស់លោកមានគម្រោងជួយអ្នកភូមិបង្កើតគណបក្សដែលមានមូលដ្ឋាននៅក្នុងឃុំសង្កាត់តូចៗប្រហែល២៥នៅដើមឆ្នាំនេះដើម្បីចូលរួមនៅ ក្នុងការបោះឆ្នោត និងពង្រឹងលទ្ធិប្រជាធិបតេយ្យ។
ថ្លែងទៅកាន់អ្នកគាំទ្រក្នុងស្រុកបសេដ្ឋ ខេត្តកំពង់ស្ពី លោក សម រង្ស៊ី បានមានប្រសាសន៍ថា ផែនការនេះនឹងផ្តល់ប្រយោជន៍ដល់គណបក្សប្រជាជនកម្ពុជាតែប៉ុណ្ណោះ។
លោក សម រង្ស៊ី បានមានប្រសាសន៍ថា "នឹងមានជ័យជម្នះលើគណបក្សប្រជាជនកម្ពុជា ប្រសិនបើអ្នកប្រជាធិបតេយ្យ និងអ្នកសេ្នហាជាតិរួបរួមគ្នា។ រយៈពេល៣០ឆ្នាំហើយ ដែលយើងមិនអាចយកឈ្នះគណបក្សប្រជាជនកម្ពុជាបាន ពីព្រោះយើងបានបែកបាក់គ្នា ហើយមានគណបក្សនយោបាយច្រើន"។
លោក សម រង្ស៊ី បានកត់សម្គាល់ថា គណបក្សហ្វុ៊នសិុនបិុច គណបក្ស សម រង្ស៊ី និងគណបក្សសិទ្ធិមនុស្សបានបំបែកសំឡេងប្រឆាំងគណបក្សប្រជាជនកម្ពុជា ដែលធ្វើឲ្យគណបក្សនេះឈ្នះការបោះឆ្នោតជាតិ។
ទោះជាយ៉ាងណា គណបក្សប្រជាជនកម្ពុជាបានប្រឈមការគំរាមកំហែងធ្ងន់ធ្ងរចំពោះភាពលើសលប់របស់ខ្លួនចាប់តាំងពីគណបក្ស សម រង្ស៊ី និងគណបក្សសិទ្ធិមនុស្សបានច្របាច់បញ្ចូលគ្នា បង្កើតជាគណបក្សសង្គ្រោះជាតិក្នុងឆ្នាំ២០១២។
ប្រធានគណបក្សប្រឆាំងរូបនេះបានមានប្រសាសន៍ថា "ឥឡូវនេះកម្លាំងរបស់យើងរួបរួមគ្នាទៅជាគណបក្សតែមួយ ដូច្នេះមានន័យថា មានគណបក្សនយោបាយមួយប្រឆាំងនឹងគណបក្សនយោបាយមួយ។ ឥឡូវនេះគណបក្សប្រជាជនកម្ពុជាដឹងយ៉ាងច្បាស់ថា អ្នកស្នេហាជាតិរួបរួមគ្នា ដូច្នេះគណបក្សប្រជាជនកម្ពុជានឹងចាញ់"។
លោក សម រង្ស៊ី បានមានប្រសាសន៍ថា "ប៉ុន្តែ ពួកគេមិនចង់ចាញ់ទៀតទេ ដូច្នេះតើពួកគេនឹងត្រូវធ្វើអ្វី?។ ល្បិចកលរបស់ពួកគេគឺបង្កើតគណបក្សតូចៗដើម្បីបំបែកសំឡេងឆ្នោតរបស់គណបក្សសង្គ្រោះជាតិ។ គណបក្សតូចៗទាំងនេះដឹងយ៉ាងច្បាស់ថា ពួកគេនឹងមិនទទួលបានអាសនៈសភាឡើយ ប៉ុន្តែ...នឹងបំបែកសំឡេងឆ្នោតរបស់យើង ដើម្បីជួយដល់គណបក្សប្រជាជនកម្ពុជា"។
លោក កែម ឡី បានមានប្រសាសន៍ថា គណបក្សប្រជាជនកម្ពុជាមិនមានតួនាទីណាមួយក្នុងការបង្កើត ឬគាំទ្រក្រុមរបស់លោកឡើយ។
លោកបានមានប្រសាសន៍ថា "ទេ យើងគ្រាន់តែប្រើប្រាស់ធនធានផ្ទាល់របស់យើង និងការរួមចំណែករបស់ពួកយើងផ្ទាល់តែប៉ុណ្ណោះ។ យើងបើកចំហសម្រាប់ក្រុមហ៊ុនសវកម្មឯករាជ្យណាមួយ ឬក្រុមណាមួយដែលចង់សើុបអង្កេតពួកយើង។ យើងបើកចំហ។ យើងកំពុងធ្វើដំណើរក្នុងផ្លូវប្រកបដោយតម្លាភាព និងការទទួលខុសត្រូវ។
លោកបានបន្ថែមថា "នេះមិនមែនជាលើកទី១ទេ ហើយវាមិនមែនត្រឹមតែរូបលោកទេ ក្រុមរបស់លោកតែងតែបន្ទោសអ្នកដែលគ្មានព័ត៌មានផ្អែកលើភ័ស្តុតាង។ ប៉ុន្តែ ខ្ញុំធ្វើការដើម្បីប្រទេសជាតិរបស់ខ្ញុំ មិនមែនសម្រាប់នរណាម្នាក់ឡើយ"៕សារុន (រាយការណ៍បន្ថែមដោយ Alex Willemyns)
នាយករដ្ឋមន្ត្រីលើកសរសើរស្ថានីយវារីអគ្គិសនីថ្មីនៅខេត្តកោះកុង
លោកនាយករដ្ឋមន្ត្រី ហ៊ុន សែន កាលពីថ្ងៃច័ន្ទបានបើកសម្ពោធដាក់ឲ្យប្រើប្រាស់ជាផ្លូវការនូវស្ថានីយវារីអគ្គិសនី ដែលមានកម្លាំង៣៣៨មេហ្គាវ៉ាត់ក្នុងខេត្តកោះកុង និងបានមានប្រសាសន៍ថា វាជាជំហានដ៏សំខាន់មួយឆ្ពោះទៅរកការកាត់បន្ថយតម្លៃអគ្គិសនីក្នុងប្រទេសនេះ។
ថ្លែងទៅកាន់ក្រុមមន្ត្រីរដ្ឋាភិបាលនៅស្រុកមណ្ឌលសីមា៉ ខេត្តកោះកុង លោក...
សម្បទានរបស់រោងចក្រកាត់ដេរនៅតាកែវ បានបញ្ចប់កូដកម្មរយៈពេលពីរថ្ងៃ
កម្មករប្រហែល១.០០០នាក់នៅរោងចក្រកាត់ដេរមួយកន្លែងក្នុងខេត្តតាកែវ ដែលបានធ្វើកូដកម្មតាំងពីថ្ងៃច័ន្ទមក នឹងត្រូវវិលត្រឡប់ចូលធ្វើការវិញនៅថ្ងៃនេះ បន្ទាប់ពីការចរចារវាងតំណាងសហជីព និងរោងចក្របានបញ្ចប់ទៅដោយជោគជ័យកាលពីម្សិលមិញ។
ខណៈកម្មករប្រមូលផ្ដុំគ្នានៅខាងក្រៅទ្វារចូលរោងចក្រ CS Gold Way Textile...
គណបក្សប្រជាជនកម្ពុជាជំរុញឲ្យកាត់បន្ថយរយៈពេលយុទ្ធនាការបោះឆ្នោតពាក់កណ្តាល
ឧបនាយករដ្ឋមន្ត្រី ប៊ិន ឈិន បានមានប្រសាសន៍កាលពីថ្ងៃច័ន្ទថា រយៈពេលធ្វើយុទ្ធនាការបោះឆ្នោតជាផ្លូវការសម្រាប់ការបោះឆ្នោតជាតិ ត្រូវតែកាត់បន្ថយពីរយៈពេល៣០ថ្ងៃមកត្រឹម១៤ថ្ងៃវិញ ដោយការដើរហែតាមផ្លូវអនុញ្ញាតឲ្យធ្វើតែនៅពេលថ្ងៃបើកនិងថ្ងៃបិទប៉ុណ្ណោះ ដើម្បីកាត់បន្ថយការកកស្ទះចរាចរណ៍។
លោក ប៊ិន...
កងរាជអាវុធហត្ថចាប់ខ្លួនប្ដីប្រពន្ធពីរនាក់ពីបទយកកាំបិតគំរាមមន្ត្រីរដ្ឋបាលព្រៃឈើ
ក្រុមមន្ត្រីនិងបុគ្គលិកសិទ្ធិមនុស្សបាននិយាយថា កាលពីម្សិលមិញ កងរាជអាវុធហត្ថខេត្តព្រះវិហារបានចាប់ខ្លួនប្តីប្រពន្ធវ័យកណ្តាលម្នាក់ដែលជាប់ចោទពីបទគំរាមប្រើអំពើហិង្សាមកលើមន្ត្រីរដ្ឋបាលព្រៃឈើជុំវិញដីរដ្ឋដែលមានវិវាទនៅក្នុងស្រុកឆែប។
យោងតាមលោក ឡុង ស៊ីថា ព្រះរាជអាជ្ញាអមសាលាដំបូងខេត្តព្រះវិហារបានឲ្យដឹងថា លោក សន វុទ្ធី អាយុ៤៥ឆ្នាំ និងប្រពន្ធរបស់គាត់ឈ្មោះ លឹម សុឃីម អាយុ៤៣ឆ្នាំ កាលពីថ្ងៃច័ន្ទបានកាន់កាំបិត និងពូថៅប៉ុនប៉ងបំភិតបំភ័យមន្ត្រីខណ្ឌរដ្ឋបាលព្រៃឈើខេត្តព្រះវិហារ ដែលមកចរចាជាមួយពួកគាត់ជុំវិញដីរដ្ឋទំហំ៨៤ហិកតា។
លោក ស៊ីថា...
មន្ត្រីក្រសួងមហាផ្ទៃបានឲ្យដឹងកាលពីម្សិលមិញថា ចំនួនពលរដ្ឋខ្មែរដែលត្រូវបានបាញ់សម្លាប់ពេលឆ្លងកាត់ព្រំដែនទៅកាប់ឈើក្នុងទឹកដីថៃបានធ្លាក់ចុះជាង៦៦ភាគរយកាលពីឆ្នាំមុន ប៉ុន្តែ ចំនួនអ្នករងរបួសវិញបែរជាកើនឡើង។
យោងតាមលោក ហូ សាគុណ ប្រធាននាយកដ្ឋានកណ្តាលនគរបាលការពារព្រំដែននៅក្រសួងមហាផ្ទៃបានឲ្យដឹងថា មនុស្សចំនួន១១នាក់ត្រូវបានបាញ់សម្លាប់ និង៣៤នាក់បានរងរបួសនៅក្នុងហេតុការណ៍បាញ់ប្រហារដាច់ដោយឡែកចំនួន១៦កាលពីឆ្នាំ២០១៤បើធៀបនឹងឆ្នាំ២០១៣វិញគឺមានមនុស្សចំនួន៣៤នាក់ត្រូវបានបាញ់សម្លាប់ និង២៥នាក់បានរងរបួសនៅក្នុងហេតុការណ៍បាញ់ប្រហារចំនួន៣៥លើក។
ឧត្តមសេនីយ៍ឯក សាគុណ បានលើកឡើងថា ហេតុការណ៍បាញ់ប្រហារភាគច្រើនបានកើតឡើងនៅក្នុងទឹកដីថៃក្បែរព្រំដែនខេត្តឧត្តរមានជ័យ និងខេត្តព្រះវិហារជាកន្លែងដែលសម្បូរដោយឈើគ្រញូង។
លោកបានមានប្រសាសន៍ថា "មានតែតំបន់ក្បែរព្រំដែននៅក្នុងខេត្តចំនួនបី គឺខេត្តបន្ទាយមានជ័យ បាត់ដំបង និងខេត្តប៉ៃលិនទេដែលការបាញ់ប្រហារកម្រកើតឡើង"។
និន្នាការបាញ់ប្រហារពីសំណាក់ទាហានថៃលើអ្នកកាប់ឈើជនជាតិខ្មែរដែលបានឆ្លងកាត់ព្រំដែនដោយខុសច្បាប់ គឺជាមូលហេតុដែលធ្វើឲ្យទំនាក់ទំនងក្បែរព្រំដែនមានភាពរកាំរកូសអស់រយៈពេលជាច្រើនឆ្នាំមកហើយ។
នៅក្នុងកិច្ចប្រជុំមួយចំនួន មន្ត្រីរដ្ឋាភិបាលកម្ពុជាបានទទូចម្តងហើយម្តងទៀតឲ្យសមភាគីថៃដោះស្រាយបញ្ហានេះ ហើយធានាថា ទាហានថៃធ្វើការចាប់ខ្លួនជាជាងបាញ់ប្រហារលើអ្នកកាប់ឈើ។
កាលពីខែមីនា ឯកអគ្គរាជទូតថៃប្រចាំកម្ពុជាត្រូវបានកោះហៅជាផ្លូវការឲ្យទៅកាន់ក្រសួងការបរទេសដើម្បីបំភ្លឺអំពីការបាញ់ស្លាប់បុរសម្នាក់ដែលបានឆ្លងកាត់ព្រំដែនទៅរកឈើ។ ក្រសួងការបរទេសក៏បានផ្ញើលិខិតដែលមានប្រើពាក្យធ្ងន់ៗទៅកាន់ស្ថានទូតថៃផងដែរកាលពីខែធ្នូ ជុំវិញហេតុការណ៍ដ៏សាហាវមួយ ដែលស្ត្រីម្នាក់ត្រូវបានបាញ់សម្លាប់ពេលឆ្លងកាត់ព្រំដែនទៅដកផ្សិត។
ថ្វីបើចំនួនអ្នកស្លាប់ ដែលត្រូវបានកត់ត្រាដោយមន្ត្រីរដ្ឋាភិបាលបានធ្លាក់ចុះក៏ដោយ តែអង្គការសិទ្ធិមនុស្សអាដហុក ដែលក៏ឃ្លាំមើលការបាញ់ប្រហារនៅតាមព្រំដែនដែរនោះបានលើកឡើងថា តួលេខរបស់នគរបាលអំពីការបាញ់សម្លាប់ពលរដ្ឋខ្មែរនេះ គឺវាទំនងជាទាបខ្លាំងណាស់។
លោក នី ចរិយា ប្រធានក្រុមឃ្លាំមើលរបស់អង្គការអាដហុកបានលើកឡើងថា អ្នកឃ្លាំមើលបានរកឃើញថាមានមនុស្សចំនួន២៦នាក់ត្រូវបានបាញ់សម្លាប់ និង១៨នាក់រងរបួសកាលពីឆ្នាំ២០១៤។ លោក នី ចរិយា បានលើកឡើងទៀតថា លោកជឿជាក់ថា នគរបាលមូលដ្ឋានជូនកាលមិនបានរាយការណ៍អំពីការស្លាប់នៅតាមព្រំដែនទៅក្រសួងមហាផ្ទៃឡើយ។ ទោះជាយ៉ាងណា លោកបានគូសបញ្ជាក់ថា តួលេខនៃអ្នករងរបួសដែលអង្គការអាដហុកទទួលបានប្រហែលជាមានការធ្លាក់ចុះ ព្រោះថា អ្នកកាប់ឈើដែលរងរបួសត្រូវគេដាក់សម្ពាធមិនឲ្យរាយការណ៍អំពីហេតុការណ៍ទាំងនេះទៅអង្គការសិទ្ធិមនុស្ស។ លោកបានមានប្រសាសន៍ថា "ភារកិច្ចរបស់យើង និងភារកិច្ចរបស់នគរបាលគឺខុសគ្នា"។
លោក ស្រី ណារ៉េន អ្នកឃ្លាំមើលរបស់អង្គការអាដហុកប្រចាំខេត្តឧត្តរមានជ័យបានលើកឡើងថា ការឃ្លាំមើលជួបការលំបាកកាន់តែខ្លាំងឡើងៗ ព្រោះឈ្មួញឈើដែលជួញដូរឈើគ្រញូងភាគច្រើនឈប់ជួលអ្នកកាប់ឈើក្នុងមូលដ្ឋានទៀតហើយ ហើយបានជួលយុវជនពីខេត្តផ្សេងៗជំនួសវិញដើម្បីមកធ្វើការងារដ៏គ្រោះថ្នាក់នេះ។
លោកបានពន្យល់ថា "ឈ្មួញរកស៊ីឈើគ្រញូងបានប្តូរវិធីសាស្ត្ររបស់ខ្លួនដោយជួលមនុស្សដែលនៅក្រៅខេត្តឧត្តរមានជ័យឲ្យមកកាប់ឈើគ្រញូងនៅក្នុងព្រៃដឹកដីថៃ ហេតុដូច្នេះ ប្រសិនបើទាហានថៃបាញ់ប្រហារ ហើយពួកគេស្លាប់នៅក្នុងព្រៃនោះ អ៊ីចឹងសាច់ញាត្តិរបស់អ្នកកាប់ឈើទាំងនោះនឹងមិនមករកពួកគេឡើយ ហើយយើងមិនអាចទទួលបានសេចក្តីរាយការណ៍នោះទេ"។
លោក ណារ៉េន បានលើកឡើងទៀតថា លោកគិតថា ប្រហែលជាមានអ្នកកាប់ឈើដែលស្លាប់ និងបាត់ខ្លួនច្រើនជាងនេះ ហើយសាច់ញាត្តិរបស់ពួកគេនៅមិនទាន់ដឹងថា ពួកគេបាត់ខ្លួននៅឡើយទេ។
លោកបានមានប្រសាសន៍បន្ថែមថា "អ្នកកាប់ឈើគ្រញូងនៅតែលួចចូលទៅក្នុងព្រៃទឹកដីថៃ ហើយការជួញដូរឈើគ្រញូងនៅតែមានច្រើនដដែលនៅក្នុងខេត្តឧត្តរមានជ័យ"៕ស៊ុយឈាង